Tosasange la nkongi djepatɔtɛkɛ nsɔnyi

1. Ladjikɛnge Abrahama ndakindjɛka nkongela wɔna?

YEHOVA alakaka ilongo yɛnde Abrahama ante ewila enkfumɔ wengosakolama má mbamba k’inkanola yɛnde. (Ewa. 15:5; 22:18) Ladjikɛnde Abrahama ayalaki la djawo djɛ wolo te Ndjambe, nde ayalaki l’eshikikelo ante daka djɛ Ndjambe ngokotshama. Kaanga yayale nghɔsɔ, winá wɔ Abrahama ndakome l’ɛnɔnyi nsuke la 100 edjinge wadjɛnde ɛnɔnyi 90, antshukami wa djawo wasɔ ngo watawotaki. (Ewa. 21:1-7) Koko, Bible ntepela ante: ‘M’ɔtɛ wɔ nkongi, [Abrahama] ayalaki la djawo ante angokoma papa kɛ ewila efula lá nkilika kɛnɛ ketepelamisá.’ (Ɔrɔ. 4:18) Wɛ ndjewaka ente nkongi djɛ Abrahama nkotshamaka. Nde akomaka papa kɛ Izaka, wɔna wɔ ndakongela ilá efula. Lamo Abrahama ndayalaka l’eshikikelo ante Yehova angokotshɛ daka djɛnde?

2. Ladjikɛnge Abrahama ndayale l’eshikikelo ante daka djɛ Yehova ngokotshama?

² Ladjikɛnde Abrahama ayalaki la djokanelo djɛ ma ma la Yehova, nde ayalaki ‘l’eshikikelo kenkfumɔ ante kɛnɛ kɛ [Ndjambe] ndalake’ kengokotshama. (Ɔrɔ. 4:21) Yehova awolaka Abrahama la owetaka ante onto wɔ wɔlɔ, m’ɔtɛ wɔ djawo djɛnde. (Dja. 2:23) Etengo Ɔrɔma 4:18 ɛnyɛnde, djawo djɛ Abrahama djayalaki la djokanelo la nkongi djɛnde. Nyontshɔ tokoshishima winá wɔsɔ kɛnɛ kɛ ɔpɔstɔlɔ Poolo ndatepela lá kɛnɛ kelendana la nkongi, etengo otepelawɔ lá Ɔrɔma shapitrɛ 5.

3. Kɛkɔnge kɛ Poolo opakisolande lá kɛnɛ kelendana la nkongi?

³ Poolo apakisola lamo okokaso ndjala l’eshikikelo ente ‘nkongi djɛso mpatɔtɛkɛki nsɔnyi.’ (Ɔrɔ. 5:5) Atokotshɛ́ lonkina djɛ nsipisoyɛ wopo wɔ nkongi djɛso djɛ Okristo okokawɔ nkemba. Winá wɔ sotashishima ikanyi yɛ Poolo ndapike nghɔmɔ ɛnsɔsɔ lá Ɔrɔma 5:1-5, kótatɔnɔlaka lá wopo wɔ nkongi djɛko yotakembe l’ilá k’etsho. Djamba djɛso ngɛnyɛ lonkina wopo w’okokɛ nkembɛ djawo djɛko ndeka wopo w’oyɛwɔ winá wɔsɔ. Nyontshɔ tokoshishima ntondo nkongi djɛ wɔlɔ lombombe djɛ Poolo ndatepala ante mpangɔtɔtɛkɛ nsɔnyi.

NKONGI DJƐSO DJƐ WƆLƆ LOMBOMBE

4. Kɛkɔnge k’otepalawɔ lá Ɔrɔma 5:1, 2?

⁴ Wala Ɔrɔma 5:1, 2. Poolo ndafunela etepela wɛnɛ nde otshumano wɔ Ɔrɔma. Wananyɔ l’ankaana iyalaki l’eteyi wekaka akambo walendana la Yehova ole la Yeso, wɛnyɛka djawo, la wakomaka Akristo. Djɛkondeke Ndjambe ‘awɔsaka etengo anto wa wɔlɔ m’ɔtɛ wɔ djawo djɛwɔ,’ edjinge akfutaka avuta la nyuma k’ekina. Ɛwo, iwɔ wawaka nkongi djɛ nsɔsɔlɔ la djɛ wɔlɔ lombombe.

