Ngɔndɔ k’enanɛyi

Tokote akambo ape wa djonyi má yeembo yel’anse yɛnɛ: 1) Anto wa wɔlɔ mpomanaka l’ekakasano. 2) Yehova ntotshungolaka má ekakasano wepomana laso. Wopo wɔkɔnge Yehova ototshungolande? Má ntokotshɛ́ dj’iso ndjala l’ikanyi yɛ wɔlɔ lá nkambo djelendana la lowiko lel’andja wa nyɛtshi wanɛ. Winá wɔ Yehova olakande ante tongoyala l’osasa má ndookambela, nde apakɔpɛ ntepela ante topangopomana l’ekakasano lɔɔko kɛnɛ. (Iza. 66:14) Nde ntokembɛka djɛ mpika wiso waso t’etsho weyaye, ntepela ente t’etsho wɛ songoyala la wopo wɔ lowiko l’okombolande dj’iso ndjala la lɔkɔ lotshinda lotshinda. (2 Kɔ. 4:16-18) Lá winá wɔk’ɔmɔ, nde ntokotshɛ́ka dj’iso nkindjɛ ndookambela lofu la lofu. (Del. 3:22-24) Olakanyelo wɔkɔnge w’okokaso mba má ndjɔmbɔmba y’enkambi wɛ Yehova, wɛ nkɔmano wel’etsho wefunamaki Bible la wel’etsho wɛso wɛnɛ? Tokoka mpomana l’ekakasano wɛ sotapomanaká. Koko ntsha iso ndawɛkɛ te Yehova, nde apatokadjɛki kaanga ndambo daambi.—Yee. 55:22. w23.04 14-15 ite. 3-4

Iso nkoka mba olakanyelo má ndjɔmbɔmba kɛ Yosɛfu nya Mariya, wanɛ wayalisá entshupa djɛ nɛmɛyɛ ewandji welá djiko kaanga lá winá wɔ nkambo djɛsɔ yayale okakasano. (Luka 2:1-6) Winá wɔ Mariya ndayale la djemi djɛ ngɔndɔ etengo 9, nde nya Yosɛfu wapomanaka la nkambo dj’ilisá dilɛmɛlɔ djɛwɔ l’ohemba. Auguste, kanga lɔlɔndjɛki Onkfumi wɔ Ɔrɔma, ilaka ɔlɛmbɛ wɔ onto onkfumɔ ntshɔ ntofuna djiina lá buku. Yosɛfu nya Mariya wayalaka ladjɛ nangha lɔkɛnde l’otale tá Bɛtɛlɛhɛmɛ, lɔ kilɔmɛtrɛ 150 lá ontayimbo w’enkókó efula. Lɔkɛndɔ lɔsɔ loyalaka ndjolo efula pekapeka le Mariya. Antshukami wasɔ wakokaka nkiyana lá kɛnɛ kelendana la vu djɛ Mariya la djɛ wɔna woyalaki lá nkfundu. Iya ntsha lɔnɔ lombotovunda l’amboka? Ndayalaka nde la djemi djɛ Mesiya. Nkambo djɛsɔ djekokaka ndapɛyɛ elonga kɛ mpendola ɔlɛmbɛ wɔ lɛɛta? Yosɛfu nya Mariya watawola ekiyano wɛsɔ ndashimba djɛ nɛmɛyɛ ɛlɛmbɛ wɛ lɛɛta. Yehova atshɔkɔlaka ntshunamo djɛwɔ. Mariya akomaka lá Bɛtɛlɛhɛmɛ, awotaka wɔna wɔ wɔlɔ, la akotshɛ́ka djɛ prɔfɛsi kɛ Bible nkotshama!—Mika 5:2. w23.10 8 ite. 9; 9 ite. 11-12

Iya okokaso ntepela mo ntsha ongokake wɔma kana nsɔnyi djɛ mpɛyɛ kɔmantɛrɛ lá nsanghanyɛ? Wɛ nkoka mba wapɔ má ndɔngɔsɔlaka wɔlɔ. (Woo. 21:5) Ntsha ombosipisoyɛ akambo wangekamá lá lɛdji lɔ wɔlɔ, opangoyala l’okakasano wɔ mpɛyɛ kɔmantɛrɛ. Lonkina, pɛyɛka kɔmantɛrɛ yɛ totenyi. (Woo. 15:23; 17:27) Nsakiso k’itenyi, kepalekaka mpɛyɛ wɔma kana nsɔnyi. Má mpɛyɛ kɔmantɛrɛ k’itenyi l’etepela wɛko nghɔmɛlɛ, ɔngɛnyɛ ente ombɔlɔngɔsɔlaka wɔlɔ edjinge ombosipisoyɛka akambo w’ekanyo la lɛdji lɔ wɔlɔ. Iya okokɛ nangha mo ntsha ombokamba l’alako wasɔ koko okindjɛ ngo ndjoka nsɔnyi djɛ mpɛyɛ kɔmantɛrɛ kɛmɔ kana ipe? Yashikikɛ ente Yehova angosasanga la welo wɛko wilɛ l’oloko ɔmɔ. (Luka 21:1-4) Mpɛyɛ kɛnɛ keleka wɔlɔ lewɛ apasakisola nangha kɛnɛ kɛ ngopakoke nangha. (Flp. 4:5) Shikikɛ akambo w’oyɛ l’akoka wa nangha, yawilela okoma wɔ nangha akambo wakɔ edjinge lɔmba djɛ wɛ ndjala la vu djɛ l’oloko. Má bango, okoma wɔsɔ nkoka ndjala wɔ mpɛyɛ kaanga kɔmantɛrɛ kɛmɔ k’itenyi. w23.04 21 ite. 6-8

Ɔpɔstɔlɔ Poolo atɛdjɛka l’angala wambowadjɛ edjinge wambɔlɔta ɔlɔta wɔ tá mbandji. Ongala wɔ wɔlɔ ndɔmbamaka djɛ ndjala entshupa djɛ nana mbandji winá onkfumɔ wɔ mbandji oposawɔ. Oyɛwɔ ngo nghɔsɔ edjinge leso. Iso ndjalaka entshupa lá nkambo djɛ lofu lɔ Yehova má ndɔta nguwa kɛ djawo la kɛ ngandji edjinge itombo yɛ nkongi. Nguwa namaka oloko w’ongala. Djawo la ngandji namaka oloko wɔso wɔ djingingi. Wekeka wasɔ ntokotshɛ́ka djɛ nkindjɛ nkambela Ndjambe edjinge nkilika Yeso. Djawo ntokotshɛ́ka djɛ ndjala l’eshikikelo ente Yehova angotofuta má wopo w’ohonaso l’oloko ɔmɔ. (Heb. 11:6) Ngotokotshɛ́ djɛ ntshikala la nkɔmano te Owandji wɔso, Yeso, kaanga ntsha topomana l’ehemba. Iso nkoka nkembɛ djawo djɛso djɛ ndjala l’akoka wa nkfulumeyɛ ekakasano welá lowiko má ndjekaka ndjɔmbɔmba kɛ anto welá etsho wɛso wɛnɛ watshikalisá la nkɔmano kaanga l’anteyi kɛ lɔnyɔkɔ kana ekakasano welendana la mfalanga. Edjinge iso nkoka ndjewɔ ilonga yɛ nkɔpa nkete djelá demba má ndjokola ndjɔmbɔmba kɛ anto watshikisá lowiko lɔwɔ onghanghunya djɛ ndjila wapɔ w’Onkfumi l’edjena kɛ ntondo. w23.06 10 ite. 8-9

