DJAMBA DJƐ WEKELO 49
Yehova angokadjimola ndɔmbɔ yɛmi?
‘Nyo nyongondjeta, nyongoyɛ la nyɔngɔndɔmba ko lemi langonyoka.’—JƐR. 29:12.
YEEMBO 41 Lambɔkɔwɔnda, oka lɔlɔmbɔ lɔmi (lá Otetela)
LÁ YOPASƐa
1-2. Lamo okokaso nkanela ente Yehova apakadjimola ndɔmbɔ yɛso?
‘SASANGA lá lɛdji l’efula le Yehova, ko nde angokotshɛ nsaki y’oloko wɔko.’ (Yee. 37:4) Ɔsɔngo daka ndeke lonangha wɔlɔ! Iya iso ladjɛ nkongela ente Yehova angɔtɔpɛyɛ ekete kenkfumɔ kɔlɔmbaso ngo mbala kɛkɔ kɛmɔ? Lamo opolaso wopo wɔsɔ? Tokolenda akambo walɔnda wanɛ. Nkaana kɛmɔtshi k’ondjemba alɔmba djɛ ndjingela lá Nkalasa k’Ansakodji y’Onkfumi. Ɛnɔnyi efula wemboheta, koko ngo wapowete. Wɔnanyɔ ɔmɔtshi w’olangala alɔmba Yehova djɛ ndosadjɛ má olando ɔmɔtshi wɔlɛmbɛ efula djɛ nde ndjala l’akoka wa ndeka ndokambela l’otshumano. Koko ngo apasale. Ambotshi w’Akristo walɔmba djɛ wɔnawɔ ntshikala lá nsɔsɔlɔ. Koko wɔnawɔ ambɔsa nkano djɛ ntshika nkambela Yehova.
2 Nkoka ndjala edjinge wɛ ɔmbɔlɔmbá Yehova nkambo mɔtshi, koko otawa nsakiso. Eposelo wekoka ndjala nde, okoka nkanela ente Yehova nkadjimolaka ndɔmbɔ y’anto ankina koko ape yɛko. Kana okoka nkanela ente ombonangha nkambo mɔtshi djɛ nyɛtshi. Nkaana kɛmɔtshi ketawɔ Janiceb akanelaka ngo nghɔsɔ. Nde nya womɛnde walɔmbaki lá kɛnɛ kelendana la mposɛ kɛwɔ kɛ ntokamba lá Betɛlɛ. Nde atepela ante: “Ndáshikikɛka ente lako ilá totshɔ tá Betɛlɛ.” Koko ɛnɔnyi l’angɔndɔ efula ihetaka, ko antshukami wasɔ lako mba leeta. Janice atepela ante: “Ndjalaka la yɛnyi efula la ntshimbaka yimba. Ndáwopolaka ntsha lambonangha nkambo mɔtshi djɛ nyɛtshi djembomadjɛ Yehova. Ndɔmbaka mbala efula djɛ otshelo wɔmi tá Betɛlɛ. Lamo ndopakadjimola ndɔmbɔ yɛmi?”
3. Kɛkɔnge k’otepelaso lɔ la djamba djɛnɛ?
3 Winá ɛmɔtshi, tokoka ndáwopola ntsha Yehova ndjokaka ndɔmbɔ yɛso. Kaanga ampame imɔtshi iyalaki la nkɔmano l’etsho wɛ ntondo wayalaka l’okiyano wɔsɔ. (Djɔ. 30:20; Yee. 22:2; Aba. 1:2) Kɛkɔnge kekoka nkoshikikɛ ente Yehova angokadjimola ndɔmbɔ yɛko? (Yee. 65:2) Djɛ nkadjimola lá woopó wɔsɔ, tokokadjimola lá weepó wɛnɛ: 1) Kɛkɔnge k’okokaso nkongela me Yehova? 2) Kɛkɔnge kɛ Yehova okongelande meso? 3) Lamo okokaso ntshikitanyɛ ndɔmbɔ yɛso imɔtshi?
KƐKƆNGE K’OKOKASO NKONGELA ME YEHOVA?
4. Lá nkilika Jɛrɛmi 29:12, kɛkɔnge kɛ Yehova otolakande?
4 Yehova ndakaka djɛ ndjoka ndɔmbɔ yɛso. (Wala Jɛrɛmi 29:12.) Ndjambe kɛso nkɔpaka enkambi wɛnde wɛ nkɔmano, djɛkondeke nde apimɛki yimba má ndɔmbɔ yɛwɔ lotshinda. (Yee. 10:17; 37:28) Koko, kɛsɔ kepasakisola ente nde angokadjimolaka ndɔmbɔ yɛso inkfumɔ. Iso nkoka nkonga tii l’andja wa bango dj’iso ndowa nkete mɔtshi dj’ɔlɔmbaso winá wɔsɔ.
