DJAMBA DJƐ WEKELO 25
Tokokolo, nyowe elakanyelo má ndjɔmbɔmba kɛ Ngidiyɔna
‘Lako winá wɔ lemi ntepela akambo walendana la Ngidiyɔna.’—HEB. 11:32.
YEEMBO 124 Toyalake mfu inkfumɔ la nkɔmano (lá Otetela)
LÁ YOPASƐa
1. Lá nkilika 1 Pɛtɛlɔ 5:2, odjito wɔkɔnge wɔ djonyi wolekɔ́ la tokokolo?
TOKOKOLO tɔ Akristo wawaká odjito wɔ nama ɛkɔkɔ wɛ ntsho wɛ Yehova. Ampame yeyapɛyɛ yɛsɔ ndɔsaka odjito wɔwɔ wɔ nkambela wananyɔ l’akaana yɛwɔ la ntshina efula edjinge nanghaka la wolo djɛ ndjala ‘anami walama nsɔsɔlɔ.’ (Jɛr. 23:4; wala 1 Pɛtɛlɔ 5:2.) Tolekɔ nsɔsɔlɔ la djedjɛ efula djɛ ndjala l’ampame yɛ nghɔsɔ lá ntshumano djɛso!
2. Ehemba wɛkɔnge wepomana la tokokolo tɔmɔtshi?
2 Tokokolo wangopomanake l’ekakasano efula, winá w’okotshɛwɔ edjito wɛwɔ. Ekakasano ɛmɔtshi nde, tokokolo ladjɛ nkamba la wolo djɛ nkotshɛ ehomba w’ase otshumano. Tony, ikokolo imɔtshi yelá États-Unis, ekaka djɛ ndeka ndjewa elelo wɛnde lá kɛnɛ kelendena l’elemo wawolande. Nde apakisola ante: “Má bango djɛ opela wɔ COVID-19, nsɛsaka nkamba olemo efula má nonghanyɛ nsanghanyɛ y’otshumano la y’olemo w’ipoposanyɛ. Koko kaanga k’enkfumɔ kɛ mananghaka kɛsɔ, akambo ankina wa nangha wayalaki ngo efula. Ekomo ekomo, ndjɛka ndosamba kaanga winá wɔ mbala Bible, nangha wekelo w’onto nyɔmɛlɛ, edjinge ndɔmba.” Ilir, ikokolo imɔtshi yelá Kosovo apomanaka l’okakasano onkina wotshikitanyi. Winá wɔ ndayalaka l’owila w’onanemaki mbandji, nde ayalaka l’okakasano wɔ nɛmɛyɛ alako wime olonghanyelo wɔ Yehova. Nde atepela ante: “Oloko wolo wɔmi wingelaka l’ohemba winá wɔ Betɛlɛ ndampɛyɛ odjito wɔ nkotshɛ́ka wananyɔ l’ankaana yeyalaki l’edjena kɛ mbalaka. Ndjalaka la wɔma efula, edjinge ɛlɔndjɛlɔ kɛ yampɛyɛka kɛnamaki etengo kepalekɔ wɔlɔ.” Tim, misiɔnɛrɛ kɛmɔtshi kelá Asie, ɛnaka ante alekɔ wolo nangha akambo ankfumɔ woyɛnde la djonyi djɛ nangha lofu la lofu. Nde atepelaka ante: “Lá winá ɛmɔtshi, langoyawokake ente lambɔlɛmba efula lá yimba la lá tokanyi. Kɛkɔnge kekoka nkotshɛ́ tokokolo topomana la wepo w’ekakasano wɛ nghɔsɔ?
