“Rambai Muchiedza Kana Muri Mukutenda”
Mapfundo Makuru Omuna VaKorinte Wechipiri
MUAPOSTORA Pauro akanga achiitira hanya pamusoro pamaKristu aiva muKorinte. Aizorangarira sei zano rakapiwa mutsamba yake yokutanga kwavari? Iye akanga ari muMakedhonia apo Tito akasvika nomushumo wakanaka wokuti tsamba yacho yakanga yasuruvarisa VaKorinte kupinda mukupfidza. Ikoko kwakafadza sei Pauro!—2 VaKorinte 7:8-13.
Pauro akanyora VaKorinte Wechipiri ari muMakedhonia, zvimwe pashure papakati pegore muna 55 N.V. Muiyi tsamba, iye akakurukura nhano dzakaitwa kuchengeta ungano yakachena, kuvaka chishuvo chokupa zvipo kuna vatendi vaishaiwa muJudhea, uye akadzivirira huapostora hwake. Zvizhinji zveizvo Pauro akataura zvinogona kutibetsera ku‘ramba tichiedza kana tiri mukutenda.’ (13:5) Naizvozvo, chii chatinogona kuwana muiyi tsamba?
Mushumiri waMwari Wenyaradzo
Muapostora akaratidza kuti sezvo Mwari achitinyaradza mudambudziko redu rose, tinofanira kunyaradza vamwe ndokuvanyengeterera. (1:1–2:11) Kunyange zvazvo Pauro navasonganiri vake vakanga vari mudzvinyiriro yakakomba, Mwari akavanunura. Bva, VaKorinte vaigona kubetsera neminyengetero nokuda kwavo, kunyange sezvatinofanira kunyengeterera vamwe vanogamuchira kutenda kwechokwadi. Asi zvakadiniko nomurume woutere anodudzwa muna 1 VaKorinte ganhuro 5? Sezviri pachena iye akanga adzingwa asi akanga apfidza. Anofanira kuva akanyaradzwa sei apo VaKorinte vakatambanudza kanganwiro ndokumudzorera nenzira yorudo pakati pavo.
Mashoko aPauro anogona kuwedzera kunzwisisa kwedu ushumiri hwechiKristu, kusimbisa kumira kwedu nokuda kwokutenda kwechokwadi. (2:12–6:10) Chokwadi, vashumiri vesungano itsva vane ropafadzo yokuva mu“kufora kworukundo” Mwari achitungamirira! Pauro navashandi biyake vakanga vane ushumiri hunokosha nemhaka yetsitsi dzavakaratidzirwa. Kufanana navo, vakazodzwa vomuzuva razvino uno vane ushumiri hweyananiso. Bva, Zvapupu zvose zvaJehovha zvinopfumisa vamwe kupfurikidza noushumiri hwazvo.
Kwanisa Utsvene Uye Iva Ano Rupo
Pauro anotiratidza kuti vashumiri vechiKristu vanofanira kukwanisa utsvene mukutya Jehovha. (6:11–7:16) Kana tichizomira takasimba mukutenda, tinofanira kudzivisa kusungwa pajoko navasingatendi, uye tinofanira kucheneswa pasvipiso yenyama neyomudzimu. VaKorinte vakaita chiito chokuchenesa kupfurikidza nokudzinga muiti wezvakaipa woutere, uye Pauro akafara kuti tsamba yake yokutanga yakanga yavasuruvarisa kuti vapfidze nokuda kworuponeso.
Tinodzidzawo kuti vashumiri vanotya Mwari vanotuswa nokuda kworupo rwavo. (8:1–9:15) Pamusoro pemipiro nokuda kwa“vanhu vatsvene” vanoshaiwa, Pauro akadudza muenzaniso wakaisvonaka wavaMakedhonia. Vakanga vave vane rupo runopfuura simba ravo, uye iye aikarira kuona rudzi rumwe cheterwo rworupo kuVaKorinte. Kupa kwavo—uye kwedu—kunofanira kubva mumwoyo, nokuti “Mwari anoda mupi anofara” uye anopfumisa vanhu vake nokuda kworudzi rwuri rwose rworupo.
Pauro—Muapostora Anoitira Hanya
Apo tinoita chinhu chipi nechipi mubasa raJehovha savashumiri, ngatiganzei maari, kwete matiri timene. (10:1–12:13) Pashure pokurangarira zvose, tinogona kuparadza kurangarira kwenhema nezvombo zvomudzimu bedzi “zvine simba kupfurikidza naMwari.” “Vaapostora vanopfuura vose” vanoganza pakati paVaKorinte vaisatongogona kuwirirana nechinyorwa chaPauro chetsungiriro somushumiri waKristu. Bva, kuti agorega kunyanyokwidzwa, Mwari haana kubvisa “munzwa [wake] waiva munyama”—zvichida kusaona zvakanaka kana kuti vaapostora ivavo venhema. Pauro aizosva aganza zvake noutera hwake kuti “simba raKristu” rigoramba riri paari kufanana netende. Somunhu akamira akatsiga mukutenda, akanga asina kubvumikisa kuva muduku kuvaapostora vanopfuura vose. VaKorinte vakanga vaona zvibvumikiso zvohuapostora izvo Pauro akanga aita pakati pavo “kupfurikidza nokutsungirira kwose, uye kupfurikidza nezviratidzo nezviratidziro namabasa esimba.”
