DJAMBA DJƐ WEKELO 52
Kotshɛ́ anto ankina djɛ nkfulumeyɛ lá deko dj’ekakasano wɛ wolo
‘Topekalake anto ekete kɛ wɔlɔ k’oyɛ ladjɛ ndaapɛyɛ ntsha olekɔ l’akoka wa nkimanyɛ.’—WOO. 3:27.
YEEMBO 103 Anami walekɔ ampame yelekɔ etengo epapɛyɛ (lá Otetela)
LÁ YOPASƐa
1. Wopo wɔkɔnge Yehova okadjimolakande mbala efula lá alɔmbɛlɔ w’enkambi wɛnde?
ONGEWAKE ente Yehova nkoka nkamba la wɛ djɛ nkadjimola lá lɔlɔmbɔ l’onkambi wɔnde ɔmɔtshi? Nde nkoka nkamba lawɛ kaanga oyɛ nde ikokolo, onkambi w’okotshɛ́, yat’ekalo, kana nsakodji l’otshumano. Nde nkoka nkamba lawɛ kaanga oyɛ nde olangala kana ekokolo, wɔnanyɔ kana nkaana. Winá w’onto ɔmɔtshi wɔkɔpa Yehova owetande djɛ ndokotshɛ́, Ndjambe kɛso nkambaka efula la tokokolo edjinge la enkambi wɛnde wɛ nkɔmano djɛ ndjala ‘ikɔkɔ yɛ ekembelo k’efula’ te onto wɔkɔ. (Kɔl. 4:11) Ɔsɔngo mpeyi k’okotshɛso kɛ nkambela Yehova la wananyɔ waso lá lɛdji lɔsɔ! Tokoka nangha nkambo djɛsɔ lá winá w’opela, mbalaka, kana lɔnyɔkɔ.
KOTSHƐ́ ANTO ANKINA LÁ DEKO DJ’OPELA
2. Lamo okokawɔ ndjala okakasano nkotshɛ́ anto ankina lá winá w’opela?
2 Olando wosambelana kana opela nkoka ntila l’okakasano wɔ nkotshana l’anteyi kɛso. Ndjɔmbɔmba, tokoka ndjala la mposɛ kɛ ntowembolá tolongo tɔso, koko topangoyalama ntsha tombonangha nghɔsɔ. Tokoka nkombola djɛ ndjeta wanɛ walekɔ l’ekakasano wɛ mfalanga djɛ ndɔlɛ lakaso, koko nkambo djɛsɔ lonkina mpakoke nanghema. Okoka ndjala la mposɛ kɛ nkotshɛ́ anto ankina, koko nkambo djɛsɔ nkoka ndjala okakasano ntsha ase nkfumbo kɛso wɛna ndjolo. Koko, iso nkombolaka nkotshɛ́ wananyɔ waso edjinge Yehova nsasangaka winá w’onanghaso kenkfumɔ k’oyɛso l’akoka wa nangha lá nkambo djɛwɔ. (Woo. 3:27; 19:17) Kɛkɔnge k’okokaso nangha?
3. Olakanyelo wɔkɔnge wowaso má ndjɔmbɔmba kɛ tokokolo tolekɔ l’otshumano wɔ Desi? (Jɛrɛmi 23:4)
3 Kɛnɛ kɛ tokokolo okokawɔ nangha. Ntsha oyɛnde ikokolo, nangha la wolo djɛ ndembetela ɛnkɔkɔ wɔlɔwɔlɔ. (Wala Jɛrɛmi 23:4.) Desi, nkaana k’isolumolaki lá djamba djemboheta ntepelaka ante: “Tokokolo tɔso telá iloyi yɛso y’olemo w’ipoposanyɛ waposaki la lemi edjinge l’anto ankina t’olemo w’ipoposanyɛ edjinge wahetshɛki winá esanga laso lá winá w’asɛkɛlɔ.”b Welo w’ilisa alami wasɔ waakotshɛka dj’iwɔ nkotshɛ́ Desi lá winá w’opela wɔ COVID-19 la winá wɔ ndavusɛ ase nkfumbo kɛnde amɔtshi m’opela wɔkɔ.
