Wɛ nkoka ndjala la vu lá deko djɛ ndjolo

1. ‘Vu djɛ Ndjambe,’ osakisolawɔ nge, ko wopo wɔkɔnge w’owaso wapɔ má ndjala la vu djɛkɔ? (Filipɛ 4:6, 7)

YOPO yɛ vu imɔtshi ilekɔ yɛ andja wanɛ yopewaka. Oyɛwɔnde ‘vu djɛ Ndjambe,’ vu djeyɛka má ndjewa ente tolekɔ la djokanelo djɛ wɔlɔ la Papa kɛso kel’olongo. Winá w’oyɛso la vu djɛ Ndjambe iso ndawokaka ente tolekɔ l’elamelo. (Wala Filipɛ 4:6, 7.) Iso ndjalaka la djokanelo djɛ ma ma l’anto ankina w’ɔkɔpa. Edjinge iso ndjalaka la djokanelo djɛ wɔlɔ la ‘Ndjambe kɛ vu.’ (1 Te. 5:23) Winá w’ewaso Papa kɛso kel’olongo, w’oyawɛkɛso tende, la w’ɔlɛmɛyɛso, vu djɛ Ndjambe nkoka ntshitshimɛ eloko wɛso welekɔ l’okiyano winá w’opomanaso l’ekakasano wɛ wolo.

2. Lamo okokaso ndashikikɛ ente tokoka ndjala la vu djɛ Ndjambe?

² Onto nkoka nsɔsɔlɔ ndjala la vu djɛ Ndjambe winá w’opomanande la ndjolo y’etengo opela, mbalaka yeposa má nkete djetongamisa, evungusano welá mbandja, kana lɔnyɔkɔ? Ekakasano wɛ nkekete wɛsɔ nkoka ntɔpɛyɛ wɔma. Koko, Yeso alakaka ambeki wande ante: ‘Eloko wɛnyo wetakiyanake edjinge wetalɛmbake la wɔma.’ (Dj. 14:27) Mpeyi nde, wananyɔ l’ankaana wangokilikake dako djɛ Yeso djɛsɔ. M’okotshɔ wɔ Yehova, iwɔ ndjalaka l’akoka wa ndjala la vu winá w’opomanawɔ l’ekakasano wɛ wolo wɛsɔ.

WOPO WƆ NDJALA LA VU LÁ DEKO DJ’OPELA ƆMƆTSHI

3. Wopo wɔkɔnge opela okokawɔ ntotshutsheyɛ vu djɛso?

³ Opela nkoka ntshikitanyɛ lowiko lɔso mbala kɛkɔ kɛmɔ. Tokoshishima eposelo weyalisá la opela wɔ COVID-19 le anto efula. Alapɔlɔ ɔmɔtshi wɛnyɛ ambɔ, anto ndekana l’antanteyi wayalaka l’okakasano wɔ mba ilɔ lá winá w’opela wɔnɛ. Opela wótshanghanisá wɔsɔ, wofudjɛka ekiyano, ɔlɛmbɛlɔ, ɔnwɛlɔ wɔ waná, wɔ tokaya, ekakasano welá nkfumbo, edjinge efula wahonaka ndayaka. Ntsha opela ɔmɔtshi womboposa lá mbandja kɛnyo, wopo wɔkɔnge w’okokɛ nkitshakitshɛ okiyano edjinge mba wapɔ má vu djɛ Ndjambe?

4. Wopo wɔkɔnge ndjewa prɔfɛsi kɛ Yeso kelendana l’etsho w’ekomo otoyakalawɔ vu?

⁴ Yeso ewoyɛka ante l’etsho w’ekomo, epela, kana elando wetshanghana wengoyala ‘lá djena la djena.’ (Luka 21:11) Wopo wɔkɔnge ndjewa akambo wasɔ okokawɔ ntoyakala vu? Epela wepatokamoyɛ. Iso nsipisoyɛka ente Yeso atepelaka ante akambo wasɔ wangonanghema. Djɛkondeke, tolekɔ l’elonga kɛ nkilika dako djɛ Yeso ndapɛyɛ anto wangowika l’etsho w’ekomo ante: ‘Nyotokake wɔma.’​—Mat. 24:6.