Ndakota oyɛwɔ nde nkoka djɛ ndjapamela nsaki la nanghedji djɛso isɔmɛlɛ. Alekɔ djonyi djɛ ndakota djɛ nkotshɛ ekoma wɛso, pekapeka ntsha okoma wɔkɔ wolekɔ wolo djɛ nkotshɛ kana topalekɔ la mposɛ kɛ nangha olemo wɔkɔ. Vungɔ ente ndakota oyɛwɔnde djekeka mɔtshi djɛ lowambo lelá nyuma, djɛkondeke lɔmbaka Yehova nyuma kɛnde k’ekina djɛ wɛ ndjala la djekeka djɛ djonyi djɛsɔ. (Luka 11:13; Nga. 5:22, 23) Tokongake ngo akambo ankfumɔ mbɔnga. Lako winá wɔ akambo ankfumɔ yɔngɔwɔnga l’andja wanɛ. Ntsha tombokonga ngo winá wɔ nghɔsɔ, mbɔ koko topakotshɛki lotshinda okoma wɔso. Iso nkoka nsamba mposɛ ladjikɛnde okoma wɔso wɛnama etengo wolekɔ wolo efula nkotshɛ. Ntsha oyɛwɔ nde nghɔsɔ lá nkambo djɛko, opakoke mbanga ndambo ndambo? Ntsha okoma wɔko oyɛwɔnde wɔ ndjala la djekeka mɔtshi, lamo ngopakoke ntateyɛ nyɛnyɛ djekeka djɛkɔ ntondo má tokakambo tɔ daambi? Ntsha okoma wɔko oyɛwɔnde wɔ nshiyɛ mbala Bible, opakoke nonghanyɛ djɛ ntateyɛ mbalaka l’ilá kɛ ndambo kɛ winá daambi? w23.05 29 ite. 11-13

L’etsho w’ekomo wɛnɛ, Yehova akamba l’olonghanyelo wɔnde djɛ ntɔpɛyɛ olelo w’efula welá nyuma djɛ ntokotshɛ́ dj’iso nkindjɛ nkɛnda lá ‘Mboka k’Ekina.’ (Iza. 35:8; 48:17; 60:17) Tokoka ntepela ente, winá onkfumɔ wɔ onto awolande ndjeka Bible, nde mbaka mbamba kɛ nkɛnda lá ‘Mboka k’Ekina.’ Amɔtshi nkɛndaka ngo ndambo daambi lá mboka k’ekekete ko masɔ wangimake. Ankina ndɔsaka nkano djɛ nkindjɛ nkɛnda l’eteyi tii iwɔ nkoma l’edjena kɛ yotatshu. Edjena kɛkɔ kɛsɔ nge? Le waalekɔ la nkongi djɛ ntshɔ t’olongo, ‘Mboka k’Ekina’ kengatɔla tá ‘paradiso kɛ Ndjambe’ kelekɔ l’olongo. (Ndj. 2:7) Le waalekɔ la nkongi djɛ mbika lá looko, mboka k’ekekete kɛsɔ kengalɔndjɛ tii l’ekomo k’ɛlɔndjɛlɔ k’ɛnɔnyi 1 000 lá anto ankfumɔ yongokoma djɔ. Ntsha ɔnkɛnda la mboka k’ekekete kɛsɔ lɔɔko kɛnɛ, tolendake t’ɔkɔngɔ. Edjinge timake m’eteyi tii nghongokoma l’ekomo kɛ lɔkɛndɔ lɔɔko l’andja wa bango! w23.05 17 ite. 15; 19 ite. 16-18

Winá w’ɔtɔnɔlɛ l’akambo ankfumɔ wa Yehova ndombokonanghela, wɛ ongolola kfu la djedjɛ te nde la ongokombola ndolambola lowiko lɔko. (Yee. 116:12-14) Bible ndjetaka Yehova ante Kanga lɔpɛyɛka ‘epapɛyɛ enkfumɔ wɛ wɔlɔ la wɛ djɔ.’ (Dja. 1:17) Lá epapɛyɛ enkfumɔ wɛsɔ, opapɛyɛ woleka ekekete nde, opapɛyɛ wɔ Wɔnande Yeso. Kookanela ndambo daambi! Oshinga wɔ mbendo ndeke lomonanghá djɛ wɛ ndjala la djokanelo djɛ ma ma la Yehova. La wɔmbɔkɔpɛyɛ́ nkongi djɛ mbika lotshinda lotshinda. (1 Dj. 4:9, 10) Ndálambola le Yehova alekɔ yopo yɛ wɔlɔ efula yɛ wɛ nyɛnyɛ djedjɛ djɛko tá ilembetelo ileka ekekete yɛ ngandji itananghemaka ntondo, la tá esako enkina enkfumɔ wɛ Yehova ndakɔpɛyɛ.—Mvu. 16:17; 2 Kɔ. 5:15. w24.03 5 ite. 8

Winá w’ɛnaso nanghedji djɛ nyɛtshi dj’anto lɔɔko kɛnɛ, iso ndawokaka etengo Lɔta ndoke. Nde ‘ayalaki la yɛnyi y’efula m’ɔtɛ wɔ nanghedji djɛ ntshamba nsɔnyi djeyalaki l’anto wa nyɛtshi,’ ladjikɛnde nde ewaki ante Papa kɛso kel’olongo ntonaka nanghedji djɛ nyɛtshi. (2 Pɛ. 2:7, 8) Ladjikɛnde Lɔta alɛmɛyɛki la akɔpaki Ndjambe efula nde atonaka nanghedji djɛ mbindo dj’anto wodjingaki. Edjinge iso tombodjingama me anto walekɔ́ la ndambo kɛ dilɛmɛlɔ daambi kana wapalɛmɛyɛ ɛlɛmbɛ wɛ Yehova welendana la nanghedji. Kaanga oyɛwɔ nghɔsɔ, iso nkoka nkindjɛ ndjala la nanghedji djɛ wɔlɔ, ntsha tokindjɛ nkɔpa Ndjambe la ndɔɔlɛmɛyɛ. Djɛ nkotshɛ okoma wɔsɔ, la ngandji kenkfumɔ Yehova mpɛyɛka ekembelo edjinge mposɛ má onkanda wɔ Woongo. Akristo ankfumɔ, ampame, amato, elangala, eseka edjinge nkokolo, nkoka nsɔsɔlɔ mba wapɔ má nshishima dako djɛ balo dj’otanaso l’eteyi. Winá w’okaso Yehova wɔma, iso mbadjɛka dj’ipa ndjawola nanghedji djɛ nyɛtshi. w23.06 20 ite. 1-2; 21 ite. 5

