Ngɔndɔ k’esambele

Yeso okolaka Papa kɛnde lá lɛdji lɔ djɔ lá tokanyi la má wopo wɔ ndoyawokaka lá kenkfumɔ kɛ ndatepelaka, kɛ ndananghaka la má ansese wande. (Dj. 14:9) Elakanyelo wɛkɔnge w’okokaso mba má ansese wa Yeso? Yeso nya Papa kɛnde ntɔkɔpaka lombombe. Winá wɔ ndayalaka lá looko, Yeso ɛnyɛka ngandji k’efula kɛ ndokaka anto má nkamba la nkfulu kɛnde kɛ nkamɔ djɛ nkotshɛ́ wɛɛnaki ndjolo. Lá mbamba kɛmɔtshi, ampame ipe yembowodjɛ wiso woleelaka djɛ nde ndaakotshɛ́. (Mat. 20:30-34) Tokote ente Yeso ‘awokaka djandji’ ko masɔ aasadjɛka. Ete ngo yombokamba lanɛ, itepela yɛ Grɛkɛ yekadjimwama ‘awokaka djandji’ nsakisolaka nkɛtshi k’efula k’onto okakande l’oloko. Nkɛtshi k’efula kɛ nghɔsɔ, kelekɔ́ lonkina ilembetelo yɛ ngandji, ndeke lotshindisá Yeso lonkina djɛ ndesɛ anto wayalaki la ndjala edjinge nsadjɛ kanga anghɛnyi. (Mat. 15:32; Mar. 1:41) Iso nkoka ndjala l’eshikikelo ente Yehova, Ndjambe kɛ ‘nkɛtshi k’efula,’ nde nya Wɔnande ntɔkɔpaka efula edjinge ndjalaka la yɛnyi winá wɔtɛnawɔ tɛna ndjolo. (Luka 1:78; 1 Pɛ. 5:7) Ndjokamaka papoo ente nsɔsɔlɔ nde nkombolaka nyimɛ akambo ankfumɔ wɛnyɛ anto nkɛtshi! w23.04 3 ite. 4-5

Iso nkoka nangha nkambo djɛsɔ má nangha la wolo dj’ipa mbala kana ndjekameyɛ tokanyi tɔ nyɛtshi tombolola l’andja wa Satana wanɛ. Iso nkoka ndodjɛ wɔɔngɔ wɔso la tokanyi tɔ wɔlɔ má mbalaka la ndjekaka Bible. Ndjingelaka lá nsanghanyɛ edjinge mpoposanyɛka angotokotshɛ́ lonkina djɛ nama yimba yɛso. L’onkoko wɔnde, Yehova ntolakaka ante apangawola dj’iso mpembama lá lɛdji lɔ isopakoke nkfulumeyɛ. (1 Kɔ. 10:12, 13) Isankfumɔ ladjɛ ndɔmbaka efula ndeka wopo w’isananghaka ntondo djɛ ntshikala la nkɔmano te Yehova l’etsho w’ekomo wɛ ndjolo wɛnɛ. Yehova nkɔpaka iso ‘ndjipola eloko wɛso lá ntondo kɛnde’ má lɔlɔmbɔ. (Yee. 62:8) Lumɛka Yehova edjinge pɛyɛnde lokasa lá kenkfumɔ k’okonanghelande. Lɔmbande akokotshɛ́ djɛ wɛ ndjala la wolo l’olemo w’ipoposanyɛ. Wɔndande akokotshɛ́ djɛ wɛ nkfulumeyɛ ekakasano enkfumɔ edjinge mpikama lá ntondo k’ohemba onkfumɔ wokoka mpomana la wɛ. Tawolake kaanga ekete kana onto nkoshimba djɛ wɛ ndɔmbaka Yehova mbala la mbala. w23.05 7 ite. 17-18

Lamo ingelakaso lá nsanghanyɛ y’otshumano? Ntondo ntondo, oyɛwɔ nde djɛ numɛ Yehova. (Yee. 26:12; 111:1) Iso ndjingelaka lonkina lá nsanghanyɛ y’otshumano djɛ nkembɛna lá deko djɛ wolo djɛnɛ. (1 Te. 5:11) Winá wɔpɛyɛso kɔmantɛrɛ lá nsanghanyɛ y’otshumano, iso nanghaka akambo ape wasɔ. Koko winá w’ɔpɛyɛso kɔmantɛrɛ, tokoka ndjala la ekakasano. Tokoka ndjala la wɔma kana la nsɔnyi djɛ mpɛyɛ kɔmantɛrɛ, kana tokoka ndjala la mposɛ kɛ mpɛyɛ kɔmantɛrɛ koko wapatɔpɛyɛ lá wopo w’ɔkɔpaso. Wopo wɔkɔnge w’okokaso ndongela ekakasano wɛsɔ? Ɔpɔstɔlɔ Poolo atepelaka ante okoma wɔso ladjɛ ndjala wɔ ‘nkembɛna l’anteyi kɛso.’ Winá w’osipisoyɛso ente anto ankina welá losanghanyɛ nkoka mba lokembo kaanga má itepela yɛ daambi yɛnyɛ djawo djɛso, topangokaka wɔma kana nsɔnyi djɛ mpɛyɛ kɔmantɛrɛ. Edjinge ntsha wapatɔpɛyisa kɔmantɛrɛ mbala efula, iso nkoka ndjala l’osasa ente anto ankina wel’otshumano wangowa edjinge iwɔ mbamba kɛ mpɛyɛ kɔmantɛrɛ.—1 Pɛ. 3:8. w23.04 20 ite. 1-3

Ndjewo kɛpɛyamaka! Ase Juda wayalaki lá lofumbe lá Babilɔnɛ l’ilá k’ɛnɔnyi ete ngo 70, wawaka lotshungɔ lɔ nkalɔ t’owila wɔwɔ, Isariyɛlɛ. (Ɛzr. 1:2-4) Ngo Yehova toko ndeke lokokisá nangha nkambo djɛsɔ. Ase Babilɔnɛ watayalaki l’ekfumbo kɛ ntshungola amfumbe yɛwɔ. (Iza. 14:4, 17) Koko Babilɔnɛ djɛka ndotshitana, edjinge owandji wɔ bango ashimelaka ase Juda dj’iwɔ nkalɔ t’owila wɔwɔ. Ose Juda onkfumɔ, pekapeka ewandji wɛ nkfumbo wayalaka ladjɛ ndɔsa nkano mɔtshi: ntshikala lá Babilɔnɛ kana nyima m’eteyi. Nkano djɛsɔ ntayala nkano djɛ wɔdju ndɔsa. Nkokolo wewoyɛka ambɔ ekakasano wengoyala efula lá lɔkɛndɔ. La koko efula k’ase Juda iyawotshɔ nde lá Babilɔnɛ, ɔsɔ ndeke loyalaki ɛtɔyi k’owila k’iyewaka. Le wɔ, Isariyɛlɛ yayalaká nde owila w’andoyi yɛwɔ. Nyɛnamaka ete ngo ase Juda amɔtshi wayɛka ndoyala la lomo efula lá Babilɔnɛ, djɛko ndeke akokaka ndjala okakasano le wɔ djɛ ntshika amvulu yɛwɔ yɛ wɔlɔ kana elemo wɛwɔ wɛ mfalanga ko ntshɔ t’owila wɔ yotalembetalaka. w23.05 14 ite. 1-2

