“Swederai Pedyo naMwari, Uye Achaswedera Pedyo Nemi”
Asati Adzidza Bhaibheri uye Azoridzidza—Upenyu Hwekare Husina Tariro, Remangwana Rine Tariro
“SHOKO raMwari ibenyu uye rine simba, rakapinza kupfuura bakatwa ripi neripi . . . uye rinokwanisa kunzwisisa kufunga nevavariro dzemwoyo.” (VaHebheru 4:12) Akadaro muapostora Pauro nezvesimba rakapinza reshoko raMwari. Kukwanisa kwaro kusvika pamwoyo kwakanyanya kuonekwa muzana remakore rokutanga C.E. Pasinei nokufurira zvisina kunaka kwaiitika panguva iyoyo, vaya vakava vaKristu vakapfeka unhu hutsva.—VaRoma 1:28, 29; VaKorose 3:8-10.
Simba rinochinja reshoko raMwari, sezvakanyorwa muBhaibheri, rinoonekawo mazuva ano. Somuenzaniso, funga zvakaitika kune mumwe murume murefu, akasimba anonzi Richard. Asingatani kushatirwa, Richard airwa kana angodenhwa zvishomanana. Upenyu hwake hwakanga hwakanganiswa nechisimba. Richard akatopinda muchikwata chomutambo wetsiva. Akadzidzira zvakasimba ndokuva shasha yetsiva yakasimba zvikuru yokuWestphalia, Germany. Richard ainwawo zvikuru uye kakawanda aiwanzopinda mumabopoto. Pane rimwe rawo, mumwe munhu akaurayiwa, uye Richard akapotsa apinda mujeri.
Ko muchato waRichard? “Ini naHeike tisati tadzidza Bhaibheri,” anodaro Richard, “taiita mazvakemazvake. Heike aipedza nguva yakawanda aine shamwari dzake dzechisikana, ini pandaiita zvinhu zvandaifarira—zvikurukuru tsiva, uye mitambo yomumvura.”
Richard naHeike pavakatanga kudzidza Bhaibheri neZvapupu zvaJehovha, Richard akaomerwa nepfungwa yokuti anofanira kuchinja miitiro yaaiona seisingabviri kuchinja kuitira kuti upenyu hwake huenderane netsika dzakakwirira dziri muShoko raMwari. Zvisinei, sezvaakasvika pakuziva Jehovha Mwari zviri nani, Richard akakudziridza chido chakasimba chokumufadza. Richard akaziva kuti Mwari haatenderi vanhu vanoda chisimba kana kuti vaya vanochiitira kuvarairwa. ‘Mweya waJehovha unonyatsovenga munhu wose anoda zvechisimba,’ Richard akaziva izvozvo.—Pisarema 11:5.
Uyezve, tariro yokurarama nokusingaperi muparadhiso pasi pano yakafadza Richard naHeike. Vaida kuvamo pamwe chete! (Isaya 65:21-23) Kukoka kwokuti “swederai pedyo naMwari, uye achaswedera pedyo nemi” kwakaorora Richard zvikuru. (Jakobho 4:8) Akaona kukosha kunoita kuteerera zano iri rakafuridzirwa rinoti: “Usagodora munhu unomanikidza; usatevera kunyange nomumwe wemitoo yake. Nokuti mutsauki inyangadzi kuna Jehovha; asi une ukama navakarurama.”—Zvirevo 3:31, 32.
Pasinei nokuva nechido chakasimba chokuchinja nzira dzake, Richard akaziva kuti aisagona kuzviita nesimba rake pachake. Akasvika pakuona kukosha kunoita kutsvaka kubatsirwa naMwari mumunyengetero. Saka akaita maererano nemashoko aJesu kuvaapostora Vake anoti: “Rambai muchinyengetera, kuti murege kupinda mumuedzo. Zvechokwadi, mudzimu unoda, asi nyama haina simba.’—Mateu 26:41.
Aziva maonero aMwari chisimba uye kufufutirwa nokutsamwa, pakanga pasina mubvunzo mupfungwa dzaRichard kuti tsiva waiva mutambo usingagamuchirwi. Achibatsirwa naJehovha uye achikurudzirwa nevaya vaidzidza Bhaibheri naye, Richard akarega zvechisimba. Akarega tsiva nemabopoto ndokusarudza kunatsiridza upenyu hwake hwemhuri. “Kudzidza chokwadi cheBhaibheri kwandibatsira kumira ndokufunga ndisati ndaita chimwe chinhu,” anodaro Richard, uyo zvino mutariri munyoro mune imwe ungano yeZvapupu zvaJehovha. Anotizve: “Iye zvino ndinotungamirirwa norudo uye ruremekedzo muukama hwangu nomudzimai wangu nevana vangu. Nokuda kweizvi, mhuri yedu yaswededzwa pamwe chete.”
Dzimwe nguva vanhu vakaudzwa zvisiri izvo vakapomera Zvapupu zvaJehovha kuti zvinoparadza mhuri. Zvisinei, mienzaniso yevanhu vakaita saRichard inoratidza kuti zvavanotaura hazvisizvo. Kutaura zvazviri, chokwadi cheBhaibheri chingaguma nokutsiga kwemhuri uye remangwana rine tariro kune vaya vakambova noupenyu hwekare husina tariro.—Jeremia 29:11.
[Mashoko okukwezva vaverengi ari papeji 9]
“Tariro yeparadhiso pasi pano yakaita kuti ndichinje”
[Bhokisi riri papeji 9]
Nhungamiro dzeBhaibheri Dzinoshanda
Bhaibheri rinogona kuchinja upenyu hwevanhu zvikuru. Hedzino dzimwe nhungamiro dzeMagwaro dzakabatsira vanhu vane chisimba kuchinja:
“Une mwoyo murefu unopfuura une simba; unodzora mweya wake, unopfuura unotapa musha.” (Zvirevo 16:32) Kutsamwa kusingadzorwi chiratidzo chokusava nesimba, kwete chesimba.
“Kungwara kwomunhu kunodzora kutsamwa kwake.” (Zvirevo 19:11) Kungwara uye kunzwisisa mamiriro ezvinhu kunobatsira munhu kuona chiri seri kwezvikonzero zvaita kuti udenhwe uye kunogona kudzivirira kutsamwa kwepakarepo.
‘Usashamwaridzana nomunhu ane hasha kuti urege kudzidza nzira dzake.’ (Zvirevo 22:24, 25) VaKristu vanochenjerera kusashamwaridzana nevaya vasingatani kutsamwa.