3. Wapɔ wɛkɔnge w’okokaso mba isankfumɔ má nshishima ndjɔmbɔmba kɛ Isushi Ngidiyɔna?
3 Tokokolo nkoka mba elekanyelo má ndjɔmbɔmba kɛ Isushi Ngidiyɔna. (Heb. 6:12; 11:32) Nde ayalaki onseedji edjinge onami wɔ enkambi wɛ Ndjambe. (Tos. 2:16; 1 Ɛk. 17:6) Ngo ngete Ngidiyɔna, tokokolo wambɔsɔnamá djɛ nama enkambi wɛ Ndjambe l’eleko keleka ofutano kɛnɛ. (Ele. 20:28; 2 Ti. 3:1) Iso nkoka ndjeka akambo efula me Ngidiyɔna má wopo wɔ ndewaka elelo wɛnde, ndayalaka l’okitshakitshɛ, edjinge la dilɛmɛlɔ. Okfumedji wɔnde wingelaka l’ohemba winá wɔ ndakotshɛka edjito wɛnde. Ayale kaanga oyɛsonde ikokolo kana lako, iso nkoka mfudjɛ djedjɛ djɛso te tokokolo tɔso. Iso nkoka nsuka ampame yɛsɔ yekamba olemo wɔ wolo welá nyuma.—Heb. 13:17.
WINÁ WƆ NKOKA DJƐ NDJEWA ELELO WƐKO EDJINGE OKITSHAKITSHƐ WƆKO INGILAWƆ L’OHEMBA
4. Wopo wɔkɔnge Ngidiyɔna ndɛnyɛ ante nde ndjewaka elelo wɛnde edjinge alekɔ l’okitshakitshɛ?
4 Ngidiyɔna ayalaki mpame kewaki elelo wɛnde la k’okitshakitshɛ.b Winá wɔ ondjelo wɔ Yehova ndashimela Ngidiyɔna ante nde ambɔsɔnama djɛ ntshungola ase Isariyɛlɛ má nkfulu k’ase Midiyanɛ, mpame k’okitshakitshɛ kɛsɔ akadjimolaka ante: ‘Nkfumbo kɛmi ndeke nkfumbo kɛleka ndaambi laka Manase, edjinge lemi oyɛminde onto woleki daambi lá mvulu kɛ papa kɛmi.’ (Tos. 6:15) Nde ayawokaka etengo apalekɔ l’akoka wa nkotshɛ odjito wɔnde wɔsɔ, koko Yehova owewaki wɔlɔ. Má okotshɔ wɔ Yehova, Ngidiyɔna akotshɛka odjito wɔnde lá lɛdji lɔ wɔlɔ efula.
5. Lá winá wɔkɔnge tokokolo okokawɔ ndjala l’okakasano wɔ ndjewa elelo wɛwɔ la ndjala l’okitshakitshɛ?
5 Tokokolo nanghaka la wolo djɛ nyɛnyɛ ambɔ iwɔ ndjewaka elelo wɛwɔ edjinge walekɔ l’okitshakitshɛ l’akambo ankfumɔ. (Mika 6:8; Ele. 20:18, 19) Iwɔ wapayapayɛ lomo lomboleka m’ɔtɛ w’akoka wawɔ kana má akambo wonanghawɔ; wapoyawɔshi ambɔ wapalekɔ la ntshina m’ɔtɛ wɔ evunga wɛwɔ kana má akambo wa yopalonge. Kaanga oyɛwɔ nghɔsɔ, ikokolo nkoka mpomana l’ohemba. Ndjɔmbɔmba, nde nkoka ndjawola edjito efula ko m’ɔkɔngɔ nde ndɛna ante alekɔ wolo nkotshɛ edjito wɛkɔ enkfumɔ. Kana wakoka ndoowandjɛ má wopo wewande nkotshɛ odjito ɔmɔtshi kana ndɔɔwɔnyɔla lá wopo wɔ ndopewe nkotshɛ odjito onkina. Olakanyelo wɔkɔnge tokokolo okokawɔ mba má ndjɔmbɔmba kɛ Ngidiyɔna wongaakotshɛ́ l’akambo w’etengo wasɔ?