5. Kɛkɔnge kɛ Yehova ɔkɔmɛkande winá w’ekameyɛnde ndɔmbɔ yɛso? Pɛyɛ ndjɔmbɔmba.
5 Yehova angɔkɔmɛke wopo w’okana ndɔmbɔ yɛso l’ikanyi yɛnde. (Iza. 55:8, 9) Etenyi kɛmɔtshi kɛ ikanyi yɛsɔ nde ndodjɛ looko l’ampame l’amato w’ɔlɛmɛyɛ l’osasa onkfumɔ etengo Owandji wɔwɔ. Koko Satana afunaka ante anto wangoleka ndjala l’osasa ntsha iwɔ ndálɔndjɛ yɔmɛlɛ. (Ewa. 3:1-5) Djɛ nyɛnyɛ ente etepela wɛ Djabolo wɛsɔ oyɛwɔnde ongolo, Yehova apɛyɛka anto lotshungɔ l’iwɔ ndálɔndjɛ yɔmɛlɛ. Koko, ɛlɔndjɛlɔ k’anto kemboyakalá ndjolo efula yopomanaso la yɛkɔ lɔɔkɔ kɛnɛ. (Los. 8:9) Iso tewa ente Yehova apangimɛ ndjolo inkfumɔ yɛsɔ win’ɔsɔ. Ntsha nde nangha nghɔsɔ, amɔtshi nkoka nkanela ambɔ ɛlɔndjɛlɔ kɛ wana w’anto kelekɔ wɔlɔ, la kelekɔ l’akoka wa nkandola ekakasano w’anto.
6. Lamo oyɛso ladjɛ ndáshikikɛ ente Yehova angonanghaka winá enkfumɔ akambo ngo la ngandji edjinge lá lɛdji lɔ djɔ?
6 Yehova nkoka nkadjimola ndɔmbɔ ifɛna lá topo totshikitanyi. Ndjɔmbɔmba, winá wɔ Nkfumi Hizikiya ndatate olando w’ekekete, nde alɔmbaka Yehova djɛ ndokotshɛ́ djɛ nde nsala. Ko, Yehova osadjɛka. (2 Nk. 20:1-6) L’onkoko onkina, winá wɔ ɔpɔstɔlɔ Poolo ndawɔndɛ Yehova djɛ ndowimɛ ‘ɔnsɛsɛ má demba,’ nkoka ndjala olando, Yehova lako ndowimeyɛ okakasano wɔsɔ. (2 Kɔ. 12:7-9) Tokolenda lonkina ndjɔmbɔmba kɛ ɔpɔstɔlɔ Djakɔbɔ nya Pɛtɛlɔ. Nkfumi Herodɛ akɔpaka ndayaka yape kɛkɔ. Otshumano w’otondo wɔlɔmbɛlaka Pɛtɛlɔ, nkoka ndjala edjinge Djakɔbɔ. Koko Djakɔbɔ avɔka ko ondjelo awikɛka Pɛtɛlɔ má nsese. (Ele. 12:1-11) Tokoka ndáwopola ente: ‘Lamo Yehova ndawikɛ Pɛtɛlɔ ko ntshika Djakɔbɔ?’ Bible mpatepela nkambo djɛsɔ.c Kɛnɛ k’oyɛso l’eshikikelo nde ente Yehova apananghaka ‘akambo la ntshamba djɛ sii.’ (Mvu. 32:4) Edjinge tewa ente Pɛtɛlɔ nya Djakɔbɔ wawolamaki me Yehova. (Ndj. 21:14) Winá ɛmɔtshi, Yehova nkoka nkadjimola ndɔmbɔ yɛso lá lɛdji lɔ sotakanelaki. Koko ladjikɛnde tolekɔ la djawo ente ndjɔndɔ yɛ Yehova l’alɔmbɛlɔ waso ingoyalaka winá enkfumɔ ngo yɛ sii la yɛ ngandji, topakoke nkiyana lá wopo w’ɔsɔnande djɛ ntokadjimola.—Djɔ. 33:13.
