Kɛnɛ kesakisola djiina djɛ Yehova le Yeso

1-2. a) Yeso ndananghe nge la lotsho lá ntondo kɛ ndjakema? b) Weepó wɛkɔnge wɔkɔpaso nkadjimola lá djamba djɛnɛ?

YAYALE nde nkɔlɔ djɛ Lofu l’anɛyi, djɛ Nisana 14, 33 D.D., anto wayalaka entshupa djɛ nkapa Yeso, ndosambisɛ, ndowopela dombo djɛ nyɔyi, ndokfusa ole ndoyaka. Yayale nde m’ɔkɔngɔ wɔ nde ndɛ dambo dj’ekomo nya ambeki wande wa nkɔmano lá mvulu kɛ lá djiko. M’ɔkɔngɔ w’iwɔ ndɛ, Yeso ashimelaka ambeki wande etepela w’ekomo wekembɛ. Lá ntondo k’iwɔ nyima má mvulu kɛ lá djiko, Yeso emalaka ko ananghaka lɔlɔmbɔ lɔ djonyi efula. Ɔpɔstɔlɔ Djɔanɛ afunaka lɔlɔmbɔ lɔkɔ; lɛnaso lá Djɔanɛ shapitrɛ 17.

² Lɔlɔmbɔ lɔ Yeso ɔtɛnyɛwɔ lɔɔko kɛnɛ nge? Wopo wɔkɔnge lɔlɔmbɔ lɔsɔ ɛnyɛwɔ kɛnɛ keyalaki djonyi le nde l’ilá k’olemo wɔnde lá looko? Tokolenda ndjɔndɔ yɛ weepó wɛsɔ.

‘LEMI NDJEWANYƐKA DJIINA DJƐKO LEWƆ’

3. Yeso ndatepela lá nkambo djɛ djiina djɛ Ndjambe nge, ko kɛsɔ osakisolawɔ nge? (Djɔanɛ 17:6, 26)

³ Lá lɔlɔmbɔ lɔnde, Yeso atepelaka ante: ‘Lemi ndjewanyɛka djiina djɛko lewɔ.’ Lá nsɔsɔlɔ, Yeso ewanyɛka mbala ipe y’etondo djiina djɛ Yehova le ambeki wande. (Wala Djɔanɛ 17:6, 26.) Ndakɔpɛ ntepela nge? Ashimelaka djiina djɛ yotewaka ntondo? Ambeki wa Yeso yayalaka nde ase Juda, wewaki ambɔ djiina djɛ Ndjambe nde Yehova. Djiina djɛ Ndjambe djɛnama ndekana mbala nunu lá Afunelo wa Hebero. Yeso atalumola djiina mɛlɛmɛlɛ djɛ Ndjambe; koko ndashimelaka nde kɛnɛ kesakisola djiina djɛkɔ. Yeso ewanyɛka Yehova wɔlɔ wɔlɔ le ambeki wande, ndjila ngole alaka, elemo la wekeka wande, lá lɛdji lɔ onto onkfumɔ ndopakoke nangha.

4-5. a) Wopo wɔkɔnge wiina w’anto amɔtshi okokawɔ ndjala la ntshina efula? b) Ambeki wa Yeso iyolewaka djiina djɛ Yehova ngete nge?

⁴ Ndjɔmbɔmba, kɔsa djɛ Davidɛ ikokolo imɔtshi y’otshumano ilekɔ dɔktɛrɛ. Wɛ ombewaná nya wɔnanyɔ wɔsɔ ɛnɔnyi efula. Ko lofu lɔmɔtshi ombotata olando w’ekekete. Ombotshɔ lankeke tá opitalo wokamba wɔnanyɔ wɔkɔ, ko la balo nkfumɔ, ambokowikɛ. Lako djiina djɛ wɔnanyɔ wɔsɔ ngoyala la nsakiso kenkina kɛ bango lewɛ? Oyɛwɔ ngo nghɔkɔsɔ! Davidɛ apalekɔ ngo ikokolo yɛ ngewaka; ambokoma winá wɔsɔ dɔktɛrɛ mbokowikɛ.

