Jeremiya

43 Jeremiya paakanga apedza kutaura nevanhu vese mashoko aya ese aJehovha Mwari wavo, mashoko ese zvawo aakanga atumwa naJehovha Mwari wavo kuti avaudze, 2 Azariya mwanakomana waHoshaya, naJohanani+ mwanakomana waKareya, nevarume vese vaizvikudza vakati kuna Jeremiya: “Zvauri kutaura ndezvekunyepa! Jehovha Mwari wedu haana kukutuma kuti uti, ‘Musaenda kuIjipiti kunogara ikoko.’ 3 Asi Bharuki+ mwanakomana waNeriya ndiye ari kukufurira kuti utaure zvisina kunaka kwatiri kuti tiiswe mumaoko evaKadheya, kuti vatiuraye kana kutitapa vachitiendesa kuBhabhironi.”+

4 Saka Johanani mwanakomana waKareya nevakuru vese vemauto nevanhu vese havana kuteerera shoko raJehovha rekuti varambe vari munyika yeJudha. 5 Pane kudaro, Johanani mwanakomana waKareya nevakuru vese vemauto vakatora vaJudha vese vakanga vasara, avo vakanga vadzoka kunogara munyika yeJudha vachibva kumarudzi ese kwavakanga vapararira.+ 6 Vakatora varume, madzimai, vana, vanasikana vamambo, nevanhu vese vakanga vasiyiwa naNebhuzaradhani+ mukuru wevarindi, vaina Gedhariya+ mwanakomana waAhikamu+ mwanakomana waShafani,+ uye vakatorawo muprofita Jeremiya naBharuki mwanakomana waNeriya. 7 Uye vakapinda munyika yeIjipiti, nekuti havana kuteerera inzwi raJehovha, uye vakatonosvika kuTapanhesi.+

8 Shoko raJehovha rakabva rauya kuna Jeremiya ari muTapanhesi, richiti: 9 “Tora matombo makuru neruoko rwako, uavige mumadhaka ari pamasitepisi ezvidhinha ari pamusuo weimba yaFarao iri muTapanhesi, varume vechiJudha vakatarisa. 10 Ubve wati kwavari, ‘Zvanzi naJehovha wemauto, Mwari waIsraeri: “Ndiri kushevedza Nebhukadhinezari* mambo weBhabhironi, mushumiri wangu,+ uye ndichaisa chigaro chake cheumambo pamusoro pematombo iwaya andaviga, uye achatambanudzira tende rake reumambo pamusoro pawo.+ 11 Uye achauya orwisa nyika yeIjipiti.+ Munhu wese akafanirwa nedenda rinouraya achafa nedenda rinouraya, munhu wese akafanirwa nekutapwa achatapwa, munhu wese akafanirwa nebakatwa achaurayiwa nebakatwa.+ 12 Ndichatungidza dzimba* dzavanamwari veIjipiti nemoto,+ uye iye achadzipisa, ovatapa. Achatora nyika yeIjipiti ozviputira nayo, sekuzviputira kunoita mufudzi nenguo yake, uye achabva ikoko murugare.* 13 Achaputsa-putsa mbiru* dzeBheti-shemeshi* munyika yeIjipiti, uye achapisa dzimba* dzavanamwari veIjipiti nemoto.”’”