Tusi o le Tusi Paia Numera 20—Faataoto

O Ē Ana Faamatalaga: Solomona, Akuru, Lemueli

Nofoaga na Tusia Ai: Ierusalema

Māeʻa Ona Tusia: Pe tusa o le 717 T.L.M.

1. O le ā le atamai lea e mafai ona maua i le tusi o Faataoto?

INA ua avea Solomona, le atalii o Tavita, ma tupu o Isaraelu i le 1037 T.L.M., sa ia tatalo atu ia Ieova mo le “poto ma le atamai” ina ia ‘faamasinoina le nuu nei ua tele.’ I le tali mai, sa avatu ia te ia e Ieova le ‘poto ma le atamai ma le loto matala.’ (2 No. 1:10-12; 1 Tu. 3:12; 4:30, 31) O le mea na iʻu i ai, e faatatau ia Solomona o “faataoto na ia faia e tolu afe ia.” (1 Tu. 4:32) O se vaega o lenei atamai ua faagaganaina, o loo tusia i le tusi o le Tusi Paia o Faataoto. Talu ai o lona atamai o se mea moni lava “na tuuina e le Atua i lona loto,” o lo tatou suʻesuʻeina la o le Faataoto o le mea moni lava ia ua tatou suʻesuʻeina le atamai o Ieova le Atua. (1 Tu. 10:23, 24) O loo taaofaʻi mai e nei faataoto ia upu moni e tumau e faavavau. O loo tumau lo latou aogā talafeagai mai lava i le taimi na tusia ai e oo mai i le taimi nei.

2. Aiseā na avea ai le taimi o Solomona ma taimi e talafeagai ai le mauaina o le taʻitaʻiga tauatua o loo i le Faataoto?

² O le nofoaiga a Solomona o se taimi talafeagai lelei lea mo le mauaina o lenei taʻitaʻiga tauatua. Sa taʻua Solomona e faapea sa “tietie . . . i le nofoālii o Ieova.” Sa matuā sili ona lelei le tulaga na iai le malo faatiokarate o Isaraelu na i lo se isi lava taimi, ma sa faamamaluina Solomona i le faateleina o lona “malualii.” (1 No. 29:23, 25) O se taimi o le filemu ma le mau, o se taimi o le saogalemu. (1 Tu. 4:20-25) Peitaʻi, e ui lava ina ola ai i lena pulega faatiokarate, ae sa iai pea faafitauli totino o tagata ma mea faigatā ona o le lē lelei atoatoa faaletagata. Ua manino ai la i le māfuaaga na ō mai ai tagata ia Solomona le Tupu atamai mo se fesoasoani i le foʻiaina o o latou faafitauli. (1 Tu. 3:16-28) A o ia faia faaiʻuga i nei mea na faamasinoina, sa ia taʻu atu faamatalaga faafaataoto e fetaui ma le tele o mea tutupu o le olaga i lea aso ma lea aso. O nei faamatalaga pupuu ae e uunaʻia ai, sa matuā faatāuaina e i latou o ē sa faanaunau ina ia faatulaga o latou olaga ia talafeagai ma le finagalo o le Atua.

3. Na faapefea ona aoaoina ma tuufaatasia le Faataoto?

³ E lē o taʻu maia i faamaumauga faapea o Solomona na tusia le Faataoto. Peitaʻi, o loo faapea mai sa ia “faia [tautala i]” faataoto, e lē gata i lena “na ia . . . suesue, ma saunia faataoto e tele,” ua taʻu mai ai sa iai sona faanaunauga e faasaoina mai faataoto e faaaogā i se taimi mulimuli. (1 Tu. 4:32; Fai. 12:9) I taimi o Tavita ma Solomona, sa iai tusiupu tofia i lisi o ē sa auauna i le maota o le tupu. (2 Samu. 20:25; 2 Tu. 12:10) Tatou te lē o mautinoa, pe o tusiupu nei sa i lona maota na tusia ma aoaoina ana faataoto, peitaʻi o faamatalaga a so o se tupu maualuga e pei o ia e matuā faatāuaina lava ma e masani lava ona faamaumauina. E ioe le toʻatele e faapea o le tusi sa aoao mai ma tuufaatasia mai i isi tusitusiga ua uma ona tuufaatasia.

