Ngɔndɔ kɛ djuwa

Ndjambe apɛyɛka Yeso nkfulu kɛ nkandola ekakasano enkfumɔ w’anto. Má ansese wande, Yeso ɛnyɛka nkfulu kelekɔ́ lande kɛ ndongela ekakasano enkfumɔ wɛ sopakoke ndongela má wolo wɔsɔ isɔmɛlɛ. Ndjɔmbɔmba, nde alekɔ la nkfulu kɛ ntotshungola má ikɔkɔ y’ekakasano w’anto, ntepela ente mpekanto kɛ sakite la eposelo wɛnde wɛ nyɛtshi, elando la nyɔyi. (Mat. 9:1-6; Ɔrɔ. 5:12, 18, 19) Ansese wande wɛnyɛka ente nde nkoka nsadjɛ ‘wepo w’elando enkfumɔ’ edjinge kaanga nkfundola edjo. (Mat. 4:23; Dj. 11:43, 44) Lonkina, nde alekɔ la nkfulu kɛ ndjapamela mpopo yɛ wolo la kɛ ndongela nyuma yɛpɔlɔ. (Mar. 4:37-39; Luka 8:2) Ɔsɔ ngo owaso lokembo má ndjewa ente Yehova ambɔpɛyɛ́ Wɔnande nkfulu kɛ nghɔsɔ! Iso nkoka ndjala l’eshikikelo ente ɛtshɔkɔ w’okongelaso l’etsho weyaye l’ɛlɔndjɛlɔ k’Onkfumi wɔ Ndjambe wengokotshama. Ansese wa Yeso ndananghe winá wɔ ndawikaka ete ngo onto lanɛ lá looko ntɛnyɛka kɛnɛ kɛ ndongonangha lá looko l’otondo ete ngo Nkfumi k’Onkfumi wɔ Ndjambe wel’olongo. w23.04 3 ite. 5-7

Ntsha olekɔ lá otshumano w’ekekete edjinge ɛna ente lɔwɔ lɔko lopaleke nyɛnama okoka mpembama djɛ ntshika mpɛyɛ kɔmantɛrɛ. Koko totshikake djɛ nangha la wolo djɛ mpɛyɛ kɔmantɛrɛ. Lɔngɔsɔlaka kɔmantɛrɛ efula lá losanghanyɛ lɔmɔ. Masɔ, ntsha wapakɔsɔnisa má bango djɛ wekelo, ongoyala ngo la mbamba kɛ mpɛyɛ kɔmantɛrɛ winá wɔ losanghanyɛ yotakindjɛ. Winá wɔlɔngɔsɔlɛ wekelo w’Etange k’Olami, hona djɛ nyɛna djokanelo djelekɔ́ l’antenyɛ itenyi inkfumɔ la ɔtɛ wɔ djamba. Ntsha wɛ nangha nghɔsɔ, opongosamba kɔmantɛrɛ kɛmɔtshi kɛ wɔlɔ k’okokɛ mpɛyɛ lá losanghanyɛ l’otondo. Má djiko djɛ lasɔ, lɔngɔsɔla kɔmantɛrɛ lá totenyi totepela elakanyelo wɛ lotshimola wɛ wolo nsipisoyɛ. Ladjikɛnge? Ladjikɛnde mbala imɔtshi anto wakoká nkadjimola lá totenyi tɔsɔ wapangoyala efula. Iya otepelaso mo ntsha opawa mbamba kɛ mpɛyɛ kɔmantɛrɛ? Sawola nya ilondjɛ yɛ wekelo lá ntondo kɛ losanghanyɛ ko shimelande edjena k’ɔkɔpɛ mpɛyɛ kɔmantɛrɛ. w23.04 21-22 ite. 9-10

Yosefu akambaka mbala kɛkɔ kɛmɔ l’ɛlɔndjɛlɔ kɛ Yehova, ko kɛsɔ k’okotshɛka djɛnde ndjala wome wɔ wɔlɔ. Mbala isato y’etendo, nde awaka alako walendana la nkfumbo kɛnde me Ndjambe. Winá enkfumɔ, nde alɛmɛyɛki mbala kɛkɔ kɛmɔ, kaanga winá wɔ nkambo djɛsɔ yalɔmbaka nangha etshikitano wɛ nkekete. (Mat. 1:20; 2:13-15, 19-21) Ma ndɔnda ɛlɔndjɛlɔ kɛ Ndjambe, Yosefu alamaka Mariya, okotshɛ́ka, edjinge oseyɛka ehomba wɛnde. Kokanela wopo wɔ nanghedji djɛ Yosɛfu djɛsɔ iyafudjɛ ngandji la dilɛmɛlɔ djɛ Mariya tende! Wame, nyo nkoka ndjokola Yosɛfu má mponaka alako wemá Bible djɛ nkotshɛka ehomba w’ankfumbo yɛnyo. Winá w’okambanyo la dako djɛsɔ, kaanga ntsha kɛsɔ kɛlɔmba nangha etshikitano, wɛ nyɛnyɛka ente wɛ nkɔpaka wadjɛko edjinge kɛsɔ kengokembɛ bala djɛnyo. Nkaana kɛmɔtshi kelekɔ́ lá Vanuatu, kembotshukama l’ila k’ɛnɔnyi ndekana 20, atepela ante: “Winá wɔ womɛmi ohonakande la okambakande l’ɛlɔndjɛlɔ kɛ Yehova, langolekake ndɔɔlɛmɛyɛ. Langoyawokake ente ndekɔ l’elamelo, edjinge langawolake akano wande.” w23.05 21 ite. 5

Ase Juda wataakalɔki wangotokoma ‘anto w’ekina’ le Ndjambe kɛwɔ. (Mvu. 7:6) Koko, nkambo djɛsɔ mpasakisola ente wapalekɔ lonkina la djonyi djɛ nangha etshikitano djɛ nsasangɛ Yehova. Efula k’ase Juda wawotshɔka lá Babilɔnɛ edjinge ɛnama ete ngo, efula kɛwɔ wayɛka ndekela tokanyi la ɛlɛmbɛ ɛmɔtshi wemá Babilɔnɛ. Ɛnɔnyi efula m’ɔkɔngɔ wɔ ase Juda wa ntondo nkalɔ tá Isariyɛlɛ, Guvɛrnɛrɛ Nɛhɛmiya akamɔka má nyɛna ante wana wawotshisá l’Isariyɛlɛ watewaki kaanga ntepela otepela w’ase Juda. (Mvu. 6:6, 7; Nɛh. 13:23, 24) Wopo wɔkɔnge wana wasɔ yakoke ndjeka djɛ nkɔpa la ntɛmɔla Yehova ntsha wapoke Hebero, ɛtɔyi k’otepela wɔ Otepela wɔ Ndjambe yafunama? (Ɛzr. 10:3, 44) Djɛko ndeke ase Juda wasɔ wayalaka ladjɛ nangha etshikitano wɛ nkekete, koko atakoka ndjala wɔdju efula lewɔ djɛ nangha etshikitano wɛsɔ l’Isariyɛlɛ, l’edjena kɛ etolo kɛ piyɔɔ yotakawoyɛmaka ndambo ndambo.—Nɛh. 8:8, 9. w23.05 15 ite. 6-7

