Jeremiya
25 Pakauya shoko kuna Jeremiya pamusoro pevanhu vese veJudha mugore rechina raJehoyakimu+ mwanakomana waJosiya, mambo weJudha, iro raiva gore rekutanga raMambo Nebhukadhinezari* weBhabhironi. 2 Izvi ndizvo zvakataurwa nemuprofita Jeremiya pamusoro pevanhu* vese veJudha nevagari vese vemuJerusarema:
3 “Kubvira mugore rechi13 raJosiya+ mwanakomana waAmone, mambo weJudha, kusvikira nhasi, makore 23 aya, shoko raJehovha ranga richiuya kwandiri uye ndakaramba ndichitaura ndataurazve nemi,* asi hamuna kuteerera.+ 4 Uye Jehovha akakutumirai vashumiri vake vese vaprofita, achivatuma avatumazve,* asi hamuna kuteerera, uyewo hamuna kurereka nzeve dzenyu kuti munzwe.+ 5 Vaiti, ‘Tapota mumwe nemumwe wenyu ngaatendeuke abve panzira dzenyu dzakaipa uye pane zvakaipa zvenyu;+ kana mukadaro muchagara kwenguva refu munyika yamakapiwa naJehovha kare kare, imi nemadzitateguru enyu. 6 Musatevera vamwe vanamwari muchivashumira nekuvakotamira, muchindigumbura nebasa remaoko enyu; nekuti ndingakuunzirai dambudziko.’
7 “‘Asi hamuna kunditeerera,’ ndizvo zvinotaurwa naJehovha. ‘Pane kudaro, makandigumbura nebasa remaoko enyu, muchizviunzira dambudziko.’+
8 “Saka zvanzi naJehovha wemauto, ‘“Nekuti hamuna kuteerera mashoko angu, 9 ndiri kushevedza mhuri dzese dzekuchamhembe,”+ ndizvo zvinotaurwa naJehovha, “ndiri kushevedza Mambo Nebhukadhinezari* weBhabhironi, mushumiri wangu,+ uye ndichavaunza kuti varwise nyika ino+ nevagari vayo nemarudzi aya ese akavapoteredza.+ Ndichaita kuti vaparadzwe, ndovaita chinhu chinotyisa uye chinoridzisa muridzo uye dongo nekusingaperi. 10 Ndichaita kuti pasanzwika inzwi rekupembera nemufaro nenzwi remufaro mukuru pakati pavo,+ inzwi remurume ari kuroora nenzwi remwenga,+ nekurira kweguyo, uye ndichadzima chiedza cherambi. 11 Nyika ino yese ichaitwa dongo uye chinhu chinoita kuti vanhu vatye, uye marudzi aya achava pasi pamambo weBhabhironi kwemakore 70.”’+
12 “‘Asi kana makore 70 apera,+ ndichatonga mambo weBhabhironi nerudzi irworwo nemhaka yekukanganisa* kwavo,’+ ndizvo zvinotaurwa naJehovha, ‘uye ndichaita kuti nyika yevaKadheya ive dongo nekusingaperi.+ 13 Ndichaunza panyika yacho mashoko angu ese andakataura nezvenyika yacho, zvese zvakanyorwa mubhuku rino zvakaprofitwa naJeremiya pamusoro pemarudzi ese. 14 Nekuti marudzi mazhinji nemadzimambo makuru+ achavaita varanda,+ uye ini ndichavaitira zvinoenderana nezvavakaita uye nebasa remaoko avo.’”+
15 Nekuti Jehovha Mwari waIsraeri ati kwandiri: “Tora kapu iyi yewaini yekutsamwa muruoko rwangu, unwise marudzi ese andinokutuma kwaari. 16 Achainwa odzedzereka, oita sevanhu vanopenga nekuti ndiri kutuma bakatwa pakati pawo.”+