Má nkilika ndjɔmbɔmba kɛ Ngidiyɔna, ikokolo imɔtshi yewa elelo wɛnde alekɔ entshupa djɛ mpona okotshɔ, ndjɔmbɔmba wopo wɔ ndɔngɔsɔla olemo w’ipoposanyɛ lá prezantwarɛ (Lenda itenyi 6)
6. Olakanyelo wɔkɔnge tokokolo okokawɔ mba má ndjɔmbɔmba kɛ Ngidiyɔna lá kɛnɛ kelendana la ndjewa elelo wɛwɔ? (Lenda edjinge ntshango.)
6 Hona okotshɔ. Onto wewaka elelo wɛnde nsipisoyɛka ante apangoyala l’akoka wa nangha akambo ankfumɔ. Ngidiyɔna ɛnyɛka ante nde ndjewaka elelo wɛnde má ndjala entshupa djɛ mpona okotshɔ le anto ankina. (Tos. 6:27, 35; 7:24) Tokokolo tolekɔ́ l’awalo wangonanghake wopo wɔk’ɔmɔ. Tony, kanga sotepelaki má djiko, apakisola ante: “Má wopo wɔ mafule, láyalaki l’ekfumbo kɛ ndjawolaka elemo efula ndeka akoka wami. Djɛkondeke ndɔsaka nkano djɛ ndjeka l’ɔtɛmwɛlɔ wɔso wɔ nkfumbo wopo wɔ ndjala la djekeka djɛ ndjewa elelo edjinge ndɔmbaka wadjɛmi djɛ nshimela lemi ikanyi yɛnde. Ndendaka lonkina video djɛlá jw.org djelekɔ́ l’ɔtɛ wɔ djoyi ante: Comme Jésus, formons les autres, faisons-leur confiance et rendons-les capables.” Tony awangaka ndɔmba anto ankina dj’iwɔ ndookotshɛ́ l’elemo wɛnde w’efula. Eposelo wɛkɔnge weyalisá la nkambo djɛsɔ? Tony atepela ante: “Elemo welá otshumano, wetateyɛka nanghemá lá wopo wɔ wɔlɔ, edjinge lambotateyɛ mba winá wɔ nkembɛ lonyumá lɔmi.”
7. Wopo wɔkɔnge tokokolo okokawɔ ndjokola Ngidiyɔna, winá waawɔnyɔlawɔ? (Djakɔbɔ 3:13)
7 Tomalake ntsha anto amɔtshi wakɔnyɔla. Ohemba onkina wopomanaka la tokokolo nde ntsha wawɔnyɔla. Edjinge lá nkambo djɛsɔ, ndjɔmbɔmba kɛ Ngidiyɔna nkoka ndakotshɛ́. Ape l’ehamo ladjikɛnde nde ewaki ante alekɔ onto wɔ ntshamba djɛ djɔ, akadjimolaka l’okitshakitshɛ onkfumɔ winá wɔ ikɔlɛ y’Efrayimɛ yaye ndɔwɔnyɔla. (Tos. 8:1-3) Ngidiyɔna ataakadjimola la nkɛlɛ. Nde ɛnyɛka ante alekɔ l’okitshakitshɛ má ndjekameyɛ ekiyano wɛwɔ, la má ndaakadjimola la ngandji kenkfumɔ, ko kɛsɔ kekitshakitshɛka nkɛlɛ kɛwɔ. Tokokolo tombopakisɔ akambo ndjokolaka Ngidiyɔna má ndjekameyɛ la nkɔmɛ nkfumɔ edjinge má nkadjimola l’okitshakitshɛ winá waawɔnyɔlawɔ. (Wala Djakɔbɔ 3:13.) Má nangha nghɔsɔ iwɔ nkotshɛ́ka djɛ vu ndjala l’otshumano.