⁵ Lá wopo wɔkɔ ɔmɔ, ambeki wa Yeso wewaki djiina djɛ Yehova. Koko djiina djɛsɔ ndjalaka la nsakiso k’ekekete efula lewɔ mpeyi la olemo wɔ Yeso. Otepelaso nghɔsɔ lamo? Ladjikɛnde Yeso ɛnyɛki má etepela la nanghedji lonto lɔ Papa kɛnde l’akambo ankfumɔ. Djɛko ndeke apɔstɔlɔ wande wayɛka ‘ndewa’ wɔlɔ wɔlɔ Yehova má wopo wɔ Yeso ndalakanyɛka la má nyɛna wopo wɔ ndananghelaka anto akambo.—Dj. 14:9; 17:3.

‘DJIINA DJƐKO DJƐ NGAPƐYƐ’

6. Lá wopo wɔkɔnge Yehova ndapɛyɛ Yeso djiina djɛnde? (Djɔanɛ 17:11, 12)

⁶ Lá lɔlɔmbɔ lɔnde, Yeso alɔmbɛlaka ambeki wande ante: ‘Papa wombawɔ m’ɔtɛ wɔ djiina djɛko djɛ ngapɛyɛ.’ (Wala Djɔanɛ 17:11, 12.) Kɛsɔ osakisolawɔ nde ente tongeta Yeso ente Yehova? Lako. Ewa ente lá lɔlɔmbɔ lɔnde, Yeso atepelaka djɛ djiina djɛ Yehova ante ‘djiina djɛko.’ Djiina djɛ Yehova ntakoma djiina mɛlɛmɛlɛ djɛ Yeso. Yeso ndakɔpɛ ntepela ante nge winá wɔ ndatepela ante Ndjambe ɔpɛyɛka djiina djɛnde? Ntondo ntondo, Yeso ayalaki ntomɔ kɛ Yehova la onto wotepelaki lá djiina djɛnde. Ayɛka lá djiina djɛ Papa kɛnde la ananghaka ansese la djiina djɛkɔ. (Dj. 5:43; 10:25) Kankina, djiina djɛ Yeso osakisolawɔ nde “Yehova alekɔ ewiko.” Ɛwo, djiina djɛ Ndjambe dekɔ la djokanelo la djiina djɛ Yeso.

7. Kɛnyɛ wopo wɔ Yeso ndakoke ntepela lá djiina djɛ Yehova.

⁷ Ndjɔmbɔmba, ambasadɛrɛ, itshɔ antomɔ yɛ prezida, nkoka ntepela lá djiina djɛ prezida. Otepela wɔ ntomɔ wolekɔ l’onkfunda ete ngo wɔ prezida kembootoma. Lá wopo wɔkɔ ɔmɔ, Yeso alekɔ ntomɔ kɛ Yehova la atepelaki nya anto lá djiina djɛnde.—Mat. 21:9; Luka 13:35.

8. Wopo wɔkɔnge djiina djɛ Yehova yakome ekete keleka ntshina ‘le’ Yeso lá ntondo kɛ nde ndjɛ lá looko? (Eposelo 23:20, 21)

⁸ Ete ngo oyɛnde Otepela, Yeso akambaki ete ngo ntomɔ kɛ Yehova má nshimela ntongami djɛ nyuma l’anto, kɛnɛ kɛ Yehova ɔkɔpande iwɔ ndjewa la nangha. (Dj. 1:1-3) Nkoka ndjala Yeso ndeke loyalaki ondjelo wɔ Yehova ndatome djɛ ntowakela ase Isariyɛlɛ winá wɔ yayalaka l’osowe wɔ lɔsɛnga. Winá wɔ Yehova ndashimela ase Isariyɛlɛ djɛ nɛmɛyɛ ondjelo wɔsɔ, Yehova atepelaka ante: ‘Ladjikɛnde djiina djɛmi dekɔ le nde.’a (Wala Eposelo 23:20, 21.) Djiina djɛ Yehova djalaki ‘le’ Yeso lá wopo wɔ ndayalaka ntomɔ kɛ Yehova la ndayalaka onto woseelaki la wokinyɛki djiina djɛ Papa kɛnde.