5. Nkongi djɛkɔnge djelekɔ́ l’ankfutami w’avuta?

⁵ M’ɔkɔngɔ Poolo alofunelaka Akristo w’ankfutami w’avuta wa Ɛfɛsɛ nkambo djelendana la nkongi djɛ yetama. Nkongi djɛkɔ nde wangowa ‘okitɔ wɔ ankinami.’ (Ɛfɛ. 1:18) Poolo ɛnyɛka lonkina idjena yɛ ase Kɔlɔsɛ yongotowa lofuto lɔwɔ. Etaka lofuto lɔkɔ ante ‘nkongi dj’onyowombelawɔ l’olongo.’ (Kɔl. 1:4, 5) Lasɔ, nkongi dekɔ́ l’Akristo w’ankfutami w’avuta nde, wangokfundɔ djɛ ntowika lotshinda lotshinda l’olongo, lá yɔngɔtɔlɔndjɛ esanga la Kristo.​—1 Te. 4:13-17; Ndj. 20:6.

6. Kɛkɔnge kɛ wɔnanyɔ ɔmɔtshi w’onkfutami w’avuta ndatepela djɛ nkongi djɛnde?

⁶ Akristo w’ankfutami w’avuta ndɔsaka nkongi djɛsɔ l’odjito efula. Wɔnanyɔ Frederick Franz, ɔmɔtshi l’anteyi kɛwɔ, atepelaka l’oloko ɔmɔ ante: “Nkongi djɛso oyɛwɔ nde nkambo djɛ nsɔsɔlɔ la onto onkfumɔ wɔ iloyi yɛso y’anto 144 000 angowa kɛnɛ kɛ Ndjambe ndatolake. Lofuto lɔso longoyala wɔlɔ lombombe, ndeka ekete kenkfumɔ k’okotshɛso.” M’ɔkɔngɔ wɔ nkambela Ndjambe la nkomano l’ilá k’ɛnɔnyi efula, Wɔnanyɔ Franz asuyɛka lá 1991 ante: “Totatshutshɛ́ ntshina kɛ nkongi djɛso. . . . Totáleke nsasanga la nkongi djɛsɔ l’ilá kenkfumɔ kɛ sotakonge. Kaanga ntsha alɔmbama nkonga miliyɔ y’ɛnɔnyi, tongokindjɛ ngo nkonga. Winá wɔsɔ ndeke momoleka ndɔsa nkongi djɛso la ntshina efula ndeka ntondo.”

7-8. Efula k’anto oyɛwɔ la nkongi djɛkɔnge? (Ɔrɔma 8:20, 21)

⁷ Efula k’anto watɛmɔla Yehova lɔɔko kɛnɛ walekɔ la nkongi ntshikitanyi la djɛ ankfutami w’avuta. Nkongi djɛkɔ nde djɛ Abrahama ndayalaka la djɛkɔ, djɛ mbika lanɛ lá looko l’ɛlɔndjɛlɔ kɛ Onkfumi wɔ Ndjambe. (Heb. 11:8-10, 13) Poolo afunaka eposelo wɛ wɔlɔ efula wekongela wanɛ walekɔ́ la nkongi djɛkɔ. (Wala Ɔrɔma 8:20, 21.) Mbala kɛ ntondo kɛ ngeke alaka wa Bible walendana l’etsho weyaye, daka djɛkɔnge dekisá nkosasangɛ? Daka ntepela ante ongokoma onto wɔ djɔ lofu lɔmɔtshi, ko opangoyala lonkina mfumbe kɛ mpekanto? Ndo koko daka ntepela ante anto wako wa ngandji wangokfundɔ djɛ ndowika lonkina lá paradiso kelá looko? ‘M’ɔtɛ wɔ nkongi’ djɛ Ndjambe ndatɔpɛyɛ, olekɔ l’akambo wa wɔlɔ efula w’okongelɛ l’osasa.

⁸ Ayale okongelaso nde ntosasanga la lowiko l’etshinda l’olongo kana lá looko, tolekɔ la nkongi djɛ wɔlɔ lombombe ntɔpɛyɛ donga djɛ ndjala l’osasa. Edjinge nkongi djɛsɔ nkoka nkemba lonkina. Kɛnɛ kɛ Poolo ndafune m’ɔkɔngɔ kepakisola wopo wɔ nkambo djɛsɔ okokawɔ nanghema. Nyontshɔ tokoshishima kɛnɛ kɛ ndafune lá nkambo djɛ nkongi djɛso. Nangha nghɔsɔ angoleka ntoshikikɛ ente nkongi djɛso ngokindjɛ nkemba la mpatɔtɛkɛki nsɔnyi.

