Ngɔndɔ k’asamalo

Yehova atshɔkɔlaka Akristo wal’ɛtɛndɔ kɛ ntondo dj’iwɔ ndjekela etshikitano weyalaki lawɔ lá winá wɔsɔ. Iwɔ wɛnaki ndjolo la lɔnyɔkɔ mbala efula, mbala imɔtshi lá winá wɛ yotakanelaki. Kolenda kɛnɛ kekomelisá Barnabasɛ nya Poolo winá wɔ yapoposanyɛka lá ngando kɛ Lystera. Má bango, anto wawekameyɛki walongolaka l’osasa onkfumɔ. Koko m’ɔkɔngɔ, antonyi wawɔ amɔtshi ‘wadjimbolaka eloyi w’anto,’ edjinge anto amɔtshi l’anteyi k’anto w’alongolisá wasɔ wavutaka Poolo awanga ko w’otshikaka nsuke la nyɔyi. (Ele. 14:19) Koko Barnabasɛ nya Poolo wakindjɛka mpoposanyɛ lá todjena tonkina. Lɔɔla lɔkɔnge l’iyawa? Iwɔ ‘wakomɛka anto djudji ambeki,’ edjinge etepela wɛwɔ la ndjɔmbɔmba yɛwɔ yekembɛka winawɔ Akristo. (Ele. 14:21, 22) Anto efula wawaka wapɔ ladjikɛnde Barnabasɛ nya Poolo watapekɔ kaanga yapomana la lɔnyɔkɔ l’isasimoyɛ. Ntsha topapekwisa l’olemo wɔ Yehova ndɔtɔlɔmbɛ djɛ nangha, tɔngɔtshɔkwɔma. w23.04 16-17 ite. 13-14

Nkfumi Davidɛ ayalaki l’antonyi wa nyɛtshi efula lá lowiko lɔnde l’otondo, edjinge mbala efula nde ahonaki okotshɔ wɔ Yehova má lɔlɔmbɔ. Davidɛ ayalaki l’eshikikelo ante Yehova okaki edjinge akadjimolaki lá ndɔmbɔ yɛnde. Iso nkoka ndjala l’eshikikelo kɛ nghɔsɔ. Bible ntoshikikɛ ante Yehova nkoka ntɔpɛyɛ balo edjinge nkfulu k’oyɛso la kɛkɔ djonyi dj’iso nkfulumeyɛ. Nde nkoka nkamba la nkfumbo kɛso kɛ nyuma edjinge l’anto wapɔtɛmɔla lá winá wɔsɔ djɛ ntokotshɛ́ lá topo tɔmɔtshi. Kaanga Yehova ndopakadjimolaka winá enkfumɔ lá ndɔmbɔ yɛso lá lɛdji lokombolaso, iso ndjewaka ente nde angokadjimola. Nde angotɔpɛyɛ ngo kɛnɛ k’oyɛso la djonyi edjinge lá winá w’oyɛso la djonyi. Djɛko ndeke kindjɛ ndɔmba la djawo nkfumɔ, l’eshikikelo ente Yehova angokokotsheyɛ ehomba wɛko má winá wɔsɔ edjinge ‘angokotshɛ mposɛ k’ekete kenkfumɔ kelekɔ́ la lowiko’ l’andja wa bango wayaye.—Yee. 145:16. w23.05 8 ite. 4; 13 ite. 17-18

Alekɔ wɔlɔ djɛ ndeka ndjila yimba lá ɛtshɔkɔ wɛ sowaka winá w’okotshɛso okoma ɔmɔtshi. L’ɛtshɔkɔ wɛkɔnge w’okokɛ ndjila yimba? Ntsha okoma wɔko olendanawɔnde la badji djɛ Bible kana la lɔlɔmbɔ, kanela lá wopo wɔ nkotshɛ okoma wɔsɔ okokawɔ nkokotshɛ́ djɛ wɛ ndeka ndjala la djokanelo djɛ wɔlɔ la Yehova. (Yee. 145:18, 19) Ntsha okoma wɔko oyɛwɔ nde wɔ wɛ ndjala la wekeka w’Okristo, tɔnɔla lá wopo wɔ nkotshɛ okoma wɔsɔ okokawɔ nkokotshɛ́ djɛ wɛ ndjala la djokanelo djɛ wɔlɔ l’anto ankina. (Kɔl. 3:14) Lamo ngopafune donga nkfumɔ dj’ɔkɔpɛ nkotshɛ okoma wɔko? Lendaka donga djɛ ngafune la nkishi mbala la mbala. Wopo wɔk’ɔmɔ ndeke, hetshɛka winá mbala efula l’anto wakoka nkɔpɛyɛ mposɛ kɛ nkotshɛ okoma wɔko. (Woo. 13:20) Koko lá nsɔsɔlɔ, etsho ɛmɔtshi isankfumɔ nsambaka mposɛ kɛ nangha akambo. Kɛsɔ osakisolawɔ nde ente topakoke ndjila welo djɛ nkotshɛ okoma wɔso? Lako. Iso nkoka ndjila welo djɛ nkotshɛ okoma wɔso kaanga winá wɔ sopalekɔ la mposɛ. Lá nsɔsɔlɔ, nkambo djɛsɔ mpalekɔ wɔdju, koko ongoyala l’osasa winá wɔ nghongokotshɛ okoma wɔko. w23.05 27-28 ite. 5-8

Ndjewa ente iso mbɛmbaka odjito w’akano waso nkoka ntotshinda djɛ ndjisola mpekanto yɛso, ndɔngɔsɔla evunga wɛso la ndjewɔ dj’ipa nkalɔ l’evunga wɛkɔ lonkina. Nangha akambo ete ngo wasɔ nkoka ntokotshɛ́ dj’iso ntshikala lá lowango losɔ lɔ lowiko. Ntsha opakoke ntshikitanyɛ nkano djɛ nyɛtshi djɛ ngɔshi, awola eposelo wembokokomela. Tɔtɛkake ntshutshɛ winá la mpona donga edjinge ndapɛla nghɔmɛlɛ kana mpɛla anto ankina. L’edjena kɛ nangha nghɔsɔ, awola evunga wɛko la nangha la wolo djɛ ndjawola akambo wambokokomela winá wɔsɔ. Ntsha nkfum’oloko kɛko kekotshumola m’ɔtɛ w’ovunga ɔmɔtshi wɔ ngananghe, kadjimɔ l’okitshakitshɛ onkfumɔ te Yehova lá lɔlɔmbɔ, awola ovunga wɔko edjinge lɔmbande akimeyɛ. (Yee. 25:11; 51:3, 4) Lɔmba imeyelo le anto wa ngananghela nyɛtshi, la hona okotshɔ wɔ tokokolo kana nkokaka. (Dja. 5:14, 15) Waka elakanyelo má evunga wɛ ngananghe, la nangha la wolo dj’ipa nkfɔ lonkina. Má nangha nghɔsɔ, okoka ndjala l’eshikikelo ente Yehova angokóka nkɛtshi la angɔkɔpɛyɛ osukɔ w’oyɛ la djonyi.—Yee. 103:8-13. w23.08 28-29 ite. 8-9

