Unoyeuka Here?

Wakawana zvinyorwa zvenguva pfupi yapfuura zveNharireyomurindi kuva zvoukoshi hunoshanda kwauri here? Ipapo kuregererei kuedza kuyeuka kwako nemibvunzo inotevera?

◻ Armagedhoni ichava yakaita sei? (Zvakazarurwa 16:14, 16)

Haisati ichizova apocalypse yenyukireya kana kuti ngwavaira inokonzerwa navanhu. Aiwa, ihondo yaMwari yokugumisa hondo dzose dzavanhu, kuparadza vose vanotsigira hondo dzakadaro, uye kuunza rugare rwechokwadi nokuda kwaavo vanoda rugare. Haisati ichizononoka. (Habhakuki 2:3)—4/15, peji 17.

◻ Muchato worudzii unokudza Jehovha?

Muchato une mavara omudzimu anokurira nzira dzenyika uchakudza Jehovha zvechokwadi. VaKristu vachafarikanya nhambo yacho kana vakadzivisa tsika dzenyika dzisingakoshi, magamuchidzanwa, uye kunyanyisa; kana vasingaiti kuti udzongonyedze mibato youmwari yenguva dzose; uye kana vachiratidzira kuva nemwero panzvimbo pokunyanyisa.—4/15, peji 26.

◻ Chii chinoratidzira munhu akatendeseka?

Munhu akatendeseka anogona kuvimbwa naye, kwete chete navanhu vaanoziva asi, zvinokosha zvikuru, naMwari. Kuchena kwomwoyo womunhu akadaro kunooneka muzviito zvake. Haanyengedzi. Haana unyengeri uye haana kushata. (2 VaKorinte 4:2)—5/1, peji 6.

◻ Nei Jeremia akati: “Zvakanaka kuti munhu atakure joko rake achiri muduku”? (Mariro aJeremia 3:27)

Kudzidza kugonana nemiedzo paanenge achiri muduku kunobetsera kugadzirira munhu kuti anangane nezvinetso zvokukura. (2 Timotio 3:12) Betsero dzokutendeka dzinopfuura zvikuru nyaradzo ipi neipi yechinguvana iyo kubvumirana pane zvisina kufanira kungaunza.—5/1, peji 32.

◻ Chii chakafananidzirwa nokuonekwa kwaMosesi naEria muchiono chokushanduka chitarisiko?

Mumashoko akapoteredza kushanduka chitarisiko, Mosesi naEria vakanga vari vamiriri vakakodzera vehama dzakazodzwa dzaJesu. Kuti ivo, pamwe chete naJesu, “vakaonekwa vachibwinya” kwaifananidzira kuti vaKristu vakazodzwa vakatendeka vaizo“kudzwawo pamwe chete” naJesu mugadziriro yoUmambo hwokudenga. (Ruka 9:30, 31; VaRoma 8:17; 2 VaTesaronika 1:10)—5/15, mapeji 12, 14.

◻ “Chakavanzika chinoyera” chaMwari chii? (1 VaKorinte 2:7, NW)

“Chakavanzika chinoyera” chaMwari chinonangidzirwa pana Jesu Kristu. (VaEfeso 1:9, 10) Zvisinei, hakusi kungozivikanwawo zvako kwaJesu saMesiya akapikirwa. Zvinobatanidza hurumende yokudenga, Umambo hwaMwari hwaMesiya, uye zvinobatanidza basa rakapiwa Jesu kuti aite mudonzo raMwari.—6/1, peji 13.

◻ MuKristu anofanira kurangarira sei kukwegura kana kuti chirwere?

Panzvimbo pokurangarira miedzo yakadaro seinoganhurira basa rake kuna Jehovha, anofanira kuiona somukana wokuwedzera kuvimba kwake. Anofanirawo kuyeuka kuti kukosha kwemuKristu kunoyerwa kwete bedzi nokukura kwemibato yake asiwo nokutenda kwake uye kukura kworudo. (Marko 12:41-44)—6/1, peji 26.

◻ Kushandisa kwaJehovha vanhu panzvimbo pengirozi kuti vanyore Bhaibheri kunoratidza sei uchenjeri hwake hukuru?

Kudai vanhu vakanga vasina kushandiswa zvachose, tingadai tine chinetso chokunzwisisa shoko reBhaibheri. Uyewo, Bhaibheri rine ushamwari, zvakasiyana-siyana, uye rinofadza zvichikonzerwa navanhu.—6/15, peji 8.

◻ Chii chiri chakavanzika chomufarwa wemhuri?

Chakavanzika chacho chiri mumapeji eShoko raMwari, Bhaibheri, uye mukushandiswa kwenheyo dzaro, dzakadai sokuzvidzora, kuziva umusoro, kurukurirano yakanaka, uye rudo.—6/15, peji 23, 24.

◻ Kurapwa kwakaitwa naJesu kwakanga kwakasiyana zvikuru sei nouko kunowanzoitwa neavo vanotaura kuva nemasimba okurapa nhasi?

Pakanga pasina kuratidzirwa kwakasimba kwemirangariro kubva kumapoka uye Jesu akanga asingaiti zvokuonererwa. Mukuwedzera, Jesu haana kumbokundikana kurapa ndonda achitaura kuti zvipiriso zvadzo zvakanga zvisina kuwanda zvakakwana kana kuti dzakanga dzisina kutenda.—7/1, peji 5.

◻ Jehovha akabetsera sei vanhu vake kuva nenzvimbo mudonzo rake roumwari pamusoro pezita rake noUmambo?

Kutanga, Jehovha akaronzesa vanhu vake chokwadi. Chechipiri, akavapa mudzimu mutsvene wake. Uye chechitatu, tine gadziriro yedu youhama hwenyika yose uye gadziriro yesangano raJehovha yokunamata.—7/1, mapeji 19, ne20.

◻ Kunaka chii?

Kunaka kunakisisa kwetsika, chiito chakanaka nokufunga. Harisi vara risingashandi asi ivara rinoshanda, rakananga. Kunaka kunoreva zvinopfuura kudzivisa chivi; kunoreva kuronda zvakanaka. (1 Timotio 6:11)—7/15, peji 14.

◻ Ndeipi nhaka inokosha zvikurusa iyo vabereki vanogona kupa vana vavo?

Nhaka inokosha zvikurusa muenzaniso wavo wokuratidza rudo kune vamwe. Nenzira yakatanhamara, vana vanoda kuona nokunzwa vabereki vavo vachitaura uye kuratidza kuda Mwari kwechokwadi muchinhu chose chavanoita.—7/15, peji 21.

◻ Ndezvipi zvimwe zvinokosha pafundo yemhuri inobudirira?

Fundo yemhuri inofanira kuva yenguva dzose. Unofanira ‘kutenga nguva’ yefundo yacho. (VaEfeso 5:15-17) Ita kuti nhambo dzefundo dzive dzinofadza vana kupfurikidza nokuita kuti Bhaibheri rinakidze. Kuti vana vaifarikanye, vanofanira kunzwa vachibatanidzwa mairi.—8/1, mapeji 26, 28.