Lamo oyɛso ladjɛ mpona alako?

1. Okokaso ndɔsa akano wa wɔlɔ la nangha djɛ akano wakɔ ndjala l’eposelo wɛ wɔlɔ ngete mo? (Woongo 13:10; 15:22)

ISANKFUMƆ nkɔpaka ndɔsa akano wa wɔlɔ. La onto onkfumɔ nkombolaka djɛ ndɔsa akano wangoyala l’eposelo wɛ wɔlɔ. Otepela wɔ Ndjambe ntoshimelaka wopo wokokaso nkotshɛ okoma wɔsɔ.—Wala Woongo 13:10; 15:22.

2. Yehova otolakande djɛ ntonanghela nge?

² Lá nsɔsɔlɔ, Onto wɔ wɔlɔ wokoka ntɔpɛyɛ balo la alako nde, Papa kɛso Yehova. Atolaka djɛ ntokotshɛ́, atoshimela ante: ‘Lemi langokolaka la langokofunaka ntsho.’ (Yee. 32:8) Etepela wɛsɔ wɛtɛnyɛ ente Yehova apatɔpɛyɛka ngo alako toko, koko angilake onto l’onto yimba, la ntokotshɛ́ka djɛ nkamba l’alako wande.

3. Ɛnaso lá djamba djɛnɛ lɔ nge?

³ Lá djamba djɛnɛ, tongokamba l’Otepela wɔ Ndjambe djɛ nkadjimola lá weepó 4 wɛnɛ: 1) Oyɛso ladjɛ ndjala la wekeka wakɔnge ntsha tɔkɔpa mba wapɔ má alako wa wɔlɔ? 2) Okoka ntɔpɛyɛ alako wa wɔlɔ na? 3) Wopo wɔkɔnge wokokami nyɛnyɛ ente nkɔpa alako? 4) Lamo oyɛso ladjɛ ndjewɔ djɛ ndɔmba anto ankina djɛ ntɔsɛla akano?

OYƐMI LADJƐ NDJALA LA WEKEKA WAKƆNGE?

4. Djɛ mba wapɔ má alako wa wɔlɔ, oyɛso ladjɛ ndjala la wekeka wakɔnge?

⁴ Iso ladjɛ ndjala l’okitshakitshɛ ole la wɛdjimo djɛ mba wapɔ má alako wa wɔlɔ. Iso ladjɛ ndjawola ente tolekɔ la djonyi djɛ okotshɔ wɔ anto ankina djɛ ndɔsa akano wa wɔlɔ ntsha tombopomana la nkambo djɛ sotapomanaka ntondo. Iso ladjɛ ndjewa lonkina ente topewe nkambo nkfumɔ. Koko ntsha topalekɔ la okitshakitshɛ ole la wɛdjimo, Yehova apangotokotshɛ́, la topanghɛna djonyi djɛ nkamba la alako wɔtɔpɛyɛnde. (Mika 6:8; 1 Pɛ. 5:5) Koko ntsha tolekɔ la okitshakitshɛ ole la wɛdjimo, tongawola alako wa Bible la tongowa wapɔ m’eteyi.

5. Akambo wakɔnge wananghisá Nkfumi Davidɛ wakokisá ndokomɛ ofuno?

⁵ Tokolenda elakanyelo wokokaso mba má ndjɔmbɔmba kɛ Nkfumi Davidɛ. Akambo wa ndananghe wakokaka ndokomɛ ofuno. Lá ntondo kɛ nkoma nkfumi, ayalaka la lokumu efula má nde ayalaki ondjombe wɔ nsɔsɔlɔ efula. Wɔlɔmbaka djɛ ntshumbela nkfumi. (1 Sa. 16:18, 19) M’ɔkɔngɔ wɔ Davidɛ nkfutama avuta ete ngo nkfumi kɛngɔlɔnda, Yehova ɔpɛyɛka nkfulu má nyuma kɛnde k’ekina. (1 Sa. 16:11-13) Ewamaka efula má wopo wɔ ndayake antonyi w’Isariyɛlɛ, ngole Gɔliyatɛ, ntomela dj’ose Filistiya. (1 Sa. 17:37, 50; 18:7) Onto wombonangha akambo wa nkekete efula nghɔsɔ nkoka mfɛnyɛ ante apalekɔ la djonyi dj’alako w’anto. Koko Davidɛ atanangha nkɔkɔsɔ.

