Kuvandudza Unyanzvi Hwedu Muushumiri—Kubatsira Vadzidzi veBhaibheri Kuva Nepurogiramu Yakarongeka Yekudzidza Vari Vega

Sei Zvichikosha: Kuti vafambire mberi pakunamata, vadzidzi veBhaibheri havafaniri kungogumira pakudzidza chokwadi chinokosha cheShoko raMwari. (VaH. 5:12–6:1) Kudzidza kunotoda kushanda nesimba. Kunosanganisira kubatanidza zvatinenge tichidzidza nezvatinotoziva nechekare uye kuziva kuti zvinoshanda sei muupenyu hwedu. (Zvir. 2:1-6) Kana vadzidzi veBhaibheri vakadzidza kutsvakurudza vari vega, vachakwanisa kupindura mibvunzo yeBhaibheri vachishandisa mabhuku edu. Kuita zvese zvavanogona kuti vashandise zvavari kudzidza kuchavabatsira kutsungirira miedzo yavachasangana nayo kana vava Zvapupu.—Ruka 6:47, 48.

Maitirwo Azvo:

Mubatsire kuona kuti kunyengetera achikumbira kubatsirwa naJehovha asati atanga kudzidza kunokosha chaizvo.—Joh. 14:26; 1 VaK. 2:10.
Kubva paunotanga kudzidza naye, mukurudzire kugadzirira chidzidzo chake cheBhaibheri. Muratidze bhuku rako raunoshandisa, uye mudzidzise kutara mashoko mashoma achamubatsira kuyeuka mhinduro dzacho.
Ita kuti mudzidzi wako apindure achishandisa mashoko ake. Pamunenge muchidzidza, ita zvekukurukura naye kwete kuti angoita zvekuverenga mhinduro kubva mubhuku rake.
Kurudzira mudzidzi wako kuti averenge Shoko raMwari zuva nezuva. Muratidze purogiramu yokuverenga Bhaibheri iri pajw.org, iyo inoratidza kuti angabudirira sei pakuita izvi. Hazvisi nyore kuti munhu atange kuva netsika yokuverenga Bhaibheri zuva nezuva, asi mubatsire kuona kuti anenge achishandira zviripo.—Pis. 1:2, 3.
Ratidza mudzidzi wako kuti angawana sei mhinduro dzinobva muBhaibheri dzemibvunzo yake achishandisa Watchtower Library kana kuti RAIBHURARI YEPAINDANETI yeWatchtower. Mubatsire kuziva mabhii anomiririra mazita emabhuku atinowanzoshandisa pamisangano.

Edza Izvi Mwedzi Uno:

Pamunenge mapedza kudzidza musoro muduku kana kuti chitsauko, ita kuti mudzidzi wako weBhaibheri ataure zvaadzidza mumashoko mashomanana. Kana usina munhu waunodzidza naye Bhaibheri edza izvi: Pashure pekuverenga chimwe chikamu muBhaibheri kana kuti imwe ndima muNharireyomurindi, edza kupfupikisa zvaunenge waverenga kuti uone kuti wabata zvakadini.