4. (a) O ā vaega e masani ona vaevaeina ai le tusi o Faataoto? (e) O ai na amataina le tele o faataoto?

⁴ E mafai ona vaevaeina le tusi o Faataoto i vaega e lima. O vaega nei: (1) Mataupu 1-9, e amata i upu “O faataoto a Solomona le atalii o Tavita”; (2) Mataupu 10-24, o loo faamatalaina e faapea “O faataoto a Solomona”; (3) Mataupu 25-29, o lenei vaega e amata faapea: “O faataoto foi nei a Solomona, na siitia mai e tagata o Esekia le tupu o Iuta”; (4) Mataupu 30, e amata faapenei “O upu a Akuru le atalii o Iake”; ma le (5) Mataupu 31, lea e aofia ai “O upu a Lemueli le tupu, o le valoaga na aʻoaʻoina ai o ia e lona tina.” O Solomona la na amataina le tele o faataoto. E faatatau ia Akuru ma Lemueli, e leai ni faamaoniga maʻoti e iloa ai po o ai i laʻua. E manatu nisi tagata faitōfā e faapea o Lemueli atonu o se isi igoa lea o Solomona.

5. O anafea na tusia ma tuufaatasia ai le Faataoto?

⁵ O anafea na tusia ma tuufaatasia ai le Faataoto? O le vaega tele lava e lē taumatea na tusia i le taimi o le nofoaiga a Solomona (1037-998 T.L.M.) a o lumanaʻi lona liliu ese. Ona o le lē mautinoa lelei po o ai moni lava ia Akuru ma Lemueli, e lē o mautinoa la le vaitaimi tonu na tusia ai a la faamatalaga. Talu ai o se tasi o tuufaatasiga sa faia i le nofoaiga a Esekia (745-717 T.L.M.), e lē mafai foʻi la ona faapea o le aoaoina mulimuli o faamatalaga na faia a o lumanaʻi lana nofoaiga. Pe sa aoaoina foʻi la faamatalaga o loo i vaega mulimuli e lua i lalo o le vaavaaiga a le tupu o Esekia? I le taliina o lenei fesili o loo iai se faaopoopoga i le pito i lalo e faamalamalama ai i le Faataoto 31:31 i le New World Translation of the Holy Scriptures—With References e faapea: “O nisi tusi[tusiga] o le mau i le gagana Epe[ru] o loo faaalia ai le trigrammaton, po o mataʻitusi e tolu, Chehth, Zaʹyin, Qohph (חזק) lea e avea ma saini a le tupu o Esekia i kopi tusitusia sa fai e ana tusiupu ina ia faaalia ai ua māeʻa le galuega.”

6. O le ā le faataoto, ma aiseā e fetaui lelei ai le igoa Eperu o le tusi?

⁶ I Tusi Paia Eperu sa muaʻi taʻua le tusi i le upu amata o le tusi, mish·lehʹ, o lona uiga “o faataoto.” O le mish·lehʹ e i le numera tele, i le tulaga faakalama o le fausaga, o le nauna Eperu ma·shalʹ, o le nauna lenei e manatu i ai le toʻatele e sau mai le upu autū o lona uiga “e faapei” po o le “talitutusa.” O nei faaupuga ua talafeagai lelei ona faamatalaina ai mea o loo aofia ai i le tusi, auā o faataoto o ni faaupuga pupuu e loloto ma uigā lea e masani ona faaaogā se mea e uiga talitutusa po o se faatusatusaga, ma e fuafua ina ia uunaʻia ai le tagata faalogologo e mafaufau. O le pupuu o faataoto e faigofie ai ona mulimuli ai ma faaoso naunau, ma o le faia faapea ua faigofie ai ona aʻoaʻo atu, aʻoaʻoina, ma manatua. Ua ave i fale le manatu.

