Unoyeuka Here?

Wakafadzwa nokuverenga magazini eNharireyomurindi omunguva pfupi yapfuura here? Kana zvakadaro, ona kana uchigona kupindura mibvunzo inotevera:

• Nei mibvunzo yakabvunzwa muchitsauko 38 chaJobho ichifanira kufungisiswa kunyange nhasi?

Mabasa anoshamisa akawanda ayo Mwari akaita kuti afungwe nezvawo haagoni kunzwisiswa zvakazara kunyange nemasayendisiti emazuva ano. Anosanganisira kuti giravhiti inoita kuti pasi rirambe riri mugwara raro sei, chiedza chii chaizvoizvo, nei kuine mazaya echando asingaperi akasiyana-siyana, maumbirwe anoitwa madonhwe emvura, uye kuti simba rinobatanidzwa sei mumabhanan’ana.—4/15, mapeji 4-11.

• Mienzaniso ipi yomuBhaibheri ingatibatsira kurarama zvinobudirira tichinzwa kuora mwoyo?

Asafi, Bharuki, naNaome vakatarisana nenguva dzinoodza mwoyo, uye chinyorwa chavo chomuMagwaro chokurarama zvinobudirira nezvinetso zvakadaro chingatibatsira.—4/15, mapeji 22-4.

• Ndedzipi dzimwe nzira dzinoshanda dzokubatsira chirikadzi dzechiKristu?

Shamwari dzingaratidza zvakajeka uye nomutsa kuti dziri kuda kubatsira. Nhengo dzemhuri kana kuti vamwe vangabatsira nemari kana zvinhu, pazvinenge zvichidiwa zvechokwadi. Vamwe vaKristu vangabatsirawo nokuratidza rudo rwoushamwari, vachitsigira mumudzimu nokunyaradza.—5/1, mapeji 5-7.

• Nei zvichikosha kuroora kana kuroorwa “munaShe bedzi,” sezano rinopiwa pana 1 VaKorinde 7:39?

Kuroorana nevasingatendi kakawanda kwakaguma nematambudziko. Uyezve, kutevera zano raJehovha Mwari iri kunoratidza kuvimbika kwaari. Patinoita maererano neShoko raMwari, mwoyo yedu haitipi mhosva. (1 Johani 3:21, 22)—5/15, mapeji 20-1.

• Sezvo Jehovha ari iye anogona kukanganwira zvivi zvedu, nei vaKristu vachireurura zvivi zvakakomba kuvarume vakuru vari muungano?

Hungu, muKristu anofanira kutsvaka kukanganwirwa zvivi zvakakomba naJehovha. (2 Samueri 12:13) Asi sezvo Dhavhidhi akabatsirwa naNatani, varume vakuru vakura vari muungano vanogona kubatsira vatadzi vanopfidza. Kuenda kuvakuru kunofambirana nezano riri pana Jakobho 5:14, 15.—6/1, peji 31.

• Uchapupu hupi huripo hwokuti tinofanira kutarisira nherera nechirikadzi dzinoshayiwa?

Chinyorwa chenhau chinoratidza kuti kutarisira kwakadaro kwairatidza kunamata kwechokwadi pakati pavose vaHebheru vekare nevaKristu vepakuvamba. (Eksodho 22:22, 23; VaGaratiya 2:9, 10; Jakobho 1:27) Muapostora Pauro akataurawo muMagwaro mirayiridzo yakajeka kuvaKristu yokutarisira chirikadzi dzinoshayiwa. (1 Timoti 5:3-16)—6/15, mapeji 9-11.

• Chii chinodiwa kuti upenyu hufadze, huve nechinangwa?

Tinofanira kukudziridza uye kuramba tine ukama hwakanaka naJehovha, Baba vedu vokudenga. Kudzidza Bhaibheri iyamuro inokosha kuti tiite saizvozvo.—7/1, mapeji 4-5.

• Munhu mumwe nomumwe ane mudzimu usingafi here?

Kunyange zvazvo vamwe vanhu vachidavira kuti mudzimu—kwete mweya—haufi, Bhaibheri haritsigiri pfungwa iyi. Rinoratidza kuti munhu paanofa, anodzokera kuguruva uye haazovipo. Asi Mwari anoramba ane mano okumudzorera kuupenyu, saka tariro ipi neipi youpenyu hweramangwana, nokumutswa, iri kuna Mwari. (Muparidzi 12:7)—7/15, mapeji 3-6.

• Dhanieri akanga ari kupi apo vaHebheru vatatu vakaedzwa pabani reDhura?

Bhaibheri haritauri. Zvimwe Dhanieri akanga asingasungirwi kuva ikoko nemhaka yechinzvimbo chake, kana kuti angadai akanga asipo nebasa rehurumende. Asi tinogona kuva nechivimbo chokuti akanga akatendeka kuna Jehovha Mwari nokuti haana kubvumirana pane zvisina kufanira.—8/1, peji 31.