Otepela wɔ Ndjambe ntokembɛka djɛ ndjala l’okfumedji, nkɛtshi, la ngandji. Luka 21:19 ntepelaka ante: ‘Má okfumedji wɔnyo ndeke nyongowikɛ mbiko yɛnyo.’ Kɔlɔsɛ 3:12 ntepelaka ante: ‘Nyɔlɔtɛ . . . nkɛtshi.’ Edjinge 1 Tesalɔnikɛ 4:9, 10 ntepelaka ante: ‘Nyɔmɛlɛ nyolakanyema me Ndjambe djɛ ndjokana ngandji l’anteyi kɛnyo. . . . Wananyɔ, tombonyokembɛ djɛ nyo nkindjɛ nangha nghɔsɔ lá lɛdji l’efula.’ Yafunela avɛrse ankfumɔ wasɔ nde ambeki wamboshiyɛka nyɛnyɛ okfumedji, nkɛtshi, edjinge ngandji ma nanghedji djɛwɔ. Koko, iwɔ wayalaka ladjɛ nkindjɛ ndjala la wekeka wasɔ. Iso ladjɛ nangha wopo wɔk’ɔmɔ. Djɛ nkokotshɛ́, tongoshishima wopo wɔ Akristo wa ntondo yɛnyɛ wekeka ankfumɔ wasɔ. Masɔ, ɔngɛna wopo w’okokɛ ndjokola ambeki wasɔ, edjinge nyɛnyɛ ente omboyala entshupa lá nkambo djɛ ndjolo k’ekekete. Winá wɔ ndjolo k’ekekete yongowanga, wɛ ɔngɔsa nkano djɛ nkfulumeyɛ ladjikɛnde omboshiyɛká ndjeka wopo wɔ nkfulumeyɛ. w23.07 3 ite. 4, 8

Ayale kaanga oyɛso nde ankfutami w’avuta kana ‘ɛnkɔkɔ enkina,’ tolekɔ la djonyi djɛ ntshikala lá ‘Mboka k’Ekina’ ladjikɛnde kengotokotshɛ́ djɛ ntshikala lá paradiso kelá nyuma edjinge kengotoyakala ɛtshɔkɔ wɛ Onkfumi woyaye. (Dj. 10:16) Ntateyɛ má 1919 D.D., miliyɔ y’ampame, amato, edjinge dɛngɛ waposaka má Babilɔnɛ dj’Ekekete, osanga wɔ nkɛlɛsiya dj’engolo djel’andja w’otondo, ko wawangaka nkɛnda lá mboka kɛ djingingi kɛsɔ. Winá wɔ ase Juda yatimaká má Babilɔnɛ, Yehova alonghanyɛka dj’ipa iwɔ mpomana l’ekakasano. (Iza. 57:14) Iya otepelaso mo lá nkambo djɛ ‘Mboka k’Ekina’ kɛ l’etsho wɛso wɛnɛ? Ɛnɔnyi nkama lá ntondo kɛ 1919, Yehova awangaka nkamba l’ampame yokaki Ndjambe wɔma djɛ ndjɔmbɛla mboka kengokotshɛ́ anto djɛ mposa má Babilɔnɛ dj’Ekekete. (Ɛdjɛ la Izaya 40:3.) Iwɔ wananghaka olemo wɔ djonyi, ntepela ente olemo wɔ ndɔngɔsɔla mboka kelá nyuma djɛ nkotshɛ́ anto w’eloko wɔlɔ djɛ mposa má Babilɔnɛ dj’Ekekete edjinge ndjingela lá paradiso kelá nyuma, l’edjena kɛ yombokawoyɛ etolo kɛ piyɔɔ kɛ Yehova. w23.05 15-16 ite. 8-9

Yehova nkɔpaka iso ndokambela l’osasa edjinge l’ɛkɔpa. (2 Kɔ. 9:7) Iya iso ladjɛ ndjila welo djɛ nkotshɛ okoma ɔmɔtshi welá nyuma kaanga ntsha topakɔpɛ okoma wɔkɔ? Tokolenda ndjɔmbɔmba k’ɔpɔstɔlɔ Poolo. Nde atepelaka ante: ‘Lemi ndjapemelaká demba djɛmi edjinge ndookomɛka ete ngo mfumbe.’ (1 Kɔ. 9:25-27, nɔtɛ) Poolo ananghaki la wolo djɛ nangha kɛnɛ kelekɔ wɔlɔ kaanga winá wɔ ndotayalaki la mposɛ kɛ nangha nkambo djɛsɔ. Yehova awolaka olemo wɔ Poolo? Ee! Edjinge Yehova ɔtshɔkɔlaka lá welo wɛnde. (2 Ti. 4:7, 8) Wopo wɔk’ɔmɔ ndeke, Yehova nsasangaka ntɛna tonangha la wolo djɛ nkotshɛ okoma wɔso kaanga lá winá wɔ sopalekɔ la mposɛ kɛ nangha nkambo djɛsɔ. Nde nsasangaka ladjikɛnde ntsha kaanga topananghisa nkambo djɛsɔ má ngandji k’olemo wɔsɔ, nde ndjewaka ante iso nanghaka nkambo djɛsɔ má ngandji k’owokaso. Ete ngo Yehova ndatshɔkɔla Poolo, angɔtɔtshɔkɔla edjinge iso lá welo wɛso. (Yee. 126:5) Edjinge winá wɔ sɔngɛna ɛtshɔkɔ wɛ Yehova, tokoka ntateyɛ ndjala la mposɛ. w23.05 29 ite. 9-10

Ɔpɔstɔlɔ Poolo ɛdjɛka wanɛ wapangowiká lá lofu lɔ Yehova la anto w’etamá ilɔ. Iwɔ wapewe akambo waheta l’edjena kɛwɔ kana wopo wotahete winá. Djɛko ndeke wapasipisoyɛ winá wɔ akambo wa djonyi onanghemawɔ, edjinge wapakoke kaanga nangha nkambo mmɔ lá kɛnɛ kelendana l’akambo wakɔ. Lɔɔko kɛnɛ anto efula walekɔ l’ilɔ yɛ nyuma. (Ɔrɔ. 11:8) Iwɔ wapawola tolembetelo tɛnyɛ ente towika ‘l’etsho w’ekomo’ edjinge ente ndjolo k’ekekete kemboyala entshupa. (2 Pɛ. 3:3, 4) Koko, iso nsipisoyɛka ente dako djemá Afunelo djetokembɛ́ djɛ mbadjɛ djetaleke ndjala djonyi winá wɔ mfu yotahete. Iso ladjɛ ntshikala vu l’idjena yɛso. Lamo? Dj’ipa iso ndiingela lá wayi wa pɔlitikɛ wa lɔɔko kɛnɛ. Winá wɔ lofu lɔ Yehova yotaleke ndjala entshupa, anto wangoleka ntotshinda la wolo djɛ ndɔsa opiko lá wayi wa pɔlitikɛ. Koko, topakoke ndakiyanyɛ lá wopo wɔ songelola. Nyuma kɛ Ndjambe kengotokotshɛ́ djɛ nama ikanyi yɛ wɔlɔ edjinge djɛ ndɔsa akano wa balo.—Luka 12:11, 12. w23.06 10 ite. 6-7