Nkoka ndjala opomana l’onanyelo me ase nkfumbo kɛko, kana mbala imɔtshi omboyapekala nkete mɔtshi ngo djɛ ndjila wapɔ w’Onkfumi l’edjena kɛ ntondo. (Mat. 6:33) Ntsha nghɔsɔ, okoka ndáshikikɛ ente Yehova ɛna akambo ankfumɔ wa ngananghe la djawo lá nkambo djɛnde. (Heb. 6:10) Mbala imɔtshi, wɛ ɔmɛna nsɔsɔlɔ k’etepela wɛ Yeso wɛnɛ: ‘Lako onto wotshikisá mvulu kana wananyɔ kana ankaana kana nyɔ kana papa kana wana kana awedji l’ɔtɛ wɔmi la l’ɔtɛ wɔ losango lɔ wɔlɔ, wopangowa mvulu, wananyɔ, ankaana, nyɔ, wana, la awedji mbala 100 winá wɔsɔ esanga la lɔnyɔkɔ, ko lá nkfumbo dj’akambo djeyaye, lowiko l’etshinda.’ (Mar. 10:29, 30) Lá nsɔsɔlɔ, esako wɛ ngombowa weleka otale ekete kenkfumɔ kɛ ngomboyapekalá.—Yee. 37:4. w24.03 9 ite. 5

Winá wɔ Akristo welá Judeya yapomana la ndjala kɛ nkasa, wananyɔ wel’otshumano welá Antiyɔka wasɔ ‘wɔsaka nkano, djɛ ntomela wananyɔ wintasɛki lá Judeya okotshɔ, onto l’onto lá nkilika akoka wande.’ (Ele. 11:27-30) Kaanga wananyɔ wɛnaki ndjolo wasɔ yayalaka otale efula lawɔ, Akristo welá Antiyɔka wɔsaka nkano djɛ ndakotshɛ́. (1 Dj. 3:17, 18) Edjinge iso tokoka nyɛnyɛ nkɛtshi kɛso lɔɔko kɛnɛ winá w’ewaso ente winaso antɛmɔdji wambopomana la mbalaka kɛmɔtshi. Tongakotshɛ́ ipa la ntshatshimba, mbala imɔtshi má ndjopola tokokolo ntsha tokoka ntókotshɛ́ l’olemo ɔmɔtshi, má mpɛyɛ epapɛyɛ wɛ l’ɛkɔpa djɛ nsuka olemo wel’andja w’otondo, kana má ndɔmbɛla waambopomana la ndjolo kɛkɔ. Wananyɔ l’ankaana yɛso nkoka ndjala la djonyi dj’okotshɔ djɛ mba nkete mɔtshi djoyɛwɔ la djonyi djɛ mbika. Winá wɔ Nkfumi kɛso, Kristo Yeso, ndongoyɛ ndolomboyɛ anto, iso nkombolaka nde ndototana tokana nkɛtshi ko nde ndoteta djɛ ‘ntokita Onkfumi.’—Mat. 25:34-40. w23.07 4 ite. 9-10; 6 ite. 12

Yeso okolaka ekanedji kɛ wɔlɔ kɛ Yehova. Nde atomamaka lá looko djɛ ndopoposanyɛ le ‘ɛnkɔkɔ wembovunga welá mvulu k’Isariyɛlɛ.’ Koko nde ɛnyɛka ekanedji kɛ wɔlɔ winá wɔ ndakotshɛka odjito wɔnde. Lá mbamba kɛmɔtshi, omoto ɔmɔtshi wotayalaki ose Isariyɛlɛ ayɛka ndɔɔwɔnda djɛ nde nkɔnɔla wɔnande ‘w’ɛnaki ndjolo me ɔdjɛngɛ.’ La nkɛtshi kenkfumɔ, Yeso akɔnɔlaka wɔna wɔsɔ ngo ngete nyɔ kɛnde ndɔɔlɔmbɛ. (Mat. 15:21-28) Tɔkɔsa ndjɔmbɔmba kenkina. Má bango dj’olemo wɔnde, Yeso atepelaka ante: ‘Onto onkfumɔ wonyanghana . . . , lemi koko langowanghana.’ (Mat. 10:33) Iya koko nde anghanaka Pɛtɛlɔ, kanga lowanghanisá mbala isato? Lako. Yeso ilaka yimba lá ndapɛla la lá djawo djɛ Pɛtɛlɔ. M’ɔkɔngɔ wɔ nde nkfundɔ, Yeso ɛnamaka le Pɛtɛlɔ edjinge mbala imɔtshi óshikikɛka ngandji kɛnde la imeyelo kɛnde. (Luka 24:33, 34) Anto ape wakɔ, Yehova Ndjambe nya Yeso Kristo walekɔ l’ekanedji kɛ wɔlɔ. Iya koko iso? Yehova ntɔlɔmbaka dj’iso ndjala l’ekanedji kɛ wɔlɔ. w23.07 21 ite. 6-7

Eshikikelo kɛkɔnge k’okokaso mpoposanyɛ le anto w’ila ehamo ambɔ daka djɛ Ndjambe djɛ Paradiso mpangokotshama? Ntondo ntondo, Yehova nyɔmɛlɛ ndeke lolaka daka djɛkɔ. Onkanda wɔ Ndjiso w’otepela ante: ‘Kanga l’intasisá lá yɛkɔ yɛ lowandji atepelaka ante: ‘Lenda! Lemi lokadjimola nkete nkfumɔ bango.’’ Nde alekɔ la balo, nkfulu ole mposɛ kɛ nkotshɛ daka djɛnde. Dj’ape, ekotshamelo kɛ daka djɛ Yehova kelekɔ nkambo djɛ nsɔsɔlɔ efula, ko lá wiso wa Yehova alekɔ ngo ngete mboshiyɛká nkotshama. Djɛko ndeke otepelande ante: ‘Etepela wɛnɛ welekɔ nkɔmano la nsɔsɔlɔ. . . . Wembokotshama!’ Dj’asato, winá wɔ Yehova owangande nkambo mɔtshi, nde nkomeyɛke nkambo djɛkɔ tii l’ekomo, lá lɛdji lɔ wɔlɔ efula, etengo etepela wɛnɛ oshikikɛwɔ: ‘Lemi ndekɔ Alfa la Omega.’ (Ndj. 21:6) Yehova ɛnyɛka ante Satana alekɔ kanga ongolo edjinge apalekɔ la wolo wɔ ndoshimba djɛ nkotshɛ ikanyi yɛnde. Djɛkondeke Winá w’onto ɔmɔtshi otepelande ante: “Alaka wasɔ walekɔ wɔlɔ lombombe,” okoka ndowalela la ndopakisola Ndjiso 21:5, 6. Ɛnyɛnde wopo wɔ Yehova ndapɛyɛ onkanda wɔ daka djɛnde, má ndjila itshapa l’eteyi, ntepela ente itshapa yɛnde nyɔmɛlɛ.—Iza. 65:16. w23.11 7 ite. 18-19