Yɛnyi nde, ayale kaanga mposɛ kɛkɔnge kelekɔ́ laso kana oyapekalaso akambo amɔtshi, iso nkoka ndopomana l’okakasano ɔmɔtshi. Ndjɔmbɔmba, ‘akambo w’isasamoyɛ’ nkoka tosambɛ winá w’oyɛso la djonyi djɛ nkotshɛ okoma wɔso. (Los. 9:11) Iso nkoka mpomana l’okakasano w’okoka ntɔlɛmbɛ edjinge nkitshakitshɛ wolo wɔso. (Woo. 24:10) Demba djɛso djɛ ntshamba djɛ djɔ nkoka ntotshinda djɛ nangha akambo wakoka ntoshimba djɛ nkotshɛ okoma wɔso. (Ɔrɔ. 7:23) Kana iso nkoka ndɛmba. (Mat. 26:43) Kɛkɔnge kekoka ntokotshɛ́ dj’iso ndongela lɔlɛmbɔ kana ekakasano enkina wekoka ntoshimba djɛ nkotshɛ okoma wɔso? Vungɔ ente mpomana l’okakasano apasakisola ente opangolonga. Bible ntepelaka ante tokoka mpomana l’ekakasano mbala la mbala. Koko, djɛnyɛ lonkina papoo ante iso nkoka nkalɔ mba wolo. Ee, má nkindjɛ ndjila welo djɛ nkotshɛ okoma wɔko kaanga opomanɛ l’ekakasano, ɔngɛnyɛ Yehova ente wɛ nkɔpaka ndoosasangɛ. Ɔsɔngo osasa wɔ Yehova ndongoka winá w’ɔkɛnande onangha la wolo djɛ nkotshɛ okoma wɔko! w23.05 30 ite. 14-15

Olemo wɔ yat’ekalo nkotshɛ́ka olangala djɛ nkamba wɔlɔ l’anto watshikitanyi. Wongokotshɛ́ lonkina djɛ ndjewa nkamba la balo nkfumɔ la mfalanga yowande la dj’ipa nsomba nkete lá lɛdji loleka akoka wande. (Flp. 4:11-13) Yopo imɔtshi yɛ wɔlɔ yɛ mbanga l’olemo wɔ winá enkfumɔ nde má ndjala yat’ekalo y’itenyi, ko kɛsɔ nkoka ndookotshɛ́ djɛ ndɔɔsa olemo wɔ yat’ekalo yɛ lotshinda. Olemo wɔ yat’ekalo nkoka ndjipola mboka tá topo tonkina tɔ olemo wɔ winá enkfumɔ, ndjɔmbɔmba nkamba lá olemo w’opikelo wɔ Amvulu y’Onkfumi kana lá Betɛlɛ. Akristo w’ampame ladjɛ ndjala l’okoma wɔ nkotshɛ akambo walɔmbama djɛ nkambela wananyɔ l’ankaana yɛwɔ l’otshumano ete ngo tokokolo. Bible atepela ante ampame ikombola odjito wɔsɔ ‘wakombola olemo wɔ wɔlɔ.’ (1 Ti. 3:1) Ntondo ntondo, wɔnanyɔ ladjɛ nkotshɛ akambo walɔmbama djɛ nkamba ete ngo onkambi w’okotshɛ́. Onkambi w’okotshɛ́ okotshɛkande nde tokokolo lá topo efula tɛnama. Tokokolo la enkambi w’ekotshɛ́ nkambelaka wananyɔ l’ankaana yɛwɔ la mpoposanyɛka l’osasalo onkfumɔ. w23.12 28 ite. 14-16

Nkfumi Josiya ayalaki olangala winá wɔ ndawange mpona Yehova. Nde akɔpaki ndjeka akambo walendana la Yehova la nangha ɛkɔpa kɛ Nde. Koko, lowiko lotayalaki wɔdju le nkfumi k’olangala kɛsɔ. L’etsho wɛsɔ, efula k’anto watɛmɔlaki tondjandjambe t’engolo, djɛko ndeke alɔmbamaka djɛ Josiya ndjala l’oloko wolo dj’ipa nangha nkambo djɛsɔ. Edjinge ndananghe ngo nghɔsɔ! Lá ntondo kɛ Josiya mba ɛnɔnyi 20, nde awangaka nyimɛ ɔtɛmwɛlɔ w’ongolo m’owila. (2 Ɛk. 34:1-2) Kaanga ntsha oyɛnde ilɛngɛ efula, okoka ndɔsa nkano djɛ ndjokola Josiya má mpona Yehova la má ndjeka djɛ nsasanga la wekeka wande. Nangha nghɔsɔ angokotshinda djɛ wɛ ndalambola te nde. Ndalambola te Yehova ɔkɔpande nsakisola nge lá lowiko lɔko lɔ lofu la lofu? Luke, kanga lolongolisá batisimo l’ɛnɔnyi 14, atepela ante: “Ngo má winá wɔsɔ, langilaka olemo wɔ Yehova l’edjena kɛ ntondo lá lowiko lɔmi edjinge langonanghaka la wolo djɛ ndoosasangɛ.” (Mar. 12:30) Ɔsɔ ngo nkambo djɛsɔ yongoyala ɔtshɔkɔ le wɛ ntsha okombola nangha wopo wɔk’ɔmɔ! w23.09 11 ite. 12-13

