Jeremiya
35 Iri ndiro shoko rakauya kuna Jeremiya richibva kuna Jehovha mumazuva aJehoyakimu+ mwanakomana waJosiya, mambo weJudha, richiti: 2 “Enda kuimba yevaRekabhi+ utaure navo, uuye navo muimba yaJehovha, mune imwe yedzimba dzekudyira; ubve wavapa waini kuti vanwe.”
3 Saka ndakatora Jaazaniya mwanakomana waJeremiya mwanakomana waHabhaziniya, nehama dzake, nevanakomana vake vese, neimba yese yevaRekabhi 4 ndikauya navo muimba yaJehovha. Ndakavapinza muimba yekudyira yevanakomana vaHanani mwanakomana waIgdhariya, munhu waMwari wechokwadi, iyo yaiva pedyo neimba yekudyira yemachinda yaiva pamusoro peimba yekudyira yaMaaseya mwanakomana waSharumu muchengeti wesuo. 5 Ndakabva ndaisa makapu azere newaini nemidziyo yekunwira izere newaini pamberi pevarume veimba yevaRekabhi ndikati kwavari: “Inwai waini.”
6 Asi ivo vakati: “Hatisi kuzonwa waini, nekuti Jehonadhabhi*+ mwanakomana waRekabhi, tateguru vedu, akatirayira kuti, ‘Hamufaniri kutombonwa waini, imi kana vanakomana venyu. 7 Uye hamufaniri kuvaka imba, kudyara mbeu, kana kudyara munda wemizambiringa, kana kuutenga. Asi munofanira kuramba muchigara mumatende, kuti mugare kwenguva refu munyika yamuri kugara muri vatorwa.’ 8 Saka tinoramba tichiteerera inzwi raJehonadhabhi mwanakomana watateguru vedu Rekabhi pazvinhu zvese zvaakatirayira, nekusatombonwa waini, isu, madzimai edu, vanakomana vedu, nevanasikana vedu. 9 Uye hativaki dzimba dzekugara, uye hatina minda yemizambiringa kana minda yezvirimwa kana mbeu. 10 Tinoramba tichigara mumatende uye tichiteerera zvese zvatakarayirwa natateguru vedu Jehonadhabhi.* 11 Asi Mambo Nebhukadhinezari* weBhabhironi paakauya kuzorwisa nyika,+ takati, ‘Uyai tipinde muJerusarema kuti tipone pauto revaKadheya uye revaSiriya,’ uye iye zvino tava kugara muJerusarema.”
12 Shoko raJehovha rakauya kuna Jeremiya, richiti: 13 “Zvanzi naJehovha wemauto, Mwari waIsraeri, ‘Enda unoti kuvarume veJudha nevagari vemuJerusarema: “Hamuna kuramba muchikurudzirwa kuteerera mashoko angu here?”+ ndizvo zvinotaurwa naJehovha. 14 “Jehonadhabhi mwanakomana waRekabhi akarayira vazukuru vake kuti varege kunwa waini, uye vakateerera mashoko ake nekurega kuinwa kusvikira nhasi, vachiteerera murayiro watateguru wavo.+ Asi ini ndakataura ndataurazve* nemi, asi hamuna kunditeerera.+ 15 Ndakaramba ndichikutumirai vashumiri vangu vese vaprofita, ndichivatuma ndavatumazve,*+ ndichiti, ‘Ndapota, mumwe nemumwe ngaatendeuke panzira dzenyu dzakaipa,+ uye itai zvakarurama! Musatevera vamwe vanamwari uye musavashumira. Kana mukadaro mucharamba muchigara munyika yandakakupai imi nemadzitateguru enyu.’+ Asi hamuna kurereka nzeve dzenyu kana kunditeerera. 16 Vazukuru vaJehonadhabhi mwanakomana waRekabhi vakaita zvavakarayirwa natateguru wavo,+ asi vanhu ava havana kunditeerera.”’”
17 “Saka zvanzi naJehovha, Mwari wemauto, Mwari waIsraeri, ‘Ndiri kuunzira vaJudha nevagari vese vemuJerusarema dambudziko rese randakavayambira nezvaro,+ nekuti ndakataura navo asi havana kuteerera, uye ndakaramba ndichishevedzera kwavari asi havana kupindura.’”+
18 Uye Jeremiya akati kuimba yevaRekabhi: “Zvanzi naJehovha wemauto, Mwari waIsraeri, ‘Nekuti makateerera murayiro waJehonadhabhi tateguru venyu uye muri kuramba muchichengeta mirayiro yake yese, muchinyatsoita zvaakakurayirai, 19 zvanzi naJehovha wemauto, Mwari waIsraeri: “Pavazukuru vaJehonadhabhi* mwanakomana waRekabhi hapazomboshayikwi murume anoshumira pamberi pangu.”’”