Chii Chinonzi Kutambudzika Kukuru?

Mhinduro yeBhaibheri

Kutambudzika kukuru kuchaita kuti pave nenguva yematambudziko akakura asati amboonekwa nevanhu. Sezvinotaurwa neuprofita hweBhaibheri, kuchaitika ‘mumazuva okupedzisira’ kana kuti “nguva yokupedzisira.” (2 Timoti 3:1; Dhanieri 12:4, Bhaibheri muNdimi yeUnion Shona) Kuchava “kutambudzika kusina kumboitika kubvira pakutanga kwezvisikwa zvakasikwa naMwari kusvikira panguva iyoyo, uye hakuzoitikizve.”​—Mako 13:19; Dhanieri 12:1; Mateu 24:21, 22.

Zvichaitika munguva yekutambudzika kukuru

• Kuparadzwa kwechitendero chenhema. Chitendero chenhema chichaparadzwa nekukurumidza zvinoshamisa. (Zvakazarurwa 17:​1, 5; 18:​9, 10, 21) Hurumende dzinomiririrwa nesangano reUnited Nations dzichange dzichiita kuda kwaMwari padzichaparadza chitendero ichi.​—Zvakazarurwa 17:​3, 15-​18.a

• Kurwiswa kwechitendero chechokwadi. Mubatanidzwa wemarudzi uyo unotaurwa nezvawo ‘saGogi wenyika yeMagogi’ mune zvakaonekwa naEzekieri, uchaedza kuparadza vanamati vechokwadi. Asi, Mwari achadzivirira vanamati vake kuti vasaparadzwa.​—Ezekieri 38:​1, 2, 9-​12, 18-​23.

• Kutongwa kwevagari vepanyika. Jesu achatonga vanhu vese uye “achaparadzanisa vanhu mumwe achibva kune mumwe, sokuparadzanisa kunoita mufudzi makwai nembudzi.” (Mateu 25:31-​33) Achatonga mumwe nemumwe maererano nekutsigira kana kuti kusatsigira kwaaiita “hama” dzaJesu, kureva vaya vachatonga pamwe chete naye kudenga.​—Mateu 25:34-​46.

• Kuunganidzwa kwevachanotonga muUmambo. Vanhu vakatendeka vakasarudzwa kunotonga naKristu vachapedza upenyu hwavo hwepanyika vomutswa kuti vazorarama kudenga.​—Mateu 24:31; 1 VaKorinde 15:50-​53; 1 VaTesaronika 4:​15-​17.

• Amagedhoni. Iyi “hondo yezuva guru raMwari Wemasimbaose” inonziwo “zuva raJehovha.” (Zvakazarurwa 16:14, 16; Isaya 13:9; 2 Petro 3:​12) Vaya vanenge vatongwa naKristu kuti vanhu vakaipa, vachaparadzwa. (Zefaniya 1:​18; 2 VaTesaronika 1:​6-​10) Izvi zvinosanganisira kuparadzwa kwehurumende dzese dzepanyika, idzo dzinotaurwa muBhaibheri sechikara chine misoro minomwe.​—Zvakazarurwa 19:19-​21.

Zvichaitika pashure pekutambudzika kukuru

• Kusungwa kwaSatani nemadhimoni ake. Ngirozi huru ichakanda Satani nemadhimoni ake “mugomba rakadzikadzika,” izvo zvinoratidza kuti vanenge vakangoita sevakafa. (Zvakazarurwa 20:1-3) Panguva iyoyo Satani achange akaita seari mujeri; achange asina simba pachinhu chero chipi zvacho.​—Zvakazarurwa 20:7.

• Kutonga kwemakore ane chiuru kunotanga. Umambo hwaMwari huchabva hwatanga kutonga kwemakore ane chiuru, zvoita kuti vanhu vawane makomborero akawanda. (Zvakazarurwa 5:9, 10; 20:4, 6) “Boka guru revanhu” vasingakwanisi kuverengwa ‘richabuda mukutambudzika kukuru,’ uye richaona kutanga kwemakore ane chiuru ekutonga kweUmambo panyika.​—Zvakazarurwa 7:9, 14; Pisarema 37:9-11.