5. a) Lá nkilika Filipɛ 4:8, 9, kɛkɔnge k’oyɛso ladjɛ ndɔmba winá w’opomanaso l’opela? b) Wopo wɔkɔnge ndjekameyɛ odio wɔ badji djɛ Bible okokawɔ ntokotshɛ́?

⁵ Opela nkoka ntokiyanyɛ edjinge ntokɛ wɔma efula. Kɛsɔ ndeke lokomelisá nkaana kɛso kɛmɔtshi ketawɔ Desi.b M’ɔkɔngɔ wɔ nyɔmpame kɛnde la wɔnɛ nyɔmpame kɛnde, la dɔktɛrɛ djɛnde mvɔ l’olando wɔ COVID-19, nde ayalaka la wɔma ante atɔsa olando ko ndosambeyɛ nyɔ kɛnde kembotshunda. M’ɔtɛ w’opela wɔsɔ, nde ayalaki la wɔma wɔ ndotshutshɛ olemo wɔnde, djɛkondeke nde ayawopolaki wopo wɔ ndongowa mfalanga yɛ nsombaka nkete djɛ ndɛ la mfutela mvulu. Ekiyano wɛsɔ wetateyɛka ndotshimbɛ wɔɔngɔ la ndotshutshɛyɛ ilɔ. Koko Desi akalɔka mba vu djɛnde. Ngetemo? Nde alɔmbaka Yehova djɛ ndokotshɛ́ djɛ nde mba vu la ndjala la tokanyi tɔ wɔlɔ. (Wala Filipɛ 4:8, 9.) Nde ekameyɛki ‘otepela’ wɔ Yehova má ndjekameyɛka odio wɔ badji djɛ Bible. Nde ntepelaka ante: “Djoyi djɛ vu dj’antangi nkitshakitshɛka ekiyano wɛmi la djemvungolaka ente Yehova ndakiyanyɛka lá nkambo djɛmi.”​—Yee. 94:19.

6. Wopo wɔkɔnge wekelo w’onto nyɔmɛlɛ la nsanghanyɛ yel’otshumano okokotshɛ́wɔ?

⁶ Lá winá w’otatshanghana opela, topayalaka winá enkfumɔ l’akoka wa nangha kenkfumɔ k’isananghaka ntondo, koko totawolake djɛ nkambo djɛsɔ ntoshimba djɛ nanghaka wekelo w’onto nyɔmɛlɛ kana ndjingelaka nsanghanyɛ. Ndjɔmbɔmba y’anto w’otepelawɔ l’enkanda la lá avideo waso ingokovungola ente wananyɔ l’ankaana wangokindjɛke ntshikala la nkɔmano kaanga winá w’opomanawɔ l’ekakasano etengo wɛsɔ. (1 Pɛ. 5:9) Nsanghanyɛ ingokokotshɛ djɛ wɛ ndodjɛ yimba yɛko la tokanyi tokembɛ tɔ má Afunelo. Ingɔkɔpɛyɛ mbamba kɛ wɛ nkembɛ anto ankina la kɛ wɛ nghɔmɛlɛ mba lokembo. (Ɔrɔ. 1:11, 12) Winá w’ɔtɔnɔlɛ lá wopo wɔ Yehova ndasuke enkambi wɛnde winá w’iyayalaka l’elando, la wɔma, kana w’iyoyawokaka olengedji, djawo djɛko ngokemba edjinge ongoyala l’eshikikelo ente nde angokosuka edjinge wɛ.