Kɛkɔnge kekoyelaká lá yimba winá w’okɛ djiina djɛ Samisɔnɛ? Mbala imɔtshi ongokanelake mpame k’okowo efula. Oyɛwɔ ngo nghɔsɔ. Koko Samisɔnɛ ɔsaka nkano djɛ nyɛtshi dj’oyakalisá eposelo wɛ ndjolo efula. Kaanga iyayale nghɔsɔ, Yehova apikaka wiso lá akambo ankfumɔ wa nkɔmano wa Samisɔnɛ ndananghe, djɛko ndeke ndafune ndjɔmbɔmba kɛnde lá Bible lá wapɔ wɔso. Yehova akambaka la Samisɔnɛ djɛ nkotshɛ akambo efula wa nkamɔ djɛ nkotshɛ́ owila wɔ ndasɔnɛ, Isariyɛlɛ. Ɛnɔnyi nkama m’ɔkɔngɔ wɔ nyɔyi kɛ Samisɔnɛ, Yehova atshindaka ɔpɔstɔlɔ Poolo má nyuma k’ekina djɛ ndjila djiina djɛ Samisɔnɛ l’ɔnɔnghɔ w’ampame iyalaki la nkɔmano dj’efula. (Heb. 11:32-34) Ndjɔmbɔmba kɛ Samisɔnɛ nkoka ntokembɛ. Nde ayawɛkɛki te Yehova, kaanga lá winá wɔ ndjolo. Iso nkoka mba lokembo la elakanyelo enkina wɛ djonyi má ndjɔmbɔmba kɛnde. w23.09 2 ite. 1-2

Iso nkoka nkembɛ okfumedji wɔso má nshimelaka Yehova ekiyano wɛso mbala la mbala. (1 Te. 5:17) Mbala imɔtshi opapomana l’ohemba wɔ wolo winá wɔsɔ. Kaanga oyɛwɔ nghɔsɔ, ongohonake ɛlɔndjɛlɔ kɛ Yehova winá enkfumɔ woyɛ la yɛnyi, w’otshimbɛ yimba, kana wɔ ngopewe kɛ nangha? Ntsha má winá wɔsɔ ongokadjimɔke mbala la mbala te Ndjambe djɛ mpona okotshɔ l’ekakasano wɛko wɛ lofu la lofu, opangokakanda djɛ ndonangha nghɔsɔ winá wɔ nghongopomana la ekakasano wɛ nkekete l’etsho weyaye. Masɔ ongoyala l’eshikikelo ente nde ndjewaka wɔlɔ wɔlɔ winá la wopo w’okokande nkokotshɛ́. (Yee. 27:1, 3) Akoka ndjala wɔdju djɛ iso ndokfulumeyɛ ndjolo k’ekekete ntsha tokfulumeyɛ ehemba má winá wɔsɔ. (Ɔrɔ. 5:3) Lamo okokaso ntepela nghɔsɔ? Efula kɛ wananyɔ wangɛnake ambɔ ohemba onkfumɔ okfulumeyɛwɔ ndakotshɛ́ka djɛ ndokfulumeyɛ ehemba enkina weyaye weleka nkekete. Okfumedji ndakotshɛ́ka djɛ iwɔ ndjala anto wa wɔlɔ, nkembɛka djawo djɛwɔ djɛ ente Yehova alekɔ winá enkfumɔ entshupa la nkɔpaka ndakotshɛ́. L’onkoko onkina, djawo ndakotshɛ́ka djɛ nkfulumeyɛ ehemba enkina.—Dja. 1:2-4. w23.07 3 ite. 7-8

Okitshakitshɛ la nkɛtshi kɛ Yehova ndootshindaka djɛ ndjala l’ekanedji kɛ wɔlɔ. Ndjɔmbɔmba, okitshakitshɛ wɔ Yehova wɛnamaka papoo winá wɔ ndayale entshupa djɛ ntotshita anto wa nyɛtshi wayalaki lá Sɔdɔmɔ. Má lotshimbo lɔ andjelo wande, Yehova ashimelaka Lɔta, onto wɔ wɔlɔ djɛ ndota tá ewila w’enkókó. Lɔta okaka wɔma djɛ ntshɔ t’eteyi. Djɛko ndeke ndalɔmbɛ djɛ ndota tá Zɔarɛ nde nya nkfumbo kɛnde, ngando kɛmɔtshi kɛ daambi keyalisá l’ɔnɔnghɔ w’angando yeyalisá ladjɛ ntshitana. Yehova akokaka nshimela Lɔta djɛ nangha ngo kɛnɛ kɛ ndɔɔlɔmbɛ djɛ nangha. Koko, nde awolaka lɔlɔmbɔ lɔ Lɔta kaanga nkambo djɛsɔ yalɔmbaka dj’ipa ntshita ngando kɛ Zɔarɛ. (Ewa. 19:18-22) Ɛnɔnyi nkama m’ɔkɔngɔ wɔ lasɔ, Yehova ɛnyɛka nkɛtshi kɛnde lonkina te anto w’intasɛki lá Ninivɛ. Nde atomaka ɔprɔfɛtɛ Yɔna djɛ ntewoyɛ losango lɔ etshitanelo kɛ ngando kɛsɔ la kɛ anto wawikaki l’eteyi. Koko winá wɔ ase Ninivɛ yoyapɛla, Yehova awokaka nkɛtshi ko awikɛka ngando kɛsɔ.—Yɔna 3:1, 10; 4:10, 11. w23.07 21 ite. 5