8. Wopo wɔkɔnge ampame yelekɔ́ l’edjito l’otshumano oyɛwɔ ladjɛ ndjelola winá wapɛyɛwɔ lomo? Pɛyɛ ndjɔmbɔmba.
8 Pɛyɛ Yehova lomo lonkfumɔ. Winá wɔ yawandjɛ Ngidiyɔna lá wopo wɔ ndalonge ase Midiyanɛ, nde akawoyɛka lomo lonkfumɔ te Yehova. (Tos. 8:22, 23) Wopo wɔkɔnge ampame yelekɔ́ l’edjito l’otshumano okokawɔ ndjokola Ngidiyɔna? Iwɔ ladjɛ mpɛyɛ Yehova lomo lonkfumɔ lá kɛnɛ k’onanghawɔ. (1 Ɛk. 4:6, 7) Ndjɔmbɔmba, ntsha wambowandola ikokolo imɔtshi má akoka wande wa ndakanyɛ, nde nkoka ntepela ante Otepela wɔ Ndjambe ndeke lotolakanyɛ kana ntepela ante mpeyi má okfumbelo w’owaso isankfumɔ má olonghanyelo wɔ Yehova. Tokokolo nkoka ntɔnɔlaka mbala la mbala ntsha wangolakanyɛke lá yopo yɛpɛyɛ Yehova lomo kana lá yopo yesepa tokanyi t’anto tewɔ yɔmɛlɛ. Kolenda kɛnɛ kekomelisá ikokolo imɔtshi y’etawɔ Timothy. Winá wɔ ndakome ikokolo bango, Timothy akɔpaki mpɛyɛ wamba efula. Nde ntepelaka ante: “Lakɔpaki mpɛyɛ etepela w’ewangelo w’etale etale la ndjɔmbɔmba yɛ wolo wolo. Mbala efula, kɛsɔ katshindaki anto ankina djɛ mbandjɛ lemi. Yɛnyi nde, nkambo djɛsɔ djasepaki tokanyi t’anto le lemi koko ape ta Bible kana te Yehova.” L’ilá k’etsho, Timothy ayɛka ndɛna djonyi djɛ ntshikitanyɛ yopo yɛnde yɛ ndakanyɛ djɛ ndjewɔ nsepa tokanyi t’anto lende nyɔmɛlɛ. (Woo. 27:21) Eposelo wɛkɔnge weyalisá la nkambo djɛsɔ? Nde apakisola ante: “Winá wɔsɔ wananyɔ l’ankaana wanshimela wopo wɔ djamba djɛmi iyaakotshɛ́ djɛ nkandola nkambo mɔtshi, nkfulumeyɛ ohemba ɔmɔtshi, kana djɛ ndeka ndasukanyɛ la Yehova. Langoyalake l’osasa efula winá w’okami etepela wɛwɔ wɛsɔ ndeka l’etsho wɛ yampɛyɛka lomo l’ɛnɔnyi wemboheta.”
WINÁ WƆ DILƐMƐLƆ KANA OLOKO WOLO WƆKO INGELAWƆ L’OHEMBA
Lá dilɛmɛlɔ nkfumɔ Ngidiyɔna akakitshɛka lofulo l’angala wande, ko asɔnaka angala 300 yewadjɛ (Lenda itenyi 9)
9. Wopo wɔkɔnge dilɛmɛlɔ la oloko wolo wɔ Ngidiyɔna yingela l’ohemba? (Lenda ntshango djelá loposo.)
9 M’ɔkɔngɔ wɔ Ngidiyɔna nsɔnama etengo isushi, dilɛmɛlɔ l’oloko wolo wɔnde wingelaka l’ohemba. Wɔpɛyɛka odjito w’ilisá lowiko lɔnde lá mbalaka, odjito wɔ ntshita etshumbelo kɛ Baala k’isɛkɛnde. (Tos. 6:25, 26) Masɔ, m’ɔkɔngɔ wɔ nde ntshumanyɛ angala wande, Yehova ashimelaka Ngidiyɔna mbala ipe y’etondo djɛ nkitshakitshɛ lofulo l’angala wande. (Tos. 7:2-7) Ekomo ekomo, woshimelaka djɛ nanyɛ antonyi wande la kati k’otsho.—Tos. 7:9-11.