7. Kɛkɔnge k’oyɛso ladjɛ ndjewɔ, ko lamo?
7 Tewɔ ndjɛdjɛ kɛnɛ ketokomela la kekomela anto ankina. Ndjɔmbɔmba, iso nkoka ndɔmba Yehova djɛ ntokotshɛ́ lá yopo imɔtshi yɛ kɔɔ, koko lɔlɔmbɔ lɔso lopakadjimolamisa. M’ɔkɔngɔ, tomboyɛ ndewa ente onto ɔmɔtshi alɔmbaka lɔlɔmbɔ lɔ wopo wɔk’ɔmɔ, koko Yehova okadjimolaka. Nkaana kɛmɔtshi ketawɔ Anna apomanaka la nkambo djɛ nghɔsɔ. Nde alɔmbaka djɛ womɛnde Matthew, nsala m’olando wɔnde wɔ kansɛrɛ. Ngo lá winá wɔkɔ, nkaana ipe y’Akristo yɛ nkokolo wayalaki la kansɛrɛ. Anna alɔmbaka efula lá nkambo djɛ Matthew la djɛ nkaana ipe yɛsɔ. Ankaana wasalaka, koko Matthew avɔka. Má bango, Anna ayawopolaki ntsha ankaana ipe yɛsɔ yasale nde má okotshɔ wɔ Yehova. Ntsha oyɛwɔ nde nghɔsɔ, lamo Yehova ndotakadjimola lá ndɔmbɔ yɛ ndalɔmbaka djɛ womɛnde nsala m’olando? Lá nsɔsɔlɔ, topewe wopo wɔ ankaana yɛsɔ yasale. Kɛnɛ k’ewaso nde Yehova alekɔ la nkando lá ndjolo yɛso inkfumɔ edjinge akombola nkfundola tolongo tɔnde tɔ ngandji tombovɔ́.—Djɔ. 14:15.
8. a) Lá nkilika Izaya 43:2, wopo wɔkɔnge Yehova otosukande? b) Wopo wɔkɔnge lɔlɔmbɔ okokawɔ ntokotshɛ́ winá w’opomanaso l’ekakasano wɛ wolo? (lenda video djelekɔ́ l’ɔtɛ wɔ djoyi ante: Dɔmbɛlɔ tokimanyiyaka dia mbikikɛ tena dia wolo.)
8 Yehova angotosukaka winá enkfumɔ. Etengo oyɛnde Papa kɛso kɛ ngandji, Yehova apakɔpaka ntɛna tɛna ndjolo. (Iza. 63:9) Koko, nde apashimbe ekakasano enkfumɔ welekɔ́ etengo andjale la ndjombe y’iyɛ ntokomela. (Wala Izaya 43:2.) Kaanga oyɛwɔ nghɔsɔ, nde atolaka djɛ ntokotshɛ́ dj’iso ‘nkfulumeyɛ’ ekakasano enkfumɔ. Apangawola djɛ ekakasano wɛso ntonanghela nyɛtshi kɛ lotshinda. Yehova ntɔpɛyɛka lonkina nyuma kɛnde k’ekina kɛ nkfulu djɛ ntokotshɛ́ djɛ nkfulumeyɛ. (Luka 11:13; Flp. 4:13) Eposelo wengoyala nde, ntongoyala l’eshikikelo ente tongowaka winá enkfumɔ kɛnɛ k’oyɛso la djonyi djɛ nkfulumeyɛ la djɛ ntshikala la nkɔmano tende.d
KƐKƆNGE KƐ YEHOVA OKONGELANDE MESO?
9. Lá nkilika Djakɔbɔ 1:6, 7, lamo oyɛso la djonyi djɛ ndashikikɛ ente Yehova angotokotshɛ?
9 Yehova nkongelaka dj’iso ndáwɛkɛ tende. (Heb. 11:6) Winá ɛmɔtshi, ehemba wɛso nkoka nyɛnama etengo topakokaki nkfulumeyɛ. Tokoka kaanga ndjila ehamo ente Yehova angotokotshɛ. Koko Bible ntoshikikɛka ante má wolo wɔ Ndjambe tokoka ‘mpanda l’epele.’ (Yee. 18:29) Djɛkondeke, l’edjena k’iso ndjila ehamo iso ladjɛ ndɔmba la djawo nkfumɔ, l’eshikikelo ente Yehova angokadjimola ndɔmbɔ yɛso.—Wala Djakɔbɔ 1:6, 7.
