Vaverengi Vanobvunza Kuti

Dhiyabhorosi Munhu Chaiyeiye Here?

Hungu, Bhaibheri rinodzidzisa kuti chaizvoizvo, Satani Dhiyabhorosi munhu chaiye. Zvisinei, vanopikisa Bhaibheri vanoseka pfungwa yokuti Dhiyabhorosi munhu chaiye. Vanoti Satani anongomirira uipi huri muvanhu.

Tinofanira kushamisika here kuti nei vanhu vasinganyatsozivi kuti Satani ndiani? Kwete. Kungopa muenzaniso: Tsotsi ringadzima mafingapirindi panzvimbo parinenge raparira mhosva richiitira kuti risazivikanwa uye kuti rirambe richipara mhosva risingabatwi. Saizvozvowo, Satani itsotsi remakoko, anofarira kupara mhosva pachivande, achikurudzira kuparara kwetsika. Jesu akaratidza zvakajeka kuti Satani ndiye anokonzera uipi hunowanika muvanhu. Jesu akadana Satani kuti “mutongi wenyika ino.”—John 12:31.

Dhiyabhorosi akabva kupi? Pakutanga akasikwa ari chisikwa chakakwana chomudzimu kudenga, ngirozi iyi yakapanduka yakazviita Dhiyabhorosi payakava nechido chakanyanya chokunamatwa nevanhu panzvimbo paMwari. Bhaibheri rinotaura nezvokukurukurirana kwakaitika pasi pano pakati paSatani naJesu, kunoratidza chinangwa choudyire chaDhiyabhorosi. Satani akaedza kuita kuti Jesu ‘awire pasi amunamate kamwe chete.’—Mateu 4:8, 9.

Saizvozvowo paaitaura naMwari, Satani akaratidza zvinangwa zvake, sokunyorwa kwazvakaitwa mubhuku raJobho. Aizoita zvose zvaaigona kukurudzira vanhu kuti varambe Mwari.—Jobho 1:13-19; 2:7, 8.

Chimbofungidzira izvi: kana Satani akataura naJehovha Mwari naJesu Kristu, angave sei uipi huri mune vanhu? Hapana kana uipi hupi zvawo huri muna Mwari kana Mwanakomana wake! Saka zviri pachena kuti Satani munhu chaiye, chisikwa chomudzimu chakaipa chisingaremekedzi Jehovha kana Jesu.

Zvinhu zvakaipa zvinoitwa nevanhu zvinopupurira kuti Dhiyabhorosi ariko zvechokwadi. Hurumende dzenyika ino dzinorega zvokudya zvichiora asi vanhu vadzo vachifa nenzara. Nyika dzinochengeta zvombo zvinoparadza nechinangwa chehondo. Dzinosvibisa zvakatipoteredza zviri pasi. Asi vanhu vakawanda havazivi kuti unhu hwakadaro hwokuvengena uye hwokuzvikuvadza hunobva kupi. Nei?

Bhaibheri rinoratidza kuti Satani ‘akapofumadza pfungwa vaya vasingatendi.’ (2 VaKorinde 4:4) Kuti atonge vanhu, Satani anoshandisa sangano risingaoneki. Iye “mutongi wemadhimoni.” (Mateu 12:24) Sezvinongoita mutungamiriri wechikwata chematsotsi anokwanisa kutungamirira chikwata chematsotsi achiita kuti asazivikanwe nevamwe vanobatanidzwa, saka Satani anoshandisa sangano rake rine ngozi rengirozi dzakaipa kutonga vanhu vakawanda vasingatombozivi zvachose kuti ndiye ani.

Tinoonga chaizvo kuti Bhaibheri rinofumura Dhiyabhorosi nesangano rake! Saka tinogona kutora matanho okurwisa Dhiyabhorosi. Bhaibheri rinotikurudzira kuti, “Zviisei pasi paMwari; asi rwisanai naDhiyabhorosi, uye iye achakutizai.”—Jakobho 4:7.