Wopo wɔkɔnge Bible okokande nkokotshɛ́?

Isankfumɔ ndáwopolaka weepó efula lá nkambo djɛ lowiko, ekakasano, nyɔyi, la dj’etsho weyaye. Lonkina iso ndakiyanyɛka l’akambo walendana la lowiko lɔso lɔ lofu la lofu, ndjɔmbɔmba wopo w’okokaso nkotshɛ ehomba wɛso welá nkfumbo la ndjala l’osasa. Anto efula ndjawolaka ambɔ Bible mpɛyɛka nsakiso lá weepó welá lowiko olekoko ndakotshɛka lá lowiko lɔwɔ lɔ lofu la lofu. Iya wɛ, ongokanelake ente Bible nkoka nkokotshɛ́?

1. Weepó wɛkɔnge wɛ Bible okadjimolande?

Bible nkadjimolaka lá weepó wɛ djonyi wɛnɛ: Wopo wɔkɔnge lowiko yawange? Lamo oyɛso lanɛ lá looko? Ladjikɛnge anto wapalekɔ́ la mbalaka ɛnawɔ ndjolo? Oyalakaso mo ntsha tombovɔ? Ntsha anto ankfumɔ nkombolaka ndjala la lowiko l’osasa, lamo ambandji yomboleka? Looko yongoyala ngete mo l’etsho weyaye? Bible ntokembɛka djɛ mpona nsakiso lá weepó wɛsɔ, edjinge miliyɔ y’anto wɛnaka ambɔ nsakiso yɛpɛyɛ Bible ilekɔ nsɔsɔlɔ.

2. Oyɛwɔ mo, Bible nkoka nkokotshɛ́ lá lowiko lɔko lɔ lofu la lofu?

Bible ndola kfu l’alako wa wɔlɔ. Ndjɔmbɔmba, nkotshɛ ankfumbo djɛ ndjala l’osasa. Ntɛnyɛ kɛnɛ k’okokaso nangha winá w’oyɛso l’ekiyano, la wopo wɔ nsasanga l’olemo wɔso. Winá wɔ ngoteke onkanda wɔnɛ, ongewa alako wapɛyɛ Bible lá akambo wasɔ edjinge l’akambo ankina. Ongoyawola ente ‘Efunelo enkfumɔ, ntepela ente akambo ankfumɔ [welá Bible] walekɔ . . . djonyi.’—2 Timɔte 3:16.

TSHIMOLA

Lenda wopo wɔ Bible ndakotshɛ́ anto, kɛnɛ k’okokɛ nangha djɛ ndjala l’osasa wɔ ndoowala, edjinge lamo oyɛwɔ djonyi dj’onto nkokotshɛ́ djɛ wɛ nsipisoyɛ elakanyelo wel’eteyi wɔlɔwɔlɔ.

3. Bible nkoka ntɔlɔndjɛ

Bible dekɔ ngete owaya kana tɔrshɛ kɛpɛta efula. Bible nkoka ntokotshɛ́ djɛ ndɔsa akano wa wɔlɔ la djɛ ndjewa kɛnɛ kengonanghema l’etsho weyaye.

Wala Yeembo 119:105, ko kadjimola lá weepó wɛnɛ:

• Ontshumbi wɔ yeembo yɛnɛ, ndɔsaka Bible ngete mo?

• Iya wɛ, ɔsɛ Bible ngete mo?

4. Bible nkoka nkadjimola lá weepó wɛso

VIDEO: Totshutshɛke nkongi kaanga ndambo daambi! (1:48)

• Lá nkilika video djɛnɛ, weepó wɛkɔnge omoto wɔnɛ ndoyawopolaka?

• Wopo wɔkɔnge wekelo wɔ Bible iyokotshɛ́?

Bible ntokembɛka djɛ ndjopola weepó. Wala Mateo 7:7, ko kadjimola lá woopó wɔnɛ:

• Weepó wɛkɔnge w’okombolɛ mba nsakiso má Bible?

5. Wɛ nkoka nsasanga mbala Bible

VIDEO: Walelo wɔ Bible (2:05)

• Oyɛwɔ mo, ndangala dj’otepelawɔ lá video djɛnɛ wakɔpaki mbala?

• Kaanga iyotakɔpaki mbala, ladjikɛnge iyombotateyɛ nkɔpa mbala Bible?

Elakanyelo welá Bible ntokembɛka edjinge ntɔpɛyɛka nkongi. Wala Ɔrɔma 15:4, ko kadjimola lá woopó wɔnɛ:

• Ongokombolake ndjewa akambo efula lá kɛnɛ kelendana la ekembelo la nkongi djɛtɔpɛyɛ Bible?

6. Alekɔ wɔdju nsipisoyɛ elakanyelo wemá Bible winá w’onto onkina otokotshɛnde

Efula k’anto wakɔpaká mbala Bible iwɔ iyɔmɛlɛ, wɛnaka ambɔ djɛ nsipisoyɛ elakanyelo wel’eteyi wɔlɔ ngo onto onkina nkokotshɛ́. Wala Elemo 8:26-31, ko kadjimola lá woopó wɔnɛ:

• Okokaso nangha mo djɛ nsipisoyɛ Bible wɔlɔwɔlɔ?—Lenda vɛrse 30 edjinge 31.

LÁ YOPASƐ

Bible mpɛyɛka alako wa wɔlɔ walendana la lowiko lɔ lofu la lofu, nkadjimolaka lá weepó wɛ nkekete welá lowiko, mpɛyɛka anto ekembelo la ndapɛyɛka nkongi.

Mvungo

• Alako wa ngetenge w’otanaso lá Bible?

• Weepó ɛmɔtshi wɛkɔnge wɛ Bible okadjimolande?

• Kɛkɔnge k’okombolɛ ndjeka má Bible?

TOKANYI TONKINA

Lenda wopo wɔ alako welá Bible oyɛwɔ djonyi leso lɔɔko kɛnɛ.

‘Elakanyelo welá Bible—balo djetshikalaka lotshinda’ (Etange k’Olami No. 1 2018 lá Otetela)

Lenda wopo wɔ Bible yakotshɛ mpame kɛmɔtshi djɛ ndongela okakasano ɔmɔtshi woyalisá lande ngo m’ɔlɛngɛ wɔnde.

Wopo wɔ móyalaka l’osasa (2:53)

Shishima alako wa djonyi wa Bible ɔpɛyɛnde lá nkambo djɛ lowiko lelá nkfumbo.

“Toseke 12 tɔ osasa wɔ nkfumbo” (Wetshɔ! No. 2 2018 lá Otetela)

Lenda wopo wɔ Bible ɛnyɛnde papoo onto wɔlɔndjɛ andja wanɛ djɛ nsembola ikanyi yɛ nyɛtshi yelekɔ́ l’anto.

Lamo ndjeka Bible?—Video y’otale (3:14)