Olakanyelo wɔkɔnge w’okokaso mba má ndjɔmbɔmba kɛ Jɛhɔyashi? Nde ayalaka ete ngo otamba wɔ esisa wɛnde wetapikama wɔlɔ lá looko wokotamaki ngo má osisa ɔmɔ w’ekekete. Winá wɔ otamba, ntepela ente Jɛhɔyashi ndavu, ko lompopo lɔ w’apɔsta yapope, Jɛhɔyashi akfɔka. Ndjɔmbɔmba yekota oloko yɛsɔ ntɛnyɛka ente topakoke nɛmɛyɛ Ndjambe ngo ladjikɛnde ase nkfumbo kɛso kana ase otshumano wɔso watɔpɛyɛ ndjɔmbɔmba kɛ wɔlɔ kɛ nangha nkambo djɛsɔ. Dj’iso nkindjɛ ndjala la lonyuma lɔ wolo, iso ladjɛ nkembɛ ngandji la dilɛmɛlɔ djɛso tende má ndjekaka, ntɔnɔlaka, la ndɔmbaka mbala la mbala. (Jɛr. 17:7, 8; Kɔl. 2:6, 7) Yehova apatɔlɔmbɛ akambo efula. Losanghanyɛ 12:13, ntepelaka lá yopasɛ kɛnɛ kɛ Yehova ɔtɔlɔmbande ante: ‘Oka Ndjambe kɛ nsɔsɔlɔ wɔma edjinge lɛmɛyɛ ɛlɛmbɛ wɛnde, ladjikɛnde ɔsɔ ndeke odjito woleki djonyi lá lowiko l’onto.’ Winá w’okaso Ndjambe wɔma, tongoyala l’akoka wa nkfulumeyɛ ehemba wetokongela l’etsho w’eyaye edjinge mpikama ndii. Lako ekete kengokoka ntshita djokanelo djɛso la Yehova. w23.06 19 ite. 17-19

Etepela wɛ Ndjambe ndakambe la wɛkɔ ete ngo itshapa w’ewanga nghɔnɛ: ‘Kanga l’intasisá lá yɛkɔ yɛ lowandji atepelaka ante.’ (Ndj. 21:5a) Etepela wɛsɔ welekɔ djonyi efula ladjikɛnde wetanema l’anteyi kɛ etepela wɛ Yehova ndatepela mbala kɛmɔtshi, lá mbala isato yɛ ndatepela l’onkanda wɔ Ndjiso. Djɛko ndeke, eshikikelo kɛsɔ kɛpɛyamaka ape me ondjelo ɔmɔtshi wɔ nkfulu, kana me Yeso kanga lokfundwisá, koko me Yehova nyɔmɛlɛ! Nkambo djɛsɔ djɛnyɛ ente iso nkoka ndjɛkɛ oloko wɔso onkfumɔ t’etepela enkina wɛwɔlama. Ladjikɛnge? Ladjikɛnde Yehova ‘apatepalaka ongolo.’ (Tito 1:2) Etepela wɛsɔ wetoshikikɛ ente etepela w’owalaso lá Ndjiso 21:5, 6 wengokotshama ipa l’ehamo. Tokoshishima itepela ‘Lenda!’ Itepela yɛ Grɛkɛ ikadjimwama ‘lenda!’ ikambemaka efula l’onkanda wɔ Ndjiso. Iya etepela wɛkɔnge wɛwɔlama itepela ‘lenda!’? Etepela wɛ Ndjambe wɛnɛ: ‘Lokadjimola nkete nkfumɔ bango.’ Lá nsɔsɔlɔ, Yehova ndatepelaka nde lá nkambo djɛ etshikitano wengonanghemá l’etsho w’eyaye, koko le nde daka djɛsɔ ngokotshama ipa l’ehamo, djɛko ndeke otepelande ngo ngete mboshiyɛká nkotshama.—Iza. 46:10. w23.11 3-4 ite. 7-8

Ɔpɔstɔlɔ Pɛtɛlɔ akindjɛka nana la wɛdju wɛnde. Tokoshishima ndjɔmbɔmba imangha yɛnɛ. Winá wɔ Yeso ndapakisolaka wopo wɔ ndɔnghɛna ndjolo la ndongovɔ djɛ nkotshɛ prɔfɛsi kɛ Bible, Pɛtɛlɔ opangolaka. (Mar. 8:31-33) Mbala la mbala, Pɛtɛlɔ nya ambeki ankina wasɛki djɛ ndjewa kanga loleka ekekete l’anteyi kɛwɔ. (Mar. 9:33, 34) L’otsho w’ekomo wɔ lá ntondo kɛ nyɔyi kɛ Yeso, ipa la ndákota Pɛtɛlɔ opaka mpame kɛmɔtshi ntoyi. (Dj. 18:10) Ngo otsho wɔkɔ, Pɛtɛlɔ okaka wɔma efula ko anghanaka mbala isato y’etondo ante apewe ilongo yɛnde Yeso. (Mar. 14:66-72) Ko m’ɔtɛ wɔ nkambo djɛsɔ Pɛtɛlɔ alelaka la yɛnyi y’efula Yeso atakadjɛ ɔpɔstɔlɔ wɔlɛmbisá wɔsɔ. M’ɔkɔngɔ wɔ nde nkfundɔ, Yeso apɛyɛka Pɛtɛlɔ mbamba kɛ Pɛtɛlɔ nkalɔ ndɔwɛnyɛ ngandji k’owokande. Yeso alɔmbaka Pɛtɛlɔ djɛ nde nkamba l’okitshakitshɛ onkfumɔ ete ngo olami w’ɛnkɔkɔ wɛnde. (Dj. 21:15-17) Pɛtɛlɔ ayalaka entshupa djɛ nangha kɛnɛ kɛ Yeso ndɔlɔmbɛ. Nde ayalaka lá Jerusalɛmɛ lofu lɔ Pantɛkɔtɛ la ayalaka l’anteyi k’anto wa ntondo wakfutamisá avuta má nyuma k’ekina. w23.09 22 ite. 6-7

Ɔpɔstɔlɔ Pɛtɛlɔ akembɛka winande tokokolo ante: ‘Nyolamake ɛnkɔkɔ wɛ Ndjambe.’ (1 Pɛ. 5:1-4) Ntsha oyɛ nde ikokolo, iso ndjewaka ente wɛ nkɔpaka wananyɔ l’ankaana yɛko edjinge wɛ nkombolaka ndalama. Koko winá ɛmɔtshi, okoka ndawoka ente opalekɔ la winá kana ɔmbɔtɛka djɛ nkotshɛ odjito wɔsɔ. Ntsha oyɛwɔ nde nghɔsɔ, okokɛ nangha nge? Shimela Yehova ekiyano wɛko la wopo wɔkɔpɛ nkotshɛ́ wananyɔ wako. Pɛtɛlɔ afunaka ante: ‘Ntsha onto akotshɛ́ anto ankina, nde ananghe nkambo djɛsɔ ete ngo onto wokongela wolo wɔ Ndjambe ɔpɛyɛnde.’ (1 Pɛ. 4:11) Mbala imɔtshi wananyɔ l’ankaana yɛko wapomana l’ekakasano wɛ yopakoke mba nkando l’andja wanɛ. Koko vungɔ ente ‘owandji w’anami w’ɛnkɔkɔ,’ Yeso Kristo, nkoka ndakotshɛ́ ndeka ledji l’okokɛ nangha. Nde nkoka nangha nkambo djɛsɔ má lɔɔkɔ edjinge l’andja wa bango. Ndjambe ndɔmbaka tokokolo ngo dj’iwɔ nkɔpa la nama wananyɔ wawɔ la dj’iwɔ ndjala ‘ndjɔmbɔmba yɛ wɔlɔ le ɛnkɔkɔ.’ w23.09 29-30 ite. 13-14