Winá wɔ Abrahama ndayalaka ekokolo kɛ ɛnɔnyi 75, Yehova olakaka daka. Abrahama ɛnaka ekotshamelo kɛ daka djɛsɔ? Ape tshɛ. M’ɔkɔngɔ wɔ nde ntepɔ ndjale kɛ Efrata edjinge nkonga ɛnɔnyi 25, Abrahama ɛnaka botshɔ djɛ nsese djɛ wɔnande Izakɛ, edjinge m’ɔkɔngɔ w’ɛnɔnyi enkina 60, ankana wande Esawo nya Djakɔbɔ wawotshɔka. (Heb. 6:15) Koko Abrahama atɛná tonkanola tɔnde wambokoma owila w’ekekete edjinge wambokita Looko lɔ daka. Koko, mpame kɛ nkɔmano kɛsɔ ayalaki la djokanelo djɛ ma ma nya Ontongi wɔnde. (Dja. 2:23) Ɔsɔ ngo osasa wongoyala la Abrahama winá wɔ ndongokfundɔ ko amboyewa ante djawo la bale ntshitshi djɛnde djeyakalaka ewila enkfumɔ wapɔ! (Ewa. 22:18) Olakanyelo wɔkɔnge w’owaso? Mbala imɔtshi topangɛna ekotshamelo k’alaka ankfumɔ wa Yehova má winá wɔsɔ. Koko, ntsha iso ndjala la bale ntshitshi ete ngo Abrahama, tokoka ndjala l’eshikikelo ente Yehova angotofuta má winá wɔsɔ edjinge lonkina efula l’andja wande wa bango wotolakande.—Mar. 10:29, 30. w23.08 24 ite. 14

Winá wɔ ndayalaka olangala, Nkfumi Uziya ayala l’okitshakitshɛ. Nde ekaka djɛ ‘ndjoka Ndjambe kɛ nsɔsɔlɔ wɔma.’ Nde awikaka ɛnɔnyi 68 edjinge Yehova ɔtshɔkɔlaka nsuke la lowiko lɔnde l’otondo. (2 Ɛk. 26:1-4) Uziya alongaka ewila efula w’antonyi, akembɛka angala la mpele djɛ Jerusalɛmɛ. (2 Ɛk. 26:6-15) Uziya ayalaka nsɔsɔlɔ l’osasa lá kɛnɛ kɛ Ndjambe ndokotshɛ́ djɛ nangha. (Los. 3:12, 13) Nkfumi Uziya ekelaka ngo nde ndeke loshimela anto kɛnɛ k’oyɛwɔ ladjɛ nangha. Kɛsɔ ndeke lonanghisá djɛ nde nkanela ante nde nkoka nangha kenkfumɔ k’ɔkɔpande? Lofu lɔmɔtshi, Uziya ingelaka lá tɛmpɛlɔ kɛ Yehova edjinge la lotamanyɛ lonkfumɔ asɛsaka djɛ ntshumba mbele lá etshumbelo, kɛ ankfumi yotayalaki la lotshungɔ lɔ nangha. (2 Ɛk. 26:16-18) Nkfundji k’Ekekete Azariya ahonaka ndɔpɛyɛ ikako, koko Uziya omalaka. Yɛnyi nde, Uziya atshitaka nkɔmano djeyalaki lande te Yehova l’ilá k’ɛnɔnyi efula edjinge awaka iluku yɛ olando w’anghɛnyi. (2 Ɛk. 26:19-21) Ɔsɔngo lowiko lɔnde otalekawɔ ndjala wɔlɔ otakindjɛnde ndjala l’okitshakitshɛ! w23.09 10 ite. 9-10

Kaanga m’ɔkɔngɔ wɔ nde nkoma Okristo wombokfutamá avuta, ɔpɔstɔlɔ Pɛtɛlɔ ayalaka ladjɛ nana la wɛdju wɛnde. Lá 36 D.D., Pɛtɛlɔ ayalaka winá wɔ Kɔrnɛyɛ ose Ongidji w’otope ntɛtɔ ndakfutama avuta má nyuma k’ekina, nkambo djɛsɔ djeyalaka ilembetelo yɛnyisá papoo ente ‘Ndjambe apasɔnɛ dongi’ la ente ase Ewila nkoka ndɔsa opiko l’otshumano w’Akristo. (Ele. 10:34, 44, 45) Masɔ Pɛtɛlɔ atateyɛka nsanga lɔwɔ l’ase Ewila, ekete kɛ ndotakoká nangha lotshinda. Koko, Akristo amɔtshi w’ase Juda wakanelaki ambɔ ase Juda l’ase Ewila wapakoke ndɛ esanga. Winá wɔ ase Juda amɔtshi wayalaki l’ikanyi yɛsɔ yaye l’Antiyɔshɛ, Pɛtɛlɔ atshikaka ndɛ esanga nya wananyɔ wande w’ase Ewila, nkoka ndjala ayalaka l’ɔpɔlu dj’ipa nde nkiyanyɛ Akristo w’ase Juda. Ɔpɔstɔlɔ Poolo ɛnaka eyalelo kɛ dongi mpe kɛ Pɛtɛlɔ kɛsɔ ko opangolaka lá ntondo k’anto. (Nga. 2:13, 14) Kaanga ndakalɔ nkfɔ l’ovunga wɔsɔ, Pɛtɛlɔ atapekɔ. w23.09 22 ite. 8