7. O le ā e ao ona mātauina e faatatau i le auala o loo tusia ai le Faataoto?

⁷ O le auala o loo faatulaga ai faaupuga i le tusi e matuā faaoso naunau foʻi. O loo faia i le auala faa-Eperu e fai ai faaupuga faafatusolo. O le faatulagaga o le tele o le tusi o loo aofia ai solo e tai uiga tutusa. E lē o le uiga o lenei mea faapea e faatutusa faaleoga o faaiʻuga o laina po o fuaiupu. O loo aofia ai laina e ōgatusa le faaupuga o loo paralela i manatu. O lona matagofie atoa ma le malosi o ona aʻoaʻoga, o loo iai lea i lenei faaupuina ōgatusa o manatu. E mafai i manatu ona uiga tutusa po o le tuufaafeagai foʻi, ae o loo iai i faaupuga paralela le malosi ina ia faamatala atili ai le manatu, ina ia faalautele le manatu, ma faamautinoa ua maua le uiga saʻo o le manatu. O faaaʻoaʻoga o le faaparalela o uiga tutusa o loo maua i le Faataoto 11:25; 16:18; ma le 18:15, atoa ai ma faaaʻoaʻoga o le anoanoaʻi o faaeseesega faafeagai o le paralela o loo i le Faataoto 10:7, 30; 12:25; 13:25; ma le 15:8. O le isi ituaiga faatulagaga o loo maua i le faaiʻuga lava o le tusi. (Faata. 31:10-31) O fuaiupu e 22 iinā o loo faatulaga e tusa ai ma le faa-Eperu e amata fuaiupu taʻitasi i le mataʻitusi e sosoo ai o le alafapeta faa-Eperu, o le faiga faasolosolo (acrostic) lenei o loo faaaogāina foʻi i le tele o salamo. O le matagofie o lenei faiga e leai ni tusitusiga anamua e tutusa ma lona faiga.

8. E faapefea i le auala sa faaaogā ai e uluaʻi Kerisiano le Faataoto ona molimau i lona moni aʻiaʻi?

⁸ E faaalia foʻi le moni aʻiaʻi o le Faataoto i le tele sa faaaogāina ai le tusi e uluaʻi Kerisiano i le faatulagaina o tulafono tau amio. E foliga mai sa masani lelei Iakopo i le Faataoto lea na ia faaaogā ai ona mataupu silisili faavae i le fautuaga lelei na ia avatu mo amioga Kerisiano. (Faatusatusa i le Faataoto 14:29; 17:27 ma le Iakopo 1:19, 20; Faataoto 3:34 ma le Iakopo 4:6; Faataoto 27:1 ma le Iakopo 4:13, 14.) O loo maua foʻi manatu sii saʻo mai i le Faataoto i tusi o loo mulimuli mai: Roma 12:20—Faataoto 25:21, 22; Eperu 12:5, 6—Faataoto 3:11, 12; 2 Peteru 2:22—Faataoto 26:11.

9. E faapefea ona ōgatusa le Faataoto ma le isi vaega atoa o le Tusi Paia?

⁹ E faaopoopo atu i lena, ua faaalia e le Faataoto lava ia lona ōgatusa ma le isi vaega atoa o le Tusi Paia, ua faamaonia ai o se vaega o “Tusi Paia uma.” O loo faaalia matilatila ai le autasi o manatu pe a faatusatusa ma le Tulafono a Mose, o aʻoaʻoga a Iesu, atoa ma tusitusiga a soo ma aposetolo o Iesu. (Tagaʻi i le Faataoto 10:16—1 Korinito 15:58 ma le Kalatia 6:8, 9; Faataoto 12:25—Mataio 6:25; Faataoto 20:20—Esoto 20:12 ma le Mataio 15:4.) E oo lava i le talanoaina o manatu e faatatau i le saunia o le lalolagi mo le nonofo ai o tagata, e autasi lelei manatu ma isi tusitala o le Tusi Paia.—Faata. 3:19, 20; Kene. 1:6, 7; Iopu 38:4-11; Sala. 104:5-9.

10, 11. O ā nisi mea e faamaonia ai le faagaeeina tauatua o le tusi?