Iso ladjɛ ndjala la yewo dj’ipa nkilika tokanyi tɔ wana w’anto. Ntsha tɔmbɛna akambo ete ngo wana w’anto, tokoka ntona Yehova l’ɛlɛmbɛ wɛnde. (1 Kɔ. 3:19) Mbala efula ‘balo djɛ andja wanɛ’ ntshindaka anto djɛ nsamba nɛmɛyɛ Ndjambe. Akristo amɔtshi wayalaki lá Pɛrgamɛ la lá Tiatirɛ wadjimbamaka me anto waadjingaki wananghaki wayi wa mbindo wa nsanga mbeto la watɛmɔlaki tosakandole. Yeso apɛyɛka ntshumano djɛkɔ mpe alako wa wolo lá wopo w’iyawolaka wayi wa mbindo wa nsanga mbeto. (Ndj. 2:14, 20) Edjinge lɔɔko kɛnɛ, tongotshindamake la wolo djɛ ndjawola tokanyi tɔ nyɛtshi. Boto la bɔndɔ djɛso nkoka nangha la wolo djɛ ntawoyɛ ambɔ tomboleka akambo wolo la nkoka ntotshinda djɛ mpendola ɛlɛmbɛ wɛ Ndjambe. Ndjɔmbɔmba, iwɔ nkoka ntoshimela ambɔ lako nyɛtshi nsasangɛ mposɛ yɛso la ente ɛlɛmbɛ wɛ Bible welendana la nanghedji wembohetá lohowe. Lá winá ɛmɔtshi, tokoka ndɛna ente ɛlɔndjɛlɔ kɛ Yehova ɔtɔpɛyɛnde kepokama kɔɔ. Iso nkoka kaanga ndohembama djɛ ‘ntamba akambo wambofunamá.’—1 Kɔ. 4:6. w23.07 16 ite. 10-11

Mariya, nyɔ kɛ Yeso, ayalaka la djonyi djɛ lokembo. Nde atátshukamá koko ayalaka ladjɛ ntshɔ djemi. Atawongolaka wɔna ntondo, koko ayalaka ladjɛ mbongola wɔna mpame wongokoma Mesiya. Edjinge masɔ, nde atewanaka la mpame ntondo, wopo wɔkɔnge Mariya ndakoke nshimela oshile wɔnde Yɔsɛfu akambo ankfumɔ wasɔ? (Luka 1:26-33) Wopo wɔkɔnge Mariya ndawa lokembo? Nde ahonaka okotshɔ me anto ankina. Ndjɔmbɔmba, alɔmbaka Gabriɛlɛ djɛ ndoshimela akambo ankina efula walendana l’odjito wɔkɔ. (Luka 1:34) Ndambo daambi masɔ, Mariya ananghaka lɔkɛndɔ l’otale efula tá ‘djeke dj’enkókó’ tá owila ɔmɔtshi wɔ Juda djɛ ntolenda ewoto kɛnde Elizabɛtɛ. Elizabɛtɛ awandjɛka Mariya la atshindamaka me Yehova djɛ ntepela prɔfɛsi kɛmɔtshi kekembɛ kelendana la wɔna Mariya wɔkɔpa mbotshɔ. (Luka 1:39-45) Mariya atepelaka ante: Yehova ‘ambonangha akambo wa nkfulu má lɔwɔ lɔnde.’ (Luka 1:46-51) Yehova akembɛka Mariya má lotshimbo lɔ Gabriɛlɛ la Elizabɛtɛ. w23.10 14-15 ite. 10-12

Lofulo lɔ daambi lɔ ambeki wa Kristo wakfutamaka avuta má nyuma k’ekina, edjinge walekɔ la djokanelo djetshikitanyi la Yehova. Anto 144 000 wasɔ, wangotokamba ete ngo ankfundji l’olongo esanga la Yeso. (Ndj. 14:1) Etenyi k’Ekina kɛ tabɛrnaklɛ nsakisolaka wopo wɔ yombawolamá ete ngo wana wa nyuma wa Ndjambe winá w’oyɛwɔ lá looko. (Ɔrɔ. 8:15-17) Etenyi Keleka Ekina kɛ tabɛrnaklɛ nsakisolaka olongo, edjena kɛ Yehova intasɛnde. ‘Irido’ yatolaki Etenyi k’Ekina l’Etenyi Keleka Ekina oyɛwɔ nde djingingi djɛ demba dj’ankfunda djɛ Yeso dj’oshimbaki djɛ mpanda t’olongo ete ngo Nkfundji k’Ekekete kɛ tɛmpɛlɔ kɛ nyuma. Má ndambola demba djɛnde ete ngo olambo lá nkambo dj’anto, Yeso adjipolaka Akristo w’ankfutami w’avuta ankfumɔ mboka kɛ lowiko lɔ l’olongo. Iwɔ ladjɛ ntshika demba djɛwɔ dj’ankfunda djɛ mba lofuto lɔwɔ lɔ t’olongo.—Heb. 10:19, 20; 1 Kɔ. 15:50. w23.10 28 ite. 13

Ngidiyɔna akadjimolaka l’okitshakitshɛ onkfumɔ winá wɔ ikɔlɛ y’Efrayimɛ yaye ndɔɔpɛla. (Tos. 8:1-3) Nde ataakadjimola la nkɛlɛ. Nde ɛnyɛka ante alekɔ l’okitshakitshɛ má ndjekameyɛ ekiyano wɛwɔ, la má ndaakadjimola la ngandji kenkfumɔ, ko kɛsɔ kekitshakitshɛka nkɛlɛ kɛwɔ. Tokokolo tombopakisɔ akambo ndjokolaka Ngidiyɔna má ndjekameyɛ la nkɔmɛ nkfumɔ edjinge má nkadjimola l’okitshakitshɛ winá waawɔnyɔlawɔ. (Dja. 3:13) Má nangha nghɔsɔ iwɔ nkotshɛ́ka djɛ vu ndjala l’otshumano. Winá wɔ yawandjɛ Ngidiyɔna lá wopo wɔ ndalonge ase Midiyanɛ, nde akawoyɛka lomo lonkfumɔ te Yehova. (Tos. 8:22, 23) Wopo wɔkɔnge ampame yelekɔ́ l’edjito l’otshumano okokawɔ ndjokola Ngidiyɔna? Iwɔ ladjɛ mpɛyɛ Yehova lomo lonkfumɔ lá kɛnɛ k’onanghawɔ. (1 Ɛk. 4:6, 7) Ndjɔmbɔmba, ntsha wambowandola ikokolo imɔtshi má akoka wande wa ndakanyɛ, nde nkoka ntepela ante Otepela wɔ Ndjambe ndeke lotolakanyɛ kana ntepela ante mpeyi má okfumbelo w’owaso isankfumɔ má olonghanyelo wɔ Yehova. Tokokolo nkoka ntɔnɔlaka mbala la mbala ntsha wangolakanyɛke lá yopo yɛpɛyɛ Yehova lomo kana lá yopo yesepa tokanyi t’anto tewɔ yɔmɛlɛ. w23.06 4 ite. 7-8

