Umambo hwaMwari Huchatonga Riini Panyika?

ZVINHU ZVIPI ZVAKANZI NAJESU ZVAIZOITIKA?

Jesu akati: “Rudzi ruchamukira rudzi, uye umambo huchamukira umambo. Kuchava nekudengenyeka kwenyika kukuru, uye munzvimbo dzakawanda muchava nenzara nematenda.” (Ruka 21:10, 11) Zvinhu izvi zvaizova chiratidzo chakajeka chekuti “Umambo hwaMwari hwava pedyo.” Zvinhu izvi zvaizoitika panguva imwe chete pasi rese here? Ngatimboonai.

1. HONDO

Muna 1914 kwakaitika hondo yaibatanidza nyika dzese uye kwakanga kusati kwamboitika hondo yakadaro. Vanyori vezvakaitika kare vanoti gore iri rakachinja zvinhu, nekuti ndipo pakaitika hondo yaibatanidza nyika dzese. Ndipo pakatanga kushandiswa mota hombe dzehondo, mabhomba anokandwa kubva mundege, pfuti dzine simba, magasi ane muchetura nezvimwewo zvombo. Kwakazotevera imwe hondo uye pakatanga kushandiswa zvombo zvenyukiriya. Kubvira gore ra1914 vanhu vari kungorwisana uye mamiriyoni ari kufa.

2. KUDENGENYEKA KWENYIKA

Bhuku rinonzi Britannica Academic rinoti kudengenyeka kunenge 100 kwakasimba zvekugona kuparadza zvinhu, kunoitika gore negore. Vaongorori veUnited States Geological Survey vachitora kubva pane zvakaitika kutangira munenge mugore ra1900 vanoti, “tinogona kutarisira kudengenyeka kunenge 16 kwakasimba pagore.” Vamwe vanoti kudengenyeka kwagara kwaingoitika. Asi kungoti takanga tisina michina yaitibatsira kuti tione kudengenyeka kwese kwaiitika. Pasinei nezvavangataura kudengenyeka kuri kukonzera kutambura uye kufa kwevakawanda chaizvo.

3. NZARA

Nzara inokonzerwa nehondo, uori, matambudziko ezveupfumi munyika, kutadza kurima uye kukundikana kuita zvinenge zvichienderana nemamiriro ekunze. Sangano reWorld Food Programme muna 2018 rakati: “Pasi rese vanhu vanenge 821 miriyoni havana zvekudya zvakakwana uye 124 miriyoni havana kana chekubata.” Vana vanosvika 3,1 miriyoni vanofa gore rega rega nemhaka yekushaya zvekudya zvinovaka muviri. Muna 2011, inenge hafu yevana vakafa gore iroro yakafa zvichikonzerwa nekushaya zvekudya.

4. ZVIRWERE

Rimwe bhuku rakabudiswa nesangano reWorld Health Organization rakati: “Makore ekuma2000 akatanga nezvirwere zvinotyisa. Vanotiwo zvirwere zvagara zvichizivikanwa zvakadai sekorera, neyero fivha zvakadzoka zvekare. Uye kwatova nezvimwe zvitsva zvakadai seSARS, furuwenza, Ebola uye Zika.” Mazuva ano, kunewo COVID-19. Pasinei nekufambira mberi kuri kuitwa mune zvekurapa, vanachiremba havasi kukwanisa kuwana mishonga inogona kupedza zvirwere zvese.

5. KUPARIDZA PASI RESE

Jesu akataura zvimwe zvaizoitika paakati: “Aya mashoko akanaka eUmambo achaparidzwa munyika yese kuti ave uchapupu kumarudzi ese, mugumo wozosvika.” (Mateu 24:14) Nyika pairi pakati pematambudziko aya vanhu vanopfuura 8 miriyoni vari kuparidzira mashoko akanaka eUmambo hwaMwari munyika 240 uye mumitauro inopfuura 1 000. Izvi hazvisati zvamboitika.

CHIRATIDZO ICHI CHINOREVEI?

Zvinhu zvakataurwa naJesu kuti zvaizova chiratidzo tiri kunyatsozviona nhasi. Saka zviri kurevei? Jesu akati: “Pamunoona zvinhu zvese izvi zvava kuitika, zivai kuti Umambo hwaMwari hwava pedyo.”​—Ruka 21:31.

Kuzadzika kwechiratidzo chakataurwa naJesu uye makore anotaurwa muBhaibheri, zvinonyatsoratidza kuti Mwari akagadza Umambo hwake kudenga mugore ra1914.a Panguva iyoyo, akagadza Mwanakomana wake Jesu Kristu saMambo. (Pisarema 2:2, 4, 6-9) Kana Umambo hwaMwari hwava kutonga panyika huchabvisa hurumende dzese dziri panyika, hwoita kuti vanhu vararame pasi pano muparadhiso nekusingaperi.

Kwasara nguva pfupi kuti mashoko akataurwa naJesu azadzike ekuti: “Umambo hwenyu ngahuuye. Kuda kwenyu ngakuitwe, panyika, sekudenga.” (Mateu 6:10) Asi zvinhu zvipi zvakaitwa neUmambo kubva pahwakagadzwa kudenga muna 1914? Uye ndezvipi zvahuchaitira vanhu pahuchatonga panyika?