4. Lamo tokokolo iyayale l’akoka wa nkotshɛ́ Desi, ko olakanyelo wɔkɔnge wokokawɔ mba?
4 Desi apakisola ante: “Ladjikɛnde langɔsake tokokolo etengo tolongo, ntayala l’okakasano wɔ ndashimela wopo wɔ moyawokaka edjinge ekiyano weyalaki la lemi.” Tokokolo olakanyelo wɔkɔnge w’okokanyo mba? Nyowembolake anto wolamanyo lá ntondo k’ekakasano mposa. Nyoyale tolongo lawɔ. Ntsha olando ɔmɔtshi w’osambelana wombonyopekala djɛ ntawembola elongi l’elongi, nyohonake topo tonkina tɔ nsawolaka lawɔ. Desi atepelaka ante: “Lá mbamba imɔtshi tokokolo efula wandjetaki kana wantomelaki mesagɛ lá lofu. Avɛrse wiyambalelaka wakotaka oloko wɔmi kaanga mewaka avɛrse wakɔ ntondo.”
5. Wopo wɔkɔnge tokokolo okokawɔ ndjewa kɛnɛ kɛ wananyɔ l’ankaana yɛwɔ oyɛwɔ la djonyi edjinge ndaakotshɛ́?
5 Yopo imɔtshi y’okokanyo ndjeka djɛ ndjewa kɛnɛ kɛ wananyɔ l’ankaana yɛnyo oyɛwɔ la djonyi nde, má ndawopolaka toopopó tɔmɔtshi. (Woo. 20:5) Walekɔ la nkete djɛ ndɛ, ekanga, la nkete nkina? Olemo wɔwɔ nkoka ndjala lá mbalaka la wambosamba mfalanga yɛ mfutela mvulu koyalawɔ? Wakoka ndjala la djonyi djɛso djɛ ndakotshɛ́ dj’iwɔ mpona osuko me lɛɛta ntsha nkokaka? Desi awaka okotshɔ welá demba me winande Akristo. Koko, ngandji kɔwɛnyisa tokokolo la ekembelo k’iyɔpɛyɛ lá nyuma ndeke lokotshisá djɛ ndongela ekakasano wɛnde. Nde ntepelaka ante: “Tokokolo walɔmbaki esanga la lemi. Kaanga mopovungɔka lonkina akambo w’iyatepela, mvungɔ wopo wɔ moke. Ayalaka etengo Yehova anshimelaka ante: ‘Opalekɔ nghɔmɛlɛ.’”—Iza. 41:10, 13.
Wɔnanyɔ wɔlɔndjɛ wekelo w’Etange k’Olami alekɔ l’osasa wɔ ndjoka kɔmantɛrɛ yekembɛ me anto efula wasanghanisa lá losanghanyɛ edjinge me wɔnanyɔ wolekɔ l’olando w’okiliká losanghanyɛ má video kɔnfɛransɛ (Lenda itenyi 6)
