Ua Faapefea Ona Taʻuleagaina e Lotu Sesē le Atua?

Pe afai e alofa le Atua, aiseā ua tele ai mea leaga ua faia e lotu ua faapea mai e tapuaʻi i le Atua? O le tali faigofie, ona e sesē nei lotu, ma ua latou aʻoaʻo atu talitonuga sesē e faatatau i le Atua. Ua faapefea ona latou taʻuleagaina o ia? O ā faalogona o le Atua i le taʻuleagaina o ia? O le ā o le a ia faia?

1. Ua faapefea ona taʻuleagaina e lotu sesē le Atua i a latou aʻoaʻoga?

Ua “fesuiaʻia [e lotu sesē] le upu moni a le Atua ma le upu pepelo.” (Roma 1:​25) Mo se faataʻitaʻiga, o le tele o lotu e latou te lē o faailoa atu le suafa o le Atua i tagata lotu. Ae ua faapea mai le Tusi Paia e tatau ona faaaogā le suafa o le Atua. (Roma 10:​13, 14) Pe a tupu se mala, e faapea mai nisi taʻitaʻi lotu o le finagalo lea o le Atua. Ae e pepelo lenā manatu. E lē mafai ona faatupuina e le Atua se mea leaga. (Faitau le Iakopo 1:13.) E faanoanoa ona o nei aʻoaʻoga sesē a lotu, ua lē mananaʻo ai tagata e faalatalata i le Atua.

2. Ua faapefea ona taʻuleagaina e lotu sesē le Atua i a latou gaoioiga?

E lē tutusa le auala e feutagaʻi ai lotu sesē ma tagata, ma le auala e feutagaʻi ai Ieova ma tagata. Ua faapea mai le Tusi Paia e faatatau i lotu sesē: “Ua tele ana agasala ma ua oo atu i le lagi.” (Faaaliga 18:5) Ua faitau selau tausaga o taumafai lotu e taaʻina faigāmalo faapolotiki, lagolagoina taua, ma avea ma faapogai o le maliliu ai o le toʻatele o tagata. O nisi taʻitaʻi lotu o loo olioli i ni olaga tamaoaiga, ma aoina le tele o tupe mai tagata tapuaʻi. O nei gaoioiga ua faamaonia ai e latou te lē iloa le Atua, ma e lē tatau foʻi ona avea i latou ma ona sui.​—Faitau le 1 Ioane 4:8.

3. O ā faalogona o le Atua e faatatau i lotu sesē?

Pe afai e te ita i mea o loo faia e lotu sesē, o le ā la sou manatu i faalogona o Ieova? E alofa o ia i tagata, ae e lē fiafia lona finagalo i taʻitaʻi lotu, o ē o loo taʻuleagaina o ia ma faileagaina tagata lotu. Na ia folafola mai o le a faaumatia lotu sesē, ma “e lē toe maua lava.” (Faaaliga 18:21) E lē o toe mamao ona tafiesea loa lea e Ieova lotu sesē uma.​—Faaaliga 18:8.

SAʻILIʻILI ATILI

4. E lē talia e le Atua lotu uma

E talitonu le toʻatele o tagata, o lotu e pei o ni auala eseese e tau uma lava i le Atua. Ae pe e moni lenā manatu? Faitau le Mataio 7:​13, 14, ona talanoa lea i le fesili lenei:

• Ua faapefea ona faamatala mai e le Tusi Paia le auala e tau atu i le ola?

Faaali le VITIŌ, ona talanoa lea i le fesili lenei:

VITIŌ: Pe e Talia e le Atua Tapuaʻiga Uma?​—Vaaiga Puupuu (3:​22)

• Po o faapea mai le Tusi Paia e talia e le Atua lotu uma?

5. E lē o faaatagia mai e lotu sesē le alofa o le Atua

Ua taʻuleagaina e lotu sesē le Atua i le tele o auala. O se tasi o auala e sili ona leaga, o le faia o a latou vaega i faigātaua. Mo se faataʻitaʻiga, faaali le VITIŌ, ona talanoa lea i fesili nei:

VITIŌ: Le Vaega Fai a Lotu i le Taua Lona II a le Lalolagi (2:​22)

• O le ā le vaega fai a le tele o lotu i le taimi o le Taua Lona Lua a le Lalolagi?

• O le ā sou manatu e faatatau i lenā mea?

Faitau le Ioane 13:​34, 35 ma le 17:16, ona talanoa lea i fesili nei:

• O le ā sou manatu i faalogona o Ieova ina ua auai lotu i faigātaua?

• Ua faapogaia e lotu sesē le tele o mea leaga. O ā auala ua lē taulau ai lotu sesē i le faaatagia mai o le alofa o le Atua?

6. E finagalo le Atua ia saʻoloto tagata mai lotu sesē

Faitau le Faaaliga 18:​4,a ona talanoa lea i le fesili lenei:

• O ā ou faalogona i le iloa, e finagalo le Atua e fesoasoani i tagata ua taʻitaʻisesēina e lotu sesē?

7. Ia faaauau pea ona aʻoaʻo e faatatau i le Atua moni

Pe e tatau ona aafia ou manatu e faatatau i le Atua, ona o aʻoaʻoga ma gaoioiga a lotu sesē? Seʻi mafaufau i se atalii e na te teena faatonuga atamai a lona tamā. Ua ia tuua le aiga, ma ola i se olaga leaga. E leʻi fiafia le tamā i ana gaoioiga. Aiseā e lē tatau ai ona tuuaʻia le tamā i le auala ua ola ai lona atalii lē usitaʻi?

• Pe e tatau ona tuuaʻia Ieova ma taofia ai lou aʻoaʻoina atili e faatatau iā te ia, ona o gaoioiga a lotu sesē?

AOTELEGA

Ua taʻuleagaina e lotu sesē le Atua e ala i a latou aʻoaʻoga sesē ma gaoioiga leaga. O le a faaumatia e Ieova lotu sesē.

Fesili Autalu

• O ā ni ou faalogona e faatatau i aʻoaʻoga a lotu sesē ma mea o loo latou faia?

• O ā faalogona o Ieova i lotu sesē?

• O le ā o le a faia e le Atua i lotu sesē?

MANATU FAAOPOOPO

Iloilo ni vala se lua o loo faaaogā e lotu i a latou tapuaʻiga, e lē finagalo malie i ai le Atua.

“Pe e Tutusa Lotu Uma? Pe e Taulaʻi Uma Atu i le Atua?” (Mataupu i le jw.org)

Aiseā e finagalo ai Ieova e tatou te tapuaʻi faatasi atu ma isi iā te ia?

“Pe e Tatau Ona Auai i se Faalapotopotoga Faalelotu?” (Mataupu i le jw.org)

Na faileagaina se tasi o patele e lana lotu. Ae e leʻi taofia ai o ia mai le aʻoaʻoina o le upu moni e faatatau i le Atua.

“Le Māfuaaga na Tuua ai e se Patele Lana Lotu” (Mataupu o le Ala Mai!)

Ua faitau selau tausaga o faasesēina e lotu tagata i aʻoaʻoga pepelo, ma ua foliga mai ai e sauā ma lē manatu mamafa mai le Atua. Iloilo le mea moni e faatatau i nisi o na pepelo.

“O Pepelo e Faapea e Lē Alofa le Atua” (Le Olomatamata, Novema 1, 2013)