Ntsha wɛ ndashishima wɔlɔ wɔlɔ, okoka ndjisola wɛdju ɛmɔtshi, koko tɔlɛmbake. ‘Nkfumi alekɔ onto wɔlɔ,’ edjinge angokokotshɛ́ djɛ wɛ ndálɔngɔsɔla. (1 Pɛ. 2:3) Ɔpɔstɔlɔ Pɛtɛlɔ atoshikikɛ ante: ‘Ndjambe nyɔmɛlɛ . . . angoshiyɛ okfumbelo wɔnyo. Angonyokotshɛ́ djɛ nyo ntshikala ndii.’ Má bango Pɛtɛlɔ ayawokaki ante apɛlama djɛnde nyemala lá ntondo kɛ Wɔna Ndjambe. (Luka 5:8) Koko m’okotshɔ la ngandji kɛ Yehova la Yeso, Pɛtɛlɔ akindjɛka ndjala ombeki wɔ Kristo. Djɛko ndeke, Pɛtɛlɔ awolamaka djɛ ‘ndjingela lá Onkfumi wɔ lotshinda wɔ Nkfumi kɛso la Nseedji kɛso Yeso Kristo.’ (2 Pɛ. 1:11) Ɔsɔ ngo l’ofuto wɔlɔ! Ntsha wɛ ndjala l’entete kɛ ngete kɛ Pɛtɛlɔ la ndjawola nkfumbama me Yehova, mbɔ koko edjinge wɛ ongowa lofuto lɔ lowiko l’etshinda. Wɛ ‘ongokotshɛ okoma wɔ djawo djɛko ntepela ente ewiko kɛko.’—1 Pɛ. 1:9. w23.09 31 ite. 16-17

Tabɛrnaklɛ kayalaki ngo l’ɛtɔyi kɛ bandja, ntepela ente edjena k’ekekete kedjingamisá la lopango, kɛ ankfundji yananghaka elemo wɛwɔ. Etshumbelo k’ekekete kɛ konga kɛ yalambolaka elambo wɛ lotshumba kayalaki lá bandja djɛkɔ, esanga la dɔnga djɛ konga dj’ekekete djɛ washi djɛ ankfundji yasolaka ɛwɔ l’ekolo lá ntondo kɛ nangha olemo wɔwɔ w’ekina. (Epo. 30:17-20; 40:6-8) Lɔɔko kɛnɛ, wananyɔ wa Kristo w’ankfutami w’avuta wakamba la nkɔmano nkfumɔ lá bandja djɛl’eteyi kɛ tɛmpɛlɔ kɛ nyuma lanɛ lá looko. Dɔnga dj’ekekete djɛ washi djeyalaki lá tabɛrnaklɛ ole lá tɛmpɛlɔ ndaavungolaka iwɔ edjinge Akristo ankfumɔ nkambo mɔtshi djɛ djonyi, nkambo djɛkɔ nde ntshikala piyɔɔ lá demba la lá nyuma. Iya koko ‘oloyi w’ekekete w’anto,’ ɔtɛmɔlawɔ Yehova lampe? Ɔpɔstɔlɔ Djɔanɛ awɛnaka ‘wambemala lá ntondo kɛ yɛɛkɔ yɛ lowandji,’ ilekɔ́ nsakiso kɛ bandja djel’andja lanɛ lá looko, edjena ‘k’okambelawɔ [Ndjambe] olemo w’ekina otsho mbile lá tɛmpɛlɔ kɛnde.’ (Ndj. 7:9, 13-15) Ɔsɔngo oyɛso l’osasa lá wopo wɔ Ndjambe ndatɔpɛyɛ edjena kɛ ntshina efula lá nonghanyi kɛnde kɛ ɔtɛmwɛlɔ wɔ piyɔɔ! w23.10 28 ite. 15-16

Yopo imɔtshi yɛ Yehova ɔtɔpɛyɛnde nkfulu nde má lotshimbo lɔ tokokolo. (Iza. 32:1, 2) Djɛko ndeke shimela tokokolo ekiyano wɛko winá w’otshimbɛ wɔɔngɔ. Tokakandake djɛ ndjawola okotshɔ w’ɔkɔpɛyɛwɔ. Yehova nkoka nkokembɛ má lotshimbo lɔwɔ. Nkongi djɛso mbopikamá lá Bible nkoka lonkina ntolodjɛ kfu la lokembo. (Ɔrɔ. 4:3, 18, 19) Nkongi djɛso ntɔpɛyɛka lokembo lɔ nkfulumeyɛ ekakasano, mpoposanyɛ losango lɔ wɔlɔ, la mbɛmba edjito w’etshikitanyi l’otshumano. (1 Te. 1:3) Nkongi djɛkɔ mmɔ nkembɛka ɔpɔstɔlɔ Poolo. ‘Wonyameyɛki, ayalaka l’okakando, ɛnaki ndjolo edjinge wowokelaki lá nkando.’ Lowiko lɔnde lingelaka ole lá mbalaka. (2 Kɔ. 4:8-10) Poolo awaka wolo wɔ nkfulumeyɛ má mpika wiso tá nkongi djɛnde. (2 Kɔ. 4:16-18) Poolo apikaka wiso tá nkongi djɛnde djɛl’etsho weyaye djɛ lowiko l’etshinda l’olongo. Poolo atɔnɔlaki lá nkongi djɛnde, ko eposelo weyalisá nde, nde ‘atalɔngɔswamaki lofu la lofu.’ w23.10 15-16 ite. 14-17

Winá w’ɔlɔmbɛ, kɔɔtɔnɔla ntsha oyɛwɔ nde winá wɔ wɔlɔ le Yehova djɛ nde nkadjimola lɔlɔmbɔ lɔko. Iso nkoka nkanela ente tolekɔ la djonyi djɛ ndjɔndɔ kɛ lankeke lá ndɔmbɔ yɛso. Koko lá nsɔsɔlɔ, Yehova ndjewaka winá woleka wɔlɔ wɔ ntokotshɛ́. (Heb. 4:16) Ntsha topawisa kɛnɛ k’ɔlɔmbaso mbala kɛkɔ kɛmɔ, tokoka mfɛnyɛ ente Yehova ‘Apatɔndɔlisa.’ Koko la nsɔsɔlɔ, ndjɔndɔ kɛnde okokawɔ ndjala nde ‘Ape winá wɔsɔ.’ Ndjɔmbɔmba, wɔnanyɔ ɔmɔtshi alɔmbaki djɛ nde nsala má olando wɔnde. Koko olando wɔkɔ wotashilá. Ntsha Yehova ambɔkɔnɔla má nsese, Satana nkoka mfuna ante wɔnanyɔ okindjɛnde nkambela Yehova ngo ladjikɛnde Yehova osadjɛka. (Djɔ. 1:9-11; 2:4) Ladjiko djɛ lasɔ, Yehova amboshiyɛ́ nshikikɛ winá wɔ ndongosadjɛ elando enkfumɔ. (Iza. 33:24; Ndj. 21:3, 4) Koko tii winá wɔsɔ topakoke nkongela dj’iso nsala lá wopo wɔ nsese. Djɛko ndeke, kɛnɛ kɛ wɔnanyɔ okokande ndɔmba nde, djɛ Yehova ndɔpɛyɛ lokembo la vu djelá yimba djɛ nkfulumeyɛ olando wɔnde la djɛ nde nkindjɛ nkambela Yehova la nkɔmano nkfumɔ. w23.11 24 ite. 13