Ntsha ngo topawa kɛnɛ k’ɔlɔmbaso, tokoka ndáwopola ente: ‘Ɔlɔmbami ngo ekete kɛ wɔlɔ?’ Mbala efula, iso mfɛnyɛka ente tewa kɛnɛ kelekɔ́ wɔlɔ leso. Koko kɛnɛ k’ɔlɔmbaso nkoka ndjala kepalekɔ djonyi leso. Ntsha tɔlɔmba djɛ nkambo mɔtshi, nkando kɛmɔtshi kɛ wɔlɔ keleká kɛnɛ k’ɔlɔmbaso nkoka ndjala. Edjinge nkete mɔtshi dj’ɔlɔmbaso nkoka ndjala ko mpokana l’ɛkɔpa kɛ Ndjambe. (1 Dj. 5:14) Ndjɔmbɔmba, tokolenda nkambo dj’ambotshi walɔmbaki Yehova djɛ nde nangha djɛ wɔnawɔ nkindjɛ ntshikala lá nsɔsɔlɔ. Dɔmbɛlɔ djɛsɔ djɛnama ete ngo dekɔ wɔlɔ. Koko, Yehova apatshindaka onto djɛ ndokambela. Nde nkombolaka isankfumɔ, ndjila edjinge wana waso, ndɔsa nkano djɛ ndokambela. (Mvu. 10:12, 13; 30:19, 20) Djɛko ndeke, kɛnɛ kɛ ambotshi wasɔ otakokawɔ ndɔmba nde, djɛ Yehova ndakotshɛ́ dj’iwɔ mvunda oloko wɔ wɔnawɔ djɛ nde nkɔpa Yehova la nkoma ilongo yɛnde.—Woo. 22:6; Ɛfɛ. 6:4. w23.11 21 ite. 5; 23 ite. 12

Lamo nkembɛ anto ankina oyɛwɔ ilembetelo y’ekekete yɛ ngandji? Lá nkilika onkanda ɔmɔtshi wosakisolá Bible, itepela ‘Nkembɛna’ yɛ Poolo ndakambe nkɔpaka ntepela “ndjala entshupa l’onto djɛ ndosuka winá w’opomanande l’ehemba wɛ wolo.” Djɛko ndeke winá w’okembɛso winaso ondjawodji wɛna ndjolo, iso ndokotshɛ́ka djɛ nde mba lokembo edjinge nkindjɛ nkɛnda lá mboka kɛ lowiko. Edjinge winá w’okembɛso wɔnanyɔ kana nkaana kɛso, tɔngɔwɛnyɛke ente iso ndɔkɔpaka. (2 Kɔ. 7:6, 7, 13) Ndjoka onto djandji la ndɔpɛyɛ lokembo alekɔ akambo ape walekɔ́ la djokanelo dj’efula. Ngete mo? Onto w’okana djandji ntshindamaka djɛ nkembɛ anto ankina la nsɛsaka djɛ ndakotshɛ́ lá ndjolo yɛnawɔ. Djɛko ndeke ntondo ntondo tongokake nkɛtshi, makɔ tɔngɔpɛyɛke lokembo. Nyontshɔ tokolenda wopo wɔ Poolo ndokanyɛ djandji djɛ Yehova la lokembo lɔpɛyɛnde. Poolo atepelaka ante Yehova alekɔ ‘Papa kɛ nkɛtshi edjinge Ndjambe kɛ lokembo lonkfumɔ.’—2 Kɔ. 1:3. w23.11 9-10 ite. 8-10

Ambeki wa Kristo ankfumɔ ndjewaka ambɔ wakoka mpomana la ndjolo. Tokolenda ndjɔmbɔmba kɛ ɔpɔstɔlɔ Poolo. Nde ashimelaka ase Tesalɔnikɛ ante: ‘Winá wɔ sayalaka esanga la nyo, tányoshimelaki ente tongopomana la ndjolo, ko yananghema ngo nghɔsɔ.’ (1 Te. 3:4) La koko afunelaka ase Kɔrɛtɔ ante: ‘Iso nkɔpaka nyo ndjewa ndjolo itokomelisá . . . Totayala l’eshikikelo ente tongowika kana lako.’ (2 Kɔ. 1:8; 11:23-27) Kaanga lɔɔko kɛnɛ, Akristo nkoka nkongela djɛ mpomana la wepo wɛ ndjolo wetshikitanyi. (2 Ti. 3:12) Winá wɔ ngayale la djawo le Yeso la ngawange ndokilika, tolongo la boto djɛko wakokaka nkɛnyɛ ndjolo. Nkano djɛko djɛ ndjala sii l’akambo ankfumɔ, mbókoposeyɛ́ ekakasano l’olemo? (Heb. 13:18) Ombópomaná l’onanyelo me ewandji wɛ lɛɛta ngo ladjikɛnde opoposanyɛ nkongi djɛko le anto ankina? Ayale wepo wɛ ndjolo wɛkɔnge y’okokaso mpomana, Poolo atepelaka ante iso ladjɛ nsasanga. w23.12 10-11 ite. 9-10

Djakɔbɔ apomanaka l’ekakasano lombombe. Wana wa Djakɔbɔ ape w’ampame, Simɛyɔ nya Levi, wapɛyɛka nkfumbo kɛwɔ la djiina djɛ Yehova nsɔnyi. Lá djiko djɛ lasɔ, Rashɛlɛ wadjɛ Djakɔbɔ wɔ ngandji, avɔka lá winá wɔ botshi djɛnde djɛ wɔna w’ape. Edjinge lá lotshundo lɔnde, Djakɔbɔ atshindamaka djɛ nsɛkɔ t’Edjipito m’ɔtɛ wɔ ndjala. (Ewa. 35:16-19; 37:28; 45:9-11, 28) Kaanga l’anteyi k’ekakasano enkfumɔ wɛsɔ, Djakɔbɔ atatshutshɛ djawo djɛnde te Yehova edjinge t’alaka wande kaanga ndambo daambi. L’onkoko wɔnde, Yehova ɛnyɛka Djakɔbɔ ante, Nde owawolaki. Ndjɔmbɔmba, Yehova atshɔkɔlaka Djakɔbɔ má ndɔɔpɛyɛ okfudji w’efula. Edjinge kokanela efula kɛ djedjɛ djeyalisá la Djakɔbɔ te Yehova winá wɔ ndɔtɛnana nya wɔnande Yosɛfu, kanga lindakanelaka ante amboshiyɛká mvɔ! Djokanelo djɛ wɔlɔ djɛ Djakɔbɔ ndayalaka nya Yehova dj’okotshɛka djɛ nkfulumeyɛ ekakasano lá yopo yɛ wɔlɔ. (Ewa. 30:43; 32:9, 10; 46:28-30) Edjinge iso tokoka ndongela ekakasano w’isasimoyɛ w’opomanaso la wɛkɔ, ntsha tolekɔ la djokanelo djɛ wɔlɔ la Yehova. w23.04 15 ite. 6-7