7. Olakanyelo wɔkɔnge w’okokɛ mba má ndjɔmbɔmba k’ɔpɔstɔlɔ Djɔanɛ?

⁷ Nangha la wolo djɛ nsawolaka nya wananyɔ l’ankaana yɛko. Olando wotatshanghana nkoka ntɔlɔmba dj’iso ndjipama lá amvulu la ndawangoyɛ l’anto ankina kaanga lá winá woyɛso esanga la winaso antɛmɔdji. Lá mbamba etengo yɛsɔ, okoka ndawoka etengo ɔpɔstɔlɔ Djɔanɛ ndoke. Nde akombolaka nyɛnana elongi l’elongi nya ilongo yɛnde Gayusu. (3 Dj. 13, 14) Koko, Djɔanɛ asipisoyɛka ante, lá mbamba kɛmɔtshi atakoka ndjala l’akoka wa nyɛna Gayusu. Djɛkondeke Djɔanɛ ananghaka kɛnɛ kɛ ndakoke nangha, nde afunelaka Gayusu onkanda. Ntsha opalekɔ l’akoka wa mbembola wananyɔ wako elongi l’elongi, nangha la wolo djɛ nsawola nyawɔ má telephonɛ, má apɛlɛ video, kana má mesajɛ. Winá w’okindjɛ nsawola nya wananyɔ wako w’Akristo, opangoyawoka olengedji la ongolama vu djɛko. Sawola nya tokokolo, pekapeka ntsha oyakiyanyɛ efula edjinge aawola ekeketshelo kɛwɔ kɛ la ngandji.​—Iza. 32:1, 2.

WOPO WƆ NDJALA LA VU NTSHA OMBOPOMANA LA MBALAKA KƐMƆTSHI

8. Wopo wɔkɔnge mbalaka yeyɛ má nkete djetongamisá okokawɔ nkotshutsheyɛ vu djɛko?

⁸ Ntsha ombopomanaká la elola, ntshikito djɛ looko kana iyɛ, okoka ndjala l’okiyano w’efula kaanga ilá efula m’ɔkɔngɔ wɔ mbalaka kɛkɔ. Ntsha ovusɛka onto wɔko ɔmɔtshi kana nkete djɛko ntshitanaka, okoka ndjala la yɛnyi y’efula, nsamba nkongi, kana kaanga nyomala. Ndawoka nghɔsɔ apasakisola ante ɔngɔkɔpake nkete djelá demba efula kana ombosamba djawo. Opomanaka l’okakasano wɔ wolo, edjinge anto amɔtshi ndjewaka ambɔ okoka ndjala la tokanyi tɔ nyɛtshi. (Djɔ. 1:11) Koko, kaanga lá ntondo k’ekakasano wɛ wolo efula wɛ nkoka ndjala la vu. Lá wopo wɔkɔnge?

9. Kɛkɔnge kɛ Yeso ndatepela lá nkambo dj’ambalaka yeposá má nkete djetongamisá?

⁹ Vungɔka kɛnɛ kɛ Yeso ndewoyɛ. Lá lɛdji lotshikitanyi l’anto amɔtshi welá andja wanɛ wápakanelaka ambɔ wakoka mpomana l’ambalaka, iso ndjewaka ente akambo wa nghɔsɔ wangoleka mfula l’etsho wɛso wɛnɛ, la tokoka mpomana l’imɔtshi. Yeso ashimelaka ambeki wande ante ‘atshikito wa looko wa nkekete’ la mbalaka inkina ingonanghema lá ntondo k’ekomo ndjɛ. (Luka 21:11) Nde ewoyɛka lonkina ante ‘mpendo k’ɛlɛmbɛ kengofula,’ kɛsɔ ndeke lonanghema l’etsho wɛso wɛnɛ; ndjɔmbɔmba tɛna oyakanelo, wayi wa lopango, la wayi wa terorismɛ. (Mat. 24:12) Yeso atatepela kaanga ndambo daambi ante ekakasano wɛsɔ wengokomela ngo anto wa Yehova ndombokadjɛ. Lá nsɔsɔlɔ enkambi wɛ Yehova efula wɛ nkɔmano wambopomana la ambalaka yɛ nghɔsɔ. (Iza. 57:1; 2 Kɔ. 11:25) Yehova apatolame lá yopo yɛ nsese má ambalaka inkfumɔ, koko nde ntɔpɛyɛka kɛnɛ k’oyɛso la djonyi dj’ipa ndakiyanyɛ amboleka la ntshikala vu.

