Bhuku Rekutanga reMakoronike
14 Mambo Hiramu+ weTire akatuma nhume kuna Dhavhidhi, nematanda emisidhari, nevavezi vematombo,* nevavezi vematanda kuti vamuvakire imba.*+ 2 Dhavhidhi akaziva kuti Jehovha akanga asimbisa umambo hwake pana Israeri,+ nekuti akasimudzira chaizvo umambo hwake achiitira vanhu vake vaIsraeri.+
3 Dhavhidhi akatora mamwe madzimai+ muJerusarema, uye Dhavhidhi akabereka vamwe vanakomana nevanasikana.+ 4 Aya ndiwo mazita evana vaakabereka muJerusarema:+ Shamua, Shobhabhu, Natani,+ Soromoni,+ 5 Ibhari, Erishua, Eripereti, 6 Noga, Nefegi, Jafiya, 7 Erishama, Bheeriyadha, naErifereti.
8 VaFiristiya pavakanzwa kuti Dhavhidhi akanga azodzwa kuti ave mambo wevaIsraeri vese,+ vaFiristiya vese vakakwidza vachienda kunotsvaga Dhavhidhi.+ Dhavhidhi paakazvinzwa, akabuda kuti anorwa navo. 9 VaFiristiya vakabva vauya, uye vairamba vachirwisa vagari vemuBani reRefaimu.+ 10 Dhavhidhi akabvunza Mwari, achiti: “Ndiende kunorwa nevaFiristiya here? Muchavaisa muruoko rwangu here?” Jehovha akabva ati kwaari: “Enda, nekuti chokwadi ndichavaisa muruoko rwako.”+ 11 Saka Dhavhidhi akaenda kuBhaari-perazimu,+ uye akavauraya ikoko. Dhavhidhi akabva ati: “Mwari wechokwadi apaza vavengi vangu achishandisa ruoko rwangu, sekupazwa kunoitwa madziro nemvura.” Ndokusaka vakatumidza nzvimbo iyoyo kuti Bhaari-perazimu.* 12 VaFiristiya vakasiya vanamwari vavo ipapo, uye pashure pekunge Dhavhidhi apa murayiro, vanamwari vacho vakapiswa mumoto.+
13 Gare gare vaFiristiya vakarwisazve mubani.+ 14 Dhavhidhi akabva abvunzazve Mwari, asi Mwari wechokwadi akati kwaari: “Usaenda wakavananga. Asi pota nekuseri kwavo, uvarwise uri mberi kwemakwenzi emibheka.+ 15 Uye paunonzwa ruzha pamusoro pemakwenzi emibheka runenge rwevanhu vari kufora, ibva warwisa, nekuti Mwari wechokwadi achange aenda mberi kwako kunoparadza uto revaFiristiya.”+ 16 Saka Dhavhidhi akaita zvaakarayirwa naMwari wechokwadi,+ uye vakaparadza uto revaFiristiya kubva kuGibhiyoni kusvika kuGezeri.+ 17 Mukurumbira waDhavhidhi wakapararira kunyika dzese, uye Jehovha akaita kuti marudzi ese amutye.+