‘PAPA, LUMƐ DJIINA DJƐKO’

9. Djiina djɛ Yehova yayale la ntshina le Yeso ngete mo? Kopakisola.

⁹ Ete ngo isɔmɛna, kaanga lá ntondo kɛ Yeso ndjɛ lá looko, djiina djɛ Yehova djayalaki la ntshina efula le nde. Okama papoo ente akambo ankfumɔ wa Yeso ndananghaka wayalaki la djokanelo la djiina djɛ Yehova winá wɔ ndayalaka lá looko! T’ekomo k’olemo wɔnde, Yeso oshimelaka ante: ‘Papa, lumɛ djiina djɛko.’ Ko mbala kɛkɔ kɛmɔ, Papa kɛnde okadjimolaka la djoyi djɛ ompondo má olongo ante: ‘Lemi langolumɛ la langokalɔ numɛ kankina.’—Dj. 12:28.

10-11. a) Yeso ndalumɛ djiina djɛ Ndjambe ngete mo? (Lenda ntshango.) b) Lamo djiina djɛ Yehova oyɛwɔ la djonyi djɛ nkinyama ole nseelama?

¹⁰ Ole Yeso alumɛka djiina djɛ Papa kɛnde. Ngete mo? Wopo ɔmɔtshi nde má nshimela anto ankina wekeka la nanghedji djɛ nkamɔ djɛ Papa kɛnde. Koko, ananghaka nkete nkina efula djɛ numɛ djiina djɛsɔ. Djiina djɛ Yehova djeyalaka ladjɛ nkinyama la lokumu lɔnde nseelama.b Yeso ɛnyɛka tii lá lɛdji lɔkɔnge yayalaka djonyi winá wɔ ndalakanyɛ ambeki wande lɔlɔmbɔ lɔ ndjɔmbɔmba. Atepelaka ante: ‘Papa kɛso kɛ l’olongo, djiina djɛko nkinyame.’—Mat. 6:9.

¹¹ Lamo djiina djɛ Yehova oyɛwɔ la djonyi djɛ nkinyama ole nseelama? Mande lá bedji dj’Ɛdɛna, Satana Djabolo atalɛmɛyɛ la atonghanyɛka Yehova Ndjambe akambo. Satana atepelaka ante Yehova alekɔ kanga ongolo la apekala Adama nya Eva ekete kɛmɔtshi kɛ wɔlɔ. (Ewa. 3:1-5) Satana akalɔka ntepela ante yopo yɛ Yehova yɛ nangha akambo ipɔlɔ. Engolo wɛ Satana wetshitaka lokumu kana djiina djɛ Yehova. M’ɔkɔngɔ, lá etsho wɛ Djɔbɔ, Satana atepelaka ante anto okambelawɔ Yehova ngo má kɛnɛ kapɛyɛnde. Akfɛka lonkina ante lako onto wongokambela Yehova winá woyɛnde lá ehemba ladjikɛnde wapɔɔkɔpɛ lá nsɔsɔlɔ. (Djɔ. 1:9-11; 2:4) Alɔmbamaka ndambo kɛ winá djɛ ndjewa olekɔ ongolo na, Yehova ndo koko Satana.

‘LEMI NKƆPA MPƐYƐ LOWIKO LƆMI’