6. Ewaso ente Davidɛ okaki alako ngete mo? (Lenda ntshango djɛ loposo.)

⁶ M’ɔkɔngɔ wɔ nkoma nkfumi, Davidɛ asɔnaka tolongo tolakaki. (1 Ɛk. 27:32-34) Topakamɔ nkambo djɛsɔ mande Davidɛ ayalaki la ekfumbo kɛ ndjekameyɛ alako wa wɔlɔ. Atawola ngo alako w’ampame toko, koko ngole wa omoto wetawɔ ambɔ Abigayɛlɛ. Ndayalaka nde wadjɛ Nabalɛ, mpame kɛ ɔsɛndji, kepewe wɔlɔ la kepalɛmɛyɛ anto. Davidɛ akambaka la okitshakitshɛ onkfumɔ la dako djɛnde djɛ wɔlɔ, la eposelo weyalisá nde, djoshimbaka djɛ nangha ovunga w’ekekete.—1 Sa. 25:2, 3, 21-25, 32-34.

7. Elakanyelo wɛkɔnge wowaso má ndjɔmbɔmba kɛ Davidɛ? (Losanghanyɛ 4:13) (Lenda asango.)

⁷ Towa elakanyelo ɛmɔtshi me Davidɛ. Ndjɔmbɔmba, tokoka ndjala l’akoka kana la lowandji. Kaanga oyɛwɔ nghɔsɔ, topakoke nkanela ente tewa akambo ankfumɔ la topalekɔ la djonyi djɛ dako. Ete ngo Davidɛ, iso ladjɛ ndjala entshupa djɛ ndjoka dako, ayale djɛ onto wɔkɔna wotolaka. (Wala Losanghanyɛ 4:13.) Ntsha tombonangha nghɔsɔ, tongewɔ djɛ nangha evunga wɛ nkekete wekoka ntokomɛ iso la anto ankina lá ekakasano.

OKOKA MPƐYƐ LEMI DAKO DJƐ WƆLƆ NA?

8. Lamo Yɔnata ndayale l’akoka wa mpɛyɛ Davidɛ dako djɛ wɔlɔ?

⁸ Tokolenda olakanyelo onkina wowaso má ndjɔmbɔmba kɛ Davidɛ. Ekameyɛki alako w’anto wayalaki la djokanelo djɛ wɔlɔ la Yehova la wewaki wɔlɔ wɔlɔ ekakasano wɛ ndapomanaka. Ndjɔmbɔmba, winá wɔ ndakɔpaka ndjewa ntsha akoka ndjokana nya Nkfumi Saolo lonkina, Davidɛ okaka dako djɛ Yɔnata, wɔna Saolo. Ladjikɛnge Yɔnata ndewe ndɔpɛyɛ dako djɛ wɔlɔ djɛsɔ? Ladjikɛnde ayalaki la djokanelo djɛ wɔlɔ nya Yehova, la ewaki papa kɛnde Saolo wɔlɔ. (1 Sa. 20:9-13) Nkambo djɛsɔ otolakanyɛwɔ nge?