Jɛhɔyada akotshɛ́ka Nkfumi Jɛhɔyashi djɛ ndjala onto wɔ wɔlɔ. Eposelo weyalisá lá nkambo djɛsɔ nde, nkfumi k’olangala kɛsɔ akɔpaki nsasangɛ Yehova. Koko m’ɔkɔngɔ wɔ nyɔyi kɛ Jɛhɔyada, Jɛhɔyashi ekameyɛka wana w’ankfumi wayalaki w’apɔsta. (2 Ɛk. 24:4, 17, 18) La yɛnyi y’efula, Yehova ‘akindjɛka ndatomela aprɔfɛtɛ djɛ ndakawoyɛ tende . . . , koko watakɔpa ndaawekameyɛ.’ Iwɔ watekameyɛ kaanga Zekariya, djɛ wɔna Jɛhɔyada, loyalaki ape ngo ɔprɔfɛtɛ wɔ Yehova la nkfundji toko, koko edjinge ewoto kɛ Jɛhɔyashi kɛ nsuke nsuke. Lá nsɔsɔlɔ, Nkfumi Jɛhɔyashi ayakaka Zekariya. (2 Ɛk. 22:11; 24:19-22) Jɛhɔyashi atakindjɛ ndjoka Yehova wɔma wɔ wɔlɔ, ko akambo wohetelaka nyɛtshi efula. Yehova atepelaka ante: ‘Wanɛ wanyɔnyɔla, wangɔnywama.’ (1 Sa. 2:30) Ndambo m’ɔkɔngɔ, iloyi yɛ daambi y’angala w’ase Asuriya walongaka ‘oloyi w’ekekete w’angala’ wa Jɛhɔyashi edjinge ‘wɔkɔtaka ampota yɛ nkekete.’ (2 Ɛk. 24:24, 25) Enkambi wɛ Jɛhɔyashi woyakaka m’ɔtɛ wɔ ndayake Zekariya. w23.06 18-19 ite. 16-17

Poolo ahetshɛka winá efula lá Ɛfɛsɛ, djɛ mpoposanyɛ losango lɔ wɔlɔ. (Ele. 19:1, 8-10; 20:20, 21) Nde akɔpaki wananyɔ wande lombombe la akɔpaki ndakotshɛ́ dj’iwɔ ntshikala la nkɔmano le Yehova. Ase Ɛfɛsɛ wa Poolo ndafunela onkanda wɔnɛ wayalaki ntondo amfumbe yɛ tokanyi tɔ ntolo dj’engolo la yɛ wayi wa maji. Ngando k’Ɛfɛsɛ kewamaki má eyalelo kɛnde kɛ wayi wa mbindo wa ntshɛngi la wa ntshamba nsɔnyi. Anto efula welá ngando kɛsɔ watɛmaki l’etombo la kaanga lá fɛtɛ yɛwɔ yɛ ntolo. (Ɛfɛ. 5:3) Anto efula wawikaki lá ngando kɛsɔ wayalaki anto ‘wambimɛ yimba má ɛlɛmbɛ welendana la nanghedji,’ ntepela ente ‘anto wapokaka lonkina djodjo l’oloko.’ (Ɛfɛ. 4:17-19) Lá ntondo k’iwɔ ndjewa kɛnɛ kelekɔ́ nsɔsɔlɔ wɔlɔ kana nyɛtshi, ase Ɛfɛsɛ watokaki kaanga ndambo kɛ yɛnyi lá nkfum’oloko kana wafɛnyɛki ambɔ wapalekɔ la lowo lá ntondo kɛ Yehova. Djɛko ndeke Poolo ndatepela lá nkambo djɛwɔ ante, ‘walekɔ lá widjima lá timba tɔwɔ la wambowangɔ otale la lowiko lime Ndjambe.’ Ase Ɛfɛsɛ amɔtshi watatshikala lá widjima. w24.03 20 ite. 2, 4; 21 ite. 5-6

Odjito wɔ Ngidiyɔna wɔ isushi alɔmbaki ndjala la wolo wɔ demba. Winá wɔ ase Midiyanɛ yalote mbandji la kati k’otsho, Ngidiyɔna ákilikaka ntateyɛ má Zɛrɛra tii mboka k’enkfumɔ kɛ Ndjale kɛ Jɔrdanɛ. (Tos. 7:22) Ngidiyɔna emalaka lá Jɔrdanɛ? Lako! Kaanga ndalɛmbɛ, nde nya angala wande 300 wopaka Jɔrdanɛ edjinge wakindjɛka ndaakilika. Ekomo ekomo, iwɔ wavundaka ase Midiyanɛ ko waayakaka. (Tos. 8:4-12) Ngidiyɔna ayalaka l’eshikikelo ante Yehova angɔɔpɛyɛ lokembo edjinge apangɔɔpɛyɛ nsɔnyi. (Tos. 6:14, 34) Lofu lɔmɔtshi, Ngidiyɔna nya angala wande wakilikaka ankfumi y’ase Midiyanɛ l’ekolo ko ankfumi yɛsɔ wataalotaki lá ampunda yɛwɔ. (Tos. 8:12, 21) Koko, m’okotshɔ wɔ Ndjambe ase Isariyɛlɛ waavundaka ko waalongaka. Wopo wɔk’ɔmɔ ndeke, tokokolo nkoka ndawɛkɛ te Yehova, ‘kanga lopalɛmbaka kana lopatɛkaka.’ Nde angaapɛyɛ wolo winá woyɛwɔ la djonyi.—Iza. 40:28, 29. w23.06 6 ite. 14, 16

