Chengeta
Uri Kushandisa Mabhurocha Aya Here?
Bhaibheri—Rinombotaura Nezvei?
Rakagadzirirwa vaya vasingazivi zvakawanda nezveBhaibheri, kunyanya vaya vari muzvitendero zvisiri zvechiKristu
Kurigovera kwaungaita: “Ndinoda kunzwawo zvamunofunga pamusoro pezviri kutaurwa pano muMagwaro (kana kuti mubhuku rino dzvene). [Verenga Pisarema 37:11, inotaurwa nezvayo muchikamu 11.] Munofunga kuti nyika ichange yakaita sei pachazadziswa uprofita uhwu? [Rega apindure.] Uhwu humwe hweuprofita huri muBhaibheri hunopa tariro uye hunonyaradza vanhu vose pasinei nokuti vanobva kupi kana kuti vanotenda zvipi.” Verenga ndima iri pokutanga pasi pemusoro uri papeji 3, uye govera bhurocha racho.
Ungaedza izvi: Kana uri kudzidzisa munhu asiri wechitendero chechiKristu Bhaibheri uchishandisa bhuku raBhaibheri Rinombodzidzisei?, kurukurai chikamu chimwe chete chebhurocha iri kwemaminitsi mashoma kuti umubatsire kuona kuti Bhaibheri rakamira sei. Ita izvi pakutanga kwechidzidzo chacho kana kuti pamunenge mapedza.
A Book for All People
Rakagadzirirwa vanhu vakadzidza asi vasingazivi zvakawanda nezveBhaibheri
Kurigovera kwaungaita: Verenga 2 Timoti 3:16, 17, wobva wati: “Munobvumirana nazvo here kuti Bhaibheri rakafemerwa naMwari? Munofunga kuti rinongovawo bhuku rakanaka here? [Rega apindure.] Vanhu vakawanda vane zvavanofunga nezvemibvunzo iyi, asi ndakaona kuti vashoma chete ndivo vakaongorora Bhaibheri kuti vazvionere voga zvarakaita. [Verenga mashoko akataurwa nemumwe munhu nezveBhaibheri ari pasi pemusoro uri papeji 3.] Bhuku iri rinonakidza rinotaura kuti nei vanhu vanobva kwose kwose, uye vezvitendero zvose vachifanira kuongorora zviri muBhaibheri.”
Ungaedza izvi: Kana saimba akagamuchira bhuku racho, taura kuti: “Chimwe chinhu chinoita kuti vanhu vakawanda vafunge kuti Bhaibheri harina zvakawanda zvarinotidzidzisa ndechokuti muzvitendero vanhu havaiti zvinotaurwa neBhaibheri. Pandichadzoka ndichakuudzai muenzaniso unoratidza izvozvo.” Paunozoshanyazve, kurukurai mashoko ari papeji 4-5.
Unogona Kuva Shamwari yaMwari!
Rakagadzirirwa vasinganyatsogoni kuverenga
Kurigovera kwaungaita: “Munofunga kuti zvinoita here kuti tive shamwari dzaMwari? [Rega apindure, wobva waverenga Jakobho 2:23.] Bhuku iri rakagadzirirwa kutibatsira kuti tive shamwari dzaMwari, sezvakanga zvakaita Abrahamu.”
Ungaedza izvi: Paunokurukura nasaimba kekutanga, kana kuti paunozomushanyirazve, muratidze kuti Bhaibheri rinodzidzwa sei uchishandisa chidzidzo 1.
A Satisfying Life—How to Attain It
Rakagadzirirwa vaya vasina chitendero chavanopinda
Kurigovera kwaungaita: “Tiri kushanyira vanhu tichikurukura navo nemhaka yokuti vakawanda vanoda kurarama upenyu hunogutsa. Tose tinombosangana nematambudziko anoita kuti tisafara. Pakadaro tinotsvaka mazano kuhama yedu yatinovimba nayo kana kuti kushamwari, kana kuti tinotsvaka mumabhuku kana paIndaneti. Munofunga kuti mazano akanaka tingaawana kupi? [Rega apindure.] Vamwe vakashamiswa pavakaona mazano anobatsira muBhaibheri. Imbotarisai muone. [Ratidza saimba chitsauko 2 uye verengai mashoko orugwaro rumwe chete pane aripo.] Bhuku rino rinotsanangura zvatingaita kuti tirarame upenyu hunogutsa.”
Ungaedza izvi: Kana saimba akagamuchira bhurocha racho, taura kuti: “Vanhu vakawanda vakanzwa kuti zvakawanda zviri muBhaibheri hazvina kururama. Pandichadzoka, ndichazokuratidzai kuti Bhaibheri rakarurama panyaya dzesayenzi, zvichida zvichakunakidzai.” Paunozodzoka kurukurai ndima 4 iri papeji 12.
The Origin of Life—Five Questions Worth Asking
Rakagadzirirwa vaKristu vechiduku vanoenda kuchikoro vanodzidziswa kuti zvinhu zvakaita zvokushanduka-shanduka. Rinobatsirawo pakukurukura nevanhu vanodavira kuti zvinhu zvakaita zvokushanduka-shanduka, vasina chokwadi chokuti Mwari ariko uye vaya vasingatendi kuti kuna Mwari (Bhurocha iri harigoverwi paimba neimba.)