¹⁰ E faamaonia foʻi le faagaeeina tauatua o le tusi i lona saʻo aʻiaʻi i faamatalaga faasaienisi, tusa lava pe tautala le faataoto i mataupu silisili tau vailaau, faafomaʻi, po o le soifua mālōlōina. E foliga o loo taʻu mai e le Faataoto 25:20 ia āuga o le tuufaatasi o le oona (acid) ma le neteri (alkali). E ioe le Faataoto 31:4, 5 i mea ua maua i suʻesuʻega faasaienisi i ona pō nei e faapea e faaitiitia e le ʻava malosi le tomai e mafaufau ai. E toʻatele fomaʻi ma tagata popoto faapitoa i taumafa talafeagai e ioe o le meli o se taumafa e lelei mo le soifua mālōlōina, ua manatua ai le faataoto lea e faapea mai: “Loʻu atalii e, ia e ʻai i le meli, auā e lelei.” (Faata. 24:13) O mea ua mafai ona iloa i suʻesuʻega i ona pō nei tau i le auala e aafia ai le tino i le mafaufau ma le faalogona, e lē fou i le Faataoto. “O le loto fiafia, e fai ma vailaau aoga lea.”—17:22; 15:17.

¹¹ O le mea moni lava ia, e matuā atoatoa lelei ona faamatalaina e le tusi o Faataoto ia tulaga uma ma manaʻoga faaletagata lea na taʻua ai i se tasi tagata poto faapitoa e faapea: “E leai se faiā i le olaga o aunoa ma sona faatonuga talafeagai, e leai se faanaunauga lelei pe leaga e aunoa ma se uunaʻiga tonu po o se faasaʻoga tonu. O le malamalamaga faaletagata ua aumaia ai i se fesootaʻiga vavalalata ma le Atua i so o se mea lava, . . . ma o loo savali le tagata e pei lava o loo i luma o Lē na Faia ma Faamasinoina o ia . . . O aga faaletagata uma lava e maua i le tusi anamua lenei; ma e ui lava sa saunia i le tolu afe tausaga talu ai, o loo tumau pea le moni i lona uiga e pei lava o loo soifua mai i latou na saunia.”—Smith’s Dictionary of the Bible, 1890, Tusi III, itulau 2616.

LE POGAI E AOGĀ AI

19. E faapefea ona faalauiloa e le Faataoto lava ia lona fuafuaga aogā?

¹⁹ O loo taʻua lava i fuaiupu amata o le Faataoto lona fuafuaga aogā: “Ina ia iloa ai le poto ma ia aʻoaʻoina; ia lagona ai upu e atamai [“malamalama,” NW] ai; ia maua ai le aʻoaʻoina i le poto, ma le amiotonu, ma le faamasinoga, ma le amio saʻo; ia avatu ai le faautauta i e faigofie; o le poto ma le mafaufau i le taulealea.” (1:2-4) Ina ia ōgatusa ma lena fuafuaga e pei ona taʻua, o loo faamatilatila i le tusi le poto, le atamai, ma le malamalama, e taufai patino uma auala e aogā ai nei mea.

20. O le ā o fai mai ai le Faataoto e uiga i le poto?

²⁰ (1) O le poto e matuā manaʻomia lava e le tagata, auā e lē lelei i le tagata pe a aunoa ma lea. E lē taitai mafai ona maua e se tasi le poto saʻo e aunoa ma le mataʻu ia Ieova, auā o le mataʻu lena e amata ai le poto. E sili atu ona manaʻomia le poto na i lo le auro lelei. Aiseā? E mafai e le poto ona laveaʻia le amiotonu; na te taofia i tatou mai le faataalise e fai le agasala. Maʻeu la le manaʻomia ona tatou saʻilia o le poto, ma ia ave i fale! E matuā tautele lava. O lea la “uai mai ia ou taliga, ma e faalogo mai i upu a e popoto; ma ia e matuā mafaufau i loʻu poto.”—22:17; 1:7; 8:10; 11:9; 18:15; 19:2; 20:15.