Samisɔnɛ ananghaka ovunga w’ekekete efula, koko nde atapekɔ. Nde ahonaka mbamba kɛ nkotshɛ odjito wɔ Ndjambe ndɔpɛyɛ te ase Filistiya. (Tos. 16:28-30) Samisɔnɛ awɔndaka Yehova ante: ‘Awola djɛ lemi nsɔmbɔla ase Filistiya.’ Ndjambe kɛ nsɔsɔlɔ akadjimolaka lɔwɔndɔ lɔ Samisɔnɛ ko okawoyɛka nkfulu kɛ ndɔpɛyɛ má nsese. Eposelo weyalisá nde, lá mbamba kɛsɔ Samisɔnɛ ayakaka ase Filistiya efula ndeka lɛdji lɔ ndayake ntondo. Kaanga Samisɔnɛ ndɛnyi ndjolo má eposelo wɛ nyɛtshi wemá evunga wɛnde, atatshika nangha ɛkɔpa kɛ Yehova. Kaanga ntsha tombonangha ovunga ɔmɔtshi la tomboyala la djonyi djɛ ikako, kana tombotshutshɛ edjito ɛmɔtshi, totapekɔke. Tovungɔ ente, Yehova apangotokadjɛ. (Yee. 103:8, 9) Ayale kaanga evunga wɛso, iso nkoka ndjala la ntshina lonkina le Yehova, ngo ngete Samisɔnɛ ndayale. w23.09 6 ite. 15-16

Okfumedji wɔko wongokokotshɛ́ djɛ wɛ ndjawolama me Yehova. Kɛsɔ kepasakisola ente Yehova nsasangaka winá w’opomanɛ l’ehemba kana l’ekakasano. Ndjambe osasangande nde la wɛ, ladjikɛnde okfulumeyɛ la nkɔmano. Alekɔ nkambo nkembɛ djɛ ndjewa ente winá w’okfulumeyɛso, tongosasangɛke Yehova! (Yee. 5:12) Tovungɔ ente Abrahama akfulumeyɛka ehemba ko kɛsɔ k’okotshɛ́ka djɛ nde ndjawolama me Ndjambe. Yehova ɔwɔsaka ete ngo ilongo yɛnde la ete ngo onto wɔ wɔlɔ. (Ewa. 15:6; Ɔrɔ. 4:13, 22) Nkambo djɛsɔ nkoka nanghema edjinge leso. Ndjambe apasasangaka laso m’ɔtɛ wɔ lɛdji l’olemo w’okambelaso kana m’ɔtɛ w’edjito w’okotshɛso. Nde nsasangaka laso ladjikɛnde tokfulumeyɛ la nkɔmano. Edjinge ayale ɛnɔnyi wɛkɔnge welekɔ́ laso, akambo watokomela, kana akoka waso, isankfumɔ nkoka nkfulumeyɛ. Okfulumeyɛ ohemba ɔmɔtshi winá wɔsɔ la nkɔmano nkfumɔ? Ntsha nghɔsɔ, mbɔ waka lokembo má ndjewa ente Ndjambe asasanga la wɛ. Ndjewa ente tawolama me Ndjambe nkoka ntɔpɛyɛ nkfulu. Nkambo djɛsɔ nkoka nkembɛ nkongi djɛso. w23.12 11 ite. 13-14

Okristo wɔ mpame ladjɛ ndjewa nsawola l’anto wɔlɔ. Mpame k’ewa nsawola l’anto wɔlɔ ndjekameyɛka la nsipisoyɛka wopo wɔ anto ankina oyawokawɔ la okanelawɔ. (Woo. 20:5) Winá w’owalande, nde nkoka ndjeka djɛ ndjokola djoyi djɛ onto onkina, nangha tosawo lá elongi la l’ɛwɔ. Opakoke ndjeka djɛ nangha nghɔsɔ ntsha opahetshɛ winá l’anto. Ntsha ongokambake mbala la mbala l’aparɛyi djɛ nsawola l’anto, ndjɔmbɔmba má mesajɛ, akoka wako wa nsawola l’anto lá elongi l’elongi nkoka nkitakita. Djɛko ndeke, honaka mbamba yɛ nsawolaka l’anto l’elongi l’elongi. (2 Dj. 12) Lonkina, mpame kembotshunda lá nyuma ladjɛ nshiyɛ ehomba wɛnde la wɛ nkfumbo kɛnde. (1 Ti. 5:8) Alekɔ wɔlɔ ndjeka nkoka mɔtshi ngokokotshɛ́ djɛ mba olemo. (Ele. 18:2, 3; 20:34; Ɛfɛ. 4:28) Yala la lokumu lɔ nkambi la l’onto w’oshiyɛka elemo w’owangande. Ntsha ombonangha nghɔsɔ, ongoyala l’akoka wa mba la mbomba olemo. w23.12 27 ite. 12-13

Winá wɔ Bible otepelande nkambo djɛ ‘lofu lɔ Yehova,’ ɔkɔpande nde ntepela lofu lɔ Yehova ndongotshita antonyi wande la ndongowikɛ enkambi wɛnde. L’etsho wɛ ntondo, Yehova alomboyɛka anto amɔtshi. (Iza. 13:1, 6; Ezk. 13:5; Sef. 1:8) L’etsho wɛso wɛnɛ, ‘lofu lɔ Yehova’ longowanga winá wɔ ewandji wɛ pɔlitikɛ yongotshita Babilɔnɛ dj’Ekekete tii lá mbandji kɛ Armagɛdɔ. Dj’iso ndowika lá ‘lofu’ lɔsɔ, iso ladjɛ ndalɔngɔsɔla má winá wɔsɔ. Yeso alakanyɛka ante totakomake ngo lá ndalɔngɔsɔla lá nkambo djɛ ‘ndjolo k’ekekete’ toko, koko ‘tokindjɛ ndalɔngɔsɔla lá nkambo djɛkɔ. (Mat. 24:21; Luka 12:40) Lá onkanda wɔnde wɔ ntondo wɔ ndafunela ase Tesalɔnikɛ má wolo wɔ nyuma k’ekina, ɔpɔstɔlɔ Poolo akambaka la ndjɔmbɔmba efula djɛ nkotshɛ́ Akristo dj’iwɔ nkindjɛ ndjala entshupa lá nkambo djɛ lofu l’ekekete lɔ dombo djɛ Yehova. Poolo ewaki ante lofu lɔ Yehova lopangoyɛ l’etsho wɛsɔ. (2 Te. 2:1-3) Koko, nde akembɛka wananyɔ djɛ ndalɔngɔsɔla lá nkambo djɛ lofu lɔkɔ etengo yongoyɛnde lomi, edjinge iso tokoka nkamba la dako djɛkɔ. w23.06 8 ite. 1-2

