KUVENGANA KUNGAPEDZWA SEI?

3 | Bvisa Pfungwa Dzeruvengo

Zvinodzidziswa neBhaibheri:

“Pfungwa dzenyu ngadzishandurwe, kuti muve vatsva, muzive mega kuda kwaMwari kwakanaka, kwaanogamuchira uye kwakakwana.”—VAROMA 12:2.

Zvazvinoreva:

Mwari ane basa nezvatinofunga. (Jeremiya 17:10) Zvinhu zvatinotaura nezvatinoita zvinotangira mumwoyo. Saka hatifaniri kungogumira pakurega kutaura kana kuita zvinhu zvinoratidza kuti tine ruvengo. Asi tinofanira kukurumidza kubvisa mafungiro anogona kuita kuti tipedzisire tava neruvengo. Izvozvo zvichaita kuti pfungwa dzedu ‘dzishandurwe,’ tokunda ruvengo.

Zvaungaita:

Nyatsoongorora mafungiro uye manzwiro aunoita nezvevamwe vanhu, kunyanya verumwe rudzi kana kuti vanobva kune imwe nyika. Zvibvunze kuti: ‘Ndinovaona sei? Maonero angu anobva pane zvandinonyatsoziva nezvavo here kana kuti anokonzerwa nerusarura?’ Siyana nemafirimu, zvinhu zvekuzvivaraidza nazvo kana zvinhu zvinobudiswa pasocial media zvinoratidza nyaya dzekuvengana uye dzekurwisana.

Shoko raMwari rinogona kutibatsira kukurira ruvengo ruri mumwoyo medu nemupfungwa

Hazvisi nyore kuongorora manzwiro edu uye mafungiro edu zvakarurama. Asi Shoko raMwari rinogona kutibatsira ‘kunzwisisa pfungwa dzedu uye zvinodiwa nemwoyo wedu.’ (VaHebheru 4:12) Saka ramba uchidzidza Bhaibheri. Enzanisa mafungiro ako nezvarinodzidzisa uye ita zvese zvaunogona kuti mafungiro ako aenderane nezvinodiwa naMwari. Shoko raMwari rinogona kutibatsira kukurira ruvengo ‘rwakadzika midzi’ mumwoyo medu nemupfungwa.—2 VaKorinde 10:4, 5.

Zvakaitika Kune Vamwe—STEPHEN

Akachinja Mafungiro Ake

Stephen nevamwe vemumhuri make vakambobatwa zvisina kunaka nemhaka yekuti vaivengwa nevarungu. Izvi zvakaita kuti atange kufarira zvaiitwa nerimwe sangano rezvematongerwo enyika rairwira kodzero dzevanhu. Nekufamba kwenguva, akatanga kupara mhosva dzaikonzerwa neruvengo rwaaiva narwo. Stephen akati: ‘Pane imwe nguva ini neshamwari dzangu taiona mafirimu ekutambudzwa kwaiitwa vanhu vatema vakatorwa kuAfrica vachinoitwa varanda muUnited States. Izvi zvakatishatirisa zvekuti takatanga kurova vamwe varungu vechidiki vaiva mataionera mafirimu. Takatozoenda kwaigara varungu tichitsvaga vamwe vekurova.’

Mafungiro aStephen akanyatsochinja paakatanga kudzidza Bhaibheri neZvapupu zvaJehovha. Akati: “Sezvo ndainge ndajaira kuona vanhu vachisarurana, zvandaiona zvichiitwa neZvapupu zvaindishamisa chaizvo. Semuenzaniso, mumwe murungu aiva Chapupu chaJehovha paakaenda kunze kwenyika, akasiya vana vake vachichengetwa neimwe mhuri yevanhu vatema. Uyewo imwe mhuri yevarungu yakatora mumwe mwana wechitema ainge asina pekugara kuti igare naye.” Stephen akanyatsoona kuti Zvapupu zvaJehovha imhuri ine vanhu vanodanana uye izvi zvakamubatsira kunzwisisa kuti ndivo vateveri vaJesu vechokwadi, vaakati vaizozivikanwa nekuratidza rudo.—Johani 13:35.

Chii chakabatsira Stephen kusiya zvekurwa uye kuvenga vamwe? Rugwaro rwaVaRoma 12:2 ndirwo rwakamubatsira. Akati: “Ndakatanga kuona kuti ndaifanira kuchinja mafungiro angu. Ndaitofanira kuita kuti mafungiro angu ave matsva ndosiyana nezvekurwisana, ndodzidza kuti kugarisana nevamwe ndicho chinhu chakanaka.” Stephen ava nemakore anopfuura 40 asiya zvekuvenga vamwe.