10. Kɔɔpɛyɛ ndjɔmbɔmba kɛnyɛ wopo w’okokaso nangha akambo lá nkilika ndɔmbɔ yɛso.
10 Yehova nkɔpaka iso nangha akambo w’okana la ndɔmbɔ yɛso. Ndjɔmbɔmba, wɔnanyɔ nkoka ndɔmba Yehova djɛ ndokotshɛ́ djɛ nde mba konje k’olemo wɔnde wɔ demba djɛ nde ndjala l’akoka wa ntingela lá losanghanyɛ lɔ rɛjɔ. Wopo wɔkɔnge Yehova okokande nkadjimola lá lɔlɔmbɔ lɔsɔ? Nde nkoka mpɛyɛ wɔnanyɔ oloko wolo woyɛnde la djonyi djɛ ntosawola l’owandji wɔnde. Koko wɔnanyɔ angokamba la lɔlɔmbɔ lɔnde má ntshɔ ntɔlɔmba owandji wɔnde. Nde nkoka ndjala la djonyi djɛ nangha nkambo djɛsɔ mbala la mbala. Nde nkoka kaanga ndjokana nya winande w’olemo djɛ mpenghanyɛ mfu yɛ olemo. Ntsha lonyi lolekɔ, nde nkoka kaanga ndɔmba dj’iwɔ ndowopela mfalanga m’ɔtɛ wɔ mfu yɛ ndongoyala lá losanghanyɛ.
11. Ladjikɛnge oyɛso ladjɛ ndɔmbaka mbala la mbala lá kɛnɛ kelendana l’ekiyano wɛso?
11 Yehova nkongelaka dj’iso ndɔlɔmbaka mbala la mbala dj’ekiyano wɛso. (1 Te. 5:17) Yeso ɛnyɛka ante ndɔmbɔ yɛso ipangokadjimwama mbala kɛkɔ kɛmɔ m’ɔkɔngɔ w’iso ndɔmba. (Luka 11:9) Koko totapekɔke! Tɔlɔmbake mbala la mbala edjinge l’oloko ɔmɔ. (Luka 18:1-7) Winá w’okindjɛso ndɔmba djɛ nkambo mɔtshi, tɔngɛnyɛke Yehova ente kɛnɛ k’ɔlɔmbaso kelekɔ nsɔsɔlɔ djonyi. Tɔngɛnyɛke lonkina djawo djɛso tá akoka wande wa ntokotshɛ́.
LAMO OKOKASO NTSHIKITANYƐ NDƆMBƆ YƐSO WINÁ ƐMƆTSHI?
12. a) Woopó ɔmɔtshi wɔkɔnge w’oyɛso ladjɛ ndáwopola lá kɛnɛ kelendana la ndɔmbɔ yɛso, ko ladjikɛnge? b) Wopo wɔkɔnge w’okokaso ndáshikikɛ ente ndɔmbɔ yɛso mpɛyɛka Yehova dilɛmɛlɔ? (Lenda ipapango ilekɔ́ l’ɔtɛ wɔ djoyi ante: “Ndɔmbɔ yɛmi mpɛyɛka Yehova dilɛmɛlɔ?”)
12 Ntsha ngo topawa kɛnɛ k’ɔlɔmbaso, tokoka ndawopola weepó esato wɛnɛ. Wɔ ntondo, ‘Ɔlɔmbami ngo ekete kɛ wɔlɔ?’ Mbala efula, iso mfɛnyɛka ente tewa kɛnɛ kelekɔ́ wɔlɔ leso. Koko kɛnɛ k’ɔlɔmbaso nkoka ndjala kepalekɔ djonyi leso. Ntsha tɔlɔmba djɛ nkambo mɔtshi, nkando kɛmɔtshi kɛ wɔlɔ keleká kɛnɛ k’ɔlɔmbaso nkoka ndjala. Edjinge nkete mɔtshi dj’ɔlɔmbaso nkoka ndjala ko mpokana l’ɛkɔpa kɛ Ndjambe. (1 Dj. 5:14) Ndjɔmbɔmba, tokolenda nkambo dj’ambotshi wa sotepelaki má djiko. Iwɔ walɔmbaka Yehova djɛ nde nangha djɛ wɔnawɔ nkindjɛ ntshikala lá nsɔsɔlɔ. Dɔmbɛlɔ djɛsɔ djɛnama etengo dekɔ wɔlɔ. Koko, Yehova apatshindaka onto djɛ ndokambela. Nde nkombolaka isankfumɔ, ndjila edjinge wana waso, ndɔsa nkano djɛ ndokambela. (Mvu. 10:12, 13; 30:19, 20) Djɛkondeke, kɛnɛ kɛ ambotshi wasɔ otakokawɔ ndɔmba nde, djɛ Yehova ndakotshɛ́ dj’iwɔ mvunda oloko wɔ wɔnawɔ djɛ nde nkɔpa Yehova la nkoma ilongo yɛnde.—Woo. 22:6; Ɛfɛ. 6:4.