Winá wɔ ɔpɔstɔlɔ Poolo ndafune onkanda wɔnɛ, ko otshumano wɔ Tesalɔnikɛ wotananghe kaanga ɔnɔnyi ɔmɔ. Mbala imɔtshi ampame yɛlɔndjɛki otshumano wɔsɔ watapakisɔ akambo la wananghaki evunga. Koko kaanga yayale nghɔsɔ, alɔmbamaki ngo ndalɛmɛyɛ. Winá wɔ sotaleke nsukana tá ndjolo k’ekekete, tokoka ndoyala la djonyi djɛ nkilika ɛlɔndjɛlɔ kɛ tokokolo tel’otshumano ndeka lɔɔko kɛnɛ. Mbala imɔtshi topangoyala l’akoka wa mba ɛlɔndjɛlɔ me wananyɔ welá bilo dj’ekekete la wemá Betɛlɛ; djɛko ndeke, alekɔ djonyi iso ndjeka djɛ nkɔpa la nɛmɛyɛ tokokolo tɔso má winá wɔsɔ. Ayale kɛkɔnge kengoposá, nyontshɔ tokindjɛ nama ekanedji kɛso kɛ wɔlɔ, ipa mpika wiso lá evunga wɛwɔ, koko topike wiso lá nsɔsɔlɔ kɛ ente, Yehova ndeke lɔlɔndjɛ ampame yɛ nkɔmano yɛsɔ má lotshimbo lɔ Kristo. Ngo ngete itombo olamakande ɔtɛ w’ongala, nkongi djɛso djɛ ewiko namaka tokanyi tɔso. Iso ndjawolaka ente kɛnɛ kɛ andja wanɛ okokawɔ ntɔpɛyɛ kepalekɔ la ntshina. (Flp. 3:8) Nkongi djɛso ntokotshɛ́ka djɛ ntshikala vu edjinge ntshikala l’edjena kɛso. w23.06 11-12 ite. 11-12

Anto woka leeta lɔ ‘omoto w’enkesa’ walekɔ lá ntondo kɛ nkano mɔtshi: Wangawola leeta lɔnde ndo koko wangotona? Tolekɔ la donga djɛ wɔlɔ efula dj’oyɛso ladjɛ ndjewɔ enanghedji kɛ wayi wa mbindo wa ntshɛngi. Watepela nkambo ‘dj’omoto w’enkesa’ ete ngo onto wotepela ante: ‘Washi wa lɔɔngɔla ndeke wɔlɔ.’ (Woo. 9:17) ‘Washi wa lɔɔngɔla’ wasɔ oyɛwɔ nge? Bible ndjɛdjɛka osangelo wɔ mbeto l’atenyɛ wadji la wome la washi wa ntshitshi. (Woo. 5:15-18) Wadji la wome wombotshukaná lá nkilika ɛlɛmbɛ wɛ lɛɛta, walekɔ la lotshungɔ lɔ nsanga mbeto l’anteyi kɛwɔ edjinge mba osasa w’oyɛka má nangha nkambo djɛsɔ. Iya, otepelaso mo lá nkambo djɛ ‘washi wa lɔɔngɔla?’ Washi wa lɔɔngɔla mpɛyɛka ikanyi yɛ osangelo wɔ mbeto wopawolama. Anto wanangha wayi wa mbindo wa ntshɛngi wanghonanghake lá wisisa, ngo ngete ose wibi ɔngɔlakande lá wisisa. ‘Washi wa lɔɔngɔla’ nkoka nyɛnama ete ngo walekɔ wɔlɔ ntsha waananghá nkambo djɛsɔ wakanela ambɔ lako onto wongisola akambo wa nyɛtshi w’onanghawɔ. Ɔsɔ ngo ongolo! Yehova nyɛnaka akambo ankfumɔ. Lako ekete keleka nyɛtshi ete ngo nsamba nkɔpama me Yehova, djɛko ndeke lako wɔlɔ woyɛ má ntshutshɛ́ ‘mpeyi’ k’ekekete kɛsɔ.—1 Kɔ. 6:9, 10. w23.06 22 ite. 7-9

Iya kɛkɔnge k’oyɛ ladjɛ nangha ntsha ɔmbɛna ente ɔpɔlɔmbaka m’anse k’oloko kana olemo wɔko w’ipoposanyɛ wopokosasangɛka? Totepelake ente opalekɔ lonkina la nyuma kɛ Yehova. Oyɛ nde ose ntshamba djɛ djɔ, mposɛ yɛko nkoka ntshikitana winá enkfumɔ. Ntsha osasalo wɔko wombotateyɛ mpɔla, tɔnɔla lá ndjɔmbɔmba kɛ ɔpɔstɔlɔ Poolo. Kaanga ndananghaka la wolo djɛ ndjokola Yeso, nde ewaki ante ape winá enkfumɔ ndeke ndongoyalaka la mposɛ kɛ nangha nkambo djɛsɔ. Poolo ɔsaka nkano djɛ nkamba olemo wɔnde ayale kaanga wopo wɔ ndoyawokaka lá winá ɛmɔtshi. Lá wopo wɔkɔ ɔmɔ, tawolake djɛ mposɛ yɛko yɛ ntshamba djɛ djɔ nkapemela. Ɔsa nkano djɛ nangha kɛnɛ kelekɔ́ wɔlɔ ayale kaanga wopo w’oyawokɛ. Ntsha ombokindjɛ nangha kɛnɛ kelekɔ́ wɔlɔ, mposɛ yɛko yɛ nyɛtshi ikoka ndotshikitana.—1 Kɔ. 9:16. w24.03 11-12 ite. 12-13

Iso tokoka nyɛnyɛ ngandji kɛso te wananyɔ l’ankaana yɛso má ndjala tolongo tɔwɔ la má mpetshɛka winá esanga lawɔ. (2 Kɔ. 6:11-13) Efula l’anteyi kɛso tolekɔ lá ntshumano djembokfumbama la wananyɔ l’ankaana yemá djena ntshikitanyi la yelekɔ́ la lonto lotshikitanyi la lɔso. Iso nkoka nkembɛ ngandji kɛso tewɔ yankfumɔ má mpika wiso lá wekeka wawɔ wa wɔlɔ. Winá wonanghaso la wolo djɛ nyɛna anto ankina ete ngo Yehova awɛnande, iso nyɛnyɛka ente iso ndakɔpaka. Ngandji kengoyala djonyi efula lá winá wɔ ndjolo k’ekekete. Winá wɔ ndjolo k’ekekete yongowanga, wopo wɔkɔnge Yehova ndongotolama? Kolenda kɛnɛ kɛ Yehova ndashimela enkambi wɛnde djɛ nangha winá wɔ yaye ndonanyɛ Babilɔnɛ djɛ ntondo: ‘Anto wami, nyotshu nyingele l’amvulu yel’eteyi, nyodjipe nkfuke yɛnyo. Nyoyawise l’ilá k’etsho daambi tii winá wɔ nkɛlɛ yongoheta.’ (Iza. 26:20) Nyɛnamaka ete ngo etepela wɛsɔ welendana edjinge laso, wanɛ wangopomana la ndjolo k’ekekete. w23.07 6-7 ite. 14-16