Somushumiri uye somuapostora, Pauro akanga aine fariro dzomudzimu dzavatendi biyake pamwoyo, kunyange sezvatinofanira kuva nadzo. (12:14–13:14) Iye ‘nenzira yokufara zvikurusa aizopedzwa chose chose nokuda kwemweya yavo.’ Asi Pauro aitya kuti pakusvika muKorinte, aizowana vamwe vakanga vasina kupfidza mabasa avo enyama. Nokudaro, akapangira vose kuramba vachiedza kana vakanga vari mukutenda ndokunyengetera kuti “vasaite chinhu chakaipa.” Mumhedziso, iye akavakurudzira kuti vafare, vagadziridzwe ndokunyaradzwa, kufunga nebvumirano, uye kurarama norugare. Izano rakaisvonaka zvakadini nokuda kweduwo!
Rambai Muchiedza!
Nokudaro tsamba yechipiri yaPauro kumaKristu eKorinte inokarakadza nzira dzakasiana-siana dzokuramba tichiedza nadzo kana tiri mukutenda. Zvamazvirokwazvo mashoko ake anofanira kutisunda kunyaradza vamwe, kunyange sezvo Mwari achitinyaradza muchitambudzo chedu chose. Icho muapostora akataura pamusoro poushumiri hwechiKristu chinofanira kutisunda kuhuita nokutendeka apo tinokwanisa utsvene mukutya Jehovha.
Kushandisa zano raPauro kungasanotiita vane rupo zvikuru navanobetsera. Bva, mashoko ake anofanira kutisunda kuganza muna Jehovha, kwete isu timene. Anofanira kusimbisa itiro hanya yedu yorudo nokuda kwavatendi biyedu. Uye zvirokwazvo aya namamwe mapfundo ari muna VaKorinte Wechipiri anogona kutibetsera ku‘ramba tichiedza kana tiri mukutenda.’
[Bhokisi/Mufananidzo uri papeji 26]
RATIDZIRA MBIRI YAJEHOVHA: Apo Mosesi akaburuka muGomo reSinai aine mahwendefa eChipupuriro, chiso chake chakabudisa mwaranzi nemhaka yokuti Mwari akanga ataura naye. (Eksodho 34:29, 30) Pauro akadudza ikoku ndokutaura, kuti: “Zvino isu tose tinoti tichitarira nechiso chisina kufukidzwa kubwinya kwa[Jehovha, NW] sapachionioni, tinoshandurwa tichifanana nomufananidzo iwoyo tichibva pakubwinya kumwe tichienda pano kumwe kubwinya, sezvinobva kuna [Jehovha Mudzimu, NW].” (2 VaKorinte 3:7-18) Zviringiriro zvekare zvomumaoko zvakanga zvakaitwa nesimbi dzakadai somukore kana kuti ndarira uye zvainatswa zvikuru kuti zvive napamusoro panoratidzira zvakanaka. Kufanana nezviringiriro, vakazodzwa vanoratidzira mbiri yaMwari inovapenyera ichibva kuna Jesu Kristu, ‘achivashandura [nenzira inofambira mberi] muchimiro’ chakapiwa kupfurikidza noMwanakomana waJehovha anoratidzira mbiri. (2 VaKorinte 4:6; VaEfeso 5:1) Kupfurikidza nomudzimu mutsvene naMagwaro, Mwari anosika mavari “hunhu hutsva,” ratidzirwo yamavara ake amene. (VaEfeso 4:24; VaKorose 3:10, NW) Kana tariro yedu iri yokudenga kana kuti yapasi, ngatiratidzirei hunhu ihwohwo ndokukoshesa ropafadzo yokuratidzira mbiri yaMwari muushumiri hwedu.
[Bhokisi/Mufananidzo uri papeji 27]
“ZVOMBO ZVOKURURAMA”: Imwe nzira iyo Pauro navasonganiri vake vakazvirumbidza nayo vamene savashumiri vaMwari yakanga iri “kupfurikidza nezvombo zvokururama zviri kurudyi nokuruboshwe.” (2 VaKorinte 6:3-7, NW) Rudyi rwaishandiswa kushandisa munondo, uye ruboshwe kubata nhovo. Kunyange zvazvo vakadenhwa mumativi ose, Pauro navashandi biyake vakanga vakashongedzerwa nezvombo kuti varwe hondo yomudzimu. Yakarwiwa navadzidzisi venhema na“vaapostora vanopfuura vose” zvokuti ungano yeKorinte yaisazobviswa pakuzvipira kuna Kristu. Pauro haana kutendeukira kuzvombo zvenyama inotadza—manomano, unyengeri, kana kuti ujarijari. (2 VaKorinte 10:8-10; 11:3, 12-14; 12:11, 16) Panzvimbo pezvo, “zvombo” zvakashandiswa zvakanga zvakarurama, kana kuti zvakanaka, mutoo wokufambisira mberi nawo nzira yokunamata kwechokwadi mukurwisana nedenho dzose. Zvapupu zvaJehovha zvino zvinoshandisa “zvombo zvokururama” zvakadaro nokuda kwedonzo rimwe chetero.