21. O le ā le aʻoaʻoga tauatua e faatatau i le atamai?

²¹ (2) O le atamai, o le tomai lea e faaaogā saʻo le poto mo le viiga o Ieova, “o le mea sili lea.” Ia maua. O Ieova e puna mai ai. O le atamai lea e maua ai le ola e amata mai i le iloaina ma mataʻu ia Ieova le Atua—o le ala sili lena e maua ai le atamai. O lea la ia mataʻu i le Atua, ae lē o tagata. I le pei o se tagata ua avatu ai e le atamai se faasilasilaga, e uunaʻia ai tagata uma ina ia faaleleia o latou ala. O loo alaga leotele le atamai i magaala. O loo valaau atu Ieova ia i latou uma e leai se poto masani atoa ma i latou e faigofie pe e leai ni mafaufau ina ia liliu mai ma fafagaina i latou i le meaʻai o le atamai. Ma, ona o le matataʻu ia Ieova, o le a latou fiafia e tusa lava pe itiiti mea o ia i latou. E anoanoaʻi faamanuiaga o le iai o le atamai; o ona āuga e matuā aogā lava. O le atamai ma le poto—o mea autū muamua ia mo le tomai faalemafaufau, le ituaiga lea e mafai ona puipuia i tatou. E faapei lava ona aogā ma lelei le meli, e faapena le atamai. E sili lona aogā na i lo le auro; o se laau o le ola. E fano tagata e aunoa ma le atamai, auā e faasaoina e le atamai le ola; e maua ai le ola.—4:7; 1:7, 20-23; 2:6, 7, 10, 11; 3:13-18, 21-26; 8:1-36; 9:1-6, 10; 10:8; 13:14; 15:16, 24; 16:16, 20-24; 24:13, 14.

22. O le ā le puipuiga e mafai ona maua i le iai o le malamalama?

²² (3) E ese mai i le poto ma le atamai, e matuā tāua foʻi le malamalama; o lea la, “o mea uma e te maua ia maua mai ai le malamalama.” (NW ) O le malamalama o le tomai lea e tagaʻi ai i se mea i ona vaega uma e fesootaʻi i ai; o lona uiga ia faautauta, ia manatua le Atua i taimi uma, auā e lē mafai e le tagata ona faalagolago i lona lava malamalamaga. Pagā le matuā lē mafai ona maua o le malamalamaga po o le faautauta pe afai e galue se tasi e tetee ia Ieova! Ina ia avea ma a tatou mea totino, e ao ona tatou matuā saʻilia le malamalama e pei o se oloa lilo. Ina ia malamalama, e ao ona tatou maua le poto. O le saʻiliga a le tagata malamalama ina ia maua le poto e tauia, ma o loo i ona luma le atamai. E puipuia ai o ia mai i le anoanoaʻi o mailei a lenei lalolagi, e pei o le lē mafaitaulia o tagata leaga o ē e ono taumafai e maileia se tasi e savavali ma i latou i le ala o le pouliuli. E faafetaia Ieova le Atua—le Puna o le poto, le atamai, ma le malamalama, o mea ia e ola ai!—4:7; 2:3, 4; 3:5; 15:14; 17:24; 19:8; 21:30.

23. O ā ituaiga fautuaga atamai o le a sosoo ai nei ona talanoaina?

²³ Ina ia ōgatusa ma le fuafuaga aogā o le Faataoto, o loo aumaia i le tusi le tele o fautuaga atamai ma faagaeeina e fesoasoani ia i tatou ina ia maua le malamalama ma ia leoleoina ai le loto, “aua e tupu mai ai le amio [“puna o le ola,” NW].” (4:23) O le faasologa lenei o nisi fautuaga atamai o loo faamamafaina i le tusi atoa lava.

24. O le ā o taʻua e faatatau i ē amioleaga ma ē amiotonu?

²⁴ E tuufaafeagai ē amioleaga ma ē amiotonu: E maua le tagata amioleaga i ona ala leaga, ma e lē mafai e ana oloa ona laveaʻiina lona ola i le aso o le toʻasa. O le tagata amiotonu o loo i le ala mo le ola ma o le a tauia e Ieova.—2:21, 22; 10:6, 7, 9, 24, 25, 27-32; 11:3-7, 18-21, 23, 30, 31; 12:2, 3, 7, 28; 13:6, 9; 14:2, 11; 15:3, 8, 29; 29:16.