Lá Yeembo 23, Davidɛ ɛnyɛ eshikikelo keyalaki lande ante Yehova ndɔɔkɔpaka la ndoolamaka. Nde atepela djɛ djokanelo djɛ wolo djeyalaki l’antenyɛ nde nya Yehova, kanga ndete ante Onami wɔnde. Davidɛ ayawokaki l’elamelo winá wɔ ndawolaka djɛ Yehova ndɔlɔndjɛ, nde alendaki ngo mende. Davidɛ ewaki ante ngandji kɛ Yehova kengoyalaka lande mfu inkfumɔ yɛ lowiko lɔnde. Lamo ndayalaka l’eshikikelo kɛ nghɔsɔ? Davidɛ ayawokaki l’elamelo ladjikɛnde Yehova ɔpɛyɛki kenkfumɔ kɛ ndayalaka la djonyi. Davidɛ ewaki lonkina ante Yehova alekɔ Ilongo yɛnde edjinge awolamaki me nde. Djɛko ndeke ndayalaka l’eshikikelo ante ayale kɛkɔnge kengokomela l’etsho weyaye, Yehova angokindjɛ ndoseeyɛ ehomba wɛnde enkfumɔ. Ladjikɛnde Davidɛ ayalaki l’eshikikelo ante Yehova ndɔkɔpaka la angooseyɛ ehomba wɛnde, nde atayala kaanga la ndambo kɛ wɔma koko ayalaka l’osasa la asasangaki la nkete dj’okotshɛnde.—Yee. 16:11. w24.01 29 ite. 12-13

Má Mbandji k’ape k’andja w’otondo, enkambi wɛ Yehova w’ewila efula wasasangaka la ndambo kɛ vu edjinge la lotshungɔ winá wɔ yapoposanyɛka. Lá nsɔsɔlɔ, olemo w’ofulaka. Lɔɔko kɛnɛ, wananyɔ w’Iloyi yɛ lɔndjɛ wakindjɛ mpona ɛlɔndjɛlɔ me Yeso Kristo. Iwɔ nkombolaka djɛ alako w’ɔpɛyɛwɔ wananyɔ nyɛnyɛ wopo wɔ Yehova ɛnande akambo. Edjinge wangokambake l’elami wɛ djingadjinga ole la tokokolo djɛ mpɛyɛ ntshumano alako. Tokokolo tombokfutama avuta tolekɔ lá ‘wɔmɛ-lɔwɔ’ lɔ Kristo. (Ndj. 2:1) Lá nsɔsɔlɔ, tokokolo tɔsɔ oyɛwɔ nde anto wa ntshamba djɛ djɔ, la wangonanghake evunga. Mɔsɛ, Yosua edjinge apɔstɔlɔ wananghaki evunga winá ɛmɔtshi. (Ew. 20:12; Yos. 9:14, 15; Ɔrɔ. 3:23) Koko, Kristo alɔndjɛ la nkɔmɛ nkfumɔ mfumbe kɛ nkɔmano la tokokolo tɔmbɔsɔnama, edjinge angokindjɛ nangha nkambo djɛsɔ. Djɛko ndeke tolekɔ l’elonga kɛ wɔlɔ efula kɛ ndáwɛkɛ tá ɛlɔndjɛlɔ k’owaso má lotshimbo l’anto wasɔnamisá wasɔ. w24.02 23-24 ite. 13-14

Lɔɔkɔ kɛnɛ, tokoka nsasangɛ Yehova má ntepela lá nkambo djɛnde l’osasa, la djedjɛ ole la ngandji. Winá w’oyalaso l’olemo w’ipoposanyɛ, tokote lá yimba ente okoma wɔso woleka djonyi nde nsepa anto te Yehova, ndakotshɛ́ dj’iwɔ nyɛna Papa kɛso kɛ ngandji ete ngo ɔwɛnaso. (Dja. 4:8) Tolekɔ l’osasa wɔ nyɛnyɛ anto wopo wɔ Bible otepelande djɛ Yehova, oposɛnde lá ntshandjawala ngandji, sii, balo la nkfulu kɛnde ole wekeka wande ankina wasepa anto le nde. Tongolumɛke la tongosasangɛke Yehova lonkina má nangha la wolo djɛ ndowokola. Má nangha nghɔsɔ, tongoyatshikitanyɛ l’ase andja wa lopango wanɛ. Anto wakoka nyɛna ambɔ totshikitana lawɔ la wakoka ndjopola lamo. (Mat. 5:14-16) Winá w’osawolaso lawɔ lofu la lofu, tokoka ndapakisola lamo onanghaso nghɔsɔ. Eposelo wengoyala nde, anto w’eloko wɔlɔ wangosukana te Ndjambe kɛso. Winá w’olumɛso Yehova lá topo tɔsɔ, tongosasangɛ oloko wɔnde.—1 Ti. 2:3, 4. w24.02 10 ite. 7

Djɛ nkoma Okristo wɔ mpame wombotshunda, wɛ ladjɛ mfudjɛ akoka walekɔ́ djonyi. Akoka wasɔ wangokokotshɛ djɛ mbɛmba edjito l’otshumano, djɛ mbomba olemo, djɛ nshiyɛ ehomba wɛko kana wɛ nkfumbo kɛko la djɛ ndjala la djokanelo djɛ wɔlɔ l’anto ankina. Ndjɔmbɔmba, eka djɛ mbala la mfuna wɔlɔ. Bible ntepelaka ante: Onto w’osasa la w’olonga l’akambo w’onanghande ndɔsaka winá mfu inkfumɔ djɛ mbala la ntɔnɔla lá Otepela wɔ Ndjambe. (Yee. 1:1-3) Má mbala Bible lofu la lofu, nde angewa wopo wɔ Yehova okanelande, ko kɛsɔ kengokotshɛ́ djɛ nkanela la ntɔnɔla wɔlɔ wɔlɔ. (Woo. 1:3, 4) Wananyɔ l’ankaana yɛso walekɔ la djonyi djɛ ampame ilekɔ́ l’akoka djɛ ndakanyɛ la mpɛyɛ alako wambopikamá lá Bible. Ntsha ombewa mbala la mfuna wɔlɔ, ongoyala l’akoka wa ndɔngɔsɔla wamba la kɔmantɛrɛ ikembɛ djawo djɛ anto ankina. Ongoyala lonkina l’akoka wa mfuna akambo wa djonyi wangokokotshɛ́ djɛ nkembɛ djawo djɛko la nkembɛ anto ankina. w23.12 26-27 ite. 9-11

