Nhengo Itsva dzeDare Rinotungamirira
MUSI wa5 October 2024, pamusangano wepagore pakapiwa chiziviso chinokosha chekuti Hama Jody Jedele naHama Jacob Rumph vakanga vagadzwa kuti vave nhengo dzeDare Rinotungamirira reZvapupu zvaJehovha. Hama mbiri idzi dzava nenguva yakareba dzichishumira Jehovha dzakatendeka.
Jody Jedele nemudzimai wake, Damaris
Hama Jedele vakaberekerwa kuMissouri, U.S.A. uye vakakurira mumhuri yeZvapupu. Nzvimbo yavaigara yaiva neZvapupu zvishoma. Saka pavaikura vaiona Zvapupu zvaibva kwakasiyana-siyana zvichiuya kuzobatsira kuparidza munzvimbo iyoyo. Hama nehanzvadzi idzi dzainge dzakabatana uye dzaiva nerudo. Izvi zvakavakurudzira chaizvo. Vakabhabhatidzwa musi wa15 October 1983. Vaifarira basa rekuparidza uye vakatanga kupayona pavakapedza chikoro muna September 1989.
Hama Jedele pavaiva vadiki, vabereki vavo vaiwanzoenda navo nehanzvadzi yavo kunoona Bheteri. Izvi zvakavabatsira vese vari vaviri kuti vave nechido chekuzoshanda paBheteri. Hama Jedele nehanzvadzi yavo vakatozoshanda paBheteri. Muna September 1990, Hama Jedele vakatanga kushanda paBheteri rekuWallkill vari mudhipatimendi rekuchenesa. Pava paya vakazoshanda mudhipatimendi rinoona nezveutano hwevashandi vepaBheteri.
Mumakore iwayo ungano dzemutauro wechiSpanish dzaiva pedyo neWallkill dzaikura uye kwaidiwa hama dzakawanda. Saka Hama Jedele vakatanga kupinda neimwe yacho vachibva vatanga kudzidzira chiSpanish. Panguva iyoyo ndipo pavakaonana naDamaris, imwe hanzvadzi yaipayona mudunhu ravo. Pava paya vakazochata, Damaris achibva auya paBheteri.
Muna 2005, vakabva paBheteri vachinochengeta vabereki vavo. Panguva iyoyo, Hama naHanzvadzi Jedele vaishumira semapiyona. Hama Jedele vaibatsira pakudzidzisa Chikoro Chebasa Reupiyona. Vaishandawo muKomiti Yekukurukura Nezvipatara uye muKomiti Yekuvaka Yemunharaunda (Regional Building Committee).
Muna 2013, Hama naHanzvadzi Jedele vakashevedzwa zvakare kuBheteri kuti vabatsire paivakwa Bheteri rekuWarwick. Kubvira ipapo, vakazoshumira paBheteri rekuPatterson uye rekuWallkill. Hama Jedele vakashandawo muDhipatimendi Remapurani Nekuvaka uye muDhipatimendi Remashoko Echipatara. Muna March 2023, vakagadzwa semubatsiri weKomiti yeBasa yeDare Rinotungamirira. Hama Jedele vakaita mabasa akawanda musangano raJehovha uye vane chidzidzo chavakawana. Vakati: “Paunopiwa basa rausati wamboita, unogona kunzwa sekuti hauzvikwanisi. Asi panguva dzakadaro ndipo paunofanira kuyeuka kuti zvinokosha kuti uvimbe naJehovha nekuti ndiye anotibatsira kuti tiite chero chaanenge achida kuti tiite.”
Jacob Rumph nemudzimai wake, Inga
Hama Rumph vakaberekerwa kuCalifornia, U.S.A. Pavaiva vadiki, amai vavo vakanga vasisapindi misangano uye vakanga vasisaiti basa rekuparidza. Kunyange zvakadaro, amai vavo vaiedza kuvadzidzisa Bhaibheri. Uyewo gore rega rega, vaiwanzoenda kwambuya vavo. Mbuya vavo vaiva Chapupu chakatendeka uye vakavabatsira kuti vade kuziva zvakawanda nezveBhaibheri. Izvi zvakaita kuti pavakanga vava nemakore 13 vakumbire kudzidziswa Bhaibheri. Hama Rumph vakabhabhatidzwa musi wa27 September 1992. Nekufamba kwenguva, amai vavo vakazotangazve kupinda misangano nekuparidza uye hanzvadzi yavo, munin’ina wavo, nababa vavo vakazobhabhatidzwa.
Pavaikura, Hama Rumph vaiona kufara kwaiita mapiyona. Izvozvo zvakaita kuti vatange kupayona muna September 1995 pavakapedza chikoro. Muna 2000, vakaenda kuEcuador kunoshumira kwaidiwa vaparidzi vakawanda. Ikoko ndiko kwavakaonana nemumwe piyona aibva kuCanada anonzi Inga uye nekufamba kwenguva vakazochata. Vakatanga kugara mune rimwe taundi rekuEcuador raiva nevaparidzi vashoma. Iye zvino mutaundi iroro matova neungano yakakura.
Hama naHanzvadzi Rumph vakazogadzwa kuva mapiyona chaiwo uye vakazopinda mudunhu. Muna 2011, vakapinda chikoro cheGiriyedhi mukirasi yechi132. Pavakapedza chikoro vakashumira munyika dzakasiyana-siyana uye vakaita mabasa akadai sebasa repaBheteri, reumishinari, uye remudunhu. Hama Rumph vakatombovawo murayiridzi weChikoro Chevazivisi Vemashoko eUmambo.
Pakatanga COVID-19 Hama naHanzvadzi Rumph vakadzokera kuUnited States. Vakanzi vaende kuBheteri rekuWallkill uye Hama Rumph vakadzidziswa zvinoitwa muDhipatimendi Rebasa. Vakazonzi vadzokere kubazi rekuEcuador uye Hama Rumph vakashanda muDare Rebazi. Muna 2023, vakanzi vanoshanda kuBheteri rekuWarwick. Muna January 2024, Hama Rumph vakagadzwa semubatsiri weKomiti yeBasa yeDare Rinotungamirira. Hama Rumph vane chidzidzo chavakawana pakushumira kwavakaita munyika dzakasiyana-siyana. Vakati: “Kuti basa rinzi rinokosha haisi nyaya yekuti uri kuriita uri kupi, asi vanhu vauri kushanda navo ndivo vanoita kuti basa racho rikoshe.”
Tinotenda chaizvo kushanda nesimba kunoita hama idzi uye ‘tinoramba tichikoshesa vanhu vakadaro.’—VaF. 2:29.