9. Okokaso ndɔmba dako winá woyɛso la djonyi na? Pakisola. (Woongo 13:20)

⁹ Winá woyɛso la djonyi djɛ dako, alekɔ wɔlɔ ndɔmba onto wolekɔ́ la djokanelo djɛ wɔlɔ la Yehova, la wewa nkambo dj’ohonaso okotshɔ.a (Wala Woongo 13:20.) Ndjɔmbɔmba, kɔsa djɛ wɔnanyɔ w’olangala alekɔ la djonyi djɛ mba wadji wɔ wɔlɔ. Onto wɔkɔna wokoka ndɔpɛyɛ alako wa wɔlɔ? Ilongo yɛnde itatshukana nkoka ndjewa ndolaka ntsha ambopika alako wande lá tɔkfɔ tɔ Bible. Koko wɔnanyɔ w’olangala nkoka mba alako wa djɔ la wa wɔlɔ ntsha ambopola antshukami imbotshunda lá nyuma, yowewa la ilekɔ́ l’osasa lá bala l’ilá kɛ etsho ɛmɔtshi.

10. Ɔkɔpaso nyɛna winá wɔsɔ nge?

¹⁰ Tombotepela wekeka 2 woyɛso ladjɛ ndjala, la anto wakoka ntɔpɛyɛ alako wa wɔlɔ. Tokolenda winá wɔsɔ wopo wokokaso nyɛnyɛ ente tɔkɔpa alako, la ntsha iso ladjɛ ndjopola anto ankina dj’iwɔ ntɔsɛla akano.

WOPO WƆKƆNGE WOKOKAMI NYƐNYƐ ENTE NKƆPA ALAKO?

11-12. a) Winá ɛmɔtshi okokaso nangha nge? b) Rɛhɔbɔamɛ ndananghe nge winá wɔ ndakɔpɛ ndɔsa nkano djɛ djonyi?

¹¹ Winá ɛmɔtshi, onto nkoka nyɛnyɛ ngo ngete ahona dako, koko lá nsɔsɔlɔ, ɔkɔpande ngo nshikikɛ ntsha nkano djɛ ndɔmbɔsa dekɔ wɔlɔ. Onto wɔ nghɔsɔ apɛnyɛ ante akɔpa alako. Akoka mba olakanyelo má ndjewo kɛ yapɛyɛ Nkfumi Rɛhɔbɔamɛ.

¹² Rɛhɔbɔamɛ apɛnaka Nkfumi Salɔmɔ ete ngo owandji wɔ Isariyɛlɛ. Winá wɔ Rɛhɔbɔamɛ ndakome nkfumi, anto wayalaki l’okfudji, koko wafɛnyɛki ambɔ Salɔmɔ akambɛka elemo wɛ wolo. Anto watshɔka te Rɛhɔbɔamɛ ko wɔlɔmbaka djɛ ndawapola odjito. Rɛhɔbɔamɛ alɔmbaka ndambo kɛ winá djɛ ntɔnɔla lá nkano dj’okokande ndɔsa. Awangaka wɔlɔ má ndɔmba ankɔlɔma ikotshisá Salɔmɔ dako. (1 Nk. 12:2-7) Koko, atonaka dako djɛ ankɔlɔma yɛkɔ. Lamo ndananghe nghɔsɔ? Rɛhɔbɔamɛ ɔsaka nkano ntondo, ko ndahonaka ngo anto ndjawola nkano djɛnde? Ntsha nghɔsɔ, alako wa winande dɛngɛ yɔpɛyɛ walosukaka nkano djɛnde. (1 Nk. 12:8-14) Rɛhɔbɔamɛ akadjimolaka anto lá nkilika kɛnɛ koshimelisá tolongo tɔnde. Eposelo weyalisá nde, owila wokapwanaka, tɔkɔlɛ efula tɔtɔmbɔkwɛlaka, la ngo má winá wɔsɔ, Rɛhɔbɔamɛ ayalaka la ekakasano efula.—1 Nk. 12:16-19.