Lá 1970, wapikaka mvulu kɛmɔtshi k’ekekete kelekɔ́ l’etajɛ 60, lá Tokyo, lá Japon. Anto efula wayawopolaki wopo wɔ mvulu kɛsɔ yakoke ntshikala ndii lá ntondo k’efula k’atshikito wa looko wananghemaká lá ngando kɛsɔ. Iseke oyɛwɔ lampe? Ampiki wapikaka mvulu kɛsɔ wɔlɔ efula la wananghaka djɛ kɛkɔ ntshikitaka lá winá w’onanghema atshikito wa looko dj’ipa nkfɔ. Akristo walekɔ etengo mvulu k’ekekete k’etajɛ kɛsɔ. Lá lɛdji lɔkɔnge? Okristo ladjɛ ndjala l’ikanyi yɛdje l’antenyɛ ntshikala ndii la ndjala entshupa djɛ ndjekesanela l’akambo. Nde ladjɛ mpikama ndii edjinge ndashikikɛ djɛ nɛmɛyɛ winá enkfumɔ ɛlɛmbɛ wɛ Yehova. Nde ndjalaka ‘entshupa djɛ nɛmɛyɛ’ edjinge apakakolaka ɛlɛmbɛ wɛ Yehova. L’onkoko onkina, nde ladjɛ ndjala ‘l’ekanedji kɛ wɔlɔ,’ kana ndjala entshupa djɛ ntshikitanyɛ ikanyi yɛnde ntsha ɔlɔmbamawɔ nde nghɔsɔ. (Dja. 3:17) Okristo wombeka djɛ ndjala l’ikanyi yɛdje nanghaka la wolo dj’ipa ndjala wayi wolo efula kana yawolawola. w23.07 14 ite. 1-2

Yeso ayalaka ladjɛ mpikama la ntondo k’ehemba wɛ Satana Djabolo, ndjila ole kɛnɛ kɛ ndooshimela dj’ipa nde ndjala la nkɔmano te Ndjambe. (Mat. 4:1-11) Satana ananghaka lá wolo onkfumɔ djɛ nkfɛyɛ Yeso lá mpekanto dj’ipa nde ndjala l’akoka wa mfuta oshinga wɔ mbendo. L’ilá k’olemo wɔnde lanɛ lá looko, Yeso akfulumeyɛka ehemba efula. Antonyi wande wɔwɛnyɛka ndjolo la wowanaki djɛ ndooyaka. (Luka 4:28, 29; 13:31) Nde ayalaka ladjɛ nkfulumeyɛ evunga w’ambeki wande. (Mar. 9:33, 34) Winá wɔ yolomboyɛ, wɔwɛnyɛka ndjolo, la wonanghaka efula. Manyi, avɔka nyɔyi kɛ nsɔnyi la kɛ ndjolo efula. (Heb. 12:1-3) Nde ayalaka ladjɛ nkfulumeyɛ etenyi k’ekomo k’ohemba wɔnde ngo má wolo wɔnde nyɔmɛlɛ, ipa l’elamelo kɛ Yehova. (Mat. 27:46) Ndjokamaka papoo ente Yeso ɛnaka ndjolo efula djɛ nde mfuta oshinga wɔ mbendo. Topakoke ndjala la ngandji k’efula te Yeso winá w’ɔtɔnɔlaso lá wopo wɔ ndoyalambola la ndayale entshupa djɛ ndjawola akambo ankfumɔ wasɔ lá wapɔ waso? w24.01 10-11 ite. 7-9

Bale ntshitshi ntokotshɛ́ka lá djokanelo djɛso l’anto ankina. Djengotokotshɛ́ke djɛ ndjekameyɛ la nkɔmɛ nkfumɔ winá wɔ anto ankina otepelawɔ. (Dja. 1:19) Bale ntshitshi ntokotshɛ́ka lonkina djɛ ndjala vu l’anto ankina. Djengotolamake dj’ipa nangha akambo lopopa lopopa la dj’ipa mposɛ itepela imɔtshi yɛ nyɛtshi winá w’otshimbaso yimba. Edjinge ntsha tolekɔ la bale ntshitshi, topangomala lankeke winá w’onto ɔmɔtshi otokiyanyɛnde. L’edjena kɛ nsɔmbɔla, ‘tongokindjɛ nkfulumeyaná la nyimeyaná l’oloko ɔmɔ.’ (Kɔl. 3:12, 13) Bale ntshitshi nkoka ntokotshɛ́ lonkina djɛ ndɔsa akano wa wɔlɔ. L’edjena kɛ nanghaka akambo lopopa lopopa ipa la nkanela, tɔngɔsaka winá djɛ nangha ehonelo la djɛ nsɔna nkano djɛ wɔlɔ dj’okokaso ndɔsa. Ndjɔmbɔmba, ntsha tohona olemo, tokoka ntshindama djɛ ndjawola olemo onkfumɔ wɛnaso. Koko, ntsha tolekɔ la bale ntshitshi, tɔngɔsa winá djɛ ntɔnɔla lá eposelo wekoka ndjala la olemo wɔkɔ tá nkfumbo kɛso la lonyuma lɔso. Má ndjala la bale ntshitshi, tokoka ndjewɔ djɛ ndɔsa nkano djɛ nyɛtshi. w23.08 22 ite. 8-9

Ntsha oka ente ɔmbɔlɛmba ladjikɛnde onana la mposɛ yɛ demba, ntɔnɔla lá daka djɛ ngalake Yehova winá wɔ ngoyalambola le nde, ngokembɛ nkano djɛko djɛ nana l’ehemba. Ngete mo? Winá w’oyalambolɛ le Yehova, wɛ ongolatona nghɔmɛlɛ kɛko. Kɛsɔ nsakisolaka ente wɛ ongotepela ente lako, tá mposɛ la ekoma wɛko wepasasangɛ Yehova. (Mat. 16:24) Djɛko ndeke, winá w’opomanɛ l’ohemba, opalekɔ la djonyi djɛ ndáwopola kɛnɛ k’oyɛ ladjɛ nangha. Omboshiyɛká ndɔsa nkano ntondo lá kɛnɛ kɛ nghongonangha, ntepela ente ntshikala la nkɔmano le Yehova. Ongopikama ngo ndii lá nkano djɛko djɛ nsasangɛ Yehova. Lá lɛdji lɔsɔ ongoyala ete ngo Djɔbɔ. Kaanga ndapomana l’ekakasano wɛ wolo efula, atepelaka l’oloko wolo onkfumɔ ante: ‘Lemi mpatshikaki nkɔmano djɛmi!’—Djɔ. 27:5. w24.03 9 ite. 6-7