WOPO W’OFULAKA NKONGI

9-10. Etengo ɛnyɛwɔ lá ndjɔmbɔmba kɛ Poolo, kɛkɔnge k’Akristo okokawɔ nkongela? (Ɔrɔma 5:3) (Lenda edjinge asango.)

⁹ Wala Ɔrɔma 5:3. Tokote ente ndjolo nkoka nkembɛ nkongi. Nkambo djɛsɔ nkoka ntokamoyɛ. Lá nsɔsɔlɔ, ambeki ankfumɔ wa Kristo ndjewaka ambɔ wakoka mpomana la ndjolo. Tokolenda ndjɔmbɔmba kɛ Poolo. Nde ashimelaka ase Tesalɔnikɛ ante: ‘Winá wɔ sayalaka esanga la nyo, tányoshimelaki ente tongopomana la ndjolo, ko yananghema ngo nghɔsɔ.’ (1 Te. 3:4) La koko afunelaka ase Kɔrɛtɔ ante: ‘Iso nkɔpaka nyo ndjewa ndjolo itokomelisá . . . Totayala l’eshikikelo ente tongowika kana lako.’​—2 Kɔ. 1:8; 11:23-27.

¹⁰ Kaanga lɔɔko kɛnɛ, Akristo nkoka nkongela djɛ mpomana la wepo wɛ ndjolo wetshikitanyi. (2 Ti. 3:12) Iya wɛ? Opomanaka la ndjolo, winá wɔ ngayale la djawo le Yeso la ngawange ndokilika? Tolongo la boto djɛko nkoka nkɔpɛyɛ nsɔnyi. Iwɔ nkoka nkɛnyɛ ndjolo. Nkano djɛko djɛ ndjala sii l’akambo ankfumɔ, mbókoposeyɛ́ ekakasano l’olemo? (Heb. 13:18) Ombópomaná l’onanyelo me ewandji wɛ lɛɛta ngo ladjikɛnde opoposanyɛ nkongi djɛko le anto ankina? Ayale wepo wɛ ndjolo wɛkɔnge y’okokaso mpomana, Poolo atepelaka ante iso ladjɛ nsasanga. Lamo?

11. Lamo oyɛso ladjɛ ndɔsa nkano djɛ nkfulumeyɛ ohemba onkfumɔ?

¹¹ Iso nkoka nsasanga winá w’oyɛso lá ekakasano m’ɔtɛ wɔ eposelo weyɛka m’eteyi. Ɔrɔma 5:3 ntepelaka ante: ‘Ndjolo mposɛka okfumedji.’ Akristo ankfumɔ ladjɛ nkfulumeyɛ, ladjikɛnde yankfumɔ wangopomana la ndjolo. Iso ladjɛ ndɔsa nkano djɛ nkfulumeyɛ ayale ndjolo yɛkɔnge ikoka mpomana laso. Ntsha lako topangoyala l’akoka wa nyɛna ekotshamelo kɛ nkongi djɛso. Topakɔpɛ ndjala etengo anto wa Yeso ndakanelaka winá wɔ ndatepela djɛ lokopo lɔkfisá lá looko lɔ awanga. Má bango iwɔ wawolaka otepela l’osasa, koko ‘m’ɔkɔngɔ w’iwɔ mpomana la ndjolo kana l’onanyelo,’ watakanaka. (Mat. 13:5, 6, 20, 21) Nsɔsɔlɔ, apayalaka nkambo djɛ wɔdju kana dj’osasa winá w’opomanaso la ndjolo kana l’onanyelo, koko nkfulumeyɛ ndjakalaka wapɔ w’ipa l’ekomo. Lá wopo wɔkɔnge?

12. Wapɔ wɛkɔnge w’owakaso winá w’okfulumeyɛso ehemba?

¹² Ombeki Djakɔbɔ ɛnyɛka wapɔ weyɛka má nkfulumeyɛ ehemba. Nde afunaka ante: ‘Nyotshike okfumedji ashiyɛ olemo wɔnde, djɛ nyo ndjala djɔ, la ipa la badji l’akambo ankfumɔ, ipa nsamba kaanga ekete.’ (Dja. 1:2-4) Djakɔbɔ atepelaka nkambo dj’okfumedji etengo oyɛwɔ nde odjito, kana olemo wɔ nangha. Okfumedji onanghakande olemo wɔkɔnge? Wokoka nkokotshɛ́ djɛ ndeka nyɛnyɛ wekeka etengo wanɛ: balentshitshi, djawo la wɛkamo te Ndjambe. Koko, má nkfulumeyɛ, tongowake wapɔ onkina w’ekekete efula.