12. Yeso ndayale entshupa djɛ nangha nge l’ɔtɛ wɔ ngandji kɛnde tá djiina djɛ Yehova?

¹² M’ɔtɛ wɔ ngandji kɛnde te Yehova, Yeso akɔpaki nangha kenkfumɔ kɛ ndakokaka nangha djɛ nkinyɛ la djɛ nseela djiina djɛ Yehova. Yeso atepelaka ante: ‘Lemi nkɔpa mpɛyɛ lowiko lɔmi.’ (Dj. 10:17, 18) Ɛle, ayalaka entshupa djɛ mvɔ l’ɔtɛ wɔ djiina djɛ Yehova.c Anto ape wa ntondo wa djɔ, Adama nya Eva, wapendolaka Yehova ole wawolaka ongolo wɔ Satana. Lá lɛdji lotshikitanyi, Yeso ayalaka entshupa djɛ ndjɛ lá looko la djɛ nyɛnyɛ Yehova ngandji kɛnde. Yeso ɛnyɛka Yehova nkɔmano djɛnde má nɛmɛyɛ Yehova lá akambo ankfumɔ. (Heb. 4:15; 5:7-10) Atshikalaka la nkɔmano lá lowiko lɔnde, tii lá nyɔyi l’otamba wɔ ndjolo. (Heb. 12:2) Lá lɛdji lɔsɔ, ɛnyɛka ngandji kɛ ndokaka Yehova la djiina djɛnde.

13. Lamo ngo Yeso ndeke lokokisá ntongola Satana? (Lenda ntshango.)

¹³ Má lowiko lɔnde l’otondo, Yeso ɛnyɛka ante kanga ongolo nde Satana, koko ape Yehova! (Dj. 8:44) Yeso ndeka onto onkfumɔ ndjewa Yehova wɔlɔ wɔlɔ. Ntsha Satana atepelaka kaanga nkambo mɔ djɛ nsɔsɔlɔ lá akambo wa ndatonghanyɛ Yehova, Yeso ewaki. Koko Yeso ɔsaka nkano djɛ nseela lokumu, kana djiina djɛ Yehova. Kaanga yɛnamaka ente Yehova ambookadjɛ, Yeso ayalaka entshupa djɛ mvɔ dj’ipa mpɛyɛ Papa kɛnde kɛ ngandji ɔkɔngɔ.—Mat. 27:46.d

‘LAMBOSHIYƐ . . . OLEMO WƆ NGAPƐYƐ DJƐ NKAMBA’

14. Yehova ndafute nkɔmano djɛ Yeso ngete mo?

¹⁴ Lá lɔlɔmbɔ lɔ ndananghe la lotsho lá ntondo kɛ mvɔ, Yeso atepelaka ante: ‘Lamboshiyɛ . . . olemo wɔ ngapɛyɛ djɛ nkamba.’ Ayalaki la eshikikelo ante Yehova angofuta m’ɔtɛ wɔ nkɔmano djɛnde. (Dj. 17:4, 5) Yeso ayalaka la elonga kɛ ndáwɛkɛ le Papa kɛnde. Yehova atawola djɛ nde ntshikala lá nketa. (Ele. 2:23, 24) Akfundolaka Yeso la ɔpɛyɛka lowandji l’ekekete l’olongo. (Flp. 2:8, 9) Ekomo ekomo, Yeso awangaka ndɔndjɛ ete ngo Nkfumi k’Onkfumi wɔ Ndjambe. Onkfumi wɔkɔ yongonangha nge? Etenyi k’ape kɛ lɔlɔmbɔ lɔ ndjɔmbɔmba ketoshimela ente: ‘Onkfumi wɔko woye. Ɛkɔpa kɛko [ɛkɔpa kɛ Yehova] kenangheme lá looko, ete ngo onanghemawɔ lá olongo.’—Mat. 6:10.

15. Yeso ndongokalɔ nangha kankina nge?

¹⁵ Lako ilá, Yeso onana l’antonyi wa Ndjambe ole otshita anto wa nyɛtshi lá Armagɛdɔ. (Ndj. 16:14, 16; 19:11-16) Ndambo daambi m’ɔkɔngɔ, Yeso angowokela Satana lá ‘mpeku dj’ipa l’ekomo,’ ko apangoyala l’akoka wa nangha kaanga nkambo mɔ. (Ndj. 20:1-3) Yeso angokawoyɛ vu, la angokomɛ anto djɔ lá Ɛlɔndjɛlɔ kɛnde k’Ɛnɔnyi Kinunu. Angokfundola edjo. Angokomɛ looko l’otondo paradiso. Daka djɛ Yehova ngokotshama!—Ndj. 21:1-4.