25. O faapefea ona lapataʻi mai le Faataoto faasaga i amioga lē tatau faaleituaiga?

²⁵ O le manaʻoga mo amioga mamā: Ua fautua mai pea lava pea ia Solomona faasaga i amioga lē tatau faaleituaiga. O tagata mulilulua o le a oo i ai mala faapena foʻi le faalumaina, ma e lē mavae atu lo latou faalumaina. Atonu e foliga mai i se talavou e suamalie le “vai ua gaoia,” peitaʻi o loo alu ifo le fafine talitane i le oti ma avatu faatasi ai ma i latou e leai se poto masani ua aafia ia te ia. O i latou ua aafia loloto i amioga lē tatau faaleituaiga e taʻusalaina e Ieova.—2:16-19; 5:1-23; 6:20-35; 7:4-27; 9:13-18; 22:14; 23:27, 28.

26. O le ā o fai mai ai e faatatau i le pulea totino?

²⁶ Le manaʻoga mo le pulea totino: O loo taʻusalaina ai le onā ma le ʻai tele. O i latou uma e mananaʻo i le faamaoniga a le Atua e ao ona faatino le fuafua lelei i le ʻai ma le inu. (20:1; 21:17; 23:21, 29-35; 25:16; 31:4, 5) O i latou e faagesegese ona ita e telē lo latou faautauta ma e sili atu i se tagata malosi na te aʻea se aai. (14:17, 29; 15:1, 18; 16:32; 19:11; 25:15, 28; 29:11, 22) E manaʻomia foʻi le pulea totino ina ia ʻalofia ai le matauʻa ma le fuā, lea e pala ai ivi o se tasi.—14:30; 24:1; 27:4; 28:22.

27. (a) O le ā lenei mea o le faaaogāina ma le lē atamai o le tautala? (e) Aiseā e matuā tāua ai le faaaogā ma le atamai o o tatou laugutu ma laulaufaiva?

²⁷ Le faaaogāina ma le atamai ma le lē atamai o le tautala: O le tautala faapiʻopiʻo, le faitala taufaaleaga, le molimau pepelo, atoa ma le taufaasesē o le a faaalia, auā e inosia ia e Ieova. (4:24; 6:16-19; 11:13; 12:17, 22; 14:5, 25; 17:4; 19:5, 9; 20:17; 24:28; 25:18) Afai e tautala le gutu o se tasi i mea lelei, e faapogaia ai le ola; ae o le gutu o le tagata valea e faapogaia ai lona faaleagaina. “O le oti ma le ola, o loo i le pule a le laulaufaiva ia; o e mananao i ai latou te aai i lona fua.” (18:21) O loo taʻusalaina ai le taufaaleaga, tautala faagutugutulua, faaʻoleʻole, ma le soona tautala. O se ala atamai le tautala faamaoni, ina ia faamamaluina ai le Atua.—10:11, 13, 14; 12:13, 14, 18, 19; 13:3; 14:3; 16:27-30; 17:27, 28; 18:6-8, 20; 26:28; 29:20; 31:26.

28. O le ā le faaleagaina e aumaia e le faamaualuga, ae o ā aogā e aumaia e le lotomaulalo?

²⁸ O le valea o le faamaualuga ma le manaʻoga ia lotomaulalo: O le tagata faamaualuga e faamaualugaina e ia ia lava i le maualuga e lē o ia te ia, o le iʻuga la, e paʻū. O le lotofaamaualuga e inosia e Ieova, peitaʻi na te tuuina atu i ē faamaulalo le atamai, le mamalu, le tamaoaiga, ma le ola.—3:7; 11:2; 12:9; 13:10; 15:33; 16:5, 18, 19; 18:12; 21:4; 22:4; 26:12; 28:25, 26; 29:23.

29. E ao faapefea ona manatu i le paiē, ma o le ā le tāua o le filigā?

²⁹ Filigā, ae lē o le augatā: E tele tulaga o loo faamatalaina ai le tagata paiē. E tatau ona alu atu i le loi mo se lesona ina ia poto ai. Peitaʻi ane, o le tagata filigā—e faatamaoaigaina o ia!—1:32; 6:6-11; 10:4, 5, 26; 12:24; 13:4; 15:19; 18:9; 19:15, 24; 20:4, 13; 21:25, 26; 22:13; 24:30-34; 26:13-16; 31:24, 25.