17 Saka ndakatora kapu yacho muruoko rwaJehovha, ndikanwisa marudzi ese andakatumwa kwaari naJehovha:+ 18 kutanga neJerusarema nemaguta eJudha,+ madzimambo aro, nemachinda aro, kuti zvive matongo, chinhu chinotyisa, chinhu chinoridzisa muridzo uye chakatukwa,+ sezvazviri nhasi; 19 kwozotevera Farao mambo weIjipiti nevaranda vake nemachinda ake, nevanhu vake vese,+ 20 nevanhu vavo vese vemarudzi akasiyana-siyana; madzimambo ese enyika yeUzi; madzimambo ese enyika yevaFiristiya,+ Ashkeroni,+ Gaza, Ekroni, nevakasara pavanhu vekuAshdhodhi; 21 Edhomu,+ Moabhi,+ nevaAmoni;+ 22 madzimambo ese eTire, madzimambo ese eSidhoni,+ nemadzimambo echitsuwa chiri mugungwa; 23 Dhedhani,+ Tema, Bhuzi, nevaya vese vane bvudzi repamberi penzeve rakadimburirwa;+ 24 madzimambo ese evaArabhu,+ nemadzimambo ese emarudzi akasiyana-siyana anogara murenje; 25 madzimambo ese eZimri, madzimambo ese eEramu,+ nemadzimambo ese evaMedhiya;+ 26 nemadzimambo ese ekuchamhembe, ari pedyo neari kure, mumwe pashure pemumwe, nehumwe umambo hwese hwepanyika. Uye mambo weSheshaki*+ achanwa kana ivo vapedza.
27 “Uti kwavari, ‘Zvanzi naJehovha wemauto, Mwari waIsraeri: “Inwai mudhakwe, murutse uye muwe zvekuti hamugoni kumuka+ nekuti ndiri kutuma bakatwa pakati penyu.”’ 28 Kana vakaramba kutora kapu yacho muruoko rwako kuti vanwe, uti kwavari, ‘Zvanzi naJehovha wemauto: “Munofanira kuinwa! 29 Nekuti kana ndiri kuunza dambudziko ndichitanga neguta rine zita rangu,+ imi mungarega kurangwa here?”’+
“‘Hamuzoregi kurangwa, nekuti ndiri kushevedza bakatwa kuti riuye pavagari vese vepanyika,’ ndizvo zvinotaurwa naJehovha wemauto.
30 “Uye unofanira kuprofita kwavari mashoko aya ese, woti kwavari,
‘Jehovha achadzvova ari kumusoro,
Uye achaita kuti inzwi rake rinzwike ari kunzvimbo yake tsvene yaanogara.
Nzvimbo yake yaanogara achaidzvovera zvine simba.
Achaimba rwiyo rwekukunda vagari vese vepanyika,
Achishevedzera sevaya vari kutsika-tsika muchisviniro chewaini.’
31 ‘Ruzha rukuru ruchasvika kumigumo yenyika,
Nekuti Jehovha ane gakava nemarudzi.
Iye pachake achapa mutongo kuvanhu vese.*+
Uye achaisa vakaipa kubakatwa,’ ndizvo zvinotaurwa naJehovha.
32 Zvanzi naJehovha wemauto:
‘Inzwai! Pane dambudziko riri kupararira richibva kune rumwe rudzi richienda kune rumwe rudzi,+
Uye mhepo huru ine mvura icharegedzerwa ichibva kumativi ari kure kwazvo enyika.+
33 “‘Uye vaya vachaurayiwa naJehovha pazuva iroro vachava panyika yese, kubvira kumugumo wayo kusvika kune mumwe mugumo wayo. Havazochemwi, uyewo havazounganidzwi kana kuvigwa. Vachava semupfudze panyika.’
34 Ridzai mhere imi vafudzi, mushevedzere!
Umburukai imi vakuru veboka rezvipfuwo,
Nekuti nguva yekuurayiwa kwenyu neyekuparadzirwa kwenyu yasvika,
Uye muchawa semudziyo unokosha!
35 Vafudzi havana nzvimbo yekutizira,
Uye vakuru veboka rezvipfuwo havana pekupukunyuka napo.
36 Inzwai! Pane kushevedzera kwevafudzi
Uye kuchema kwevakuru veboka rezvipfuwo,
Nekuti Jehovha ari kuparadza mafuro avo.
37 Nzvimbo dzekugara dzine rugare dzasiyiwa dzisina chinhu chipenyu
Nekuda kwekutsamwa kukuru kwaJehovha.