Jeremiya
15 Jehovha akabva ati kwandiri: “Kunyange dai pamberi pangu paizomira Mozisi naSamueri+ ndaisambonzwira* vanhu ava nyasha. Vadzinge pamberi pangu. Ngavaende. 2 Uye kana vakati kwauri, ‘Toendepi?’ iwe unofanira kuti kwavari, ‘Zvanzi naJehovha:
“Munhu wese akafanirwa nedenda rinouraya, ngaaende kunofa nedenda!
Munhu wese akafanirwa nebakatwa, ngaafe nebakatwa!+
Munhu wese akafanirwa nenzara, ngaafe nenzara!
Munhu wese akafanirwa nekutapwa, ngaatapwe!”’+
3 “‘Ndichatuma matambudziko mana* pavari,’+ ndizvo zvinotaurwa naJehovha, ‘bakatwa kuti riuraye, imbwa kuti dzizvuzvurudze, shiri dzedenga uye mhuka dzepanyika kuti dzidye uye dziparadze.+ 4 Ndichavaita chinhu chinotyisa kuumambo hwese hwepanyika+ nemhaka yaManase mwanakomana waHezekiya, mambo weJudha, nekuda kwezvaakaita muJerusarema.+
5 Ndiani achakunzwira tsitsi, haiwa iwe Jerusarema,
Ndiani achachema newe,
Uye ndiani achamira kuti abvunze kuti wakadii?’
6 ‘Wakandisiya,’ ndizvo zvinotaurwa naJehovha.+
‘Unoramba uchindipira gotsi.*+
Saka ndichakutambanudzira ruoko rwangu ndokuparadza.+
Ndaneta nekukunzwira tsitsi.*
7 Ndichavaurutsa neforogo pamagedhi enyika yacho.
Ndichaita kuti vafirwe nevana.+
Ndichaparadza vanhu vangu,
Nekuti vari kuramba kusiya nzira dzavo.+
8 Chirikadzi dzavo dzichawanda pamberi pangu kupfuura jecha remakungwa.
Ndichaunza muparadzi pavari zuva riri panhongonya, pana vanaamai nepamajaya.
Ndichaita kuti vangoerekana vava kunetseka uye vava kutya zvikuru.
Zuva rake ravira achiri masikati,
Zvichikonzera kunyadziswa uye kuzvidzwa.’*
‘Uye vashoma vakasara pakati pavo
Ndichavaurayisa nebakatwa pamberi pevavengi vavo,’ ndizvo zvinotaurwa naJehovha.”+
10 Ndine nhamo, haiwa amai vangu, nekuti makandibereka,+
Ini murume wekungopopotedzana uye kukakavadzana nenyika yese.
Handina kukweretesa, uye hapana wandakakwereta kwaari;
Asi vese zvavo vanondituka.
11 Jehovha akati: “Chokwadi ndichakushumira kuti zvikufambire zvakanaka;
Chokwadi ndichakumiririra kumuvengi panguva yekutambudzika,
Panguva yenhamo.
12 Munhu angagura-gura simbi here,
Simbi inobva kuchamhembe, uye mhangura?
13 Ndichaita kuti pfuma yako nezvinhu zvako zvinokosha zvitorwe+
Pasina mubhadharo, nemhaka yezvivi zvako zvese munharaunda dzako dzese.
Nekuti moto wabatidzwa nekutsamwa kwangu,
Uye uri kubvira kuti ukupisei.”+
15 Imi munoziva, haiwa Jehovha,
Ndiyeukei, mufunge nezvangu.
Nditsivirei vaya vanonditambudza.+
Musandirega ndichiparara,* nekuda kwekunonoka kutsamwa kwenyu.
Zivai kuti ndinotsungirira kuzvidzwa uku ndichiitira imi.+
16 Mashoko enyu akawanikwa, ndikaadya;+
Uye akaita kuti mwoyo wangu upembere uye ufare chaizvo,
Nekuti ndiri kushevedzwa nezita renyu, haiwa Jehovha Mwari wemauto.
17 Handifadzwi nekugara pane vaya vanoita mafaro akanyanyisa.+
18 Nei marwadzo angu asiri kupera uye ronda rangu risingarapiki?
Riri kuramba kupora.
Muchava kwandiri nzvimbo inoita seine mvura asi iyo isina here,
Nzvimbo isingagoni kuvimbwa nayo?
19 Saka zvanzi naJehovha:
“Kana ukadzoka, ndichabva ndakudzosa panzvimbo yako,
Uye uchamira pamberi pangu.
Kana ukaparadzanisa zvinhu zvinokosha nezvinhu zvisina zvazvinobatsira,
Uchava semuromo wangu.*
Vanenge vava kufanira kutouya kwauri,
Asi iwe hauzoendi kwavari.”
20 “Ndiri kukuita rusvingo rwemhangura rwakasimba kuvanhu ava.+
Chokwadi vacharwa newe,
Nekuti ini ndinewe, kuti ndikununure,” ndizvo zvinotaurwa naJehovha.
21 “Ndichakununura paruoko rwevakaipa,
Ndokudzikinura muchanza chevane utsinye.”