Jeremiya
24 Jehovha akabva andiratidza tswanda mbiri dzemaonde dzakanga dzakaiswa pamberi petemberi yaJehovha, pashure pekunge Mambo Nebhukadhinezari* weBhabhironi atapa Jekoniya*+ mwanakomana waJehoyakimu,+ mambo weJudha, nemachinda eJudha, nemhizha, nevapfuri vesimbi;* akavatora muJerusarema akaenda navo kuBhabhironi.+ 2 Imwe tswanda yaiva nemaonde akanaka kwazvo semaonde anotanga kuibva, asi imwe tswanda yaiva nemaonde akaora chaizvo, akaora zvekuti aisadyika.
3 Jehovha akabva andibvunza kuti: “Uri kuonei Jeremiya?” Saka ndakati: “Maonde; akanaka acho akanaka zvekunaka zviya, asi akaora acho akaora zvekuora zviya, akaora zvekuti haadyiki.”+
4 Shoko raJehovha rakabva rauya kwandiri, richiti: 5 “Zvanzi naJehovha Mwari waIsraeri, ‘Nhapwa dzeJudha dzandaendesa kunyika yevaKadheya dzichibva munzvimbo ino ndichadziona sedzakanaka semaonde aya akanaka. 6 Ziso rangu richaramba riri padziri kuti ndidzibatsire, uye ndichadzidzosa kunyika ino.+ Ndichadzivaka uye handizodziputsi; ndichadzidyara, uye handizodzidzuri.+ 7 Ndichadzipa mwoyo wekuti dzindizive kuti ndini Jehovha.+ Dzichava vanhu vangu, uye ini ndichava Mwari wadzo,+ nekuti dzichadzoka kwandiri nemwoyo wese.+
8 “‘Asi kana ari maonde akaora, aya akaora zvekusadyika,+ zvanzi naJehovha: “Ndichaonawo saizvozvo Mambo Zedhekiya+ weJudha, nemachinda ake, nevashoma vari muJerusarema vasara munyika ino, nevaya vari kugara munyika yeIjipiti.+ 9 Ndichaita kuti umambo hwese hwepanyika hutye pahunoona dambudziko randichaunza pavari.+ Vachashorwa, vachava chirevo, chinhu chinozvidzwa, uye chakatukwa,+ kwese kwandichavaparadzira.+ 10 Ndichavatumira bakatwa,+ nzara, nedenda,*+ kusvikira vapera panyika yandakavapa ivo nemadzitateguru avo.”’”