Nyoyale la lokumu lɔ wanɛ walekɔ́ l’ekanedji kɛ wɔlɔ. Koyawopola ente: ‘Anto wangɔndɔsake ete ngo onto wolekɔ́ l’ekanedji kɛ wɔlɔ, wawola tokanyi t’anto ankina edjinge wopalekɔ́ akambo wolo? Ndo koko wanghɔnyɛnake ete ngo onto wɔ wayi wolo kana w’ɔtɛ wolo? Langekameyɛke anto ankina edjinge langawolake tokanyi tɔwɔ ntsha akoka?’ Winá wɔ sotaleke ndjala l’ekanedji kɛ wɔlɔ ndeke sotaleke ndjokola Yehova nya Yeso. Ndjala l’ekanedji kɛ wɔlɔ nsakisolaka lonkina, ndjala entshupa djɛ ndjekela winá w’akambo otshikitanawɔ lá lowiko lɔso. Etshikitano wɛ nghɔsɔ nkoka ntoyakala ekakasano ɛmɔtshi wɛ sotákanelaki. Tokoka mpomana l’olando w’isasimoyɛ. Etshikitano welendana la wayi wa mfalanga kana la wayi wa pɔlitikɛ welá edjena k’oyalaso nkoka ndjila lowiko lɔso l’okakasano. (Los. 9:11) Kaanga etshikitano w’owaso l’olemo wɔ teokrasi nkoka ntilá l’ohemba. Iso nkoka nangha akambo anɛyi wawɔlamá wanɛ: 1) ndjawola otshikitano wombotokomelá, 2) mpika wiso t’etsho weyaye, 3) ndjila yimba l’akambo wa wɔlɔ, edjinge 4) nkotshɛ́ anto ankina. w23.07 21-22 ite. 7-8

Ɔprɔfɛtɛ Danyɛlɛ ayalaki olangala winá w’ase Babilɔnɛ yovunde tá lokando edjinge yɔtɔlɛ otale la mbandja kɛnde kɛ lowotshɔ. Koko lá nsɔsɔlɔ Danyɛlɛ akamoyɛka anto wovundisá. Iwɔ wɛnaka ‘ɛnamelo kelá wiso’ ente Danyɛlɛ atayalaki ‘kaanga l’ikɔkɔmɔ, ayalaki l’ɛnamelo kɛ wɔlɔ’ la koko ndaye nde má nkfumbo kɛ lomo efula. (1 Sa. 16:7) M’ɔtɛ wɔ donga djɛsɔ, ase Babilɔnɛ wakfumbaka Danyɛlɛ djɛ nde ndokamba lá mvulu kɛ nkfumi. (Dan. 1:3, 4, 6) Yehova akɔpaki Danyɛlɛ, m’ɔtɛ wɔ wopo wɔ l’onto lɔ olangala wɔ mpame wɔsɔ ndasɔnɛ djɛ ndjala. Lá nsɔsɔlɔ, Danyɛlɛ akokaka ndjala l’ɛnɔnyi djomi la ndjakfe kana 20 toko, winá wɔ Yehova ndatepela wɔlɔ lá nkambo djɛnde nya Nɔa la Djɔbɔ, ampame yokambelisá l’ilá k’ɛnɔnyi efula. (Ewa. 5:32; 6:9, 10; Djɔ. 42:16, 17; Ezk. 14:14) Edjinge Yehova akindjɛka nkɔpa Danyɛlɛ lá lowiko lɔnde l’otondo lɔ nkamɔ lɔsɔ.—Dan. 10:11, 19. w23.08 2 ite. 1-2

Winá w’ɔkɔpɛ nsomba mvulu kɛmɔtshi, ɔngɔkɔpa nyɛna ikakambo inkfumɔ ilendana la mvulu k’onto w’ɔkɔpɛ nsomba. Iso nkoka nangha wopo wɔkɔ ɔmɔ winá w’owalaso la w’ekaso Bible. Ntsha wɛ mbala lankeke lankeke ongewa ngo akambo wa nsɔsɔlɔ wa wɔdju, ntepela ente ‘akambo w’ewangelo walendana l’Otepela w’ekina wɔ Ndjambe.’ (Heb. 5:12) Ngo ngete ɔlɔmbamawɔ ndjingela ‘l’eteyi’ kɛ mvulu djɛ ndjewa mvulu kɛkɔ wɔlɔ, wɛ ladjɛ ndjeka Bible la nkɔmɛ nkfumɔ djɛ ndosipisoyɛ wɔlɔ wɔlɔ. Yopo imɔtshi ileka wɔlɔ ndjeka Bible nde ndenda wopo wɔ ntenyi dj’etshikitanyi djɛ losango lɔnde okanawɔ. Nangha la wolo djɛ nsipisoyɛ ape ngo akambo wa nsɔsɔlɔ wawolɛ toko, koko lonkina lamo awolɛ akambo wakɔ. Djɛ nsipisoyɛ ntenyi nkfumɔ djɛ Otepela wɔ Ndjambe, iso ladjɛ ndjeka akambo wa nsɔsɔlɔ wa lotshimola wa Bible. Ɔpɔstɔlɔ Poolo akembɛka wananyɔ l’ankaana yɛnde y’Akristo djɛ ndjekaka Otepela wɔ Ndjambe la nkɔmɛ nkfumɔ dj’iwɔ ndjala l’akoka wa ‘nsipisoyɛ wɔlɔwɔlɔ ekekete, otale, wemema la ngunda’ k’akambo wa nsɔsɔlɔ. Má nangha nghɔsɔ, iwɔ ‘wangopika edjo edjinge wangopikama ndii’ lá djawo djɛwɔ. (Ɛfɛ. 3:14-19) Ole iso ladjɛ nangha nghɔsɔ. w23.10 18 ite. 1-3