13. Lá nkilika Hebero 4:16, winá wɔkɔnge Yehova ndongotokotshɛ? Pakisola.
13 Woopó w’ape nde, ‘Oyɛwɔ mo, ɔnɛ ndeke winá wɔ wɔlɔ le Yehova djɛ nde nkadjimola lɔlɔmbɔ lɔmi?’ Iso nkoka nkanela ente tolekɔ la djonyi djɛ ndjɔndɔ kɛ lankeke lá ndɔmbɔ yɛso. Koko lá nsɔsɔlɔ, Yehova ndjewaka winá woleka wɔlɔ wɔ ntokotshɛ́. (Wala Hebero 4:16.) Ntsha topawisa kɛnɛ k’ɔlɔmbaso mbala kɛkɔ kɛmɔ, tokoka mfɛnyɛ ente Yehova ‘Apatɔndɔlisa.’ Koko la nsɔsɔlɔ, ndjɔndɔ kɛnde okokawɔ ndjala nde ‘Ape winá wɔsɔ.’ Ndjɔmbɔmba, tokovungɔ wɔnanyɔ wɔlɔmbaki djɛ nde nsala má olando wɔnde. Ntsha Yehova ambɔkɔnɔla má nsese, Satana nkoka mfuna ante wɔnanyɔ okindjɛnde nkambela Yehova ngo ladjikɛnde Yehova osadjɛka. (Djɔ. 1:9-11; 2:4) Ladjiko djɛ lasɔ, Yehova amboshiyɛ́ nshikikɛ winá wɔ ndongosadjɛ elando enkfumɔ. (Iza. 33:24; Ndj. 21:3, 4) Koko tii winá wɔsɔ topakoke nkongela dj’iso nsala lá wopo wɔ nsese. Djɛkondeke, kɛnɛ kɛ wɔnanyɔ okokande ndɔmba nde, djɛ Yehova ndɔpɛyɛ lokembo la vu djelá yimba djɛ nkfulumeyɛ olando wɔnde la djɛ nde nkindjɛ nkambela Yehova la nkɔmano nkfumɔ.—Yee. 29:11.
14. Olakanyelo wɔkɔnge sombowa má kɛnɛ kekomelisá Janice?
14 Tokovungɔ Janice, kanga lɔlɔmbisá Yehova lá nkambo djɛ otshelo wɔnde tá Betɛlɛ. Ɛnɔnyi etano wehetaka lá ntondo kɛnde ndosipisoyɛ wopo wɔ Yehova ndakadjimola ndɔmbɔ yɛnde. Nde atepela ante: “Yehova akambaka la winá wɔsɔ djɛ ndakanyɛ la mbɔngɛ lemi. Wɛkamo wɔmi tende woyalaka la djonyi djɛ mfula. Ndjalaka la djonyi djɛ ndɔngɔsɔla wekelo wɔmi w’onto nyɔmɛlɛ. Edjinge ndjalaka la djonyi djɛ mba osasa wɔ nsɔsɔlɔ w’opaye má akambo wankomela.” M’ɔkɔngɔ, wetaka Janice nya womɛnde djɛ ntokamba l’olemo w’edjingadjinga. Janice avungɔ ante: “Yehova akadjimolaka lá ndɔmbɔ yɛmi ape lá wopo wɔ makombolaka. Alɔmbamaka ndambo k’etsho djɛ lemi ndosipisoyɛ wopo wɔ ndjɔndɔ kɛnde yayale wɔlɔ, koko ndekɔ l’osasa lá wopo wɔ mawa mbamba kɛ nyɛna ngandji l’oloko wɔlɔ wɔ Yehova.”
