4 | O Loo Saunia Mai i le Tusi Paia Fautuaga Aogā

O le ā Lona Uiga?

E ui o le Tusi Paia e lē o se tusi faafomaʻi, ae o loo saunia mai ai fautuaga aogā e mafai ona fesoasoani i se tagata o loo tauivi ma faafitauli o le mafaufau. Mātau nisi o faaaʻoaʻoga nei.

O Auala e Fesoasoani Mai Ai

“E lē manaʻomia e tagata malolosi se fomaʻi, ae na o ē mamaʻi.”​—MATAIO 9:12.

Ua faailoa mai i le Tusi Paia, e ono manaʻomia ona tatou saʻilia ni togafitiga faafomaʻi. E toʻatele na fesoasoani iā i latou le vaaia o se fomaʻi, ma le mauaina o faamatalaga maufaatuatuaina e faatatau i o latou tulaga.

“E aogā le faamalositino mo lou tino.”​—1 TIMOTEO 4:8, Contemporary English Version.

O le faaalu o le taimi e faia ai ni gaoioiga e faaleleia ai le soifua mālōlōina o lou tino, e ono fesoasoani foʻi i le faaleleia o le soifua mālōlōina o le mafaufau. O na gaoioiga e aofia ai le tausisi i se faasologa o le faamalositino e lē aunoa, taumafa i meaʻai paleni, ma ia lava le moe.

“O le lotofiafia o se vaifofō lelei lea, ae o le lotomomomo e vaivai ai le tino.”​—FAATAOTO 17:22.

O le faitauina o ni mau faalaeiau mai i le Tusi Paia, ma faatutū ni sini talafeagai e mafai ona ausia, o le a fesoasoani e faatumauina ai le fiafia. Pe a e taulaʻi atu i mea lelei i le olaga, ma talitonu o le a faaleleia le tulaga o mea i le lumanaʻi, o le a fesoasoani lea iā te oe e onosaia ai faafitauli o le mafaufau.

“E iai le atamai i ē e faamaulalo.”​—FAATAOTO 11:2.

Ia talia le fesoasoani mai i isi ona e ono iai ni mea e te manaʻo e fai, e lē mafai ona e faia na o oe. E tele lava ina mananaʻo au uō ma ou tauaiga e fesoasoani atu, ae atonu e latou te lē iloa le mea e fai. Ia faailoa atu iā i latou se mea patino o loo e manaʻomia ai le fesoasoani. Aua e te faatalitalia ni mea e sili atu e latou te faia mo oe, ma ia lotofaafetai mo le fesoasoani e latou te saunia.

Auala o Loo Fesoasoani ai Fautuaga Aogā o le Tusi Paia i Ē ua Mafatia

“Na ou lagona e iai se mea na faalētonu, o lea na ou alu ai loa e vaai se fomaʻi. Na mafai ona ia faamatalaina mai le mea o loo tupu. Na fesoasoani lenā ou te malamalama ai i le faafitauli o loo oʻu fesagaʻia, ma ou iloa ai togafitiga o loo maua e aogā iā te aʻu.”​—Nicole,a o sē o loo tauivi ma le maʻi o le bipolar.

“O le ma faitauina e lē aunoa o le Tusi Paia ma laʻu avā, ua fesoasoani iā te aʻu e amata ai aso taʻitasi i se manatu lelei ma faalaeiau. E masani lava pe a faigatā loʻu tulaga i nisi taimi, e iai lava se mau patino e faalaeiauina ai aʻu.”​—Peteru, o sē o loo tauivi ma le lotomafatia.

“Ona o loʻu matamuli tele, na faigatā ai ona ou talanoa atu i isi e faatatau i loʻu maʻi. Peitaʻi, na faalogologo lelei mai saʻu uō vavalalata, ma taumafai e malamalama i oʻu faalogona. Na fesoasoani mai o ia ina ia faaleleia oʻu faalogona, ma ia ou iloa e lē na o aʻu o loo aafia i lenei maʻi.”​—Ji-yoo, o sē o loo tauivi ma se faafitauli i le taumafa.

“Ua fesoasoani mai le Tusi Paia ina ia ou faaalia le paleni ma le fetuutuunaʻi, i le taimi e galue ma le taimi e mālōlō ai. O le atamai foʻi mai i le Tusi Paia ua fesoasoani iā te aʻu, e fesagaʻia ai faafitauli tau faalogona, ia e faaauau pea ona ou aafia ai.”​—Timoteo, o sē o loo tauivi ma le maʻi o le OCD.