Iso tokoka ndjala l’oloko wɔ ndii ayale ohemba wɔkɔnge w’okoka mpomana laso. Djɛko ndeke ilela Yehova oloko. Tokolenda wopo wɔ Barakɛ ndalonge má ndawɛkɛ tá ɛlɔndjɛlɔ kɛ Yehova. Kaanga yotakokaki nyɛna nguwa l’owila w’otondo, Yehova ɔpɛyɛka alako djɛ ntshɔ ntonana nya Sisɛra, owandji w’ase Kanana l’angala wande wayalaki la mpeko djɛ mbandji djɛ wolo efula. (Tos. 5:8) Ɔprɔfɛtɛ w’omoto Dɛbɔra, ashimelaka Barakɛ djɛ nkilimɔ tá looko lombalemá djɛ ntopomana la Sisera nya pusupusu yɛnde 900. Kaanga Barakɛ ndewaka ante angoyala okakasano djɛ nana la pusupusu yɛ Sisera lá looko lombalemá papoo, nde alɛmɛyɛka. Winá wɔ yotakitaka má onkókó wɔ Tabɔrɔ, Yehova atɔngɛka olumbe wɔ mvula m’olongo. Pusupusu yɛ Sisɛra yekfundamaka l’ɛtɔpi, ko Yehova apɛyɛka Barakɛ mpongo. (Tos. 4:1-7, 10, 13-16) Wopo wɔk’ɔmɔ ndeke, Yehova angɔtɔpɛyɛ mpongo ntsha iso ndawɛkɛ te nde la tá ɛlɔndjɛlɔ k’ɔpɛyɛnde má lotshimbo lɔ olonghanyelo wɔnde.—Mvu. 31:6. w23.07 19 ite. 17-18

Bale ntshitshi dekɔ djonyi djɛ mbikɛ mbiko yɛso. Ngo ngete enkambi wɛ Ndjambe wɛ nkɔmano wɛ l’etsho wɛ ntondo, iso ladjɛ nkonga alaka wa Ndjambe la nkɔmano nkfumɔ. (Heb. 6:11, 12) Bible ntɛdjɛka la onkonyi. (Dja. 5:7, 8) Onkonyi nkambaka olemo wɔ wolo wɔ nkona la mvutela washi, koko nde apewaka winá kɔɔ wɔ nkete yongoposa. Djɛko ndeke onkonyi nkongaka la bake ntshitshi nkfumɔ l’eshikikelo ante angovuka ngo nkete djɛnde. Wopo wɔkɔ ɔmɔ ndeke, iso nkindjɛka ndapɛyɛ l’elemo wɛso wɛ nyuma, kaanga ‘sopewe lofu lɔkɔnge longoyɛ Nkfumi’ kɛso. (Mat. 24:42) Iso nkongaka la bake ntshitshi nkfumɔ, l’eshikikelo ente, Yehova angokotshɛ kenkfumɔ kɛ ndalake, lá winá wɔ ndashikikɛ. Ntsha tombosamba bake ntshitshi, tokoka ndopekɔ nkonga la ndoyawangoyɛ otale m’akambo wa nsɔsɔlɔ. Tokoka ndowanga mpona nkete dj’okanelaso ente djɛngɔtɔpɛyɛ osasa má winá wɔsɔ. Koko ntsha tolekɔ la bake ntshitshi, tokoka nkfulumeyɛ tii l’ekomo edjinge ndowa ewiko.—Mika 7:7. w23.08 22 ite. 7

Má ndjɛdjɛ prɔfɛsi kɛ Danyɛlɛ 2:41-43 la inkina y’otanaso l’onkanda wɔ Danyɛlɛ la wɔ Ndjiso, tokoka ntepela ente akaka wasɔ oyɛwɔ nde osanga wɔ Anglo-Américain, onkfumi wapamela l’andja w’otondo lɔɔko kɛnɛ. Lá kɛnɛ kelendana la onkfumi wɔkɔ wapamela l’andja w’otondo wɔsɔ, Danyɛlɛ atepelaka ante, ‘onkfumi wɔkɔ wongoyala ndambo wolo ndambo wɔdju.’ Ladjikɛnge ndambo wɔdju? Ladjikɛnde anto walekɔ́ djingingi djɛ bomba, walɛmbɛ akoka wande wa nangha akambo la nkfulu kɛ ngete kɛ lowolo. Iso ndjekaka elakanyelo wɛ ndjonyi efula má kɛnɛ kɛ Danyɛlɛ ndatepela lá nkambo djɛ dɔ dj’isakandole. Ntondo ntondo, Onkfumi wɔ Anglo-Américain, wapamelá l’andja w’otondo wɛnyɛka wolo wɔnde lá topo totshikitanyi. Ndjɔmbɔmba, woyalaka l’anteyi k’ewila w’owisá mpongo má Mbandji kɛ I la II kel’andja w’otondo. Koko, onkfumi wapamelá l’andja w’otondo wɔsɔ woyalaka wɔdju edjinge wongokindjɛ ndjala wɔdju má ntshamba djɛ djokanelo djɛ wana mbandja wande. Dj’ape, osanga wɔsɔ wongoyala onkfumi w’ekomo wapamela l’andja w’otondo lá ntondo kɛ Onkfumi wɔ Ndjambe ndila ekomo kɛ enkfumi enkfumɔ wɛ wana w’anto. w23.08 10-11 ite. 12-13

Lá mbamba imɔtshi, Davidɛ alɛmbaki demba m’ɔtɛ w’ekakasano l’ehemba enkfumɔ wɛ ndapomanaka. (Yee. 18:4, 5) Koko, Ngandji k’efula kɛ Yehova k’okembɛki. Yehova alɔndjɛki ilongo yɛnde yɛmbɔlɛmbá ‘tá wilo wamɔnghɔla’ la tá ‘djena djɛ mpomola djelekɔ́ la washi wa ntshitshi.’ Eposelo weyalisá nde, Davidɛ akalɔka mba lokembo lɔnde la ayalaka l’akoka wa nkindjɛ nkfulumeyɛ l’osasa. (Yee. 18:28-32; 23:2) Wopo wɔk’ɔmɔ ndeke lɔɔko kɛnɛ, oyɛwɔ ngo ‘m’ɔtɛ wɔ ngandji kɛ nkɔmano kɛ Yehova ndeke sotashilá’ winá wɔ sapomaná l’ehemba edjinge l’ekakasano wɛ lowiko. (Del. 3:22; Kɔl. 1:11) Lowiko lɔ Davidɛ lingelaki mbala efula lá mbalaka, la ayalaki l’antonyi wa nkfulu efula. Koko, ngandji kɛ Yehova k’okotshɛki djɛ nde ndáwoka ante alamema la awakelama. Davidɛ akokaki ndawoka ante Yehova alekɔ esanga lande l’ikakambo inkfumɔ, edjinge nkambo djɛsɔ dj’ɔpɛyɛki oloko wolo. Djɛko ndeke ndayale l’akoka wa ntshumba ante: ‘[Yehova] atshungolaka má wɛma wɛmi.’ (Yee. 34:4) Davidɛ ayalaki nsɔsɔlɔ la donga djɛ ndjoka wɔma, koko ngandji kɛ Yehova kalekaki wɔma wɔnde wolo. w24.01 30 ite. 15-17

