WEKELO 51
Wopo wɔkɔnge w’okokɛ nsasangɛ Yehova m’etepela wɛko?
Winá wɔ Yehova ndototonge, nde atɔpɛyɛka opapɛyɛ ɔmɔtshi wɔ wɔlɔ efula ntepela ente, nkoka djɛ ntepela. Wopo w’okambaso l’opapɛyɛ wɔsɔ wolekɔ la djonyi lá wiso wa nde? Ee wolekɔ la djonyi! (Wala Djakɔbɔ 1:26.) Wopo wɔkɔnge w’okokaso nkamba l’opapɛyɛ wɔso w’otepela djɛ nsasangɛ Yehova?
1. Wopo wɔkɔnge w’okokaso nkamba l’opapɛyɛ wɔso w’otepela?
Bible ntepelaka ante ‘nyokindjɛ nkembɛna onto nya winande edjinge nkotshana onto nya winande.’ (1 Tesalɔnikɛ 5:11) Ongewake anto amɔtshi walekɔ́ la djonyi dj’okotshɔ? Wopo wɔkɔnge w’okokɛ ndakembɛ? Shimelawɔ ente wɛ ndawilaka yimba. Okoka ndashimela akambo amɔtshi wangɔkɔpaka lewɔ. Ovungɔ vɛrse mɔtshi djekoka nkembɛ onto ɔmɔtshi w’ewɛ? Avɛrse walekɔ efula w’okokɛ nsɔna mɔtshi m’anteyi kɛ wɔ. Koko ewa ente, etepela wɛko la wopo wɔko wɔ ntepela nkoka nkotshɛ́ anto amɔtshi kana ndapɛyɛ yɛnyi. Djɛkondeke posɛka winá enkfumɔ etepela wɛ wɔlɔ la wekembɛ.—Woongo 15:1.
2. Etepela wɛ ngete nge w’oyɛso ladjɛ ndjewɔ?
Bible ntepelaka ante: ‘Etepela wɛ nyɛtshi wetaposake m’ɛlɔmɔ wɛnyo.’ (Wala Ɛfɛsɛ 4:29.) Nkambo djɛsɔ nkɔpaka ntepela ante topakoke mposɛ etepela wɛ nyɛtshi kana wekoka nkɔta anto. Iso ladjɛ ntona lɔtɛndɔ edjinge omamanyɛ.—Wala Woongo 16:28.
3. Kɛkɔnge kekoka ntokotshɛ́ djɛ ntepelaka lá yopo yekembɛ?
Mbala efula, wamba waso ndeke lɛnyɛ kɛnɛ kelekɔ́ nsɔsɔlɔ l’oloko edjinge lá timba tɔso. (Luka 6:45) Djɛkondeke, alekɔ djonyi leso djɛ mpikaka wiso waso ngo l’akambo wakembɛ, nkɔpa ntepela ente akambo wa sii, wa piyɔɔ, wakoka nkɔpama la mbandolama. (Filipɛ 4:8) Djɛ mpika wiso l’akambo wasɔ, iso ladjɛ ndjewa nsɔna etombo la tolongo tɔso. (Woongo 13:20) Iwɔ wangotokotshɛ́ lonkina djɛ ntɔnɔlaka lá ntondo k’iso ntepela. Shishima eposelo wengoyala l’etepela wɛko te anto ankina. Bible ntepelaka ante: ‘Etepela w’epa la nkanela nkɔtaka etengo lokfula, koko lolemi lɔ kanga balo nsadjɛka.’—Woongo 12:18.
TSHIMOLA
Eka wopo wɔ ntepelaka lá wopo wosasangɛ Yehova edjinge wokembɛ anto ankina.
4. Ewa nkamba l’etepela wɛko
Winá ɛmɔtshi, iso mposɛka etepela woyɛkaso ndokiyana m’ɔkɔngɔ. (Djakɔbɔ 3:2) Wala Ngalatiya 5:22, 23, ko kadjimola lá weepó wɛnɛ:
Lá wekeka wasɔ, djɛkɔnge dj’okokɛ ndɔmba Yehova djɛ nde nkokotshɛ́ djɛ wɛ ndjewa nkamba l’etepela wɛko? Wopo wɔkɔnge wekeka wasɔ okokawɔ nkokotshɛ́?
Wala 1 Kɔrɛtɔ 15:33, ko kadjimola lá woopó wɔnɛ:
Tolongo edjinge etombo kana akambo ankina okokawɔ nkotshinda djɛ ndjala l’etepela wɛ ngete nge?
