Mapisarema

Kumutungamiriri. Mutinhimira unonzi, “Musaparadza.” Pisarema raAsafi.+ Rwiyo.

75 Tinokutendai, haiwa Mwari, tinokutendai;

Zita renyu riri pedyo,+

Uye vanhu vanozivisa mabasa enyu anoshamisa.

2 Munoti: “Pandinotara nguva,

Ndinotonga ndisingasaruri.

3 Pakanyungudutswa nyika uye vagari vayo vese,

Ndini ndakaita kuti mbiru dzayo dzirambe dzakasimba.” (Sera)

4 Ndinoti kune vaya vanozvirumbidza, “Musazvirumbidza,”

Uye kune vakaipa, “Musakwidziridza simba renyu.*

5 Musakwidziridzira simba renyu* kumusoro

Kana kutaura muchizvitutumadza.

6 Nekuti kukwidziridzwa hakubvi

Kumabvazuva kana kumavirira kana kumaodzanyemba.

7 Nekuti Mwari Mutongi.+

Anoderedza mumwe munhu, okwidziridza mumwe.+

8 Nekuti muruoko rwaJehovha mune kapu;+

Waini yacho iri kupupuma uye yakanyatsosanganiswa.

Achatoidurura,

Uye vakaipa vese vepanyika vachainwa, kusvikira kumasese acho.”+

9 Asi kana ndiri ini, ndichazivisa nezvazvo nekusingaperi;

Ndichaimba ndichirumbidza* Mwari waJakobho.

10 Nekuti anoti: “Ndichagura simba rese revakaipa,*

Asi simba revakarurama richakwidziridzwa.”*