6. Kɛkɔnge kenanghaka anto efula l’otshumano djɛ nkotshɛ́ anto ankina? (Lenda ntshango.)
6 Kɛnɛ k’anto ankina okokawɔ nangha. Tongokongelake djɛ tokokolo nkotshɛ́ wananyɔ l’ankaana yel’otshumano. Koko Yehova ntɔlɔmbaka dj’isankfumɔ nkembɛ la nkotshɛ́ anto ankina. (Nga. 6:10) Kaanga itepela yɛ daambi yɛnyɛ ngandji kɛso nkoka ndjala l’eposelo ɛmɔtshi wɛ wɔlɔ efula te onto ɔmɔtshi wolekɔ l’olando. Ilɛngɛ nkoka ntoma kartɛ kana ntshango mɔtshi djɛ nkembɛ wɔnanyɔ. Olangala nkoka nkotshɛ́ nkaana djɛ tosombela nkete kana ndonanghela ikakambo imɔtshi. Anto ankina wal’otshumano nkoka nkatsheyɛ onto wolekɔ l’olando nkete djɛ ndɛ ko totshikela lakande? Lá nsɔsɔlɔ, winá w’olando ɔmɔtshi yotatshanghana, onto onkfumɔ wɔ l’otshumano ndjalaka la djonyi dj’ekembelo. Mbala imɔtshi iso nkoka ntshikala m’ɔkɔngɔ wɔ losanghanyɛ djɛ ntowembola wɔnanyɔ kana nkaana ayale elongi l’elongi kana má video kɔnfɛransɛ. Kaanga tokokolo wangoyalake la djonyi dj’ekembelo. Wananyɔ amɔtshi wangotomelake tokokolo toyapɛyɛka efula djɛ nkotshɛ́ wananyɔ l’ankaana lá winá w’olando wosambelana kana w’opela tonkankanda tɔ ndakawoyɛ lokasa. Angoyala nsɔsɔlɔ wɔlɔ efula ntsha onto l’onto wɔ l’anteyi kɛso nanghaka kɛnɛ k’okokande nangha djɛ ‘nkeketshana la nkotshána l’anteyi kɛso’!—1 Te. 5:11.
KOTSHƐ́ ANTO ANKINA LÁ WINÁ WƆ MBALAKA
7. Ekakasano wɛkɔnge weposaka m’ɔkɔngɔ wɔ mbalaka?
7 Mbalaka yeyɛ má nkete djetongamisa nkoka mfutanyɛ lowiko l’onto ngo lá mayimo djɛ ntsho. Amɔtshi nkoka ntshutshɛ nkete djɛwɔ, mvulu yɛwɔ, kana kaanga anto wawɔ wangandji. Wananyɔ l’ankaana yɛso wapalamema m’akambo wanyɛtshi wasɔ. Kɛkɔnge k’okokaso nangha djɛ ndaakotshɛ́.
8. Kɛkɔnge kɛ tokokolo la ɛtɛ wɛ nkfumbo oyɛwɔ ladjɛ nangha lá ntondo kɛ mbalaka mposa?
8 Kɛnɛ kɛ tokokolo oyɛwɔ ladjɛ nangha. Nyokotshɛ́ wananyɔ lá ntondo kɛ mbalaka yeyɛ má nkete djetonghamisá mposa. Nyoyashikikɛ ente, onto onkfumɔ wel’otshumano ndjewaka kɛnɛ k’oyɛwɔ ladjɛ nangha djɛ ndalama la djɛ nsawola la tokokolo. Margaret, kanga isatepela lá djamba djehetisa, atepelaka ante: “Tokokolo tɔso watɛnyɛka ohomba welá etatshi kɛso kɛ looko, watewolaka ambɔ deko djetombɔka iyɛ mboyala entshupa. Watoshimelaka ambɔ, ntsha ewandji wɛ mbandja wambotoshimela djɛ ndota m’amvulu, kana ntsha akambo wambokoma tá nyɛtshi, iso ladjɛ ndota mbala kɛkɔ kɛmɔ.” Wananyɔ watoshimelaka akambo wasɔ lá winá wɔ wɔlɔ, ladjikɛnde iyɛ iposaka m’ɔkɔngɔ wɔ mbengo itano. Lá winá wɔ wekelo wɔ nkfumbo, ɛtɛ wɛ nkfumbo nkoka nsawola kɛnɛ k’onto onkfumɔ welá nkfumbo oyɛnde ladjɛ nangha ntsha mbalaka kemboposa. Ntsha nyo la wana wanyo nyoyalɔngɔsɔlaka má ntondo, nyokoka nama vu djɛnyo winá wɔ mbalaka yeyɛ má nkete djetongamisá oposawɔ.