10. Wopo wɔkɔnge dilɛmɛlɔ dj’ikokolo okokawɔ ndjingela l’ohemba?
10 Tokokolo ladjɛ ndjala ‘entshupa djɛ nɛmɛyɛ.’ (Dja. 3:17) Ikokolo yelekɔ́ la dilɛmɛlɔ ndjalaka entshupa djɛ nɛmɛyɛ kɛnɛ ketepela Afunelo edjinge ɛlɔndjɛlɔ kimá olonghanyelo wɔ Ndjambe. Má nangha nghɔsɔ, nde mpɛyɛka ndjɔmbɔmba kɛ wɔlɔ le anto ankina. Koko, dilɛmɛlɔ djɛnde nkoka ndjingela l’ohemba. Ndjɔmbɔmba, nde nkoka nyɛna ante alako wamboleka efula, kana wapemala ntshikitana edjinge alekɔ okakasano lende djɛ nkamba la wakɔ. L’akambo amɔtshi, nde nkoka ndawopola ntsha ɛlɔndjɛlɔ kɛmɔtshi kelekɔ nsɔsɔlɔ kɛ wɔlɔ kana kɛ balo. Kana wakoka ndɔlɔmba djɛ mbɛmba odjito ɔmɔtshi w’okoka ndjila lotshungɔ lɔnde lá mbalaka. Wopo wɔkɔnge tokokolo okokawɔ ndjokola dilɛmɛlɔ djɛ Ngidiyɔna l’akambo w’etengo wasɔ?
11. Kɛkɔnge kekoka nkotshɛ́ tokokolo djɛ ndjala la dilɛmɛlɔ?
11 Ekameyɛ ɛlɔndjɛlɔ la nkɔmɛ nkfumɔ edjinge kamba la kɛkɔ. Ndjambe ashimelaka Ngidiyɔna wopo wɔ ntshita etshumbelo k’isɛkɛnde, edjena kɛ ndongopikela Yehova etshumbelo kɛ bango, edjinge nyama k’okokande ndambola. Ngidiyɔna atila ehamo lá ɛlɔndjɛlɔ kɛsɔ, koko nde akilikaka ɛlɔndjɛlɔ kɛsɔ ngo mbala kɛkɔ kɛmɔ. Lɔɔko kɛnɛ, tokokolo mbaka ɛlɔndjɛlɔ má olonghanyelo wɔ Yehova má lotshimbo lɔ enkanda, andjewo, la alako watoyakala wapɔ lá nyuma edjinge lá demba. Iso nkɔpaka tokokolo tɔso lombombe lá wopo wokilikawɔ la nkɔmano nkfumɔ ɛlɔndjɛlɔ kɛ teokrasi. Otshumano w’otondo mbaka wapɔ.—Yee. 119:112.
12. Wopo wɔkɔnge tokokolo okokawɔ nkamba la Hebero 13:17 ntsha otshikitano ɔmɔtshi wombonanghema l’ɛlɔndjɛlɔ kɛ teokrasi?
