Faaleleia o o Tatou Tomai i le Faiva—Toleni Tagata Fou

Māfuaaga e Tāua Ai: E tatau i soo fou o Iesu ona tausia “mea uma” ua ia poloaʻia, e aofia ai le aʻoaʻoina atu o le upu moni i isi. (Mata. 28:19, 20) O le toʻatele o tagata fou ua agavaa mo le Aʻoga o le Faiva Faatiokarate, ma atonu ua latou molimau lē fuafuaina atu foʻi i o latou tauaiga ma uō. Peitaʻi, a o faaauau ona latou faatatau mea ua latou aʻoaʻoina, ma ua iloa e finagalo Ieova ia faalogo tagata uma i le tala lelei, e ono faailoa mai e nei tagata fou lo latou faanaunauga e fia auai i le galuega talaʻi. (Roma 10:13, 14) Pe afai ua faamaonia ua agavaa nei tagata fou e avea ma tagata talaʻi e leʻi papatisoina, e manaʻomia la ni toleniga lelei ina ia fesoasoani ai iā i latou e maua le lototele, a o uia laasaga manaʻomia ina ia agaʻigaʻi ai i luma faaleagaga.—Luka 6:40.

Le Auala e Fai Ai:

Ia fesoasoani i le tagata talaʻi fou, ina ia maua lomiga e manaʻomia mo le talaʻiga ma le faia o suʻesuʻega. Ia faasino i ai le auala e faamaopoopo ai lau ato talaʻi, ma faamatala i ai le fuafuaga o lomiga taʻitasi o loo i lau ato.
Ia iloilo faatasi se taulimaga faataʻitaʻi o loo i La Tatou Faiva o le Malo, ma faataʻitaʻi le auala e fai ai. Faalaeiau le tagata talaʻi e faaupu lenā taulimaga faataʻitaʻi i ana lava upu. Ia faataʻitaʻi faatulagaga eseese o loo i le itulau e 82 o le tusi Aʻoga o le Faiva, e talafeagai ma la outou oganuu. Ia faamamafa i ai le tāua o laʻei onomea ma talafeagai.—2 Kori. 6:3, 4.
Ia saunia pea toleniga faaopoopo. Ia faasino i le tagata talaʻi fou se faafanua o le oganuu, ma faamatala i ai le auala e fai ai ni faamaumauga saʻo. Ia faataʻitaʻi le auala e faamaumau ai faamatalaga e faatatau i se tagata na faaalia le fiafia. Ia faasino foʻi i le tagata talaʻi fou le auala e faaaogā ai i le talaʻiga le jw.org ma le tamaʻi tusi Good News for People of All Nations. Fesoasoani iā te ia ia iloa atiaʻe le fiafia o se tasi na talanoa i ai, ae na faaalia le naunau moni.—1 Kori. 3:6.
Ia onosaʻi ma faamālō atu. (Faata. 25:11) Ia faataatia se faaaʻoaʻoga lelei. O lou maelega ma lou naunau moni i isi e mafai ona iai se aafiaga lelei iā i latou mo se taimi umi.

Faataʻitaʻi a o Faagasolo le Masina:

Ia galulue ma lau tagata aʻoga i le galuega talaʻi mai i lea fale i lea fale, pe ō foʻi e fai toe asiga ma suʻesuʻega faale-Tusi Paia. Pe afai e leai sau tagata aʻoga, e mafai ona e fesili atu i se tagata talaʻi e lē tele ni ona tomai i le faiva, e te lua galulue faatasi i le talaʻiga.