9. Wopo wɔkɔnge tokokolo olonghanyɛkawɔ akambo lá ntondo la m’ɔkɔngɔ wɔ mbalaka?
9 Ntsha oyɛnde ilɔndjɛ y’iloyi imɔtshi y’olemo w’ipoposanyɛ, yashikikɛ ente, olekɔ la numelo la adrɛsɛ w’onto onkfumɔ wolekɔ l’iloyi yɛko y’olemo w’ipoposanyɛ, edjinge tokongake ngo mbalaka kemboposa ko wɛ ndonangha nkambo djɛsɔ. Nangha listɛ, la lendaka mbala la mbala djɛ ndjila etshikitano wenanghema. Masɔ winá wongoposá mbalaka, ongoyala l’akoka wa nsawola l’ansakodji ankfumɔ djɛ ndjewa ntsha walekɔ la djonyi dj’okotshɔ. Mbala kɛkɔ kɛmɔ shimela ilɔndjɛ y’oloyi wɔ tokokolo akambo wasɔ, ko nde angoshimela onami w’edjingadjinga. Winá wɔ wananyɔ okambawɔ esanga iwɔ nkoka nkotshɛ́ lá lɛdji lɔ wɔlɔ. Onami w’edjingadjinga wolekɔ l’edjingadjinga kɛ wa Margaret atetamá ilɔ l’ilá kɛ winá 36, djɛ ndɔndjɛ tokokolo lá welo wonanghawɔ djɛ ndjeta la nkotshɛ́ wananyɔ l’ankaana 450 yɛsɛkwisá. (2 Kɔ. 11:27) Má nangha nghɔsɔ, onto onkfumɔ woyalaki la djonyi djɛ edjena kɛ ndjetama awaka.
10. Lamo tokokolo ɔsakawɔ olemo wɔ mbembola ɛnkɔnkɔ la ntshina? (Djɔanɛ 21:15)
10 Etenyi kɛmɔtshi k’olemo wɔ tokokolo t’Akristo nde, mpɛyɛ wananyɔ wawɔ okotshɔ welá demba la welá nyuma. (1 Pɛ. 5:2) Winá woposá mbalaka, tokokolo ladjɛ ndashikikɛ ntondontondo ntsha wananyɔ l’ankaana inkfumɔ walekɔ vu, walekɔ la nkete djɛ ndɛ, ntshendja djɛ ndɔta la edjɛna kɛ ndjetama. Koko lá angɔndɔ efula yɛwɔlamá, wananyɔ wangoyala la djonyi djɛ osukɔ welá nyuma la ndawɛnyɛ ngandji. (Wala Djɔanɛ 21:15.) Harold wɔnanyɔ ɔmɔtshi w’okambá lá Kɔmite kɛ filialɛ edjinge wosawolisá la wananyɔ l’ankaana efula yepomanisá la mbalaka ntepelaka ante: “Ndɔmbamaka etsho efula dj’iwɔ ndoyawoka wɔlɔ. Iwɔ nkoka ntateyɛ ndawoka etengo iyoyawokaka ntondo, koko yɛnyi yɛ onto wɔnde wɔ ngandji w’ovwisá, ekete kɛnde kɛ ntshina ketshitanisá nkoka ntshikala lá wɔɔngɔ. Mvungo yɛsɔ nkoka ndapɛyɛka yɛnyi mbala la mbala. Ɔsɔ apalekɔ osambo wɔ djawo edjinge lako nyɛtshi ndawoka nghɔsɔ.”