10. Lamo ndalɔngɔsɔla má winá wɔsɔ lá nkambo djɛ mbalaka oyewɔ ilembetelo yɛ djawo? (Woongo 22:3)

¹⁰ Akoka ndjala wɔdju iso ntshikala vu winá w’opomanaso la mbalaka ntsha tɔlɔngɔsɔlaka ntondo wopo wɔ songelola winá wɔ nkambo djɛsɔ otokomelawɔ. Ndalɔngɔsɔla nghɔsɔ, nyɛnyɛka ente topalekɔ la djawo te Yehova? Lako. Lá nsɔsɔlɔ, ndalɔngɔsɔla lá ntondo kɛ mbalaka nyɛnyɛka ente tolekɔ la djawo t’akoka walekɔ lande wa ntolama. Lá wopo wɔkɔnge? Otepela wɔ Ndjambe ntolakaka djɛ ndalɔngɔsɔla lá ntondo kɛ mbalaka yekoka ntokomela. (Wala Woongo 22:3.) Edjinge má loshimbo lɔ waa periodikɛ, nsanghanyɛ y’otshumano, la ndjewo yɔtɔpɛyɛwɔ la winá wɛdje, olonghanyelo wɔ Ndjambe ntolakaka mbala la mbala djɛ ndalɔngɔsɔla lá ntondo kɛ mbalaka.c Iso ndjilelaka Yehova oloko? Ntsha oyɛwɔnde nghɔsɔ, mbɔ tongokilika alako wasɔ má winá wɔsɔ, lá ntondo kɛ mbalaka mposa.

11. Olakanyelo wɔkɔnge wɔ ngombowa má ndjɔmbɔmba kɛ Margaret?

¹¹ Kolenda ndjɔmbɔmba kɛ nkaana kɛmɔtshi ketawɔ Margaret. Ewandji wɛ mbandja w’oshimelaka djɛ nde ladjɛ ntshika mvulu kɛnde ladjikɛnde iyɛ imbotombɔ l’owila wɔwɔ. Ladjikɛnde anto efula wayɛka ndolota ngo mbala kɛkɔ kɛmɔ, etuka welolaka lá mboka ko wedjipaka mboka. Lompopo lotshitanaka la edjinga wɛ ntshulu, ko Margaret ayawokaka etengo onto welekɔ́ l’edjena kɛ nkenya l’otuka wɔnde. Koko, nde awikaka ladjikɛnde ayalɔngɔsɔlaka lá ntondo. Lá impampata yɛnde yɛ l’ɛwɔ, nde ayalaka la kartɛ kɛ ndotakilikaka djɛ ndjewa mboka k’okokande mpeta. Nde ewaki edjena kɛ ndakoke ntshɔ djɛ mba okotshɔ ipa l’okakasano. Mpeyi má wopo wɔ ndoyalɔngɔsɔla, Margaret awikaka má mbalaka kɛsɔ.

12. Lamo oyɛso ladjɛ nkilika ɛlɔndjɛlɔ k’ɔtɔpɛyɛwɔ djɛ ndalama?

¹² Djɛ ntolama la djɛ ndjila vu, ewandji wɛ mbandja nkoka ntɔlɔmba djɛ nɛmɛyɛ kuvrɛfe, ndota m’owila, kana nangha akambo ankina. Anto amɔtshi ndjalaka lɔnghɔnyu djɛ nɛmɛyɛ kana nanghaka akambo ngo lɔko lomi ladjikɛnde wapakɔpɛ nshika nkete dj’okotshɛwɔ. Akristo onanghakawɔ akambo ngetemo? Bible ntoshimelaka ante: ‘M’ɔtɛ wɔ Nkfumi, nyoyakitshakitshɛ l’anse kɛ enkfumi enkfumɔ wɛ wana w’anto, ayale nkfum’ekanga etengo oyɛnde lá djiko, kana wa nguvɛrnɛrɛ etengo oyɛwɔ atomami.’ (1 Pɛ. 2:13, 14) Olonghanyelo wɔ Ndjambe wɔngɔtɔpɛyɛke lonkina ɛlɔndjɛlɔ djɛ ntolama. Wongotovungolake mbala la mbala dj’iso mpɛyɛ tokokolo numelo yɛso yɛ telefɔnɛ yekamba laso etsho wɛnɛ dj’iwɔ ndewa ntohona winá wɔ woposa nkambo dj’isasimoyɛ. Wɛ omboshiyɛka nangha nkambo djɛsɔ? Iso nkoka lonkina mba ɛlɔndjɛlɔ kelendana la edjena kɛ ndalama, djena djɛ ndota, la wopo wɔ mba okotshɔ kana wɔ nkotshɛ́ anto ankina. Ntsha topalɛmɛyɛ tokoka ndjila lowiko lɔso la lɔ tokokolo lá mbalaka. Tovungɔ ente ampame yɛ nkɔmano yɛsɔ wakindjɛ ntolama. (Heb. 13:17) Margaret ntepelaka ante: “Ndekɔ l’eshikikelo ente wopo wɔ mankilika ɛlɔndjelɔ kɛ tokokolo la k’olonghanyelo ndeke lowikisa lowiko lɔmi.”

