Jeremiya
18 Iri ndiro shoko rakauya kuna Jeremiya richibva kuna Jehovha: 2 “Simuka uende kuimba yemuumbi,+ uye ndichaita kuti unzwe mashoko angu ikoko.”
3 Saka ndakaenda kuimba yemuumbi uye ndakamuwana achiumba achishandisa mudziyo wekuumbisa. 4 Asi mudziyo waakanga achiumba nevhu hauna kubuda zvakanaka. Saka muumbi wacho akagadzira mumwe mudziyo waaida* nevhu racho.
5 Shoko raJehovha rakabva rauya kwandiri richiti: 6 “‘Handikwanisi kukuitai sezvaitwa nemuumbi uyu here, haiwa imi imba yaIsraeri?’ ndizvo zvinotaurwa naJehovha. ‘Inzwai! Sezvakaita ivhu riri muruoko rwemuumbi, ndizvo zvamakaita muruoko rwangu, haiwa imi imba yaIsraeri.+ 7 Pese pandichataura nezvekudzura, kuputsa, uye kuparadza rudzi kana umambo,+ 8 rudzi irworwo rwosiya zvakaipa zvarwo zvandakaruyambira, ndichachinjawo pfungwa* pamusoro pedambudziko randakanga ndasarudza kuunza paruri.+ 9 Asi pese pandinotaura nezvekuvaka nekudyara rudzi kana umambo, 10 irwo rwoita zvakaipa pamberi pangu uye rworega kuteerera inzwi rangu, ndichachinja pfungwa* pamusoro pezvakanaka zvandakasarudza kuruitira.’
11 “Zvino ndapota taura nevarume veJudha nevagari vemuJerusarema uchiti, ‘Zvanzi naJehovha: “Ndiri kukugadzirirai dambudziko uye ndiri kukufungirai zano. Ndapota tendeukai panzira yenyu yakaipa, uye chinjai nzira dzenyu nezvamunoita.”’”+
12 Asi ivo vakati: “Hazvichabatsiri!+ Nekuti tichatevera kufunga kwedu, uye mumwe nemumwe wedu achatevera mwoyo wake wakaoma uye wakaipa.”+
13 Saka zvanzi naJehovha:
“Ndapota, bvunzai mega pakati pemarudzi.
Ndiani akambonzwa zvinhu zvakadai?
Mhandara yaIsraeri yaita chinhu chakaipa zvisingaiti.+
14 Chando cheRebhanoni chingabva pamatombo ari pamawere ayo here?
Kana kuti mvura inotonhorera iyo inoyerera ichibva kure ingapwa here?
15 Asi vanhu vangu vakandikanganwa.+
Nekuti vanopa zvibayiro* kuchinhu chisina zvachinobatsira,+
Uye vanoita kuti vanhu vagumburwe munzira dzavo, iwo makwara ekare kare,+
Kuti vafambe nemigwagwa yemusango isina kuenzana uye isina kuti chechetere,*
16 Kuti vaite kuti nyika yavo ive chinhu chinotyisa+
Uye chinhu chinoridzisa muridzo nekusingaperi.+
Munhu wese anopfuura nemo acharamba akatarisa achitya uye achadzungudza musoro.+
17 Ndichaita kuti vapararire pamberi pemuvengi sezvinoita mhepo yekumabvazuva.
Pazuva redambudziko ravo, ndichavafuratira, handizovatarisi.”+
18 Uye ivo vakati: “Uyai tirukire Jeremiya zano,+ nekuti mutemo* hauzoshayikwi kuvapristi vedu kana zano kuvarume vakachenjera kana shoko kumuprofita. Uyai titaure mashoko ekumupikisa* uye ngatirege kuteerera zvaanotaura.”
19 Nditeererei, haiwa Jehovha,
Uye inzwai zviri kutaurwa nevanondipikisa.
20 Zvakanaka zvinofanira kutsiviwa nezvakaipa here?
Nekuti vandicherera gomba kuti vandiuraye.*+
Yeukai kumira kwandakaita pamberi penyu kuti nditaure zvakanaka nezvavo,
Kuti ndibvise hasha dzenyu pavari.
Madzimai avo ngaafirwe nevana uye ngaave chirikadzi.+
Varume vavo ngavaurayiwe nedenda rinouraya,
Uye majaya avo ngaaurayiwe nebakatwa muhondo.+
22 Kuchema ngakunzwike mudzimba dzavo
Pamunongoerekana mavaunzira vapambi.
Nekuti vandicherera gomba kuti vandibate
Uye vaisira tsoka dzangu zviteyeso.+
Musafukidza kukanganisa kwavo,
Uye musadzima chivi chavo pamberi penyu.