13. Wopo wɔkɔnge wokokaso ndjewa ntsha tongawolake alako wa anto ankina?

¹³ Olakanyelo wɔkɔnge wowaso má ndjɔmbɔmba kɛ Rɛhɔbɔamɛ? Topakoke ndɔsa nkano ntondo, ko ntohona dako m’ɔkɔngɔ. Toyale entshupa djɛ ndjoka alako wotolakawɔ. Tokolawopola ente: ‘Langɔlɔmbake alako ko mpakambaka l’alako wakɔ ladjikɛnde apalekɔ kɛnɛ kɛ makombolaka ndjoka?’ Tokolenda ndjɔmbɔmba kɛnɛ.

14. Olɛso ladjɛ mvungɔ nge winá wowaso alako? Pakisola. (Lenda ntshango.)

¹⁴ Kɔsa djɛ wambeta wɔnanyɔ djɛ ndokamba olemo wɔ mfalanga efula. Lá ntondo kɛ ndjawola, ambohona dako me ikokolo. Wɔnanyɔ ambɔwɛnyɛ ante olemo wongowangoyɛ ilá efula nya nkfumbo kɛnde. Ikokolo ambovungola wɔnanyɔ tɔkfɔ tɔ Bible tɛnyɛ ente odjito wɔnde wɔ ntondo nde nkotshɛ ehomba wɛ nyuma wɛ nkfumbo kɛnde. (Ɛfɛ. 6:4; 1 Ti. 5:8) Kɔsa djɛ wɔnanyɔ apawolisá kɛnɛ kemboshimela ikokolo ko ambopola wananyɔ ankina l’otshumano nkambo djɛkɔ, ko manyi onto ɔmɔtshi amboshimela ante akoka nkamba olemo wɔkɔ. Wɔnanyɔ wɔsɔ alekɔ nsɔsɔlɔ la ohomba wɔ dako, ndo koko ambɔsa nkano ntondo ko ahona ngo onto wokoka nsuka nkano djɛnde? Iso ladjɛ mvungɔ ente oloko wɔso nkoka ntodjimba. (Jɛr. 17:9) Mbala imɔtshi, alako woyɛso la djonyi oyɛwɔ nde wasopakɔpɛ.

LEMI LADJƐ NDƆMBA ANTO ANKINA DJƐ NDƆSƐLA AKANO?

15. Oyɛso ladjɛ ndjewɔ djɛ nangha nge, ko lamo?

¹⁵ Onto onkfumɔ alekɔ la odjito wɔ ndɔsa akano wande. (Nga. 6:4, 5) Ete ngo isɔmɛna, onto wɔ balo angohonake alako lá Otepela wɔ Ndjambe la le Akristo wambotshunda lá nyuma lá ntondo kɛ nangha nkambo mɔtshi. Koko, iso ladjɛ ndjewɔ djɛ ndɔmba anto ankina djɛ ntɔsɛla akano. Amɔtshi ndjopolaka mbala kɛmɔ onto ambɔ: “Otananghɛ mo ntsha wɛ ndeke lombopomana lá nkambo djɛnɛ?” Ankina wakoka ndɔsa ngo nkano djɔsisa anto ankina ipa ndɔsa winá wɔ ntɔnɔla lá nkano djɛkɔ.

16. Nkambo djɛkɔnge mposisa lá Kɔrɛtɔ djelendana lá elambo wɛ yalambolaka tosakandole, ko oyalaki l’odjito wɔ ndɔsa nkano djɛ ndɛ kana dj’ipa ndɛ na? (1 Kɔrɛtɔ 8:7; 10:25, 26)