13. Kɛkɔnge kɛpɛyisa Akristo efula wasɛkwisa má djena djɛwɔ osasa la vu?

¹³ Wananyɔ l’ankaana efula yɛsɛkwisa má ambandja yɛwɔ, m’ɔtɛ w’ambalaka, ambandji, kana evungusano w’ewila, wananghaka la wolo djɛ ndjekesanela la djena djɛwɔ djɛ bango la ndapɛyɛ efula l’elemo wɛ teokrasi. Ngo ngete Akristo wa l’ɛtɛndɔ kɛ ntondo watshanghanisá m’ɔtɛ wɔ lɔnyɔkɔ, iwɔ nkindjɛka ‘mpoposanyɛ losango lɔ wɔlɔ l’andja w’otondo.’ (Ele. 8:4) Mpoposanyɛ ndaakotshɛ́ká dj’iwɔ ndjila yimba yɛwɔ t’Onkfumi wɔ Ndjambe koko ape t’ekakasano wepomana lawɔ. Eposelo weyalaka la nkambo djɛsɔ nde, iwɔ namaka osasa wɔwɔ la vu djɛwɔ.

WOPO WƆ NDJALA LA VU WINÁ W’ƆTƐNYƐWƆ NDJOLO

14. Wopo wɔkɔnge lɔnyɔkɔ ototshutsheyɛnde vu djɛso?

¹⁴ Winá w’ɔtɛnyɛwɔ ndjolo iso nkoka ntshutshɛ nkete efula djetokotshɛka djɛ nama vu djɛso. Iso ndjalaka l’osasa winá wopomanaso esanga, wópoposanyɛso ipa l’okakasano edjinge w’onanghaso elemo wɛso wɛ lofu la lofu, ipa la wɔma wɔ mvundama. Ntsha topalekɔ lonkina l’akoka wa nangha akambo wasɔ, tokoka ndakiyanyɛ la ndjala la wɔma lá kɛnɛ kengotokomela. Lako nyɛtshi ndawoka nghɔsɔ. Koko, iso ladjɛ mbadjɛ. Yeso ɛnyɛka ante lɔnyɔkɔ nkoka ntshinda enkambi wɛnde djɛ ntakana. (Dj. 16:1, 2) Ko wopo wɔkɔnge w’okokaso nama vu djɛso winá w’ɔtɛnyɛwɔ ndjolo?

15. Lamo sopakoke ndjoka lɔnyɔkɔ wɔma? (Djɔanɛ 15:20; 16:33)

¹⁵ Otepela wɔ Ndjambe ntoshimelaka ante: ‘Anto ankfumɔ wakombola mbika imama la la Ndjambe esanga la Kristo Yeso wangawɛnyɛ ndjolo edjinge iwɔ.’ (2 Ti. 3:12) Wɔnanyɔ wetawɔ Andrei ayalaka l’okakasano djɛ ndjawola nkambo djɛsɔ m’ɔkɔngɔ w’iwɔ nshimba olemo wɔso l’owila wɔwɔ. Nde ayawopolaka ante: ‘Ewakɛ wɛ Yehova walekɔ efula lanɛ. Wopo wɔkɔnge ewandji wɛ lɛɛta okokawɔ ntovunda isankfumɔ?’ Koko l’edjena k’ikanyi yɛsɔ ndjakala Andrei vu, yewangaka ndokiyanyɛ. Wananyɔ ankina watshikaka nkambo djɛsɔ l’ɛwɔ wɛ Yehova, ipa la mpona ndawawoyɛ iyɔmɛlɛ ambɔ wapangovundama. Iwɔ wawolaka ambɔ iwɔ nkoka mvundama, koko watayakiyanyɛki efula etengo Andrei. Djɛkondeke nde ɔsaka nkano djɛ ndjawola ikanyi yɛwɔ, la ndawɛkɛ te Ndjambe. Atahetá ilá nde awaka vu, edjinge winá wɔsɔ nde amboyala l’osasa kaanga okakasano wɔsɔ yotashile. Nkambo djɛsɔ nkokaka ndjala nsɔsɔlɔ edjinge leso. Winá wɔ Yeso ndatoshimela ante tongopomana l’onanyelo, nde atoshikikɛka lonkina ante tokoka ntshikala la nkɔmano.​—Wala Djɔanɛ 15:20; 16:33.