11. Ehomba wɛkɔnge wepashile wɛ ankfumbo okokawɔ ndjala la djonyi?
11 Tokokolo nkambaka la dako djɛnɛ djetepela ante: ‘Nyosasange la waasasanga, nyolele la waalela.’ (Ɔrɔ. 12:15) Waawikisá má mbalaka nkoka ndjala la djonyi dj’onto ndashikikɛ ante Yehova la wananyɔ wawɔ w’Akristo wakindjɛ ngo ndaakɔpa. Tokokolo ladjɛ nkotshɛ́ ankfumbo dj’iwɔ nkindjɛ nanghaka akambo welá nyuma, ndjɔmbɔmba, ndɔmbaka, nanghaka wekelo welá nkfumbo, djingelaka lá nsanghanyɛ, la mpoposanyɛka. Tokokolo nkoka nkembɛ lonkina ambotshi dj’iwɔ nkotshɛ́ka wana wawɔ dj’iwɔ ndjila yimba lá nkete djepakoke ntshitana má ambalaka. Ambotshi, nyovungolake wana wanyo ente Yehova angoyalaka winá enkfumɔ Ilongo yɛwɔ la angaakotshɛ́ka winá enkfumɔ. Edjinge nyasipisoyɛ ente wangotshikalaka mfu inkumɔ lá nkfumbo kel’andja w’otondo kɛ wananyɔ l’ankaana yelekɔ entshupa djɛ ndaakotshɛ́.—1 Pɛ. 2:17.
Opakoke ndapɛyɛ l’ɛkɔpa djɛ ntokotshɛ́ m’ɔkɔngɔ wɔ mbalaka mposa l’owila wɔnyo? (Lenda itenyi 12)e
12. Kɛkɔnge kɛ anto ankina okokawɔ nangha djɛ nsuka winá woposa mbalaka? (Lenda ntshango.)
12 Kɛnɛ k’anto ankina okokawɔ nangha. Ntsha mbalaka kɛmɔtshi kemboposa entshupa la nyo, opola tokokolo wopo wokokɛ ntokotshɛ́. Mbala imɔtshi okoka nkotshɛ́ wananyɔ wasɛkwisá kana wananyɔ wayapɛyɛ l’ɛkɔpa dj’iwɔ ndoyala ndambo lakawɛ. Wɛ nkoka nkotshɛ́ ansakodji yelekɔ lá djonyi la nkete djɛ ndɛ kana nkete nkina. Wɛ nkoka nkotshɛ́ lonkina kaanga ntsha mbalaka yombonanghema nde lá edjena k’otale lanyo. Lawopo wɔkɔnge? Má ndɔmbɛlaka anto wapomanisa la mbalaka yɛkɔ. (2 Kɔ. 1:8-11) Wɛ nkoka nsuka lonkina má mpɛyɛ epapɛyɛ djɛ nsuka olemo wɔ nkotshɛ́ waapomaná l’ambalaka. (2 Kɔ. 8:2-5) Ntsha olekɔ l’akoka wa nangha lɔkɛndɔ t’owila woposisá mbalaka djɛ ntokotshɛ́, opola tokokolo kɛnɛ k’oyɛ ladjɛ nangha djɛ ntokotshɛ́. Ntsha wambokawola, wakoka nkɔpɛyɛ okfumbelo dj’iwɔ ndokamba la wɛ l’edjena la lá winá woyɛwɔ la djonyi efula dj’okotshɔ.
KOTSHƐ́ WANANYƆ DJƐ NKFULUMEYƐ LƆNYƆKƆ
13. Ekakasano wɛkɔnge wepomana la wananyɔ waso l’ewila w’iyomboshimba olemo wɔso?
13 L’ewila w’iyomboshimba olemo wɔso, lɔnyɔkɔ nkoka nkomɛ lowiko nkenya. Wananyɔ welá ewila wɛsɔ mpomanaka l’ekakasano welendana la mfalanga, nkɔnaka elando edjinge mvusɛka anto wawɔ wa ngandji. Koko m’ɔtɛ w’oshimbelo, tokokolo wapalekɔ l’akoka wa ntshɔ ntowembola la ntosawola la wananyɔ walekɔ la djonyi dj’ekeketshelo. Kɛsɔ ndeke lokomelisa Andrei, kanga satepela lá djamba djemboheta. Nkaana kɛmɔtshi kelá iloyi yɛnde y’olemo w’ipoposanyɛ ayalaki l’okakasano wɔ mfalanga. Masɔ nde ananghaka aksida l’otuka. Nde ayalaka ladjɛ ndjata mpaso efula edjinge atakoka nkamba olemo lonkina. M’ɔtɛ wɔ oshimbelo la wɔ opela, wananyɔ wananghaka kɛnɛ k’iyakoke nangha djɛ ndookotshɛ́, ko Yehova ɛnaki kɛnɛ kehetaki.