12 Yala entshupa djɛ ndjekela l’etshikitano. Vungɔ ente Yehova alɔmbaka Ngidiyɔna djɛ nkawoyɛ angala nsuke l’ankfumɔ tá mbandja. (Tos. 7:8) Nde akokaka ndawopola ante: ‘Otshikitano wɔnɛ wolekɔ nsɔsɔlɔ djonyi? Akambo wangoheta ngo wɔlɔ?’ Kaanga yayale nghɔsɔ, Ngidiyɔna alɛmɛyɛka. Lɔɔko kɛnɛ, tokokolo ndjokolaka Ngidiyɔna má nkamba l’etshikitano w’apɛyɛwɔ m’ɛlɔndjɛlɔ kɛ teokrasi. (Wala Hebero 13:17.) Ndjɔmbɔmba, lá 2014 Iloyi yɛ lɔndjɛ atshikitanyɛka wopo wɔ mba mfalanga yɛ opikelo wɔ Amvulu y’Onkfumi, edjinge yɛ Amvulu yɛ Nsanghanyɛ yɛ nkekete. (2 Kɔ. 8:12-14) L’etsho wɛ ntondo, olonghanyelo wɔ Yehova wasɔmbɛki ntshumano mfalanga djɛ mpika Amvulu y’Onkfumi ko m’ɔkɔngɔ wasɔmbɔlaki mfalanga yɛ yasɔmbaka. Koko winá wɔsɔ, olonghanyelo akamba la epapɛyɛ wemá ntshumano djel’andja w’otondo djɛ mpika Amvulu y’Onkfumi la Amvulu yɛ Nsanghanyɛ yɛ nkekete lá djena nkfumɔ djoyɛwɔ la djonyi, kaanga ntsha otshumano wɔkɔ wopalekɔ l’akoka efula. Winá wɔ José ndoke otshikitano wɔsɔ, nde ilaka ehamo ante wopangoyala l’eposelo wɛ wɔlɔ, nde akanelaka ante: ‘Lako kaanga Mvulu k’Onkfumi kɛmɔ kengopikamá. Apalekɔ nghɔsɔ ndeke akambo onanghemawɔ l’etatshi kɛ looko kɛnɛ.’ Iya kɛkɔnge kekotshisá José djɛ nsuka ɛlɔndjɛlɔ kɛsɔ? Nde atepela ante: “Etepela welá Woongo 3:5, 6 wemvungolaka djɛ ndjilela Yehova oloko. Ko eposelo weyalaka wɛ wɔlɔ efula! Totakomá ngo lá mpika Mvulu y’Onkfumi efula toko, koko tekaka lonkina djɛ mpɛyɛ epapɛyɛ lá lɛdji lotshikitanyi dj’ipa otshikitano ndjala.”
Ayale l’ewila wɛ yomboshimba olemo wɔso, iso nkoka mpɛyɛ owakɛ l’oloko wolo onkfumɔ (Lenda itenyi 13)
13. a) Eshikikelo kɛkɔnge keyalisá la Ngidiyɔna? b) Wopo wɔkɔnge tokokolo okokawɔ ndjokola Ngidiyɔna? (Lenda edjinge ntshango.)
13 Nangha ɛkɔpa kɛ Yehova l’oloko wolo onkfumɔ. Ngidiyɔna alɛmɛyɛka Yehova kaanga lá winá wɔ ndayalaka la wɔma kana wɔ lowiko lɔnde yayalaka lá mbalaka. (Tos. 9:17) M’ɔkɔngɔ wɔ nde mba eshikikelo me Yehova, Ngidiyɔna ayashikikɛka ante Ndjambe angookotshɛ djɛ nama enkambi wɛnde. Tokokolo towika l’ewila wɛ yomboshimbá olemo wɔso ndjokolaka Ngidiyɔna. Iwɔ ndɔndjɛka nsanghanyɛ y’otshumano la y’olemo w’ipoposanyɛ l’oloko wolo onkfumɔ kaanga okokawɔ ndavunda, ndawopola weepó, ntshutshɛ elemo wɛwɔ, kana ndawɛnyɛ ndjolo.c Lá winá wɔ ndjolo k’ekekete, tokokolo wangoyala la djonyi dj’oloko wolo djɛ nɛmɛyɛ ɛlɔndjɛlɔ kɛ yongapɛyɛka kaanga nkambo djɛsɔ okokawɔ ndjila mbiko yɛwɔ lá mbalaka. Ɛlɔndjɛlɔ kɛsɔ nkoka ndjala kɛ mpoposanyɛ losango lɔ dombo edjinge kɛnɛ k’oyɛso ladjɛ nangha djɛ mbika lá mbandji kɛ Ngɔngɔ kelá Mangɔngɔ.—Ezk. 38:18; Ndj. 16:21.
