Krisimisi Inorevei Kwauri?
Waizopindura sei? Krisimisi(1) inguva yokuva nemhuri yako; (2) inguva yamapati; (3) inguva yorudzidziso; (4) inguva inotambudza; (5) inguva yokusuruvara; (6) inguva yokutengeserana kworuzha.
KUNYANGE zvazvo kungaratidzika kuva kunoshamisa, pavanhu vanopfuura 1 000 vakanzverwa muBritain, vatanhatu bedzi muzana vakarangarira Krisimisi kuva zvikurukuru nhambo yorudzidziso. Mukupesana, 48 muzana yakafunga nezveKrisimisi zvikurukuru senguva yokuva nemhuri yavo. Zvirokwazvo, vakawanda vanotaura kuti inguva chaiyo yavana. Chaizvoizvo, mumwe musikana ane makore gumi nerimwe okukura, apo akabvunzwa chaaida zvikurusa pamusoro peKrisimisi, akapindura, kuti: “Manyemwe, kunzwa kwomufarwa, [uye] kupa zvipo.” The Making of the Modern Christmas rinobvuma kuti “simbiso dzakasimba zvikurusa . . . dzeKrisimisi ya‘magamuchidzanwa’ pasina kupokana dziri pamusha, mhuri uye zvikurukuru vana.”
Asi zvikurukuru ndimo muchiKristudhomu chokumadokero umo Krisimisi iri chinhu chemhuri, apo hama dzokunyama dzinoungana kuzotsinhana zvipo. Munyika umo Eastern Orthodox Church inodzora, vanhu vanoisa simbiso huru paIsita; zvisinei, nguva yeKrisimisi inowanzova nhambo yezororo.
“Bhizimisi Rokutengeserana”
Krisimisi “yakava nokutengeserana . . . kunoshamisa,” inodaro The New Encyclopœdia Britannica. Ikoku zvichida hakusati kuri kwechokwadi zvikuru kune imwe nzvimbo kupfuura muJapan.
“VaJapan vakarega nyengedzo yose yorudzidziso ndokuchinja Krisimisi kuva bhizimisi rokutengeserana chose,” inoshuma kudaro Daily Record yeWashington. Krisimisi muJapan, inowedzera kudaro, ku“chengeta kukuru kunosimbisa kutengeserana uye kunosimbisa zvishomanene rutivi rworudzidziso.”
Kunyange munyika dzakawanda dzinonzi dzechiKristu, urwu “rutivi rworudzidziso” rwunowanzova rwakaoma kucherechedza. Makore 40 apfuura, kamwe kabhukwana kanorwisana neKrisimisi kakachema, kachiti: “Krisimisi inotsigirwa nenyika yezvokutengeserana. Iyo inhambo hurusa yokuita mari yegore. Vazvinabhizimisi vanoti ndevechiKristu vanotarira mberi kunhambo yeKrisimisi, kwete nokuda kwaKristu, asi nokuda kwemhindu yemari.” Mashoko iwayo ndeechokwadi sei nhasi! Munyika dzakawanda, hatiwanzosvika mavambo echikamu chechina chokupedzisira chegore tisati tanzwa zviyeuchidzo zvokuti mazuva mangani asara okutenga zvipo zveKrisimisi inotevera. Bhizimisi rinova rinobudirira zvikuru sezvo gore rinoguma, nechakawanda sechikamu chimwe chezvina chokutengesa kwegore negore kwezvitoro chinouya panguva yeKrisimisi.
Chipi kana chipi Krisimisi inoreva kwauri zvino, ungasanoshamisika kuti yakatanga sei. Bhaibheri, kutaura idi, rinotsigira kupa zvipo paKrisimisi here? Kuchengetwa kweKrisimisi kwanhasi ndokwechiKristu zvirokwazvo here? Ngationei.
[Vakatipa Mufananidzo uri papeji 2]
Butiro: Thomas Nast/Dover Publications, Inc., 1978