Kurishandisa kwaungaita kune munhu anodavira kuti zvinhu zvakaita zvokushanduka-shanduka uye kune asingatendi kuti Mwari ariko: “Mazuva ano mabhuku akawanda esayenzi anodzidzisa kuti zvinhu zvakaita zvokushanduka-shanduka. Munofunga kuti nyaya yokuti zvinhu zvakaita zvokushanduka-shanduka kungofungidzirawo here kana kuti ndicho chinotova chokwadi? [Rega apindure.] Ndinofunga munobvumirana nazvo kuti kana tichida kuona kuti chokwadi ndechipi tinofanira kuongorora mativi ose. Bhuku iri rinopa uchapupu hwakaita kuti vamwe vatende kuti zvinhu zvakaita zvokusikwa.”
Ungaedza izvi: Kana uchienda kuchikoro, siya bhurocha iri padhesiki rako woona kana richiita kuti vaunodzidza navo vave neshungu dzokuona kuti rinombotaura nezvei.
Why Should We Worship God in Love and Truth?
Rakagadzirirwa vechiHindu
Kurigovera kwaungaita: “Munamato wemaIndia unozivikanwa chaizvo une mamwe mashoko okukumbira kuti munhu awane chokwadi uye chiedza. Munofunga kuti zvinokosha here kunamata Mwari tichimuda uye muchokwadi? [Rega apindure.] Cherechedzai zvakataurwa naJesu panyaya iyi.” Verenga Johani 4:24. Zvadaro verenga ndima 4 iri papeji 3 wobva wamugovera bhurocha racho.
Ungaedza izvi: Kana saimba akagamuchira bhurocha racho, taura kuti: “Vamwe vachenjeri vechiHindu vanotaura kuti chokwadi chakavanzwa mumwoyo yedu. Vamwe vanoti chokwadi chinowanikwa mubhuku dzvene. Munguva inotevera, ndinoda kuzokurukura nemi mubvunzo uri panoperera ndima 3 iri papeji 4 wokuti: ‘Ndokupi kwatinofanira kutsvaga chokwadi chinobva kuna Mwari?’”
The Pathway to Peace and Happiness
Rakagadzirirwa vechiBuddha
Kurigovera kwaungaita kumunhu mukuru wechiBuddha: “Zvimwe munonetsekawo sezvandinoita nepamusana pezvinhu zvakafumuka zvangozara uye kukanganisa kwazvinoita vana vedu. Munofungeiwo, kusateerera kuri kuita vana kuri kuwedzera here? [Rega apindure.] Maizviziva here kuti izvi zvakafanotaurwa kare mubhuku rakanyorwa kare kare, zvitendero zvechiKristu, chiHindu, uye chiMuslim zvisati zvatanga? [Verenga 2 Timoti 3:1-3.] Onai kuti zvinhu izvi zvinoramba zvakadaro pasinei nokuti vanhu vari kuramba vachidzidza. [Verenga ndima 7.] Mashoko ari mubhuku rino akandibatsira kuti ndinzwisise chokwadi chisingazivikanwi nevanhu vakawanda. Munoda kuriverenga here?”
Ungaedza izvi: Paunenge wamushanyirazve uye waita kuti afarire Bhaibheri, muratidze mibvunzo iri kuseri pakavha yebhurocha racho uye muratidze kuponi rebhuku raBhaibheri Rinombodzidzisei? Muudze kuti wauya nebhuku racho kana achida kuriona. Muratidze peji yezviri mukati uye kurukurai ndima imwe chete kana mbiri kubva pachitsauko chaanenge asarudza.
Our Problems—Who Will Help Us Solve Them?
Rakagadzirirwa vechiHindu
Kurigovera kwaungaita: “Vanhu vakawanda vatinokurukura navo vanorwadziwa chaizvo pavanoona zvinhu zvakaipa zvichiitika munyika. Munofunga kuti rimwe zuva Mwari achabvisa matambudziko ose ari panyika here? [Rega apindure.] Uprofita uhwu hunotipa tariro. [Verenga Pisarema 37:11.] Zvandaverenga izvi zvinobva muBhaibheri iro risinganzwisiswi nevakawanda uye rinoshandiswa zvisiri izvo. Mungashamiswa kuziva kuti Bhaibheri harisi bhuku revanhu vokuAmerica nekuEurope; harikurudziri udzvinyiriri uye kuti rumwe rudzi ruri nani kupfuura rumwe. Asi rinotipa tariro yokuti Mwari achapedza matambudziko edu ose nokukurumidza. Rinewo mazano anotibatsira kuti tikunde matambudziko edu iye zvino. Bhuku rino rine mamwe mashoko.”
Ungaedza izvi: Paunozoshanyirazve saimba wacho uye wamuita kuti afarire Bhaibheri, muratidze mifananidzo iri papeji 4-5 yebhuku raBhaibheri Rinombodzidzisei? Verenga rugwaro rumwe chete kana kupfuura pane akanyorwa pamapeji acho uye govera bhuku racho.