13-14. Okfumedji oposɛkande nge, ko wopo wɔkɔnge nkambo djɛsɔ oyɛwɔ la djokanelo la nkongi? (Ɔrɔma 5:4)

¹³ Wala Ɔrɔma 5:4. Poolo atepelaka ante okfumedji nkomɛka onto djɛ ‘ndjawolama.’ Okfumedji wɔko wongokokotshɛ́ djɛ wɛ ndjawolama me Yehova. Kɛsɔ kepasakisola ente Yehova nsasangaka winá w’opomanɛ l’ehemba kana l’ekakasano. Ndjambe osasangande nde la wɛ, ladjikɛnde okfulumeyɛ la nkɔmano. Alekɔ nkambo nkembɛ djɛ ndjewa ente winá w’okfulumeyɛso, tongosasangɛke Yehova!​—Yee. 5:12.

¹⁴ Tovungɔ ente Abrahama akfulumeyɛka ehemba ko kɛsɔ k’okotshɛ́ka djɛ nde ndjawolama me Ndjambe. Yehova ɔwɔsaka etengo ilongo yɛnde la etengo onto wɔ wɔlɔ. (Ewa. 15:6; Ɔrɔ. 4:13, 22) Nkambo djɛsɔ nkoka nanghema edjinge leso. Ndjambe apasasangaka laso m’ɔtɛ wɔ lɛdji l’olemo w’okambelaso kana m’ɔtɛ w’edjito w’okotshɛso. Nde nsasangaka laso ladjikɛnde tokfulumeyɛ la nkɔmano. Edjinge ayale ɛnɔnyi wɛkɔnge welekɔ́ laso, akambo watokomela, kana akoka waso, isankfumɔ nkoka nkfulumeyɛ. Okfulumeyɛ ohemba ɔmɔtshi winá wɔsɔ la nkɔmano nkfumɔ? Ntsha nghɔsɔ, mbɔ waka lokembo má ndjewa ente Ndjambe asasanga la wɛ. Ndjewa ente tawolama me Ndjambe nkoka ntɔpɛyɛ nkfulu. Nkambo djɛsɔ nkoka nkembɛ nkongi djɛso.

NKONGI DJƐ WOLO

15. Nkambo nkina djɛ djonyi djɛkɔnge Poolo ndatepela, ko lamo nkambo djɛsɔ okokawɔ nkamoyɛ anto amɔtshi?

¹⁵ Etengo Poolo ndapakisola, iso ndjawolamaka me Yehova má nkfulumeyɛ ehemba la nkɔmano nkfumɔ. Kolenda wopo wɔ Poolo okindjɛnde la djamba djɛnde: ‘Ndjawolama, l’onkoko wɔnde, nkomɛka lá nkongi, edjinge nkongi mpatɛkɛka nsɔnyi.’ (Ɔrɔ. 5:4, 5) Nkambo djɛsɔ nkoka nkamoyɛ anto amɔtshi. Lamo? Ladjikɛnde má djiko, etengo yafunamá lá Ɔrɔma 5:2, Poolo ndatepela nde ante Akristo w’ase Ɔrɔma wasɔ, wamboshiyɛka ndjala la nkongi, ‘nkongi djɛ lomo lɔ Ndjambe.’ Djɛkondeke amɔtshi nkoka ndawopola ambɔ: ‘Ntsha Akristo wasɔ wamboshiyɛka ndjala la nkongi, lamo Poolo ndowala djawo lá djamba djɛnde?’

16. Wopo wɔkɔnge nkongi owangande nkemba le onto? (Lenda edjinge asango.)

¹⁶ Tokoka nsipisoyɛ kɛnɛ kɛ Poolo ndakɔpɛ ntepala winá w’olamaso lá yimba ente nkongi nkoka nkemba. Tɔkɔsa ndjɔmbɔmba kɛnɛ: Ovungɔ mbala kɛ ntondo kɛ ngoke nkongi djɛ wɔlɔ efula dj’otanaso l’Otepela wɔ Ndjambe? Mbala imɔtshi, okokaka nkanela ente ikanyi yɛ mbika lotshinda lotshinda lá paradiso kelá looko ilekɔ wɔlɔ lombombe koko otayalaki l’eshikikelo ente ingokotshama. Koko, winá wɔ ngotalekaka ndjewa Yehova l’alaka wande welá Bible, oyɛka ndoyala l’eshikikelo ente daka djɛsɔ ngokotshama.

