Rumbidza Jehovha Zuva Nezuva
1 Mwari wedu, Jehovha, Musiki anoshamisa, ane rudo, Manyuko oupenyu hwose nomufaro. Nemhaka youkuru hwake, iye zvirokwazvo anofanirwa nokurumbidza kunobva kuchisiko chake chose. Somunhu mumwe nomumwe, tinoshuva kutaura sezvakaita wezvamapisarema, kuti: “Ndicharamba ndichiwedzera kukurumbidzai. Muromo wangu uchareva kururama kwenyu, nokuponesa kwenyu zuva rose.” (Pis. 71:14, 15) Kuti tiite izvozvi, tinofanira kutsvaka nzira dzokurumbidza nadzo Jehovha zuva nezuva ndokusundwa kutaura zvakanaka nezvake, kururama kwake, uye gadziriro dzake dzoruponeso.
2 VaKristu vapakuvamba vakagadza muenzaniso wakaisvonaka mukurumbidza Jehovha. Pamusoro pavane 3 000 vakabhapatidzwa paPentekosta, tinorava pana Mabasa 2:46, 47, kuti: “Zuva rimwe nerimwe vakanga vachitsungirira mutembere nomwoyo mumwe, . . . vachirumbidza Mwari, vachidikanwa navanhu vose. [Uye] Ishe akawedzera kwavari zuva rimwe nerimwe avo vaiponeswa.” Ivo vakanga vachidzidza zvokwadi dzakaisvonaka pamusoro paJehovha naMesiya wake. Mufaro wavo wakanga uchitapukira, uchikurudzira vamwezve kuteerera ndokudzidza uye kurumbidza Jehovha.
3 Mikana Inowanika Zuva Riri Rose: Nhasi vakawanda vanowana kuti vanogona kurumbidza Jehovha zuva nezuva kupfurikidza nokupupura kusina kurongwa. Kuronga pachine nguva mberi kunovabetsera kuva vanobudirira zvikuru. Imwe hanzvadzi yakanga yakatsunga kugoverana mukupupura kusina kurongwa yakawana kuti mumwe munhu akanga apwanya mafafitera maviri ndokupinda mumotokari yayo. Iyo yakadana vanogadzira uye ipapo yakagadzirira kupupura kumunhu akanga achiita basa racho. Kugadzirira kwayo kwakabatanidza kunyengeterera nhungamiro yaJehovha. Somugumisiro, iyo yakapupura kumunhu anogadzira kweawa imwe ndokugovera bhuku raKurarama Nokusingaperi kwaari.
4 Imwe hanzvadzi nguva dzose yaisangana nomumwe muvakidzani apo vakanga vachifambisa imbwa dzavo. Mukati mokumwe kusangana, ivo vakava nekurukurirano yakakomba pamusoro pezvinetso zvoupenyu, uye kwakatungamirira kukurukurirano dzakawanda. Pashure penguva yakati, fundo yeBhaibheri yakatangwa. Nenzira inofadza, muvakidzani wacho gare gare akareurura kuti angadai asina kuteerera Zvapupu zvaJehovha kudai zvakanga zvashanyira suo rake, sezvo akanga asingadaviri Mwari kana kuti Bhaibheri.
5 Vamwe vanokuwana kuchibvira kupa uchapupu apo vatengesi kana kuti vamwe vanoshanyira suo ravo. Imwe hanzvadzi muIreland yakashanyirwa nomurume akanga achitengesa inishuwarenzi youpenyu. Iyo yakatsanangura kuti yakanga ichikarira kufarikanya upenyu husingaperi. Uyu wakanga uri mufungo mutsva chose chose kuuyu murume, uyo akanga arerwa somuKaturike weRoma. Iye akagamuchira bhuku raKurarama Nokusingaperi, akapinda musangano vhiki yakatevera yacho, uye akabvuma kuva nefundo yeBhaibheri. Zvino uyu mutengesi ihama yakabhapatidzwa.
6 Tose zvedu tinofanira kusvinurira mikana yokurumbidza Jehovha zuva nezuva. Kunobetsera kuchengeta magazini mashomanene kana kuti maturakiti apo anogona kuonwa uye anogona kugoverwa nyore nyore kuvashanyi. Mune dzimwe nzvimbo nguva shomanene inopedzerwa pabhenji romupaka ingakupa mikana inoverengeka yokupupura kuvamwe avo vanomira kuti vazorore kwamaminiti mashomanene. Dzimwe pwere Zvapupu muchikoro dzinochengeta mabhuku eBhaibheri pachibhariro chadzo senzira yokutanga nayo kurukurirano nomumwe munhu uyo anoacherekedza ndokubvunza mibvunzo. Rangarira nongedzero imwe kana kuti mbiri dzaMagwaro dzaunogona kushandisa. Kumbira Jehovha kuti akubetsere. Uchakomborerwa nokuda kwokuita saizvozvo.—1 Joh. 5:14.