Waka olakanyelo má akano wa nyɛtshi w’ɔsisá Jɛhɔyashɛ. M’ɔkɔngɔ wɔ nyɔyi kɛ Nkfundji k’Ekekete Jɛhɔyada, Jɛhɔyashɛ asɔnaka ntombe yɛpɔlɔ. (2 Ɛk. 24:17, 18) Nde ɔsaka nkano djɛ ndjekameyɛ alako wa wana w’ankfumi y’ase Juda yetakɔpaki Yehova. Mbala imɔtshi ongawola ente Jɛhɔyashɛ ayalaka ladjɛ ndota ase ofutano wasɔ. L’edjena kɛ nangha nghɔsɔ, nde ekameyɛka ntombe yɛnde yɛ nyɛtshi yɛsɔ. Lá nsɔsɔlɔ, winá wɔ wɔna isomoto kɛnde Zekariya ndahone ndɔpɛyɛ dako, Jɛhɔyashɛ oyakaka. (2 Ɛk. 24:20, 21; Mat. 23:35) Ɔsɔ ngo nkambo djɛ nyɛtshi la dj’enkesa djɛ ndananghe! Jɛhɔyashɛ awangaka lowiko lɔnde wɔlɔ, koko nkambo djɛ yɛnyi nde ayɛka ndokoma apɔsta edjinge ondjaki. Ekomo ekomo, enkambi wɛnde woyakaka. (2 Ɛk. 24:22-25) Ɔsɔ ngo lowiko lɔnde otakokawɔ ntshikitana otakindjɛnde ndjekameyɛ Yehova l’anto wɔkɔpa! w23.09 9 ite. 6

Yeso ewaki ante Pɛtɛlɔ nkoka nkindjɛ ndjala la nkɔmano. Djɛko ndeke la ngandji kenkfumɔ, Yeso ashimelaka Pɛtɛlɔ ante: ‘Tokake wɔma.’ Wopo wɔ Yeso ndilela Pɛtɛlɔ oloko atshikitanyɛka lowiko lɔnde. M’ɔkɔngɔ Pɛtɛlɔ nya wankfunɛnde Andele watshikaka olemo wɔwɔ wɔ nsaka ndjale ko wakomaka ambeki wa Mesiya wa winá enkfumɔ, nkano djayakalisá ɛtshɔkɔ wɛ nkekete efula. (Mar. 1:16-18) Ete ngo ndayalaka ombeki wɔ Kristo, Pɛtɛlɔ apomanaka l’akambo wa wɔlɔ efula. Nde ɛnaka Yeso asadjɛ elando, akilika ɛdjɛngɛ, la akfundola kaanga edjo. (Mat. 8:14-17; Mar. 5:37, 41, 42) Pɛtɛlɔ ayalaka lonkina owakɛ wɛnisá la wiso wande lomo l’Onkfumi wɔ Yeso w’oyaye, nkambo dj’ekekete djeyalisá la lɔɔla l’efula lende. (Mar. 9:1-8; 2 Pɛ. 1:16-18) Ɛwo, otasambande ndjala ombeki wɔ Yeso, Pɛtɛlɔ atasamba nyɛna akambo wasɔ kaanga ndambo daambi. Ɔsɔ ngo osasa wɔ ndoke má wopo wɔ ndotawolá djɛ tokanyi tɔpɔlɔ toyalaki lande lá nkambo djɛnde nyɔmɛlɛ ndosambɛ ɛtshɔkɔ wɛsɔ! w23.09 21 ite. 4-5

L’onkanda wɔnde wɔ ntondo, ɔpɔstɔlɔ Pɛtɛlɔ akambaka l’itepela ‘ngandji k’efula.’ Ngandji kɛ nghɔsɔ kepadjimbisanyɛ ngo evunga wɛ daambi toko, koko ‘edjinge evunga wɛ nkekete.’ (1 Pɛ. 4:8) Mbala imɔtshi Pɛtɛlɔ avungɔka olakanyelo wolendana la imeyelo wɔ Yeso ndolakanyɛ ɛnɔnyi efula lá ntondo. Mbala imɔtshi Pɛtɛlɔ akanelaki ante nde ayalaki onto wɔ wɔlɔ efula winá wɔ ndopola ntsha akoka nyimeyɛ wɔnanyɔ wɔnde ‘mbala esambele.’ Koko Yeso olakanyɛnyɛka la atolakanyɛ edjinge iso djɛ nyimeyɛ winaso ‘mbala 77,’ ntepela ente ipa l’ekomo. (Mat. 18:21) Ntsha ongoyalake l’okakasano wɔ nkamba la dako djɛsɔ, mbɔ koko tɔlɛmbake! Enkambi wɛ Yehova enkfumɔ walekɔ anto wa tshamba djɛ djɔ edjinge wangoyalake l’okakasano wɔ nyimeyɛ lá winá ɛmɔtshi. Nkambo djeleka djonyi winá wɔsɔ lewɛ nde nangha kenkfumɔ k’okokɛ nangha djɛ nyimeyɛ wɔnanyɔ wɔko la ndjila vu l’anteyi kɛnyo. w23.09 29 ite. 12

Lá nkfundu djɛ nse, Yɔna ayalaka la djawo ante Yehova angoka lɔlɔmbɔ lɔnde l’okitshakitshɛ la lɔ ndápɛla, edjinge Yehova angookotshɛ. Yehova awikɛka Yɔna, ko m’ɔkɔngɔ nde ayalaka entshupa djɛ ndjawola la djɛ nkotshɛ odjito onkina wɔ Yehova ndɔpɛyɛ. (Yɔna 2:10–3:4) Winá w’opomanɛ l’ohemba, ongoyalake la yɛnyi efula ko opoyewaka kɛnɛ kɛ nshimela Yehova lá lɔlɔmbɔ? Ndo koko ongoyawokake ente ɔmbɔlɛmba efula djɛ nangha wekelo? Vungɔ ente Yehova nsipisoyɛka wɔlɔwɔlɔ wopo w’oyawokɛ. Djɛko ndeke kaanga winá w’onanghɛ lɔlɔmbɔ l’itenyi, yala l’eshikikelo ente nde angɔkɔpɛyɛ ngo kɛnɛ k’oyalɛ la djonyi. (Ɛfɛ. 3:20) Ntsha olekɔ l’okakasano wɔ mbala kana wɔ nangha wekelo m’ɔtɛ w’olando kana yɛnyi yelekɔ́ lawɛ, okoka ndjekameyɛ arɛnjistrɛma wa Bible kana wa enkanda wɛso. Mbala imɔtshi ongowa lokembo má ndjekameyɛ teembo tɔso kana ndenda video mɔtshi lá jw.org. Má ndɔmbaka Yehova la má mponaka nsakiso y’alɔmbɛlɔ wako lá Bible la má nkete nkina nkfumɔ dj’ɔtɔpɛyɛnde, nde angɔkɔpɛyɛ lokembo. w23.10 13 ite. 6; 14 ite. 9