14. Wopo wɔkɔnge tokokolo okokawɔ mpɛyɛ ndjɔmbɔmba kɛ ndawɛkɛ tɛ Yehova?
14 Kɛnɛ kɛ tokokolo okokawɔ nangha. Andrei alɔmbaki edjinge ananghaki kɛnɛ kɛ ndakokaka nangha. Ko Yehova ndokadjimola ngete mo? Nde atshindaka wananyɔ wimá ntshumano djetshikitanyi wakokisá nangha akambo efula djɛ ndookotshɛ́. Amɔtshi watɔlaki nkaana t’opitalo. Ankina wɔpɛyiki mfalanga djɛ nde ndakotshɛ́. Yehova aatshindaka dj’iwɔ nangha kɛnɛ k’iyakoke nangha edjinge atshɔkɔlaka welo w’ilisá wananyɔ l’ankaana inkfumɔ. (Heb. 13:16) Tokokolo, ntsha nyomboyala l’elelo lá kɛnɛ k’okokanyo nangha, nyɔlɔmbɛ anto ankina djɛ nyokotshɛ́. (Jɛr. 36:5, 6) Nkambo deka djonyi nde nyoyawɛkɛ te Yehova. Nde nkoka nyokotshɛ́ djɛ nkotshɛ ehomba wɛ wananyɔ l’ankaana yɛnyo.
15. Wopo wɔkɔnge w’okokaso nama osanga w’Akristo lá deko djɛ lɔnyɔkɔ?
15 Kɛnɛ k’anto ankina okokawɔ nangha. Ntsha wamboshimba olemo wɔso, iso nkoka mpomanaka la wananyɔ l’ankaana yɛso lá toloyi tɔ daambi. Djɛkondeke alekɔ djonyi efula dj’iso ndjala la djokanelo djɛ vu l’anteyi kɛso. Tonanyɛ Satana, koko ape iso isɔmɛlɛ. Imeyɛ wananyɔ wako evunga wɛwɔ, kana nyonanghe la nkeke djɛ nkandola ekakasano enkfumɔ wekoka ndjala l’anteyi kɛnyo. (Woo. 19:11; Ɛfɛ. 4:26) Nyoyale entshupa djɛ nkotshana l’anteyi kɛnyo. (Tito 3:14) Okotshɔ w’anto ankina ɔpɛyɛwɔ nkaana kelekɔ lá djonyi ndjalaka l’eposelo wɛ wɔlɔ tá iloyi y’olemo w’ipoposanyɛ. Iwɔ ndjalaka ma ma etengo ase nkfumbo.—Yee. 133:1.
16. Lá nkilika Kɔlɔsɛ 4:3, 18, wopo wɔkɔnge w’okokaso nkotshɛ́ wananyɔ l’ankaana yɛso yɛna ndjolo la lɔnyɔkɔ?
16 Nunu djɛ wananyɔ l’ankaana yɛso y’Akristo wakambela Yehova kaanga l’anteyi kɛ oshimbelo wɔ me lɛɛta. Amɔtshi l’anteyi kɛwɔ walekɔ l’ankando m’ɔtɛ wɔ djawo djɛwɔ. Iso nkoka ndalɔmbɛla iwɔ, ankfumbo yɛwɔ la wanɛ wilá lotshungɔ lɔwɔ lá mbalaka djɛ nsuka wananyɔ la ankaana yɛsɔ lá nyuma, la demba, la lá wayi wa tominanyi.c (Wala Kɔlɔsɛ 4:3, 18.) Tovungɛke kaanga ndambo daambi ente, ndɔmbɔ yɛko nkoka nkotshɛ́ wananyɔ l’ankaana yɛsɔ!—2 Te. 3:1, 2; 1 Ti. 2:1, 2.