WINÁ WƆ OKFUMEDJI WƆKO INGELAWƆ L’OHEMBA
14. Wopo wɔkɔnge okfumedji wɔ Ngidiyɔna yingela l’ohemba?
14 Odjito wɔ Ngidiyɔna wɔ isushi alɔmbaki ndjala la wolo wɔ demba. Winá wɔ ase Midiyanɛ yalote mbandji la kati k’otsho, Ngidiyɔna ákilikaka ntateyɛ má Zɛrɛra tii mboka k’enkfumɔ kɛ Ndjale kɛ Jɔrdanɛ, kɛ mbala imɔtshi kedjingamaki l’etamba wɛ nkekete efula. (Tos. 7:22) Ngidiyɔna emalaka lá Jɔrdanɛ? Lako! Kaanga ndalɛmbɛ, nde nya angala wande 300 wopaka Jɔrdanɛ edjinge wakindjɛka ndaakilika. Ekomo ekomo, iwɔ wavundaka ase Midiyanɛ ko waayakaka.—Tos. 8:4-12.
15. Lá winá wɔkɔnge okfumedji w’ikokolo okokawɔ ndjingela l’ohemba?
15 Lá winá ɛmɔtshi ikokolo nkoka ndawoka ante ambɔlɛmba lá yimba, lá demba, kana lá tokanyi djɛ nkotshɛ ehomba wel’otshumano la w’ase nkfumbo kɛnde. Wopo wɔkɔnge tokokolo okokawɔ ndjokola Ngidiyɔna, lá mbamba yɛ nghɔsɔ?
Tokokolo tɔ ngandji walekɔ entshupa djɛ nkotshɛ́ anto efula walekɔ́ la djonyi dj’okotshɔ (Lenda itenyi 16-17)
16-17. Kɛkɔnge kekotshisá Ngidiyɔna djɛ nkfulumeyɛ, ko eshikikelo kɛkɔnge kekoka ndjala la tokokolo? (Izaya 40:28-31) (Lenda edjinge ntshango.)
16 Yala l’eshikikelo ente Yehova angokokembɛ. Ngidiyɔna ayalaka l’eshikikelo ante Yehova angɔɔpɛyɛ lokembo edjinge apangɔɔpɛyɛ nsɔnyi. (Tos. 6:14, 34) Lofu lɔmɔtshi, Ngidiyɔna nya angala wande wakilikaka ankfumi y’ase Midiyanɛ l’ekolo ko ankfumi yɛsɔ wataalotaki lá ampunda yɛwɔ. (Tos. 8:12, 21) Koko, m’okotshɔ wɔ Ndjambe ase Isariyɛlɛ waavundaka ko waalongaka. Wopo wɔk’ɔmɔ ndeke, tokokolo nkoka ndawɛkɛ te Yehova, ‘kanga lopalɛmbaka kana lopatɛkaka.’ Nde angaapɛyɛ wolo winá woyɛwɔ la djonyi.—Wala Izaya 40:28-31.