Tabɛrnaklɛ la tɛmpɛlɔ kɛ yopikaka m’ɔkɔngɔ lá Jerusalɛmɛ kayalaki ngo wopo ɔmɔ l’eteyi. Ntenyi mpe djayalaki l’eteyi: ‘Etenyi k’Ekina la Etenyi Keleka Ekina’ kɛ yatolaka la irido. (Heb. 9:2-5; Epo. 26:31-33) L’Etenyi k’Ekina, nkondji djɛ ntala djɛ mpaonyi, etshumbelo kɛ yatshumbaka itshɔ yɛ nsolo mpimbo la mɛsa kɛ yatshikaka mampa w’ekina ndeke loyalaki l’eteyi. Ngo ‘ankfundji yembokfutama avuta’ ndeke loyalaki la lotshungo lɔ ndjingela l’Etenyi k’Ekina djɛ ntonangha olemo wɔwɔ w’ekina. (Ew. 3:3, 7, 10) L’etenyi Keleka Ekina, onsete wɔ mpaonyi, woyalaki djingingi djɛ ɛnamelo kɛ Yehova, ndeke loyalaki l’eteyi. (Epo. 25:21, 22) Ngo nkfundji k’ekekete toko ndeke lolekanaki irido djɛ ndjingela l’etenyi Keleka Ekina mbala kɛmɔ l’ɔnɔnyi lá lofu lɔ ndjipisanyɛ mpekanto. (Lew. 16:2, 17) Nde ingelaki l’ekila w’anyama djɛ ntodjipisanyɛ mpekanto yɛnde nyɔmɛlɛ la yɛ owila w’otondo. Ekomo ekomo, Yehova ɛnyɛka papoo nsakiso kɛ nkete djeyalaki lá tabɛrnaklɛ djɛsɔ.—Heb. 9:6, 7. w23.10 27 ite. 12

Iso ntanaka mbala efula l’Otepela wɔ Ndjambe ɔlɛmbɛ wɔ ‘nkɔpana l’anteyi kɛso.’ (Dj. 15:12; Ɔrɔ. 13:8; 1 Te. 4:9; 1 Pɛ. 1:22; 1 Dj. 4:11) Koko, ngandji oyɛnde nde djekeka djel’eteyi k’oloko, kana l’onto lɔ l’eteyi, edjinge lako onto w’okoka nyɛna l’eteyi k’oloko wɔso. Ntsha nghɔsɔ, wopo wɔkɔnge w’okokaso nyɛnyɛ ente iso ndjokanaka ngandji l’anteyi kɛso? Má etepela la nanghedji djɛso. Topo tolekɔ efula t’okokaso nyɛnyɛ wananyɔ l’ankaana yɛso ente iso ndakɔpaka. Ndjɔmbɔmba imɔtshi ikikinɛ: ‘Nyoshimelanake nsɔsɔlɔ l’anteyi kɛnyo.’ (Zak. 8:16) ‘Nyoyale vu l’anteyi kɛnyo.’ (Mar. 9:50) ‘Lá nkambo djelendana la nɛmɛyɛna, nyɔpɛyɛ ndjɔmbɔmba.’ (Ɔrɔ. 12:10) ‘Nyolongolanake.’ (Ɔrɔ. 15:7) ‘Nyokindjɛ . . . nyimeyana l’anteyi kɛnyo.’ (Kɔl. 3:13) ‘Nyɔwɛmbɛlanake edjito.’ (Nga. 6:2) ‘Nyokindjɛ nkembɛna.’ (1 Te. 4:18) ‘Nyokindjɛ . . . nsukana l’anteyi kɛnyo.’ (1 Te. 5:11) ‘Nyɔlɔmbɛlanake.’—Dja. 5:16. w23.11 9 ite. 7-8

Lofu la lofu, iso ndɔsaka akano walɔmbama ndjala la djawo djɛ wolo. Ndjɔmbɔmba, iso ndɔsaka akano walendana la ntombe yɛso, etombo, nkalasa, bala, waana, edjinge olemo wela ndemba. Angoyala wɔlɔ ndáwopola ente: ‘Akano wɔsami nyɛnyɛka djɛ ndekɔ l’eshikikelo ente andja wanɛ watahete edjinge wangɔhɛnama l’andja wa bango wa Ndjambe? Ndokoko langɔsake akano ete ngo anto wakanelaka ambɔ nyɔyi ndeke ekomo k’akambo ankfumɔ?’ (Mat. 6:19, 20; Luka 12:16-21) Tɔngɔsaka akano wa wɔlɔ ntsha iso nkembɛ djawo djɛso djɛ ente andja wa bango wamboyala nsɔsɔlɔ entshupa. Tongopomanake lonkina l’ehemba wɛlɔmba ndjala la djawo djɛ wolo. Mbala imɔtshi, tɛna ndjolo la lɔnyɔkɔ, olando wopashile kana akambo wakoka ntɔlɛmbɛ. Má bango, tokoka nkfulumeyɛ ehemba l’eshikikelo kenkfumɔ. Koko ntsha wembiloyɛ ndeka wopo wɔ sakanelaka angɔlɔmbama ndjala la djawo djɛ wolo djɛ nkfulumeyɛ edjinge nkindjɛ nkambela Yehova l’osasa.—1 Pɛ. 1:6, 7. w23.04 27 ite. 4-5