Wopo wɔkɔnge w’okokɛ ndɔngɔsɔla nkfumbo kɛko lá nkambo djɛ lɔnyɔkɔ? (Lenda itenyi 17)
17. Wopo wɔkɔnge w’okokanyo ndalɔngɔsɔla má winá wɔsɔ lá nkambo djɛ lɔnyɔkɔ?
17 Wɛ nya nkfumbo kɛko nkoka ndalɔngɔsɔla má winá wɔsɔ lá nkambo djɛ lɔnyɔkɔ. (Ele. 14:22) Tohonake djɛ nkanela akambo ankfumɔ wa nyɛtshi wakoka mposa. Koko, kembɛ djokanelo djɛko nya Yehova edjinge kotshɛ́ wana wako djɛ nangha wopo wɔk’ɔmɔ. Ntsha ongoyakiyanyɛke mbala la mbala, djipolela Ndjambe oloko wɔko. (Yee. 62:7, 8) Nyosawole lá nkfumbo, donga djɛ onto onkfumɔ okokande ndjilela Yehova oloko.d Etengo lá nkambo djɛ ambalaka yeyɛ má nkete djetongamisa, ntsha nyo ndalɔngɔsɔla la ntondo la ndawɛkɛ te Yehova, wana wanyo wangoyala l’oloko wolo la wangolama vu djɛwɔ.
18. Etsho weyaye wɛ ngetenge wetokongela?
18 Vu djɛ Ndjambe ntolamaka. (Flp. 4:6, 7) Má lotshimbo lɔ vu djɛkɔ, Yehova ntshitshimɛka awale waso, kaanga opomanaso la elando, mbalaka la lɔnyɔkɔ. Nde nkambaka la tokokolo tolekɔ l’eloko wolo djɛ ntolama. Edjinge nde ntɔpɛyɛka isankfumɔ mpeyi kɛ nkotshana l’anteyi kɛso. Vu djoyɛso la djɛkɔ má winá wɔsɔ, ngotokotshɛ winá wɔ songopomana l’ekakasano wɛ nkekete, kaanga lá ‘ndjolo k’ekekete.’ (Mat. 24:21) Koko má winá wɔsɔ, iso la djɛ nama vu djɛso edjinge nkotshɛ́ anto ankina djɛ nangha wopo wɔk’ɔmɔ. Koko m’ɔkɔngɔ w’akambo wasɔ, topangopomana lonkina l’akambo watokiyanyɛ. Tongowa kɛnɛ kɛ Yehova ɔkɔpande iso mba, ntepela ente vu djɛ nsɔsɔlɔ djengotshikala lotshinda.—Iza. 26:3, 4.
YEEMBO 109 Tokane ngandji k’efula k’imanse oloko (lá Otetela)
a Yehova angokambake mbala efula la enkambi wɛnde wɛ nkɔmano djɛ nkotshɛ́ anto wapomana l’ekakasano. Nde nkoka nkamba la wɛ djɛ wɛ ndjala ikɔkɔ yɛ ekembelo te wananyɔ l’ankaana yɛko. Nyontshɔ tokolenda wopo w’okokaso nkotshɛ́ winá w’anto ankina oyɛwɔ la djonyi dj’okotshɔ.
b Nkombo imɔtshi itshikitanyemaka.
c Kɔmite kɛ filialɛ kana biro dj’ekekete mpakoke ntomela wɔnanyɔ kana nkaana kɛmɔ kɛmɔ kelá lokando enkanda.
d Lenda djamba djelekɔ l’ɔtɛ wɔ djoyi ante: “Yalɔngɔsɔla má winá wɔsɔ lá nkambo djɛ lɔnyɔkɔ” lá Etange k’Olami Ngɔndɔ k’esambele 2019.
e NSAKISO Y’ASANGO: Wadji la wome ɔmɔtshi wamboyakala nkfumbo kɛmɔtshi kelekɔ l’olotshi m’ɔtɛ wɔ mbalaka kɛmɔtshi nkete djɛ ndɛ.