¹⁶ Kolenda nkambo mposisá lá otshumano wɔ Kɔrɛtɔ w’ɛtɛndɔ kɛ ntondo dendana la oleelo wɔ nkete djɛ yalambola tosakandole. Poolo afunelaka otshumano wɔsɔ ante: ‘Iso ndjewaka ente isakandole alekɔ ekete kɛ totoko l’andja la ente alekɔ Ndjambe ngo 1.’ (1 Kɔ. 8:4) Má etepela wɛ Poolo wɛsɔ, anto amɔtshi lá otshumano wɔsaka nkano djɛ ndɛ nkete djɛ yalambolaka tosakandole djɛ yasadjɛka lá lobengo. Akristo amɔtshi wɔsaka nkano djɛ ndɛ nkete djɛsɔ ipa nkfum’oloko yɛwɔ ndafutanyɛ. (Wala 1 Kɔrɛtɔ 8:7; 10:25, 26.) Ɔsɔ yayale nde nkano dj’onto l’onto ndayale ladjɛ ndɔsa. Poolo atalaka ase Kɔrɛtɔ dj’iwɔ ndɔsɛla winawɔ akano, kana dj’onto nangha kɛnɛ kɛ winande onanghawɔ. Onto onkfumɔ ayalaka ladjɛ ‘mbɛmba odjito wɔnde nyɔmɛlɛ ngɛndjɔ lá wiso wa Ndjambe.’—Ɔrɔ. 14:10-12.

17. Kɛkɔnge kekoka ntokomela ntsha tombonangha ngo kɛnɛ kenanghisá anto ankina? Kɔpɛyɛ ndjɔmbɔmba. (Lenda asango.)

¹⁷ Nkambo djɛ wopo wɔsɔ okokawɔ nanghema lɔɔko kɛnɛ ngete mo? Tokolenda tokekete tɔsawɔ má nkete 4 nkfumba ekila (fractions du sang). Okristo onkfumɔ ladjɛ ndɔsa nyɔmɛlɛ kɛnde nkano ntsha angawola kana angotona tokekete tɔsɔ.b Tokoka ndjala l’okakasano wɔ ndjoka nkambo djɛsɔ, koko ndɔsa nkano djɛ nghɔsɔ oyɛwɔ nde odjito wɔ onto onkfumɔ oyɛnde ladjɛ mbɛmba. (Ɔrɔ. 14:4) Ntsha iso ndɔsa nkano dj’onto onkina ndɔshi, tokoka ndɛmbɛ nkfum’oloko kɛso. Tokoka nkfumba la ndɔngɔsɔla nkfum’oloko winá wɔsaso akano wambopikama lá Bible. (Heb. 5:14) Iya winá woyɛso ladjɛ ndɔmba Okristo wombotshunda dako? M’ɔkɔngɔ wɔ nangha ehonelo wɛso koko topoke wɔlɔ, tokoka ndjala la djonyi djɛ okotshɔ djɛ ndjewa wopo wɔ nkamba la tɔkfɔ tɔ Bible tolendana la nkambo djɛso.

KINDJƐ MPONA ALAKO

18. Yehova ndombotonanghela nge?

¹⁸ Yehova amɛnyɛ ante atilela oloko má ntɔpɛyɛ akoka wa isɔmɛlɛ ndɔsa akano. Ambɔtɔpɛyɛ Otepela wɔnde, Bible. La ambɔtɔpɛyɛ tolongo tɔ balo tokoka ntokotshɛ́ djɛ ntɔnɔla lá tɔkfɔ tɔ Bible. Nde akotshɛ odjito wɔnde w’ete ngo Papa kɛso. (Woo. 3:21-23) Okokaso ndɔwɛnyɛ djedjɛ djɛso ngete mo?

19. Okokaso ndɔsa akano wasasangɛ Yehova ngete mo?

¹⁹ Tokolenda nkambo djɛnɛ: Ambotshi nkɔpaka winá wɔ wana wawɔ otshundawɔ lá nyuma, okomawɔ enkambi wɛ Yehova wɛ ntɔnɔ, wɛ balo la wekotshɛ́ anto ankina. Lá wopo wɔkɔ ɔmɔ, Yehova nsasangaka efula winá wɔtɛnande tofula lá nyuma, tohona alako la tɔsa akano wosasangɛ.