Yehova nkɔpaka iso nangha akambo w’okana la ndɔmbɔ yɛso. Ndjɔmbɔmba, wɔnanyɔ nkoka ndɔmba Yehova djɛ ndokotshɛ́ djɛ nde mba konje k’olemo wɔnde wɔ demba djɛ nde ndjala l’akoka wa ntingela lá losanghanyɛ lɔ rɛjɔ. Wopo wɔkɔnge Yehova okokande nkadjimola lá lɔlɔmbɔ lɔsɔ? Nde nkoka mpɛyɛ wɔnanyɔ oloko wolo woyɛnde la djonyi djɛ ntosawola l’owandji wɔnde. Koko wɔnanyɔ angokamba la lɔlɔmbɔ lɔnde má ntshɔ ntɔlɔmba owandji wɔnde. Nde nkoka ndjala la djonyi djɛ nangha nkambo djɛsɔ mbala la mbala. Nde nkoka kaanga ndjokana nya winande w’olemo djɛ mpenghanyɛ mfu yɛ olemo, kana nde nkoka kaanga ndɔmba dj’iwɔ ndowopela mfalanga m’ɔtɛ wɔ mfu yɛ ndongoyala lá losanghanyɛ. Yehova nkongelaka dj’iso ndɔlɔmbaka mbala la mbala dj’ekiyano wɛso. Yeso ɛnyɛka ante ndɔmbɔ yɛso ipangokadjimwama mbala kɛkɔ kɛmɔ m’ɔkɔngɔ w’iso ndɔmba. (Luka 11:9) Koko totapekɔke! Tɔlɔmbake mbala la mbala edjinge l’oloko ɔmɔ. (Luka 18:1-7) Winá w’onanghaso nghɔsɔ, tɔngɛnyɛ Yehova ente kɛnɛ k’ɔlɔmbaso kelekɔ nsɔsɔlɔ djonyi. Tɔngɛnyɛke lonkina djawo djɛso tá akoka wande wa ntokotshɛ́. w23.11 22 ite. 10-11

Yehova alakaka ilongo yɛnde Abrahama ante ewila enkfumɔ wengosakolama má mbamba k’inkanola yɛnde. (Ewa. 15:5; 22:18) Ladjikɛnde Abrahama ayalaki la djawo djɛ wolo te Ndjambe, nde ayalaki l’eshikikelo ante daka djɛ Ndjambe ngokotshama. Kaanga yayale nghɔsɔ, winá wɔ Abrahama ndakome l’ɛnɔnyi nsuke la 100 edjinge wadjɛnde ɛnɔnyi 90, antshukami wa djawo wasɔ ngo watawotaki. (Ewa. 21:1-7) Koko, Bible ntepela ante: ‘M’ɔtɛ wɔ nkongi, [Abrahama] ayalaki la djawo ante angokoma papa kɛ ewila efula lá nkilika kɛnɛ ketepelamisá.’ (Ɔrɔ. 4:18) Wɛ ndjewaka ente nkongi djɛ Abrahama nkotshamaka. Nde akomaka papa kɛ Izaka, wɔna wɔ ndakongela ilá efula. Lamo Abrahama ndayalaka l’eshikikelo ante Yehova angokotshɛ daka djɛnde? Ladjikɛnde Abrahama ayalaki la djokanelo djɛ ma ma la Yehova, nde ayalaki ‘l’eshikikelo kenkfumɔ ante kɛnɛ kɛ [Ndjambe] ndalake’ kengokotshama. (Ɔrɔ. 4:21) Yehova awolaka Abrahama la owetaka ante onto wɔ wɔlɔ, m’ɔtɛ wɔ djawo djɛnde.—Dja. 2:23. w23.12 8 ite. 1-2

Olangala wilelawɔ oloko angokotshɛke edjito wɛnde la nkɔmɛ nkfumɔ. Tokolenda ndjɔmbɔmba kɛ djɔ kɛ Yeso. Nde atayala kanga ompino kana atalotaki edjito wɛnde. Koko, nde akotshɛka edjito wɔpɛyisá Yehova, kaanga lá winá wɔ nkambo djɛsɔ yayalaka wolo nangha. Nde akɔpaki anto, pekapeka ambeki wande, edjinge apɛyɛka lowiko lɔnde lá nkambo djɛwɔ l’ɛkɔpa. (Dj. 13:1) Djɛ ndjokola Yeso, kamba la wolo djɛ nkotshɛ odjito onkfumɔ wɔ yɔmbɔkɔpɛyɛ. Ntsha opewe wopo w’okokɛ nkotshɛ odjito wɔkɔ, yala l’okitshakitshɛ la hona okotshɔ me wananyɔ wambotshunda lá nyuma. Shiyɛ olemo wɔ yɔmbɔkɔpɛyɛ ape nkamba ngo ndambo daambi ko mpekɔ. (Ɔrɔ. 12:11) L’edjena kɛ nangha nghɔsɔ, kotshɛ odjito wɔko tii l’ekomo, nangha nkambo djɛsɔ ete ngo onanghelɛ nde ‘Yehova koko ape anto.’ (Kɔl. 3:23) Lá nsɔsɔlɔ opalekɔ djɔ, djɛko ndeke yala l’okitshakitshɛ edjinge awola ovunga onkfumɔ w’onanghɛ.—Woo. 11:2. w23.12 26 ite. 8

Tongoyalake l’osasa efula winá w’olongolaso batisimo la w’ingelaso lá nkfumbo kɛ Yehova. Anto walekɔ́ la mpipo kɛsɔ wakoka ndjawola etepela wɛ ondjombe Davidɛ wɛnɛ: ‘Osasa le onto wɔ wɛ [Yehova] ngɔmbɔsɔna la wolekɔ́ entshupa la wɛ djɛ ndjintasɛ lá awandja wako.’ (Yee. 65:4) Yehova apapɛyɛka onto onkfumɔ mbamba kɛ ndjintasɛ lá awandja wande. Nde angosepake le nde ngo anto wɛnyɛ ambɔ wakombola ndjala la djokanelo djɛ wɔlɔ la nde. (Dja. 4:8) Winá w’oyalambolɛ la w’olongolɛ batisimo, okoka ndjala l’eshikikelo ente nde ‘angotshadjola esako tii lako kaanga ekete kɛmɔ kengosamba.’ (Mal. 3:10; Jɛr. 17:8) Batisimo oyɛwɔ ngo ewangelo. Wɛ ongonangha kenkfumɔ k’oyɛ ladjɛ nangha djɛ mbika lá wopo w’okana l’ɛlɔkɔ kɛko kɛ ndálambola, kaanga lá ntondo k’ehemba l’ekakasano. (Los. 5:4, 5) Ete ngo oyɛ ombeki wɔ Yeso, ongokilika ndjɔmbɔmba la ɛlɛmbɛ wɛnde má nkilika akoka wako.—Mat. 28:19, 20; 1 Pɛ. 2:21. w24.03 8 ite. 1-3