Bible dekɔ la ndjɔmbɔmba efula y’anto wayalisá la bale ntshitshi. Ladjikɛnge sopalonghanyɛ djɛ ndjeka ndjɔmbɔmba yɛsɔ lá wekelo wɔso? Ndjɔmbɔmba, Kaanga Davidɛ ndakfutamá avuta ngo m’ɔlɛngɛ wɔnde djɛ ndjala nkfumi k’Isariyɛlɛ, nde akongaka ɛnɔnyi efula lá ntondo kɛ nde ndowa lotshungɔ lɔ ndɔndjɛ. Simɛɔna nya Ana wátɛmɔlaki Yehova la nkɔmano nkfumɔ winá wɔ yakongaka djɛ ndɛna Mesiya kelakemisá. (Luka 2:25, 36-38) Winá w’ekɛ ɛkɔndɔ ete ngo wɛsɔ, hona ekadjimwelo lá weepó wɛnɛ: Kɛkɔnge kekokisá nkotshɛ́ onto wɔsɔ djɛ ndjala la bale ntshitshi? Wapɔ wɔkɔnge ndawa má ndjala la bale ntshitshi? Wopo wɔkɔnge w’okokami ndjokola ndjɔmbɔmba kɛnde? Wɛ nkoka lonkina mba wapɔ má ndjeka akambo walendana l’anto watayala la bale ntshitshi. (1 Sa. 13:8-14) Okoka ndawopola ente: ‘Kɛkɔnge k’akomisá djɛ nsamba bale ntshitshi? Eposelo wɛkɔnge wɛ nyɛtshi wakomelisá má nsamba bale ntshitshi?’ w23.08 25 ite. 15

Ɔpɔstɔlɔ Pɛtɛlɔ ayalaki la nkɔmano; atawola kaanga ekete kɛmɔ ndotshinda djɛ nde mpekɔ etshinda etshinda. Nde ɛnyɛka nkɔmano djɛnde lá mbamba kɛmɔtshi, winá wɔ Yeso ndatepela nkambo mɔtshi djɛ ambeki wande yotasipisoyɛ wɔlɔ wɔlɔ. (Dj. 6:68) Ngo winá wɔk’ɔmɔ, ipa la mpona djɛ ndjewa lamo, efula watshikaka nkilika Yeso. Koko ape Pɛtɛlɔ. Nde asuyɛka ante ngo Yeso ndeke lolekɔ́ ‘l’etepela wɛ lowiko l’etshinda.’ Yeso ewaka ante Pɛtɛlɔ nya apɔstɔlɔ ankina wangokadjɛ. Koko, Yeso ashimelaka Pɛtɛlɔ ante nde alekɔ l’eshikikelo ante Pɛtɛlɔ angokalɔ la angotshikala la nkɔmano. (Luka 22:31, 32) Yeso asipisoyɛka ante ‘oloko . . . nkɔpaka, koko demba ndeke wɔdju.’ (Mar. 14:38) Djɛko ndeke, kaanga m’ɔkɔngɔ wɔ Pɛtɛlɔ ndoowanghana, Yeso atakadjɛ ɔpɔstɔlɔ wɔnde. M’ɔkɔngɔ w’ekfundwelo kɛnde, Yeso ɛnamaka le Pɛtɛlɔ, nyɛnamaka papoo ente yayale nde winá wɔ Pɛtɛlɔ ndayalaka nyɔmɛlɛ. (Mar. 16:7; Luka 24:34; 1 Kɔ. 15:5) Ɔsɔ ngo nkambo djɛsɔ yakembɛ ɔpɔstɔlɔ wɔlɛmbisá wɔsɔ! w23.09 22 ite. 9-10

Ndjambe nyimeyɛka kana ndjipisanyɛka mpekanto y’anto walekɔ la djawo le nde. Nde ndawimeyɛka lotshinda lotshinda la koko apilaka yimba lá mpekanto yɛwɔ. (Yee. 32:1, 2) Nde ndɔsaka anto wasɔ ete ngo anto wa sii la wapalekɔ́ la lowo m’ɔtɛ wɔ djawo djɛwɔ. Kaanga yawete ambɔ anto wa wɔlɔ, Abrahama, Davidɛ la enkambi enkina wɛ Ndjambe wɛ nkɔmano watshikalaka ngo ananghi yɛ mpekanto. Koko m’ɔtɛ wɔ djawo djɛwɔ, Ndjambe awɔsaki ete ngo anto wapelekɔ́ la lowo, pekapeka winá w’awɛdjɛnde l’anto wapɔtɛmɔla. (Ɛfɛ. 2:12) Ete ngo ɔpɔstɔlɔ Poolo ndɛnyɛ papoo l’onkanda wɔnde, alɔmbama ndjala la djawo djɛ ndjala la djokanelo djɛ wɔlɔ la Ndjambe. Nsɔsɔlɔ kɛ nkambo djɛsɔ kɛnamaka le Abrahama la Davidɛ, akoka ndjala nsɔsɔlɔ edjinge leso. w23.12 3 ite. 6-7

Lɔɔko kɛnɛ Akristo ankfumɔ walekɔ la mpeyi kɛ ndambola Yehova elambo má nkamba la winá, wolo, la nkete djɛwɔ djɛ nsuka wapɔ w’Onkfumi wɔ Ndjambe. Iso nkoka nyɛnyɛ ente tosasanga la mpeyi kɛso kɛ ntɛmɔla Yehova má ndolambolaka elambo wɛso weleka wɔlɔ. Ɔpɔstɔlɔ Poolo apikaka nghɔmɔ ɛnsɔsɔ lá topo totshikitanyi tɔtɛmɔlaso Yehova tɔ sopakoke lotshinda nyimɛ yimba. (Heb. 10:22-25) Ndjɔmbɔmba, ndɔmba Yehova mbala la mbala, mpoposanyɛka nkongi djɛso le anto ankina, nsanghanaka lá nsanghanyɛ y’otshumano, la nkembanɛka l’anteyi kɛso edjinge ndeka nangha nghɔsɔ ‘ete ngo ɛnaso ente lofu lɔ Yehova lomboleka ndjala entshupa.’ Tá ekomo kɛ akambo welá onkanda wɔ Ndjiso, ondjelo wɔ Yehova atepelaka nkambo djɛnɛ mbala ipe y’etondo ante: ‘Tɛmɔla Ndjambe!’ (Ndj. 19:10; 22:9) Nyontshɔ isankfumɔ tovungɔke akambo wa nsɔsɔlɔ wa lotshimola wa nyuma walendana la tɛmpɛlɔ k’ekekete kɛ nyuma kɛ Yehova, ole mpeyi kɛ wɔlɔ efula k’okotshɛso kɛ ntɛmɔla Ndjambe kɛso k’ekekete! w23.10 29 ite. 17-18