17 Kolenda kɛnɛ kekomelisá Matthew, kanga lokamba lá kɔmite kɛpɛyɛ okotshɔ l’esakelo kɛ lankeke lankeke. Kɛkɔnge k’okotshisá djɛ nkfulumeyɛ? Matthew atepela ante: “Nyɛnaka nsɔsɔlɔ k’etepela welá Filipɛ 4:13. Mbala efula yɛ moyawokaka ente lambɔlɛmba efula, edjinge ente mpangokoka nkindjɛ lonkina, lalɔmbaki l’oloko ɔmɔ, lawɔndaki Ndjambe djɛ mpɛyɛ lemi wolo welá demba la welá yimba wɔ mayalaka la wɔkɔ djonyi djɛ nsuka wananyɔ wami. Lá winá wɛ nghɔsɔ, lokaki djɛ nyuma kɛ Yehova kampɛyɛki lokembo lɔ mayalaka la djonyi djɛ nkfulumeyɛ.” Ngo ngete Ngidiyɔna, tokokolo tɔso tokamba olemo wɔ wolo nkoka mpomana l’ekakasano winá w’okotshɛwɔ ehomba wɛ ɛnkɔkɔ wɛ Ndjambe la ngandji kenkfumɔ. Lá nsɔsɔlɔ, iwɔ ladjɛ ndjewa elelo wɛwɔ welá demba la welá yimba edjinge nkamba djɛ ndongela elelo wɛsɔ. Koko, iwɔ ladjɛ ndjala l’eshikikelo ambɔ, Yehova angoka ndɔmbɔ yɛwɔ yohonawɔ okotshɔ, edjinge angapɛyɛ lokembo lɔ nkfulumeyɛ.—Yee. 116:1; Flp. 2:13.
18. Lá yopasɛ, wopo wɔkɔnge tokokolo okokawɔ ndjokola Ngidiyɔna?
18 Tokokolo nkoka mba elakanyelo efula má ndjɔmbɔmba kɛ Ngidiyɔna. Tokokolo ladjɛ nyɛnyɛ ambɔ iwɔ ndjewaka elelo wɛwɔ la walekɔ l’okitshakitshɛ lá kɛnɛ kelendana l’edjito w’oyɛwɔ ladjɛ ndjawola edjinge lá wopo welolawɔ winá wawɔnyɔlawɔ kana wawandjɛwɔ. Iwɔ ladjɛ ndjala la dilɛmɛlɔ edjinge l’oloko wolo pekapeka winá wɔ sotaleke ntshɔ t’ekomo kɛ nkfumbo dj’akambo djɛnɛ. Edjinge ayale ekakasano wɛkɔnge wepomana lawɔ, iwɔ ladjɛ ndjala l’eshikikelo ambɔ Ndjambe nkoka ndaapɛyɛ lokembo. Lá nsɔsɔlɔ, tolekɔ la djedjɛ dj’efula l’olemo wɔ wolo w’okamba anami wasɔ edjinge ‘tokindjɛ ndawɔsa la ntshina efula.’—Flp. 2:29.
YEEMBO 120 Tokole ɔkɔkɛ w’Akristo (lá Otetela)
a Yehova asɔnaka Ngidiyɔna djɛ ndɔndjɛ la nama enkambi wɛnde l’eleko kelekisá wolo l’ɔkɔndɔ wɔ owila w’Isariyɛlɛ. Ngidiyɔna akotshɛka olemo wɔsɔ la nkɔmano nkfumɔ l’ilá k’ɛnɔnyi etengo 40. Koko, nde apomanaka l’ekakasano efula. Tongoshishima wopo wɔ ndjɔmbɔmba kɛnde okokawɔ nkotshɛ́ tokokolo lɔɔko kɛnɛ winá w’opomanawɔ l’ehemba.
b Ndjewa elelo wɛso la ndjala l’okitshakitshɛ alekɔ wekeka wafɛna efula. Iso nyɛnyɛka ente iso ndjewaka elelo wɛso má nsamba ndapɛyɛ lomo lomboleka edjinge má ndjewa ente ape akambo ankfumɔ ndeke oyɛso l’akoka wa nangha. Iso nyɛnyɛka ente tolekɔ l’okitshakitshɛ má nɛmɛyɛ anto ankina la má ndjawola ente iwɔ ntoleka. (Flp. 2:3) Mbala efula, onto wewaká elelo wɛnde ndjalaka edjinge l’okitshakitshɛ.
c Lenda djamba djelekɔ́ l’ɔtɛ wɔ djoyi ante: ‘Kindjɛ ntɛmɔla Yehova kaanga wamboshimba etolo kɛso’ lá Etange k’Olami Ngɔndɔ k’esambele 2019, nki. 10-11, ite. 10-13. (Lá Otetela.)