Iya kɛkɔnge k’okokanyo nangha ntsha nyape kɛkɔ nyopasasanga mpetshɛ winá esanga? Kɛkɔnge k’okokanyo nangha? Kokanela nkambo djelendana l’iyɛ. Iyɛ ipatateyɛka mpɛta la wolo má bango. Ingɔlɔmbake ndjila tokokonyi tɔ daambi ndambo ndambo tii ndokoma lá angale. Wopo wɔk’ɔmɔ ndeke, má bango nyokoka mpetshɛka ndambo kɛ winá daambi esanga lofu la lofu. Nyonanghe ikakambo imɔtshi yekoka nyosasangɛ nyape kɛkɔ. (Dja. 3:18) Má nangha nghɔsɔ, nyokoka ntateyɛ mpɛtshɛ ngandji kɛnyo. Dilɛmɛlɔ dekɔ la ntshina efula lá bala. Dekɔ ete ngo lohoye lokotshɛ́ká dj’iyɛ mpɛta la wolo. Ntsha lako lohoye, iyɛ ingodjima lankeke. Wopo wɔk’ɔmɔ ndeke, ntsha lako dilɛmɛlɔ, ngandji k’antshukami nkoka mpɔla lankeke. L’onkoko onkina, wadji la wome wonangha la wolo djɛ nɛmɛyana l’anteyi kɛwɔ, nkomɛka ngandji kɛwɔ wolo efula. Koko, vungɔka ente, ape nkanela ente wɛ nɛmɛyɛka wadjɛko kana womɛko ndeke djonyi, koko wadjɛko kana womɛko ndeke ladjɛ ndawoka ante ɔngɔɔlɛmɛyɛke. w23.05 22 ite. 9; 24 ite. 14-15

Lá Bible, enkambi wɛ Ndjambe wɛ nkɔmano watepelaka djɛ winá wɛ yayalaka lá ndjolo la yadjidjimaka lokomba m’ɔtɛ w’antonyi wawɔ kana w’akambo wa yatshindamaká la wolo djɛ nangha. (Yee. 18:4; 55:1, 5) Lá wopo wɔkɔ ɔmɔ, tokoka mpomana l’onanyelo lá nkalasa, l’olemo, me nkfumbo kɛso kana me ewandji wɛ lɛɛta. Tokoka kaanga ndjoka wɔma ente tongovɔ m’ɔtɛ wɔ olando. Lá winá wɛ nghɔsɔ, tokoka ndáwoka ente topakotshi wolo wɔ nangha kaanga nkambo mmɔ ete ngo wɔna w’ilɛngɛ. Wopo wɔkɔnge Yehova otokotshɛnde lá winá wɛ nghɔsɔ? Nde ntokembɛka la ntovumbɛka. Djɛko ndeke, tohetshɛke winá mbala la mbala esanga la Yehova, má ndɔlɔmbaka la mbalaka Otepela wɔnde. (Yee. 77:1, 12-14) Manyi, winá w’opomanɛ la nkambo nkotshimbɛ yimba, ikanyi yɛko yɛ ntondo ingoyala yɛ nkadjimɔ te Papa kɛko kɛ l’olongo. Shimela Yehova wɔma l’ekiyano wɛko. Pɛyɛnde mbamba kɛ nde nsawola la wɛ la nkokembɛ má lotshimbo l’Afunelo.—Yee. 119:28. w24.01 24-25 ite. 14-16

Mposɛ alekɔ djonyi efula djɛ nkotshɛ okoma ɔmɔtshi welá nyuma. Winá w’oyɛ la mposɛ k’efula kɛ nkotshɛ okoma ɔmɔtshi, ongila welo djɛ nkotshɛ okoma wɔkɔ. Wopo wɔk’ɔmɔ ndeke, ntsha tolekɔ la mposɛ k’efula kɛ nkotshɛ okoma ɔmɔtshi, tongila welo efula djɛ nkotshɛ okoma wɔkɔ. Ko, kɛkɔnge kokokɛ nangha djɛ wɛ ndeka ndjala la mposɛ? Lɔmba djɛ wɛ ndjala la mposɛ k’efula. Má lotshimbo lɔ nyuma kɛnde, Yehova nkoka nkɔpɛyɛ mposɛ kɛ nkotshɛ okoma wɔko. Mbala imɔtshi iso ndawilelaka okoma ɔmɔtshi ladjikɛnde alɔmbama ngo nangha nghɔsɔ, ɔsɔ alekɔ nkambo djɛ wɔlɔ. Koko lá nsɔsɔslɔ akoka ndjala ko topalekɔ la mposɛ kɛ nkotshɛ okoma wɔkɔ. Tɔnɔlaka lá kɛnɛ kɛ Yehova ndombokonanghelá. (Yee. 143:5) Ɔpɔstɔlɔ Poolo atɔnɔlaka lá wɔlɔ w’ipawɔsɔdjɔmba wɔ Yehova tende, ko kɛsɔ kotshindaka djɛ nde ndeka ndjala la mposɛ kɛ nkamba la wolo l’olemo wɔ Yehova. (1 Kɔ. 15:9, 10; 1 Ti. 1:12-14) Wopo wɔk’ɔmɔ ndeke, ntsha tɔtɔnɔla efula la kɛnɛ kɛ Yehova otonanghelande, tongoleka ndjala la mposɛ k’efula kɛ nkotshɛ ekoma wɛso.—Yee. 116:12. w23.05 27 ite. 3-5

Tongosasangɛke Papa kɛso kɛ l’olongo winá w’olumɛso djiina djɛnde. (Yee. 119:108) Ko kɛsɔ osakisolawɔ nde ente Ndjambe kanga nkfulu inkfumɔ alekɔ ngete wana w’anto wa ntshamba djɛ djɔ, walekɔ́ la mposɛ kɛ lomo ladjikɛnde walekɔ la djonyi kana wahona lokembo? Lako. Winá w’olumɛso Papa kɛso kɛ l’olongo, tongotonake nkambo dj’ongolo djelendana ole laso. Satana afunaka ante lako kaanga onto ɔmɔ w’okoka nseela djiina djɛ Ndjambe la nkɔmano. Lá nkilika etepela wɛnde, lako kaanga onto wɔ l’anteyi kɛso wolekɔ́ la nkɔmano. Nde atepelaka ante isankfumɔ tɔngɔpɛyɛ Ndjambe ɔkɔngɔ ntsha tombewa ente tongowa wapɔ má nangha nghɔsɔ. (Djɔ. 1:9-11; 2:4) Koko Djɔbɔ mpame kɛ nkɔmano, ɛnyɛka ante Satana alekɔ kanga ongolo efula. Iya wɛ? Onto onkfumɔ wɔ l’anteyi kɛso alekɔ la mpeyi kɛ nseela djiina djɛ Papa kɛso la nkɔmano nkfumɔ ole ndosasangɛ má ndokambela. (Woo. 27:11) Alekɔ nsɔsɔlɔ mpeyi k’ekekete kɛ nangha nkambo djɛsɔ. w24.02 8-9 ite. 3-5