Winá w’okɛ wɔma, tɔnɔla lá kɛnɛ kɛ Yehova ndongonangha l’etsho weyaye winá wɔ Satana ndongima. Etombo w’olakanyelo ɛmɔtshi wɛ losanghanyɛ lɔ rɛjɔ lɔ 2014 w’ɛnyɛka wopo w’okokaso ntɔnɔla lá nkongi ete ngo papa kɛmɔtshi kesawolaki la nkfumbo kɛnde lá wopo wɔ 2 Timote 3:1-5 yotakoka mfunama lá lɛdji lotshikitanyi ntsha avɛrse wanɛ yotewoyɛ nde wopo w’akambo yongoyala lá Paradiso: “L’andja wa bango deko dj’osasa ngoyala. Ladjikɛnde anto wangɔkɔpa anto ankina, wangɔkɔpa nsɔsɔlɔ, wangewa elelo wɛwɔ, wangoyala l’okitshakitshɛ, waalumɛ Ndjambe, waalɛmɛyɛ ambotshi, waalekɔ́ la djedjɛ, waalekɔ́ la nkɔmano, waalekɔ́ la ngandji k’efula lá nkfumbo, wookana, waatepelaka wɔlɔ djɛ anto ankina, waalekɔ́ la ndákota, waapalekɔ enkonda, waalekɔ́ la ngandji k’akambo wa wɔlɔ, wɛɛdje djɛ ndawilela oloko, waalekɔ́ entshupa djɛ ndjoka, waapasangɛ apɛka, waakɔpa Ndjambe l’edjena kɛ nkɔpa esasa, wangoyapɛyɛ lá wayi wa Ndjambe lá lɛdji lɔ nsɔsɔlɔ. Nyomaleme anto wasɔ.” Ongosawolake la nkfumbo kɛko kana la winako andjawodji wopo wɔ lowiko yongoyala l’andja wa bango? w24.01 6 ite. 13-14

Alekɔ nsɔsɔlɔ nkambo djɛ lokembo djɛ ndjewa ente Yehova ndjawolaka enkambi wɛnde ete ngo oloyi! Bible ntepelaka ante: ‘Yehova nsasangaka l’enkambi wɛnde.’ (Yee. 149:4) Koko winá ɛmɔtshi, anto amɔtshi wangokake ambɔ wambɔlɛmba ko wangolawopolake ambɔ: ‘Yehova ndjawolaka lemi?’ Enkambi efula wɛ Yehova wɛ nkɔmano wewikaki l’etsho wefunamaki Bible wananaki winá ɛmɔtshi la tokanyi tɔ nghɔsɔ. (1 Sa. 1:6-10; Djɔ. 29:2, 4; Yee. 51:11) Bible nyɛnyɛka papoo ante, anto wa ntshamba djɛ djɔ nkoka ndjawolama me Yehova. Lá wopo wɔkɔnge? Iso ladjɛ nyɛnyɛ djawo te Yeso Kristo ole ndongola batisimo. (Dj. 3:16) Lá wopo wɔsɔ tɔngɛnyɛ lá ntshandjawala ente tomboyapɛla má mpekanto yɛso la ente tombolaka Ndjambe djɛ nangha ɛkɔpa kɛnde. (Ele. 2:38; 3:19) Yehova angosasangake winá w’onanghaso akambo wasɔ djɛ ndjala la djokanelo djɛ wɔlɔ la nde. Ntsha tokindjɛ nangha kenkfumɔ k’oyɛso ladjɛ nangha djɛ mbika lá wopo wokana l’ɛlɔkɔ kɛso, Yehova angosasanga laso la angɔtɔsa ete ngo tolongo tɔnde tɔ ma ma.—Yee. 25:14. w24.03 26 ite. 1-2

Iso nkoka ndjokola ambeki wa Yeso má nkindjɛ mpoposanyɛ kaanga winá wɔ ewandji wɛ mbandja otoshimbawɔ djɛ mpoposanyɛ. Tokoka ndjala l’eshikikelo ente Yehova angotokotshɛ́ dj’iso nkotshɛ olemo wɔso w’ipoposanyɛ. Djɛko ndeke tɔlɔmbɛ Yehova atokotshɛ́ djɛ ndjala l’oloko wolo edjinge la balo djɛ nkfulumeyɛ ekakasano. Efula l’anteyi kɛso tɛna ndjolo l’elando kana ekakasano enkina, ndjɔmbɔmba nyɔyi kɛ onto wɔso wɔ ngandji, ekakasano welá nkfumbo edjinge lɔnyɔkɔ. Ekakasano wɛ nghɔsɔ ndjila edjinge epela l’ambandji ndjalaka wolo efula djɛ nkfulumeyɛ. Djipolela Yehova oloko wɔko. Shimelande okakasano wɔko ngo ngete oshimelɛnde ilongo yɛko yɛ ma ma. Yala l’eshikikelo ente Yehova ‘anghonangha akambo lá wapɔ wɔko.’ (Yee. 37:3, 5) Nkindjɛ ndɔmba angotokotshɛ dj’iso ‘nkfulumeyɛ ndjolo.’ (Ɔrɔ. 12:12) Yehova ndjewaka ekakasano wepomana l’enkambi wɛnde, ‘nde ndjokaka alelo wawɔ w’ohonawɔ okotshɔ.’—Yee. 145:18, 19. w23.05 5-6 ite. 12-15

Winá w’ɔsaso akano wa djonyi, iso la djɛ ndjewa ‘oye ɛkɔpa kɛ Yehova’ lá nkambo djɛkɔ, ko masɔ nangha akambo lá wopo w’okana l’ɛkɔpa kɛkɔ. (Ɛfɛ. 5:17) Má mpona tɔkfɔ tɔ Bible tolendana la nkambo djɛso mɔtshi, iso mponaka nsɔsɔlɔ ikanyi yɛ Ndjambe lá nkambo djɛkɔ. Masɔ, winá w’okambaso la tɔkfɔ tɔnde, tongoyala l’akoka wa ndɔsa akano wa wɔlɔ. ‘Kanga nyɛtshi,’ ontonyi wɔso Satana, nkombolaka dj’iso ndjala l’akambo efula wa nangha l’andja wanɛ, dj’ipa iso mba winá wɔ nkambela Ndjambe. (1 Dj. 5:19) Akoka ndjala wɔdju efula le Okristo djɛ ndjila nkete djelá demba, nkalasa, kana olemo wɔnde l’edjena kɛ ntondo, ko nkawoyɛ mbamba yɛ nkambela Yehova t’ɔkɔngɔ. Ntsha Okristo amonangha nghɔsɔ, kɛsɔ kɛngɛnyɛ ente ambodjimbolama má yimba y’andja wanɛ. Lá nsɔsɔlɔ, nkete djɛsɔ mpalekɔ nyɛtshi, koko djepakoke ndɔsa edjena kɛ ntondo lá lowiko lɔso kaanga ndambo daambi. w24.03 24 ite. 16-17