1 Ua Tusia le Suafa o le Atua i Tusitusiga Paia Eperu ma Tusitusiga Paia Eleni

O le taimi muamua o loo taʻua ai le suafa o “Ieova” (faa-Eperu, יהוה, YHWH), o loo i le Kenese 2:4. O lea suafa o se veape Eperu, הוה (ha·wahʹ, “e avea”), o lona uiga e gaoioi pea. O lea la, o le uiga o le suafa o Ieova, “E Gaoioi o Ia e Tusa ai ma Tulaga Manaʻomia.” Ua faaalia mai ai o Ieova, o ia Lē e galue pea e faataunuuina folafolaga, o Lē e faataunuuina pea lona finagalo.

Ua sili ona lē migao tagata faaliliu i aso nei i Lē e Ana le Tusi Paia, ona ua latou aveesea pe natia lona suafa faapitoa. Ae o le mea moni, e 6,828 taimi ua tusia ai lona suafa i tusitusiga Eperu e faapea, יהוה (YHWH po o JHVH), ua masani ona taʻua o le Tetakalamatone (o lona uiga “e fā ona mataʻitusi”). O lo matou faaaogāina o le suafa o “Ieova,” ua faaalia ai lo matou mulimuli i tusitusiga mai i uluaʻi gagana ae lē o faiga e masani ai, o le sui lea o le suafa o Ieova po o mataʻitusi Eperu e fā i le taʻu “Alii,” “le Alii,” “Adonai” (Alii), po o le “Atua.”

E 6,973 taimi ua tusia ai le suafa o “Ieova” i Tusitusiga Eperu o le Faaliliuga a le Lalolagi Fou. E 6,828 taimi ua tusia ai mataʻitusi Eperu e fā i tusitusiga Eperu, e aofia ai ma isi auala e tolu o loo tusia ai le suafa o Ieova (Kenese 22:14; Esoto 17:15; Faamasino 6:24) ma taimi e ono o loo tusia ai i ulutala o Salamo (7:sup; 18:sup [3 taimi]; Sl 36:sup; 102:sup). Ua matou faaliliuina mataʻitusi Eperu e fā iā “Ieova” i taimi uma e 6,828 seʻi vaganā ai le Faamasino 19:​18, o loo iai le suinauna “loʻu” ae lē o le suafa o Ieova le Atua. E lē gata i lea, e tusa ai ma le Septuagint, ua matou toe tuu mataʻitusi Eperu e fā i le Teuteronome 30:16; 2 Samuelu 15:20 and 2 Nofoaiga a Tupu 3:1. Ua matou toe faaaogāina foʻi le suafa o le Atua i le Isaia 34:16 ma le Sakaria 6:8 lea e tatau ona iai “Ieova,” ae lē o suinauna o “oʻu” po o “loʻu.” I vaega ua sui ai e le ʻautusiupu Soferete (Sopherim) le suafa o le Atua i le ʼAdho·naiʹ (Alii) po o ʼElo·himʹ (Atua), e 141 taimi ua matou toe tuuina i ai le suafa o Ieova.

Ina ia ʻalofia le faaliliuina e tusa ma manatu o tagata, sa matou faia ni iloiloga māeʻaeʻa i Tusitusiga Eperu ma na matou faaeteete ina ia filifili lelei e tusa o le faaaogāina o le suafa o le Atua i Tusitusiga Eleni. Na matou saʻiliʻili lelei i Tusitusiga Eperu o loo iai o Tusitusiga Eleni e faamaonia ai la matou faaliliuga.

Na faaaogā mataʻitusi Eperu e fā (יהוה) i tusitusiga Eperu, faapea ma le Tusi Paia Eleni o le Septuagint. O lea la, ina ua faitauina e Iesu ma ona soo Tusitusiga Paia i le gagana Eperu faapea ma le gagana Eleni, e latou te maua ai le suafa o Ieova. I le sunako i Nasareta, na tulaʻi Iesu ma faitau le Isaia 61:​1, 2 o loo iai mataʻitusi Eperu e fā, ma sa ia taʻua ai le suafa o Ieova. Ua ōgatusa lea ma lona faanaunauga ia faalauiloa le suafa o Ieova, e pei ona faaalia i lana tatalo i lona Tamā: “Ua ou faailoa atu lou suafa i tagata ua e foaʻi mai iā te aʻu i le lalolagi. . . . Ua ou faailoa atu lou suafa iā i latou, ma saga faailoa atu.”​—Ioane 17:​6, 26.

E 237 taimi ua matou faaaogā ai le suafa o Ieova i la matou faaliliuga o Tusitusiga Eleni. O taimi uma nei e 237, o loo faamaonia mai i tusitusiga Eperu eseese.