16. Ɛlɔndjɛlɔ kɛkɔnge k’oyɛso la djonyi djɛ nɛmɛyɛ winá w’opomanaso la lɔnyɔkɔ?

¹⁶ Ntsha wamboshimba olemo wɔso kana wambotilela ɛlɛmbɛ ɛmɔtshi wɛ wolo, tokoka mba ɛlɔndjɛlɔ má Betɛlɛ kana me tokokolo. Iwɔ wangotolama, wangoyashikikɛ ntsha tokindjɛ mba nkete djɛ ndɛ djelá nyuma, la wangotokotshɛ dj’iso nkindjɛ mpoposanyɛ lá lɛdji lokoka. Nangha la wolo djɛ nɛmɛyɛ ɛlɔndjɛlɔ k’ɔkɔpɛyɛwɔ kaanga ntsha opasipisoyɛ lamo iyɔmbɔkɔpɛyɛ. (Dja. 3:17) Lonkina, tisolake akambo walendana la wananyɔ l’ankaana yɛso kana walendana l’akambo waheta l’otshumano le anto wapalekɔ la lotshungɔ lɔ ndjewa.​—Los. 3:7.

17. Ngo ngete apɔstɔlɔ wa l’ɛtɛndɔ kɛ ntondo, kɛkɔnge kɛ somboyashikikɛ djɛ nangha?

¹⁷ Elonga kɛ ntondo kɛ Satana onanyɛnde enkambi wɛ Ndjambe nde ‘wakamba olemo wɔ mpoposanyɛ akambo walendana la Yeso.’ (Ndj. 12:17) Tawolake Satana nya andja wande nkokɛ wɔma. Mpoposanyɛ la ndakanyɛ kaanga l’anteyi k’onanyelo ntoyakalaka osasa la vu. L’ɛtɛndɔ kɛ ntondo winá wɔ ewandji w’ase Juda yashimela apɔstɔlɔ dj’iwɔ ntshika mpoposanyɛ, ampame yɛ nkɔmano yɛsɔ wasɔnaka djɛ nɛmɛyɛ Ndjambe. Iwɔ wakindjɛka mpoposanyɛ, ko olemo wɔsɔ wápɛyɛka osasa. (Ele. 5:27-29, 41, 42) Lá nsɔsɔlɔ, winá w’olemo wɔso oshimbamawɔ, iso ladjɛ ndjala l’okoso winá w’opoposanyɛso. (Mat. 10:16) Koko ntsha iso nangha kenkfumɔ k’okokaso nangha, tongowa vu djeyɛka má nsasangɛ Yehova la má mpoposanyɛ losango lowikɛ mbiko.

‘NDJAMBE KƐ VU ANGOYALA LA NYO’

18. Kɛkɔnge k’oyɛso ladjɛ mvungɔka lá kɛnɛ kelendana la Ikɔkɔ yɛ vu dj’oyɛso la djonyi?

¹⁸ Yala l’eshikikelo ente kaanga lá deko dj’ekakasano wɛ wolo, iso nkoka ndjala la vu. Lá deko djɛ nghɔsɔ, iso ladjɛ mvungɔka ente vu dj’oyɛso la djonyi nde vu djɛ Ndjambe, vu djɛ ngo Yehova toko ndeke l’okoka mpɛyɛ. Yawɛkɛ tende winá w’opomanɛ la opela kana olando wotáshanghaná, w’opomanɛ l’ambalaka, kana la lɔnyɔkɔ. Yala entshupa l’olonghanyelo wɔnde. Ilá yimba tá etsho weyaye wɛ wɔlɔ wekokongela. Winá w’onanghanyo nghɔsɔ, ‘Ndjambe kɛ vu angoyala la nyo.’ (Flp. 4:9) Lá djamba djeyaye tongoshishima wopo w’okokaso nkotshɛ́ winaso Akristo wapomaná l’ekakasano dj’iwɔ ndjala la vu djɛ Ndjambe.