CHIDZIDZO 6

Kuratidza Kushanda Kunoita Rugwaro

Johani 10:33-36

PFUPISO YECHIDZIDZO: Usangoverenga rugwaro wobva waenda pane imwe pfungwa. Iva nechokwadi chekuti vateereri vanyatsoona kuti rugwaro rwawaverenga ruri kubatana sei nepfungwa yauri kutaura.

MAITIRWO AZVO:

Ita kuti vanhu vaone mashoko anokosha. Kana waverenga rugwaro, ita kuti vateereri vaone mashoko anonyatsotsigira pfungwa yauri kutaura. Unogona kuita izvi kuburikidza nekudzokorora mashoko acho kana kuti kubvunza mubvunzo unoita kuti vateereri vaone pane mashoko anokosha.

Kana ukataura pfungwa iri murugwaro uchishandisa mamwe mashoko, iva nechokwadi chekuti vateereri vanyatsoona kuti mashoko ari muBhaibheri pacharo ari kubatana sei nepfungwa huru yauri kutaura.
Simbisa pfungwa yauri kuda kuti vateereri vanzwe. Kana ukataura chinangwa chauri kuda kuverengera rugwaro, tsanangura kuti mashoko ari murugwaro rwacho anobudisa sei chinangwa chacho.

Paunenge uchitsanangura rugwaro, ramba wakavhura Bhaibheri. Izvi zvichaita kuti vateereri vako vaone kuti mashoko ako ari kubatana sei nevhesi yawaverenga.
Ita kuti zvirambe zviri nyore. Usatsanangura zvinhu zvisinei nepfungwa huru yauri kutaura nezvayo. Zvichienderana nezvinotozivikanwa nevateereri vako panyaya yacho, funga kuti unofanira kutsanangura zvakawanda sei kuti ujekese pfungwa yauri kukurukura.