Mapisarema

28 Ndinoramba ndichishevedzera kwamuri, haiwa Jehovha, Dombo rangu;+

Ndinzweiwo.

Kana mukaramba makandinyararira,

Ndinenge ndangofanana nevaya vari kudzika kugomba.*+

 2 Inzwai kuteterera kwangu pandinochemera kubatsirwa nemi

Ndichisimudzira maoko angu kuimba yemukati yenzvimbo yenyu tsvene.+

 3 Musandizvuzvurudza pamwe chete nevakaipa, vanoita zvinhu zvisina kunaka,+

Vaya vari kutaura zvinhu zverugare nevamwe vavo asi mumwoyo mavo muine zvinhu zvakaipa.+

 4 Vatsivei maererano nezviito zvavo,+

Zvinoenderana nemabasa avo akaipa.

Vatsivei mabasa emaoko avo,

Maererano nezvavakaita,+

 5 Nekuti havaise pfungwa dzavo pamabasa aJehovha,+

Kana pabasa remaoko ake.+

 6 Jehovha ngaarumbidzwe,

Nekuti anzwa kuchema kwangu ndichida rubatsiro.

 7 Jehovha ndiye simba rangu+ nenhoo yangu;+

Mwoyo wangu unovimba naye.+

Ndakawana rubatsiro rwake, uye mwoyo wangu uri kufara,

Saka ndichamurumbidza nerwiyo rwangu.

 8 Jehovha ndiye simba revanhu vake;

Iye inhare uye anounza ruponeso rukuru kumuzodziwa wake.+