16. Kɛkɔnge kengonanghema l’ekomo k’Ɛnɔnyi Kinunu?

¹⁶ Okokaso nkongela nge lá ekomo k’Ɛnɔnyi Kinunu? Mpekanto la ntshamba djɛ djɔ ngoshila. Anto wapangokalɔ ndɔmba kankina imeyelo kɛ mpekanto yɛwɔ má mbamba kɛ oshinga wɔ mbendo; wapangoyala la djonyi djɛ ntepetedji kana djɛ Nkfundji k’Ekekete. La ‘ontonyi w’ekomo, nyɔyi’ kɛ Adama ndatosambeyɛ angima. Anketa ipangoyala lonkina l’ekete l’eteyi. Edjo wengokalɔ ndjala la lowiko. Anto ankfumɔ welá looko wangoyala djɔ.—1 Kɔ. 15:25, 26.

17-18. a) Kɛkɔnge kengonanghema l’ekomo k’Ɛlɔndjɛlɔ k’Ɛnɔnyi Kinunu? b) Yeso ndongonangha nge winá wɔ ndongokoma l’ikoto y’ɛlɔndjɛlɔ kɛnde? (1 Kɔrɛtɔ 15:24, 28) (Lenda ntshango.)

¹⁷ Kɛkɔnge kengokalɔ nanghema l’ekomo k’Ɛlɔndjɛlɔ k’Ɛnɔnyi Kinunu? Lá winá wɔsɔ, nkambo mɔtshi djɛ wɔlɔ efula ngonanghema. Topangotepela kankina nkambo djɛ okinyelo wɔ djiina djɛ Yehova. Ngete mo? Lá bedji djɛ Ɛdɛna, Satana atepelaka ante Yehova alekɔ kanga ongolo la ɛlɔndjɛlɔ kɛnde kepalekɔ kɛ ngandji. Ngo masɔ, djiina djɛnde nkinyamaka m’anto wɔlɛmɛyɛ la wokambela. Djɛko ndeke l’ekomo k’Ɛlɔndjɛlɔ kɛ Ɛnɔnyi Kinunu, lokumu lɔ Yehova loseelamaka. Ɛnyɛka l’akambo ankfumɔ ante alekɔ Papa kɛ ngandji.

¹⁸ Ongolo wɔ Satana ndatepela lá nkambo djɛ Yehova wongisɔ mbala kɛmɔ etshinda etshinda. Yeso ndongonangha mo l’ikoto y’ɛlɔndjɛlɔ kɛnde? Angokilika lokolo lɔ Satana, la angɔtɔmbɔkɛla Yehova? Lako! (Wala 1 Kɔrɛtɔ 15:24, 28.) Yeso angokawoyɛ Papa kɛnde Onkfumi. Angosunama lá ɛlɔndjɛlɔ kɛ Yehova. Ɛwo, ntshikitana la Satana, Yeso alekɔ entshupa djɛ mpɛyɛ ekete kenkfumɔ m’ɔtɛ wɔ ngandji kɛnde te Yehova.

19. Djiina djɛ Yehova oyɛwɔ la nsakiso kɛkɔnge le Yeso?

¹⁹ Topakamɔ lá wopo wɔ Yehova ndapɛyɛ Yeso djiina djɛnde! Yeso ɛnyɛka ante alekɔ ntomɔ kɛ djɔ kɛ Papa kɛnde. Kɛkɔnge kesakisola djiina djɛ Yehova le Yeso? Djayalaki la ntshina efula le nde ndeka nkete nkfumɔ. Ayalaka entshupa djɛ mvɔ djɛ djiina djɛsɔ, la angokawoyɛ Yehova ekete kenkfumɔ l’ekomo k’Ɛlɔndjɛlɔ k’Ɛnɔnyi Kinunu. Okokaso ndjokola ndjɔmbɔmba kɛ Yeso ngete mo? Tongokadjimola woopó wɔsɔ lá djamba djeyaye.