Ntsha ɛna ente opawa ndjɔndɔ me Yehova, lɔmba akambo ankina (Lenda itenyi 15)f
15. Lamo lá winá ɛmɔtshi sopakoke ntepela wopo wokombolaso djɛ ndɔmbɔ yɛso nkadjimɔma? (Lenda edjinge ntshango.)
15 Woopó w’asato nde, ‘Lemi ladjɛ ndɔmba ekete kɛmɔtshi lonkina?’ Kaanga oyɛwɔ wɔlɔ ntepela wopo w’okombolaso djɛ ndɔmbɔ yɛso nkadjimɔma, lá wina ɛmɔtshi angoleka wɔlɔ nsamba ntepela wopo wɔkɔpaso nde ntokadjimola dj’iso nyɛna kɛnɛ kɛ Yehova ɔkɔpande leso. Tokolenda ndjɔmbɔmba kɛ nkaana k’ondjemba kɛlɔmbaki djɛ ndjingela lá Nkalasa k’Ansakondji y’Onkfumi. Nde akombolaki ndjingela nkalasa djɛ nde ntshɔ ntokamba l’edjena keyalaki la lonyi lɔ ansakondji. Djɛkondeke, winá wɔ ndakindjɛka ndɔmba dj’iwɔ ndoweta tá nkalasa, nde akokaka ndɔmba lonkina Yehova djɛ nde ndokotshɛ́ djɛ ndjisola mbamba yɛ nde mfundjɛ olemo wɔnde w’ipoposanyɛ. (Ele. 16:9, 10) Masɔ, nde akokaka nangha akambo lá wopo w’okana l’alɔmbɛlɔ wande má ndjopola olami wɔnde w’edjingadjinga ntsha otshumano ɔmɔtshi w’entshupa wolekɔ la djonyi djɛ tat’ekalo. Kana nde nkoka mfunela biro djɛ filiyalɛ djɛ ndalɔmba edjena k’oyɛwɔ la djonyi efula djɛ ansakondji y’Onkfumi.e
16. Eshikikelo kɛkɔnge k’oyɛso ladjɛ ndjala la kɛkɔ?
16 Etengo sɔmbɛna, tokoka ndjala l’eshikikelo ente Yehova angokadjimolaka ndɔmbɔ yɛso la ngandji edjinge lá lɛdji lɔ djɔ. (Yee. 4:3; Iza. 30:18) Mbala imɔtshi topangowaka ndjɔndɔ y’okombolaso. Koko Yehova apangimɛ yimba má ndɔmbɔ yɛso kaanga ndambo daambi. Nde ntɔkɔpaka lombombe. Edjinge nde apatokadjɛki lotshinda. (Yee. 9:10) Djɛkondeke tokindjɛ ‘ndáwɛkɛ tende winá enkfumɔ,’ todjipole eloko wɛso lá lɔlɔmbɔ.—Yee. 62:8.
YEEMBO 43 Lɔlɔmbɔ l’okawoyelo wɔ lokasa (lá Otetela)
a Djamba djɛnɛ ngotopakisola donga dj’okokaso ndjala l’eshikikelo ente Yehova angokadjimolaka ndɔmbɔ yɛso winá enkfumɔ la ngandji edjinge lá lɛdji lɔ djɔ.
b Nkombo imɔtshi itshikitanyemaka.
c Lenda djamba djelekɔ́ l’ɔtɛ wɔ djoyi ante: “Ongoyalake la djawo ente Yehova angonanghake akambo ankfumɔ ngo lá yopo yɛ wɔlɔ?” lenda Etange k’Olami Ngɔndɔ k’ape 2022, ite. 3-6.
d Djɛ ndjewa akambo ankina efula lá wopo wɔ Yehova otokotshɛnde djɛ nkfulumeyɛ ekakasano, lenda video djelekɔ́ l’ɔtɛ wɔ djoyi ante Dɔmbɛlɔ tokimanyiyaka dia mbikikɛ tena dia wolo, lá jw.org.
e Djɛ ndjewa alako wa wopo w’okokɛ ntokamba lá etatshi kɛ looko kɛ filiyalɛ k’enkina, lenda Tamboyakongɛ dia nsala lolango la Jehowa, shap. 10, ite. 6-9.
f NSAKISO Y’ASANGO: Nkaana ipe walɔmba Yehova lá ntondo k’iwɔ ndondjɛ demandɛ djɛ ndjingela lá Nkalasa k’Ansakodji y’Onkfumi. M’ɔkɔngɔ, ɔmɔtshi wamboweta, onkina wapowetisa. L’edjena kɛnde ndjala la yɛnyi y’efula, nkaana kɛ yopetisa, alɔmba Yehova djɛ ndookotshɛ́ djɛ nyɛna mbamba inkina yɛ mfundjɛ olemo wɔnde w’ipoposanyɛ. Manyi nkaana kɛkɔ afunela biro djɛ filiyalɛ onkanda djɛ ntokamba l’ɛkɔpa l’edjena k’oyɛwɔ la djonyi djɛ ansakondji.