Má ɔkɔngɔ w’etsho wɛ Mɔsɛ la wɛ Yosua, Yehova asɔnaka tosushi djɛ ndɔndjɛ enkambi wɛnde. Makɔ, l’eleko k’ankfumi, Yehova asɔnaka aprɔfɛtɛ djɛ ndɔndjɛ enkambi wɛnde. Ankfumi yɛ nkɔmano walɔndaka alako w’aprɔfɛtɛ. Ndjɔmbɔmba, Nkfumi Davidɛ awolaka l’okitshakitshɛ onkfumɔ ikako yɛ me ɔprɔfɛtɛ Natana. (2 Sa. 12:7, 13; 1 Ɛk. 17:3, 4) Nkfumi Yehoshafata ayawɛkɛka te ɔprɔfɛtɛ Jahaziyɛlɛ djɛ mpona ɛlɔndjɛlɔ, edjinge akembɛka ase Juda djɛ ‘ndjala la djawo te aprɔfɛtɛ wa [Ndjambe].’ (2 Ɛk. 20:14, 15) Winá wɔ ndayalaka la yɛnyi, Nkfumi Izikiya ahonaka okotshɔ me ɔprɔfɛtɛ Izaya. (Iza. 37:1-6) Mbala inkfumɔ y’ankfumi yalɔndaka ɛlɔndjɛlɔ kɛ Yehova, iwɔ wasakolamaki la owila wolamemaki. (2 Ɛk. 20:29, 30; 32:22) Ɛnamaki papoo ente Yehova akambaki la aprɔfɛtɛ djɛ ndɔndjɛ enkambi wɛnde. w24.02 21 ite. 8

Satana nkombolaka dj’iso ndjala tolongo l’anto wangotokomɛ djɛ nkanela ente ɛlɛmbɛ wɛ Yehova welekɔ wolo nɛmɛyɛ. Iso ladjɛ mvungɔka ente ape ngo anto wahetshɛ laso winá elongi l’elongi toko ndeke tolongo tɔso, koko edjinge anto wasawola laso lá rɛzo sosio. Iso ladjɛ nana l’ikanyi y’andja wanɛ y’ente wayi wa mbindo wa ntshɛngi walekɔ wɔlɔ. Iso tewa wɔlɔ ente walekɔ nyɛtshi. (Ɛfɛ. 4:19, 20) Angoyala wɔlɔ iso ndáwopola ente: ‘Lemi langowadjɛke dj’ipa ndjala ilongo la winami w’olemo, wa nkalasa kana l’anto ankina wapalɛmɛyɛ ɛlɛmbɛ wɛ sii wɛ Yehova? Langoseelake ɛlɛmbɛ wɛ Yehova l’oloko wolo onkfumɔ kaanga anto amɔtshi okokawɔ ndjeta ambɔ kanga akambo wolo?’ Ete ngo 2 Timɔte 2:20-22 ɛnyɛnde, iso ladjɛ mbadjɛ lonkina winá w’ɔsɔnaso tolongo kaanga l’anteyi k’otshumano w’Akristo. Iso namaka lá yimba ente anto amɔtshi wapakoke ntokotshɛ́ dj’iso ntshikala la nkɔmano l’olemo wɔ Yehova. w24.03 22-23 ite. 11-12

Ombokanelaká lofu lɔmɔtshi wopo wɔ Yehova oyɛnde? Kaanga Yehova ndɔpɛnamá, Bible ntepelaka nkambo djɛnde lá topo totshikitanyi. Bible ndjetaka Yehova ante ‘winá la nguwa’ edjinge ‘iyɛ yetshumba.’ (Yee. 84:11; Heb. 12:29) Omfunyi wɔ Bible ɔmɔtshi atepelaka ante ɛnamelo kɛnde kelekɔ ete ngo lɔwɔkɔ lɔ safirɛ, lowolo lɔ mfɛsa, la ete ngo ngolo kenghayinghá. (Ezk. 1:26-28) Ladjikɛnde tɔpɛnáká Yehova, tokoka ndjala l’okakasano wɔ ndjawola ente nde ntɔkɔpaka. Amɔtshi mfɛnyɛka ambɔ Yehova apakokaki ndaakɔpa lotshinda m’ɔtɛ w’akambo wapomanisá lawɔ lá lowiko. Yehova nsipisoyɛka wopo w’oyawokaso wɔsɔ edjinge nde ndjewaka eposelo welekɔ́ la nkambo djɛsɔ leso. Djɛ ntokotshɛ́, nde ntisolaka lonto lɔnde lɔ wɔlɔ lombombe l’Otepela wɔnde. Itepela imɔtshi ileká nyɛnyɛ wopo w’olekɔ́ Yehova nde ngandji. (1 Dj. 4:8) Ngandji nyɛnyɛká wopo w’oyɛnde. Ngandji ndeke lootshinda djɛ nangha kenkfumɔ k’onanghakande. Ngandji kɛ Ndjambe kelekɔ ekekete edjinge nkfulu efula ko kɛsɔ ndotshindaka djɛ nkɔpa kaanga anto wapɔkɔpɛ.—Mat. 5:44, 45. w24.01 26 ite. 1-3

Yehova asɔnaka Mɔsɛ djɛ ndɔndjɛ ase Isariyɛlɛ dj’iwɔ mposa má Edjipito. Nde álɔndjɛka má lotshimbo lɔ nkondji djɛ bonde la mbile edjinge la l’otsho má nkondji dj’iyɛ. (Epo. 13:21) Mɔsɛ la wana w’Isariyɛlɛ watalɔndaki nkondji ko djalɔndjɛka tá Ndjale kɛ Nkolankola. Ase Isariyɛlɛ wadjidjimaka lokomba winá wɔ yewe ambɔ ndjale kelekɔ lá ntondo kɛwɔ la koko angala w’ase Edjipito walakilika m’ɔkɔngɔ. Koko ɔsɔ atayala ovunga. Yehova ndeke lokambisá la Mɔsɛ djɛ ndɔndjɛ enkambi wɛnde t’eteyi. (Epo. 14:2) Ndjambe áwikɛka lá lɛdji lɔ nkamɔ efula. (Epo. 14:26-28) L’ilá k’ɛnɔnyi 40, Mɔsɛ akindjɛki nkilika ngo nkondji djɛ bonde djɛ ndɔndjɛ enkambi wɛ Ndjambe lá osowe wɔ lɔsɛkɛ. (Epo. 33:7, 9, 10) Yehova asawolaki nya Mɔsɛ má nkondji, ko l’onkoko wɔnde, Mɔsɛ ashimelaki ase Isariyɛlɛ kɛnɛ kɛ Ndjambe ndooshimelaka. Ase Isariyɛlɛ wayalaki la ilembetelo y’ekekete yɛnyɛki ente Yehova akambaki la Mɔsɛ djɛ ndalɔndjɛ. w24.02 21 ite. 4-5