Isankfumɔ nkombolaka ‘nkindjɛ ndjokana ngandji.’ Djɛko ndeke, alekɔ djonyi leso dj’iso mvungɔ ndjewo kɛ Yeso kɛnɛ: ‘Ngandji kɛ anto efula kɛngɔhɔla.’ (Mat. 24:12) Yeso atakɔpa ntepela ante nkambo djɛsɔ ngoleka nanghema l’anteyi kɛ ambeki wande. Koko, iso ladjɛ mbadjɛ dj’ipa nkfumbwama má osambo wɔ ngandji wolekɔ́ l’andja watodjingi wanɛ. La ikanyi yɛsɔ lá wɔɔngɔ, nyontshɔ tokoshishima woopó wɔ djonyi wɔnɛ: Kɛkɔnge kekoka ntokotshɛ́ djɛ ndjewa ntsha ngandji kɛso te wananyɔ kelekɔ ngo wolo? Yopo imɔtshi y’okokaso nshikikɛ wolo wɔ ngandji kɛso nde nshishima wopo w’elolaso winá w’opomanaso l’akambo amɔtshi lá lowiko. (2 Kɔ. 8:8) Ɔpɔstɔlɔ Pɛtɛlɔ alumolaka nkambo mɔtshi, atepelaka ante: ‘Ladjiko djɛ akambo ankfumɔ wasɔ, nyokane ngandji k’efula l’anteyi kɛnyo ladjikɛnde ngandji ndjipaka kɛ mpekanto efula.’ (1 Pɛ. 4:8) Djɛko ndeke wɛdju la evunga w’anto ankina nkoka ndjila ngandji kɛso l’ohemba. w23.11 10-11 ite. 12-13

Topakoke nɛmɛyɛ ɔlɛmbɛ wɔ Yeso wolendana la ngandji ntsha tɛnyɛ ngandji kɛso ngo le anto amɔtshi wel’otshumano toko. Lá nsɔsɔlɔ, tokoka ndeka ndjala imama l’anto amɔtshi ndeka wopo w’oyɛso l’anto ankina, ngo ngete Yeso ndananghe. (Dj. 13:23; 20:2) Koko ɔpɔstɔlɔ Pɛtɛlɔ atovungolaka ante iso ladjɛ ndjala la ‘ngandji kɛ nsɔsɔlɔ k’onto la wɔna nyɛnghɛnde,’ ntepela ente wopo wɔ djokanelo djɛ wolo djeyalaka l’anteyi k’ase nkfumbo, te wananyɔ l’ankaana yɛso inkfumɔ. (1 Pɛ. 2:17) Pɛtɛlɔ atokembɛka djɛ ‘ndjokana ngandji k’efula kɛm’anse oloko l’anteyi kɛso.’ (1 Pɛ. 1:22) Lá nkilika ikanyi ilekɔ́ lanɛ, ndjala la ngandji ‘k’efula’ nsakisolaka nkɔpa onto ɔmɔtshi kaanga ntsha alekɔ wolo ndɔwɛnyɛ ngandji. Ndjɔmbɔmba, otepelaso mo ntsha wɔnanyɔ ɔmɔtshi atomadjɛka kana atokiyanyɛka lá lɛdji lɔmɔtshi? Ikanyi yɛso yɛ ntondo nkoka ndjala yɛ nsɔmbɔla koko ape yɛ ndɔwɛnyɛ ngandji. Koko, Pɛtɛlɔ ekaka me Yeso ante nsɔmbɔla apasasangɛ Ndjambe. (Dj. 18:10, 11) Pɛtɛlɔ afunaka nghɔnɛ: ‘Nyotakawoyɛke nyɛtshi tá nyɛtshi kana ntoyi tá ntoyi. Koko nyaasakole.’ (1 Pɛ. 3:9) Awola djɛ ngandji k’efula nkotshinda djɛ nanghela kaanga anto wambokomadjɛ wɔlɔ la ndawɔsa l’odjito. w23.09 28-29 ite. 9-11

Tongokamɔke efula djɛ nyɛna wopo wɔ ilɛngɛ ndofulaka lankeke. Nyɛnamaka ente ilɛngɛ mfulaka ipa la nde ndjila welo. Koko, mfula djɛ nkoma Okristo wombotshunda lá nyuma, ndɔmbamaka ndjila welo. (1 Kɔ. 13:11; Heb. 6:1) Djɛ nkotshɛ okoma wɔsɔ, iso ladjɛ ndjala la djokanelo djɛ wolo la Yehova. Tolekɔ lonkina la djonyi djɛ nyuma kɛnde k’ekina dj’iso ndjala la wekeka w’osasangɛ, ndjala l’akoka walekɔ́ djonyi la ndálɔngɔsɔla djɛ ndɔwɛmba edjito l’etsho weyaye. (Woo. 1:5) Yehova alonghanyɛka djɛ anto ndjala ampame l’amato. (Ewa. 1:27) Lá nsɔsɔlɔ, mpame l’omoto ntshikitanaka l’alemba, koko wangotshikitanake l’onkina la topo tonkina. Ndjɔmbɔmba, Yehova ananghaka djɛ mpame l’omoto nkotshɛ edjito kɔɔ, djɛko ndeke walekɔ la djonyi djɛ wekeka l’akoka wakoka nkotshɛ́ onto l’onto djɛ mbɛmba edjito wɛnde.—Ewa. 2:18. w23.12 18 ite. 1-2

Yeso akombolaki djɛ anto ankina nkamba la djiina mɛlɛmɛlɛ dj’isɛkɛnde? Ee, ape l’ehamo. L’etsho wɛsɔ, ewandji ɛmɔtshi w’ɛtɛmwɛlɔ weyalaki l’eloko wɔlɔ wakokaki nkanela ambɔ djiina djɛ Ndjambe dekɔ ekina efula djɛ numola, koko Yeso atatshikaki kaanga ndambo daambi tokanyi topalɔndɛ Afunelo tɔsɔ ndopekala djɛ nde numɛ djiina djɛ Papa kɛnde. Tokolenda mbala kɛmɔtshi kɛ ndaposɛ ɛdjɛngɛ me mpame kɛmɔtshi lá djeke djɛ Ngeraseni. Anto wa l’eteyi wokaka wɔma efula ko walɔmbaka Yeso djɛ nyima m’eteyi, ko nde atshɔka. (Mar. 5:16, 17) Koko, Yeso akombolaka djɛ djiina djɛ Ndjambe ndjewama l’eteyi. Djɛko ndeke ndashimela mpame kesalisá djɛ ntoshimelá anto, ape kɛnɛ kɛ Yeso ndananghe, koko kɛ Yehova ndananghe. (Mar. 5:19) Nde nkombolaka tii lɔɔko kɛnɛ, iso ndjewanyɛ djiina dj’Isɛkɛnde l’andja w’otondo! (Mat. 24:14; 28:20) Winá w’onanghaso nghɔsɔ, tongosasangɛke Nkfumi kɛso, Yeso. w24.02 10 ite. 10