17. Wopo wɔkɔnge nkongi djɛko yakindjɛ nkemba m’ɔkɔngɔ wɔ wɛ ndalambola la ndongola batisimo?

¹⁷ Kaanga m’ɔkɔngɔ wɔ wɛ ndálambola la ndongola batisimo, winá wɔ ngotaleke ndjeka akambo efula la ngotatshunde lá nyuma, nkongi djɛko ngotakindjɛka nkemba. (Heb. 5:13–6:1) Mbala imɔtshi ombopomaná l’akambo w’otepelawɔ lá Ɔrɔma 5:2-4. Opomana la ndjolo itshikitanyi, koko okfulumeyɛka la ɛnaka ente Ndjambe nkɔkɔpaka. Ladjikɛnde olekɔ l’eshikikelo ente ɔngɔkɔpamake me Ndjambe, olekɔ la donga efula djawolɛ ente ongowa kɛnɛ kɛ ndakolake. Nkongi djɛko ngoleka nkemba ndeka wopo wɔ yayalaka má bango. Mbetela ndjala nsɔsɔlɔ le wɛ la mbokoma djɛko. Mboleka ndjala l’eposelo le wɛ. Lá lɛdji lɔmɔtshi, dekɔ l’eposelo tá ikakambo inkfumɔ yɛ lowiko lɔko, mbotshikitanyɛ kaanga wopo w’onanghelɛ nkfumbo kɛko akambo, wopo w’ɔsɛ akano, ole kaanga wopo w’okambɛ la winá wɛko.

18. Yehova ɔpɛyɛnde eshikikelo kɛkɔnge?

¹⁸ Ɔpɔstɔlɔ Poolo akfɛ ikakambo imɔtshi yɛ djonyi efula yelendana la nkongi djɛ ngawa m’ɔkɔngɔ wɔ wɛ ndjawolama me Ndjambe. Nde akoshikikɛ ante nkongi djɛko ngokotshama. Lamo okokɛ ndashikikɛ nghɔsɔ? Poolo atepelaka djɛ eshikikelo kɛ Ndjambe ndapɛyɛ Akristo ante: ‘Nkongi mpatɛkɛka nsɔnyi ladjikɛnde ngandji kɛ Ndjambe kembolola l’eloko wɛsɔ m’okotshɔ wɔ nyuma k’ekina kɛ sawa.’ (Ɔrɔ. 5:5) Olekɔ la donga djɛ wɔlɔ efula djɛ ndjala l’eshikikelo tá nkongi djɛsɔ, nkongi djɛko.

19. Eshikikelo kɛkɔnge k’oyɛ ladjɛ ndjala la kɛkɔ lá kɛnɛ kelendana la nkongi djɛko?

¹⁹ Tɔnɔla lá daka djɛ Yehova ndalake Abrahama, lá wopo wɔ ndowawola la ndɔwɔshi etengo ilongo yɛnde. Abrahama atakongela ekongela kongela. Bible ntepela ante: ‘M’ɔkɔngɔ wɔ Abrahama nyɛnyɛ balentshitshi, nde awaka daka djɛkɔ.’ (Heb. 6:15; 11:9, 18; Ɔrɔ. 4:20-22) Lá nsɔsɔlɔ, nde atatɛka nsɔnyi. Yala l’eshikikelo ente ntsha ombotshikala la nkɔmano, ongowa lofuto lɔ nkongi djɛko. Nkongi djɛko dekɔ nsɔsɔlɔ, dekɔ ikɔkɔ y’osasa koko ape yɛ nsɔnyi! (Ɔrɔ. 12:12) Poolo afunaka ante: ‘Ndjambe kanga lɔpɛyɛ nkongi anyolodjɛ l’osasa ole la vu lá wopo w’oyawɛkɛnyo te nde, djɛ nkongi djɛnyo ndeka nkemba m’okotshɔ wɔ wolo wɔ nyuma k’ekina.’​—Ɔrɔ. 15:13.