Yehova, ‘Ndjambe kɛ ngandji,’ alekɔ esanga laso! (2 Kɔ. 13:11) Nde ndjilaka onto l’onto wɔ l’anteyi kɛso yimba. Tolekɔ l’eshikikelo ente iso ‘ndjingama la ngandji kɛnde kɛ nkɔmano.’ (Yee. 32:10) Winá wɔ sotaleke ntɔnɔla lá wopo w’ɔtɛnyɛnde ngandji kɛnde, ndeke ndongotalekaka nkoma onto wɔ nsɔsɔlɔ leso la songoleka ndáwoka entshupa iso lande. Iso nkoka ndɔlɔmba ipa la ndjoka wɔma la ndoshimela wopo w’oyɛso la djonyi djɛ ngandji kɛnde k’efula. Iso nkoka ndoshimela wɛma wɛso enkfumɔ, l’eshikikelo ente nde atoka edjinge alekɔ entshupa djɛ ntokotshɛ́. (Yee. 145:19) Ngo ngete ɔsɛmɛlakaso tá iyɛ lofu lɔ ntshitshi, iso nsɛmɛlaka tá ngandji kɛ Yehova. Kaanga ngandji kɛ Yehova oyɛwɔ nkfulu efula, kelekɔ́ lonkina ekekete. Djɛko ndeke sasanga ladjikɛnde Yehova nkɔkɔpaka. Edjinge nyontshɔ isankfumɔ tokadjimole lá ngandji kɛnde má ntepela ente: ‘Lemi nkɔpaka Yehova’!—Yee. 116:1. w24.01 31 ite. 19-20

Yeso ananghaka akambo efula ndeka nshimela anto toko ante djiina djɛ Ndjambe nde Yehova. Ase Juda wa Yeso ndalakanyɛka wewaki djiina djɛ Ndjambe. Koko Yeso ndeke loyalisá ‘ɛtɔyi k’onto . . . w’otopakisolisá wopo w’oyɛnde.’ (Dj. 1:17, 18) Ndjɔmbɔmba, Afunelo wa Hebero wɛnyɛ ambɔ Yehova alekɔ kanga nkɛtshi la kanga djadji. (Epo. 34:5-7) Yeso apakisolaka nkambo djɛ nsɔsɔlɔ djɛsɔ lá wopo wɔ papoo winá wɔ ndapakisolaka ndjɔmbɔmba kɛ wɔna w’ovungisá la isɛkɛnde. Winá w’owalaso nkambo djɛ papa ketangelisá wɔnande woyapɛlisá ‘winá wɔ ndayalaka ngo m’otale,’ alotaka djɛ ntopomana nya nde, ɔtɔka mpidji edjinge owimeyɛka lá kenfumɔ kɛ ndananghe, tosipisoyɛ wɔlɔ wɔlɔ ente Yehova alekɔ kanga nkɛtshi la kanga djandji. (Luka 15:11-32) Yeso ɛnyɛka lá ntshandjawala wopo wolekɔ́ Isɛkɛnde. w24.02 10 ite. 8-9

Yehova ntshitshimɛka la nkembɛka anto walekɔ́ lá ndjolo. Wopo wɔkɔnge w’okokaso ndjokola Yehova má ndjoka anto ankina djandji la má ndapɛyɛka lokembo? Yopo imɔtshi nde, nkona l’oloko wɔso wekeka wakoka ntokotshɛ́ djɛ ndjoka anto ankina ngandji la ndakembɛ. Ete ngo wekeka wakɔnge? Kɛkɔnge kekoka ntokotshɛ́ djɛ nkindjɛ ndjala la ngandji k’oyɛso la djonyi djɛ ‘nkindjɛ nkembɛ anto ankina’ lofu la lofu? (1 Te. 4:18) Iso ladjɛ nkona wekeka wanɛ: djandji, ngandji k’onto la wɔnanyɔ la oloko wɔlɔ. (Kɔl. 3:12; 1 Pɛ. 3:8) Wopo wɔkɔnge wekeka wasɔ okokawɔ ntokotshɛ́? Winá wɔ djandji la wekeka ankina wafɛna okomawɔ etenyi kɛmɔtshi kɛ lonto lɔso, tongoyalaka la mposɛ kɛ nkembɛ waalekɔ́ lá deko djɛ ndjolo. Ete ngo Yeso ndatepela, ‘má efula k’akambo walekɔ́ l’oloko ndeke ɔlɔmɔ otepelakande. Onto wɔ wɔlɔ mposɛka akambo wa wɔlɔ má bomba djɛnde djɛ akambo wa wɔlɔ.’ (Mat. 12:34, 35) Nkembɛ wananyɔ l’ankaana walekɔ́ la djonyi djɛ lokembo alekɔ nsɔsɔlɔ yopo yɛ wɔlɔ efula yɛ ndawɛnyɛ ngandji kɛso. w23.11 10 ite. 10-11

Ntsha tɔkɔpa nsipisoyɛ prɔfɛsi yɛ Bible, iso ladjɛ mpona okotshɔ. Kolenda ndjɔmbɔmba kɛnɛ. Kɔsa djɛ otawembola idjena imɔtshi yɛ ngopalembetela wɔlɔ koko ilongo yetatshu lawɛ alembetela idjena yɛkɔ wɔlɔ. Nde ewa wɔlɔ edjena kɔɔ k’oyɛnyo la tá edjena kɛ mboka la mboka ɔtɔlande. Ape l’ehamo ongoyala l’osasa lá wopo wɔ ilongo yɛko ndawolaki ndjɛ la wɛ! Lá wopo wɔk’ɔmɔ, Yehova ndjewaka etsho weyaye wɔlɔ wɔlɔ edjinge nde ndjewaka kɛnɛ ketokongela lá ntondo. Djɛkondeke djɛ ndjoka prɔfɛsi yɛ Bible, iso ladjɛ ndɔmba Yehova okotshɔ l’okitshakitshɛ onkfumɔ. (Dan. 2:28; 2 Pɛ. 1:19, 20) Ngo ngete ombotshi onkfumɔ wɔ wɔlɔ, Yehova nkɔpaka wana wande ndjala l’etsho weyaye w’osasa. (Jɛr. 29:11) Koko lá lɛdji lotshikitanyi l’ambotshi wa wana w’anto, Yehova nkoka ntepela akambo wangonanghemá l’etsho weyaye lá lɛdji lɔ djɔ. Nde afunaka prɔfɛsi l’Otepela wɔnde dj’iso ndjewa akambo wa djonyi wanghonanghemá l’etsho weyaye lá ntondo k’iwɔ nanghema.—Iza. 46:10. w23.08 8 ite. 3-4