Tolekɔ nsɔsɔlɔ la mpeyi kɛ ndjala l’anteyi k’olonghanyelo wɔ Yehova l’etsho w’ekomo wɛ wolo wɛnɛ. Winá w’akambo w’andja wanɛ yotaleke ntshitana, Yehova ambɔtɔpɛyɛ́ nkfumbo k’osanga kɛ nyuma kɛ wananyɔ l’ankaana. (Yee. 133:1) Nde ntokotshɛka djɛ ndjala la djokanelo djɛ wolo la nkfumbo kɛkɔ. (Ɛfɛ. 5:33–6:1) Edjinge nde ntɔpɛyɛka alako wa balo w’oyɛso la djonyi djɛ ndjala la vu djɛ nsɔsɔlɔ djɛ l’eteyi. Koko, iso ladjɛ nangha la wolo djɛ nkindjɛ nkambela Yehova la nkɔmano. Lamo? Ladjikɛnde lá winá ɛmɔtshi tokoka nkiyana m’ɔtɛ w’evunga wɛ anto ankina. Tokoka lonkina ndɛmba winá w’onanghaso evunga, peka peka ntsha tɔkfɔ l’evunga wɛkɔ mbala la mbala. Iso ladjɛ nkindjɛ l’olemo wɔ Yehova 1) winá wɔ winaso ondjawodji otokiyanyɛnde, 2) winá w’ebula kɛso otokiyanyɛnde, la 3) winá w’ɔlɛmbaso ntsha tombonangha evunga. w24.03 14 ite. 1-2

Mbala la mbala, ongokaka kɛnɛ kekomela wananyɔ l’ankaana wambɔsá nkano djɛ ndeka ndápɛyɛ l’olemo w’ekina. Mbala imɔtshi, wambingelá lá Nkalasa k’Ansakodji y’Onkfumi kana wambɔsɛkɔ́ tá djena dj’oyɛwɔ la djonyi dj’efula. Ntsha olekɔ l’akoka, yawilela okoma ɔmɔtshi wɔ nghɔsɔ ole wɛ. Enkambi wɛ Yehova wangokombolake mfudjɛ olemo wɔwɔ. (Ele. 16:9) Iya ntsha winá wɔsɔ opalekɔ l’akoka wa nangha nghɔsɔ? Tɔfɛnyɛke ente anto wakoka nangha nghɔsɔ wakoleka. Ekete keleka djonyi lá lowiko l’Okristo nde, nkindjɛ nkfulumeyɛ. (Mat. 10:22) Tokanelake ente welo w’ilɛ djɛ nkambela Yehova lá nkilika akoka wako la akambo wakokomela lá lowiko wepalekɔ la ntshina. Ɔsɔ oyɛwɔ nde yopo imɔtshi yɛ djonyi efula y’okokɛ nkindjɛ nkilika Yeso m’ɔkɔngɔ wɔ batisimo djɛko.—Yee. 26:1. w24.03 10 ite. 11

Papa kɛso kɛ l’olongo ntolakaka djɛ ntimeyɛ ntsha tomboyapɛla. (Yee. 86:5) Djɛko ndeke ntsha tomboyapɛla lá lɛdji lɔ nsɔsɔlɔ má mpekanto yɛ sananghe, tokoka ndjilela Yehova oloko ente kɛnɛ k’otepelande kelekɔ ngo nsɔsɔlɔ, ntepela ente ambotimeyɛ́. Vungɔ ente Yehova apalekɔ akambo wolo. Nde apatɔlɔmbɛ kaanga ndambo daambi dj’iso nangha kɛnɛ kɛ sopalekɔ l’akoka wa nangha. Angoyalake la djedjɛ lá kenkfumɔ k’onanghaso l’olemo wɔnde l’ilá kenkfumɔ k’ilaso welo djɛ ndokambela. Lonkina, tɔnɔla lá ndjɔmbɔmba yɛ Bible yɛ wanɛ wakambelisá Yehova l’oloko ɔmɔ. Tɔkɔtɔnɔla lá ndjɔmbɔmba kɛ ɔpɔstɔlɔ Poolo. Nde akambaka olemo l’entete l’ilá k’ɛnɔnyi, ananghaka nkɛndɔ yɛ kilɔmɛtrɛ nunu la nunu, edjinge ataka ntshumano lombombe. Iya Ndjambe atasasanga lande lonkina winá wɔ akambo yotshikitanaka lá lowiko lɔnde la ndotayala lonkina l’akoka wa mpoposanyɛ ete ngo ndapoposanyɛka ntondo? Lako. Nde akindjɛka nangha kɛnɛ kɛ ndakokaka nangha, ko Yehova osakolaka. (Ele. 28:30, 31) Lá wopo wɔkɔ ɔmɔ ndeke, kɛnɛ k’okokaso mpɛyɛ Yehova nkoka ntshikitana winá ɛmɔtshi. Koko kɛnɛ keleka djonyi lende nde donga djetotshinda djɛ ndokambela. w24.03 27 ite. 7, 9

Yeso atshikelaka ambeki wande ndjɔmbɔmba k’iwɔ nkilika má alɔmbɛlɔ wa ndalɔmbaka Yehova. L’ilá k’olemo wɔnde, Yeso alɔmbaki mbala la mbala. Nde ayawombelaki winá wɔ ndɔmba ladjikɛnde mbala efula nde ayalaki l’olemo edjinge anto efula wodjingaki. (Mar. 6:31, 45, 46) Nde awetshɔki lá nkɛsɛ dj’efula djɛ nde mba winá wɔ ndɔmba. Ndekana mbala kɛmɔ, nde alɔmbaka otsho w’otondo lá ntondo kɛ ndɔsa nkano djɛ djonyi. (Luka 6:12, 13) Edjinge Yeso alɔmbaka mbala efula l’otsho lá ntondo kɛ nyɔyi kɛnde djɛ nkotshɛ odjito wolekisá wolo l’anteyi k’edjito weyalisá lande lanɛ lá looko. (Mat. 26:39, 42, 44) Ndjɔmbɔmba kɛ Yeso ntolakanyɛka ente, ayale elemo wɛkɔnge w’oyalaso la wɛkɔ, iso ladjɛ ndɔsaka winá djɛ ndɔmbaka. Ngo ngete Yeso, iso nkoka mba winá wɔ ndɔmbaka má mbetshɔka l’inkɛnkɛsɛ kana la nkɔlɔ dj’efula. Winá w’onanghaso nghɔsɔ, iso nyɛnyɛka Yehova ente iso ndɔsaka opapɛyɛ wɔ ndɔtɔpɛyɛ la ntshina. w23.05 3 ite. 4-5

