Dare Rinotungamirira Rinoshanda Sei?

Panguva yevaKristu vepakutanga, boka diki ‘revaapostora nevakuru vemuJerusarema’ ndiro raiva dare rinotungamirira raiita zvisarudzo zvinokosha zvaitevedzerwa nevamwe vaKristu vese vakazodzwa. (Mabasa 15:2) Pavaiita zvisarudzo vaibvumirana nekuti vaitanga vakurukura zvinotaurwa neMagwaro, vachibvuma kutungamirirwa nemweya waMwari. (Mabasa 15:25) Ndizvowo zviri kuitwa mazuva ano.

Riri kushandiswa naMwari pakuita kuda kwake. Hama dzakazodzwa dziri muDare Rinotungamirira dzinoda Shoko raMwari chaizvo uye dzine ruzivo rwakawanda panyaya dzeupenyu nepanyaya dzekunamata. Dzinoungana vhiki rega rega kuti dzikurukure nyaya dzine chekuita nesangano rese reZvapupu zvaJehovha. Sezvaingoitwa kare, ungano dziri kupiwa mirayiridzo yemuBhaibheri pachishandiswa tsamba kana kuti vatariri vematunhu nevamwewo vanotumwa nesangano. Izvi zvinoita kuti tibatane pamafungiro edu uye pane zvatinoita. (Mabasa 16:4, 5) Dare Rinotungamirira rinoona nezvekugadzirwa kwezvekudya zvekunamata, rinokurudzira munhu wese kuti aise basa rekuparidza Umambo pekutanga muupenyu, uye rinotungamirira panyaya dzekupa hama mabasa musangano.

Rinobvuma kutungamirirwa nemweya waMwari. Dare Rinotungamirira rinobvuma kutungamirirwa naChangamire wezvinhu zvese, Jehovha, uye neMusoro weungano, Jesu. (1 VaKorinde 11:3; VaEfeso 5:23) Vari mudare iri havazvioni sevatungamiriri vevanhu vaMwari. Ivo pamwe chete nevaKristu vese vakazodzwa “vanoramba vachitevera Gwayana pasinei nekwarinoenda.” (Zvakazarurwa 14:4) Dare Rinotungamirira rinokoshesa chaizvo kurinyengeterera kwatinoita.

• Ndivanaani vaiva mudare rinotungamirira panguva yevaKristu vepakutanga?

• Dare Rinotungamirira rinoratidza sei kuti rinoda kutungamirirwa naMwari?