Nei Mwari Asingapinduri Mimwe Minyengetero?
Baba vedu vekudenga, Jehovha Mwari, vanoda chaizvo kuteerera minyengetero yedu. Asi pane zvimwe zvinhu zvinoita kuti vasateerera mimwe minyengetero. Chii chinoita kuti vasaipindura, ndezvipi zvatinofanira kuita kuti minyengetero yedu ipindurwe? Inzwa zvimwe zvinotaurwa neBhaibheri.
“Paunenge uchinyengetera, usadzokorora-dzokorora zvinhu zvimwe chetezvo.”—Mateu 6:7.
Jehovha haadi kuti tidzokorore minyengetero yatinenge takaita zvekubata nemusoro kana kuti inenge yakaita zvekunyorwa mubhuku. Anoda kuti titaure zvichibva pasi pemwoyo. Chimbofungidzira kubhowa kwazvinoita kana uine shamwari inouya ichitaura kwauri mashoko mamwe chete zuva rimwe nerimwe. Shamwari dzinotaurirana dzakasununguka zviri pasi pemwoyo. Patinonyengetera tichitaura zviri pamwoyo pedu, zvinoratidza kuti tinenge tichiona Mwari seshamwari yedu.
“Pamunokumbira pacho, hapana chamunopiwa nekuti munokumbirira zvisina kunaka.”—Jakobho 4:3.
Mwari haateereri minyengetero yedu kana tichikumbira zvinhu zvatinoziva kuti haazvifariri. Semuenzaniso, ngatitii munhu obheja uye onyengetera kuna Mwari achikumbira kuti aite mhanza yakanaka ahwine. Jehovha anopindura munyengetero wakadaro here? Bhaibheri rinoti Mwari anovenga makaro uye vanhu vanoshuvira kuva nemhanza yakanaka. (Isaya 65:11; Ruka 12:15) Hatitarisiri kuti Jehovha angapindura minyengetero yakadaro! Kana tichida kuti apindure minyengetero yedu, tinofanira kunyengetera tichikumbira zvinhu zvinoenderana nezvaanoda.
“Munhu anoramba kuteerera mutemo, kunyange munyengetero wake unosemesa.”—Zvirevo 28:9.
Kare, Mwari akanga asingapinduri minyengetero yevanhu vakanga vasingateereri mitemo yake. (Isaya 1:15, 16) Nanhasi ndizvo zvaanongoita. (Maraki 3:6) Kana tichida kuti apindure minyengetero yedu, tinofanira kuedza nepese patinogona kuteerera mitemo yake. Ko kana tiine zvinhu zvakaipa zvatakamboita kare? Zvinoreva here kuti Jehovha haachambofi akatiteerera? Aiwa! Mwari anotiregerera kana tikasiya zvakaipa zvataimboita, toedza kuita zvinomufadza.—Mabasa 3:19.