Tokolenda itepela ‘kembolola’ y’otanaso lá vɛrse djɛso djɛ lɔɔko. Diksiɔnɛrɛ mɔtshi djesakisola Bible nkadjimolaka itepela yɛsɔ nghɔnɛ “kemboyala ete ngo ndjale l’eteyi kɛso.” Ɔsɔ ngo yopo yɛ nkfulu yɛ nyɛnyɛ ngandji k’efula kɛ Yehova okande ankfutami w’avuta! Ankfutami w’avuta ndjewaka ambɔ ‘Ndjambe ndakɔpaka.’ (Yuda 1) Ɔpɔstɔlɔ Djɔanɛ ɛnyɛka wopo w’oyawokawɔ winá wɔ ndafune ante: ‘Nyolende wopo wɔ ngandji ketɔkɔpisá Papa kɛso má wopo wɔ ndawola iso ndjetama wana wa Ndjambe!’ (1 Dj. 3:1) Yehova ɔkɔpakande ngo ankfutami toko? Lako, Yehova ɛnyɛka ngandji kɛnde le onto Onkfumɔ wɔ l’anteyi kɛso. Ilembetelo yɛkɔnge ileka ekekete yetoshikikɛ ngandji kɛ Yehova? Ilembetelo yɛkɔ nde oshinga wɔ mbendo, enanghedji kɛ ngandji keleka ekekete l’andja w’otondo!—Dj. 3:16; Ɔrɔ. 5:8. w24.01 28 ite. 9-10

Vɛrse djɛnɛ djɛnyɛ wopo onkina wɔ Davidɛ ndashiyɛ wɔma wɔnde. Kaanga lowiko lɔnde yayalaka lá mbalaka, nde atɔnɔlaka lá kɛnɛ kɛ Yehova ndongonanghela. Davidɛ ewaki ante Yehova angowikɛ lá winá w’ɛdje. Lá djiko djɛ lasɔ, Yehova atepelaka ante Davidɛ angoyala nkfumi k’Isariyɛlɛ. (1 Sa. 16:1, 13) Le Davidɛ, ayalaka ngo ngete kɛnɛ kɛ Yehova ndolake kembokotshama. Kɛkɔnge kɛ Yehova ndombokolaka djɛ nkonanghela? Topakongela ente Yehova angoshimba dj’ekakasano enkfumɔ ntokomela. Koko, ayale ehemba wɛkɔnge wɛ nghongopomana lá nkfumbo dj’akambo djɛnɛ, Yehova angimɛ enkfumɔ wɛkɔ l’andja wa mbango wayaye. (Iza. 25:7-9) Ontongi wɔso alekɔ nsɔsɔlɔ la nkfulu kɛ nkfundola edjo, kɛ ntosadjɛ la kɛ nyimɛ antonyi ankfumɔ.—1 Dj. 4:4. w24.01 6 ite. 12-13

Kanela lamo ngalambola lowiko lɔko te Yehova la ngalongola batisimo. Wɛ otapolaka wina wasɔ ladjikɛnde okombolaki ntshikala l’onkoko wɔ Yehova. Tɔnɔla ndambo lá kɛnɛ kekokotshisá djɛ ndashikikɛ ente ombisola akambo wa nsɔsɔlɔ. Wɛ owaka balo djɛ djɔ djelendana la Yehova la ofudjɛka ngandji la dilɛmɛlɔ djɛko te nde ete ngo oyɛnde Papa kɛko kel’olongo. Wɛ oyalaka la djawo te nde ko kɛsɔ kekotshindaka djɛ ndapɛla má evunga wɛko. Oloko wɔko wokotshindaka djɛ ntshika nanghedji djɛ nyɛtshi ko nangha ɛkɔpa kɛ Ndjambe. Oloko wɔko w’otshitshimaka winá wɔ ngewe ente Ndjambe ambokimeyɛ. (Yee. 32:2) Wɛ otateyɛka ndjingela nsanghanyɛ y’Akristo la mpoposanyɛ akambo wa wɔlɔ wa ngeke le anto ankina. Ete ngo oyɛ Okristo wombolongolá batisimo winá wɔsɔ, otakɛndɛ lá mboka kɛ lowiko, la ɔmbɔsa nkano dj’ipa nyima má mboka kɛkɔ. (Mat. 7:13, 14) Nyontshɔ topikame ndii, l’onkoko wɔ Yehova la ipa nsasoka lá dilɛmɛlɔ djɛso t’ɛlɛmbɛ wɛnde. w23.07 17 ite. 14; 19 ite. 19

Má ntɔnɔla lá lɔlɔmbɔ lɔko lɔ ngananghe winá wɔ ngoyalambola le Yehova, ongowa wolo wɔ mpikama l’ohemba onkfumɔ. Ndjɔmbɔmba, ongowetshola mposɛ yɛ ebula kɛ nkana? Lako kaanga ndambo daambi! Wɛ omboshiyɛká ntepela ente lako lá nkambo djɛsɔ. Má nangha nghɔsɔ, ongoyalama dj’ipa ndotshimba yimba la nana la mposɛ yɛ nyɛtshi m’ɔkɔngɔ w’iwɔ nkonama. ‘Tingelake lá mboka k’anto wa nyɛtshi.’ (Woo. 4:14, 15) Má mvungɔ nkano djɛ Yeso djɛ nsasangɛ Papa kɛnde, ongotona mbala kɛkɔ kɛmɔ ole l’oloko wolo onkfumɔ ekete kenkfumɔ kewɛ ente kekoka ntshutshumadjɛ Ndjambe, kanga ngoyalambolá le nde. (Mat. 4:10; Dj. 8:29) Kɛnɛ kelekɔ́ nsɔsɔlɔ nde, ehemba l’ekakasano wɛkɔpɛyɛ mbamba kɛ nyɛnyɛ ente ɔmbɔsa nkano djɛ nkindjɛ nkilika Yeso. Ntsha ombonangha nghɔsɔ, okoka ndáshikikɛ ente Yehova angokokotshɛ́. w24.03 9-10 ite. 8-10