Will There Ever Be a World Without War?
Rakagadzirirwa vaJudha
Kurigovera kwaungaita: “Kwemakore nemakore vanhu vari kutambura nepamusana pehondo. Munofunga kuti nei hondo dzichiramba dziripo pasinei nokuti vanhu vanotaura kuti vanoda runyararo? [Murege apindure.] Uprofita uhwu hwaIsaya hunotipa tariro. [Verenga Isaya 2:4.] Asi izvi zvinoita kuti pave nemibvunzo yakaita seyokuti: Uprofita hwaIsaya huchazadziswa rini uye sei? Nei tichigona kuva nechokwadi chokuti Magwaro anotipa tariro yechokwadi? Bhuku rino rinopindura mibvunzo iyi.”
Ungaedza izvi: Kana bhurocha racho ragamuchirwa, ita kuti saimba wacho avhure papeji 16-17 wobva wati: “Vanhu vakawanda pavanofunga nezvezviitiko zvinotyisa zvakadai seHolocaust vanobvunza kuti, ‘Kana Mwari ariko, nei achisiya vanhu vachitambura?’ Tinogona kuzokurukura izvi pandichadzoka.”
The Guidance of God—Our Way to Paradise
Rakagadzirirwa vechiMuslim vanogara munzvimbo dzinoita kuti vanzwe vakasununguka kudzidza Bhaibheri
Kurigovera kwaungaita: “Ndinonzwisisa kuti vaMuslim vanotenda muna Mwari mumwe chete wechokwadi uye zvinotaurwa nevaprofita vose. Ndizvo here? [Rega apindure.] Ndinoda kutaura nemi nezveuprofita hwekare hunotaura kuti nyika ino ichachinjwa kuti ive paradhiso. Ndingakuverengerai here uprofita hwacho? [Verenga Isaya 11:6-9.] Vanhu vakawanda vanonetseka kuti Mwari achazvifambisa sei kuti nyika ichinje zvakadaro. Bhuku rino rinoratidza zvinotaurwa nevaprofita panyaya iyi.”
Ungaedza izvi: Kana saimba akagamuchira bhurocha racho, taura kuti: “Bhuku raMwari iri rinotsanangura kuti pakutanga vanhu vaigara muparadhiso. Patichazoonanazve ndichada kupindura mubvunzo wokuti, ‘Zvakafamba sei kuti vanhu varambe kutungamirirwa naMwari vachibva varasikirwa neparadhiso?’” Paunodzokera kurukurai mashoko okutanga echikamu chinotangira papeji 6.
Real Faith—Your Key to a Happy Life
Rakagadzirirwa vechiMuslim vanogara munzvimbo dzinoita kuti vanzwe vakasununguka kudzidza Bhaibheri
Kurigovera kwaungaita: Ratidza saimba mufananidzo uri papeji 16-17 wobva wati: “Zviri kuratidzwa pano zvakasiyana nokure nezvatinoona munyika nhasi. Munofunga kuti zvichazomboitika here kuti nerimwe zuva nyika ino iite sezvakaita zviri kuratidzwa pano? [Rega apindure.] Cherechedzai zvatinovimbiswa neBhuku raMwari iri. [Verenga muBhaibheri rugwaro rumwe chete pane aripo.] Bhuku rino rinotibatsira kuti tive nokutenda kwechokwadi kwokuti zvinhu izvi zvatakavimbiswa zvichaitika.”
Ungaedza izvi: Mangopedza kukurukura, kumbira saimba uti asarudze mubvunzo waanoda pane iri nechekuseri pakavha yebhurocha racho. Zvadaro ronga kuti uzodzoka kuzokurukura mhinduro yacho iri mubhurocha racho.
Lasting Peace and Happiness—How to Find Them
Rakagadzirirwa vanhu vechiChinese
Kurigovera kwaungaita: “Mazuva ano upenyu hunombooma zvokuti tinoshaya mufaro. Chii chinoita kuti murambe muchifara pasinei nematambudziko ose iwayo? [Rega apindure.] Vanhu vakawanda vakaona kuti kutevedzera mazano ari muBhaibheri kunoita kuti vafare. [Verenga Pisarema 119:1, 2.] Vamwe vanoti Bhaibheri ibhuku revanhu vekuAmerica nekuEurope. Asi cherechedzai izvi. [Kurukurai ndima 16 iri papeji 17.] Bhuku iri rinotsanangura zvatingaita kuti tiwane rugare uye mufaro.”
Ungaedza izvi: Kana saimba akagamuchira bhurocha racho, verengai pamwe chete mitsetse mitatu yokutanga yendima 18 iri papeji 17 wobva wati: “Pandichadzoka, ndichada kuzokuratidzai zvatinogona kutarisira zvinotaurwa neBhaibheri kuti zvichazoitika.” Paunozomushanyirazve, kurukurai pfungwa imwe chete pane dzinotaurwa mundima 6 iri papeji 30.