Eposelo wɛkɔnge wekoka ndjalá la wopo wɔso wɔ ntepela?
Wala Losanghanyɛ 3:1, 7, ko kadjimola lá woopó wɔnɛ:
Winá wɔkɔnge wolekɔ́ wɔlɔ mvumba kana nkonga mbamba kɛmɔtshi djɛ ndotepela?
5. Tepela wɔlɔ lá nkambo dj’anto ankina
Wopo wɔkɔnge w’okokaso ntona djɛ ntola anto edjinge ndamposeyɛ etepela wɛ nyɛtshi? Lenda VIDEO, ko kadjimola lá weepó wel’anse.
Lá video djɛnɛ, ladjikɛnge wɔnanyɛnghɛso ndakɔpɛ ntshikitanyɛ wopo wɔnde wɔ ntepela lá nkambo dj’anto ankina?
Kɛkɔnge kɛ ndananghe djɛ ntshikitana?
Wala Losanghanyɛ 7:16, ko kadjimola lá woopó wɔnɛ:
Kɛkɔnge k’oyɛso ladjɛ nkanela ntsha tohona ntepela nyɛtshi lá nkambo dj’onto ɔmɔtshi?
Wala Losanghanyɛ 7:21, 22, ko kadjimola lá woopó wɔnɛ:
Wopo wɔkɔnge avɛrse wanɛ okokawɔ nkokotshɛ́ dj’ipa nyomala lankeke winá w’onto ɔmɔtshi otepelande nyɛtshi lá nkambo djɛko?
6. Posɛka etepela wɛ wɔlɔ winá w’osawolɛ ny’ase nkfumbo kɛko
Yehova nkɔpaka dj’iso ndjamba l’ase nkfumbo kɛso lá wopo wɔ wɔlɔ edjinge la ngandji. Lenda VIDEO, ko kadjimola lá woopó wɔl’anse.
Kɛkɔnge kekoka nkokotshɛ́ djɛ nsawola wɔlɔ ny’ase nkfumbo kɛko?
Wala Ɛfɛsɛ 4:31, 32, ko kadjimola lá woopó wɔnɛ:
Etepela wɛkɔnge wekoka nkembɛ nkfumbo kɛko?
Yehova ɛnyɛka wopo wokande lá nkambo djɛ Wɔnande, Yeso. Wala Mateo 17:5, ko kadjimola lá woopó wɔnɛ:
Wopo wɔkɔnge w’okokɛ ndjokola Yehova winá wosawolɛ ny’ase nkfumbo kɛko?
Hona mbamba kɛ ndjedjɛ anto ankina
ANTO EFULA NTEPELAKA AMBƆ: “Etepela weyɛ l’ɔtɛ wɔmi ndeke otepelami. Ntsha anto woka etepela wɛmi nyɛtshi ɔsɔ nde nkambo djɛwɔ.”
Edjinge wɛ ndeke lawola ikanyi yɛsɔ? Lamo?
LÁ YOPASƐ
Etepela w’oposɛso nkoka nkotshɛ́ anto kana ndakiyanyɛ. Djɛkondeke, alekɔ wɔlɔ iso ntɔnɔla ntondo akambo w’ɔkɔpaso ntepela, nsɔna winá wɔ ntepela edjinge wopo wɔ ntepela.
Mvungo
Topo tɔmɔtshi tɔkɔnge t’okokɛ nkamba l’etepela wɛko djɛ nkembɛ anto ankina?
Etepela wɛ wopo wɔkɔnge ngomboyashikikɛ dj’ipa ntepelaka?
Kɛkɔnge kekoka ntokotshɛ́ djɛ mposɛka winá enkfumɔ ngo etepela wɛ wɔlɔ edjinge wekembɛ?
TOKANYI TONKINA
Kɛkɔnge kengotokotshɛ́ djɛ ndjala l’etepela wɛ wɔlɔ wekembɛ anto ankina?
Eka akambo wakoka nkokotshɛ́ djɛ ntona nkamba l’etepela wɛ pɔlɔ.
Lenda wopo w’okokɛ nangha dj’ipa nkfɔ l’ilonga yetepela wɛ ambɔ ante wɛ pɔlɔ.
Isola wopo wɔ Yehova ndakotshɛ́ mpame kɛmɔtshi kenanghisá la wolo djɛ ntshika etepela wɛ nyɛtshi.
‘Mbangaka nkanela wopo wɔ lowiko lɔ mayale ladjɛ mbika’ (Etange k’Olami, Ngɔndɔ k’enanɛyi 1, 2013)