30. O faapefea ona faamamafa mai e le Faataoto ia aumea saʻo?

³⁰ Aumea saʻo: O se mea valea le aumea ma i latou e lē matataʻu ia Ieova, ma i latou e amioleaga po o ē amio vālea, o tagata e lotoa, faitatala, po o ē ʻai tetele. Na i lo lena, auau faatasi ma tagata atamamai, ona e atili atamai ai lea.—1:10-19; 4:14-19; 13:20; 14:7; 20:19; 22:24, 25; 28:7.

31. O le ā le fautuaga atamai e faatatau i aʻoaʻiga?

³¹ Manaʻoga mo le aʻoaʻiga ma le faasaʻoga: “O le ua alofagia e Ieova, e aoaiina o ia e ia,” ma o i latou e uaʻi atu i lenei aʻoaʻiga o loo latou i le ala i le faamamaluina ma le ola. O le tagata e ʻinoʻino i le aʻoaʻiga e oo mai ai le faalumaina.—3:11, 12; 10:17; 12:1; 13:18; 15:5, 31-33; 17:10; 19:25; 29:1.

32. O ā apoapoaʻiga lelei e faatatau i le avea ma avā lelei?

³² Fautuaga i auala e avea ai ma avā lelei: O loo lapataʻi mai e lē aunoa le Faataoto faasaga i se avā e finauvale ma gaoioi i mea e masiasi ai. O le avā e faautauta, agavaa ma mataʻu i le Atua o loo iai le tulafono o le alofa agalelei i lona laulaufaiva; so o se tasi na te maua lea ituaiga o avā ua maua e ia le mea lelei mai ia Ieova.—12:4; 18:22; 19:13, 14; 21:9, 19; 27:15, 16; 31:10-31.

33. O le ā le fautuaga aogā o loo aumaia e faatatau i le toleniina o fanau?

³³ Le tausia aʻe o fanau: Ia aʻoaʻo i latou e lē aunoa i poloaʻiga a le Atua ina ia “aua neʻi galo.” Ia tausia aʻe i latou i aʻoaʻoga a Ieova mai lava o tama meamea. Aua le taofia le sasa pe afai ua manaʻomia; i le avea o se auala e faaalia ai le alofa, o le sasa ma le aʻoaʻiga e atamai ai le tamaitiiti. O i latou e tausia aʻe fanau i ala o le Atua o le a maua ni tamaiti atamamai o ē o le a aumaia le olioli ma le matuā faafiafiaina i le tamā ma le tinā.—4:1-9; 13:24; 17:21; 22:6, 15; 23:13, 14, 22, 24, 25; 29:15, 17.

34. O le ā se mea e lelei ai le fai o le tiute tauave o le fesoasoani i isi?

³⁴ Le tiute tauave e fesoasoani i isi: O le mea lenei o loo masani lava ona faamamafa i le Faataoto. O le tagata atamai e tatau ona faasalalau atu le poto mo le lelei o isi. E tatau foʻi i se tagata ona limafoaʻi i le faaalia o le agalelei i ē lē tagolima, ma i le faia faapea, tusa o lea ua ia nonō atu ia Ieova, o lē ua faamautinoa mai lona toe taui mai.—11:24-26; 15:7; 19:17; 24:11, 12; 28:27.

35. I le taulimaina o le iʻo o o tatou faafitauli, o le ā le fautuaga o loo aumai e le Faataoto?

³⁵ Faalagolago ia Ieova: O loo talanoaina e le Faataoto le iʻo o o tatou faafitauli i le fautua mai lea e tatou te faalagolago atoatoa i le Atua. E ao ona tatou manatua Ieova i o tatou ala uma. E ono fuafuaina e le tagata lona ala, ae o ona laasaga, e ao ona faatonuina e Ieova. O le suafa o Ieova o le olo malosi lea, e sola i ai le amiotonu ma maua ai le puipuiga. Faamoemoe ia Ieova ma vaai lana Afioga mo le taʻitaʻiga.—3:1, 5, 6; 16:1-9; 18:10; 20:22; 28:25, 26; 30:5, 6.

36. O ā vaaiga po o tulaga e mafai ona faamatalaina ai le Faataoto e faapea o loo tumau pea le fetaui o ona faamatalaga ma nei aso, e lelei pe a faatino, ma e aogā?

³⁶ Maʻeu le aogā o le tusi o Faataoto e aʻoaʻo ai ma aʻoaʻi ai i tatou lava atoa ai ma isi! E aunoa lava ma se vala o faiā faaletagata e foliga mai e lē o taʻua ai. Pe o iai ea se isi ua vavae ese mai o ia mai i ē latou te tapuaʻi faatasi i le Atua? (18:1) O iai ea se tasi i se tulaga maualuga ua muaʻi fai lana faaiʻuga a o leʻi faalogo atu i itu e lua o le mataupu? (18:17) Pe o iai ea se tasi e mataʻutia le tulaga e faatino ai lona faaulaula? (26:18, 19) Pe o se tasi e foliga mai e faailoga tagata? (28:21) O le tagata faatauoloa i lona faleoloa, le faifaatoʻaga i lona fanua, o le tane ma le avā ma le fanau—o loo maua uma lava faatonuga mo lo latou lelei. O loo avatu le fesoasoani i mātua ina ia mafai ona faaalialia le tele o mailei o loo natia i le ala o talavou. E mafai e tagata atamamai ona aʻoaʻo atu i ē leai se poto masani. E aogā le faataoto po o fea lava o tatou ola ai; o aʻoaʻoga ma fautuaga a le tusi e lē mafai ona uma le aogā: Na taʻua e se faiaʻoga Amerika e suafa ia William Lyon Phelps e faapea: “O le tusi o Faataoto, e sili atu ona fetaui ma nei aso manatu o loo i ai na i lo le nusipepa o le taeao nei.”a E fetaui ona faamatalaga ma nei aso, e lelei pe a faatino, ma e aogā le tusi o Faataoto e aʻoaʻo ai auā ua faagaeeina e le Atua.

37. E faapefea ona ōgatusa le Faataoto ma aʻoaʻoga a le Solomona Sili?

³⁷ Ona o le aogā mo le faasaʻoina ai, o le tusi o Faataoto, lea o le tele lava sa tautala mai ai Solomona, ua ia liliuina tagata i le Atua e Ona le Malosi Uma Lava. Sa faia foʻi faapea e Iesu Keriso, lē o loo faasino atu i ai le Mataio 12:42 o “le sili ia Solomona.”

38. E faapefea ona faaopoopo mai le Faataoto i lo tatou talisapaia o le Malo o le Atua atoa ai ma ona mataupu silisili amiotonu?

³⁸ Maʻeu lo tatou lotofaafetai e ao ona iai ona o Ia lenei e matilatila lona atamai ua filifilia e Ieova e avea ma Suli o le Malo! O lona nofoalii lea e “faatumauina . . . i le amiotonu,” mo se pulega filemu e sili atu ona faamamaluina na i lo le pulega a le tupu o Solomona. E faatatau i lena pulega o le Malo, e mafai ona faapea atu, “O le alofa ma le faamaoni, la te leoleoina le tupu; e faatumauina lona nofoālii i le alofa.” O le a faaava ai e lena le malo amiotonu e faavavau mo le fanau a tagata, lea foʻi o loo tautala i ai le Faataoto e faapea: “O le tupu, o le na te faamasinoina ma le faamaoni e matitiva, e faatumauina lona nofoalii e faavavau.” O lea la, tatou te matuā talisapaia ma le olioli e lē gata ua faamalamalamaina e le Faataoto o tatou ala i le poto, atamai, ma le malamalama, e faapena foʻi ma le ola e faavavau, ae e sili atu ai ona tāua, o loo faasilisilia ai Ieova o le Puna o le atamai moni, lea ua ia faasalafa mai e ala ia Keriso Iesu, le Suli o le Malo. Ua faaopoopo e le Faataoto le tele o mea i lo tatou talisapaia o le Malo o le Atua atoa ai ma mataupu silisili amiotonu ia o loo pulea ai nei.—Faata. 25:5; 16:12; 20:28; 29:14.

[Faaopoopoga i lalo]