Wananyɔ w’elangala, nyokome Akristo w’ampame wambotshunda lá nyuma

1. Kɛkɔnge k’Okristo onkfumɔ wɔ mpame oyɛnde ladjɛ nangha djɛ ndonga l’akambo ankfumɔ?

NKFUMI Davidɛ alakaka Salɔmɔ ante: ‘Kemba la yala mpame.’ (1 Nk. 2:1-3) Angoyala wɔlɔ Akristo ankfumɔ w’ampame nkamba la dako djɛsɔ lɔɔko kɛnɛ. Djɛ ndjewa nkamba la dako djɛkɔ, iwɔ ladjɛ ndjeka djɛ nɛmɛyɛ ɛlɛmbɛ wɛ Ndjambe la nkamba la tɔkfɔ tɔ Bible l’akambo ankfumɔ welá mbiko yɛwɔ. (Luka 2:52) Lamo oyɛwɔ djonyi wananyɔ w’elangala nkoma Akristo w’ampame wambotshunda?

2-3. Lamo wɔnanyɔ w’olangala oyɛnde la djonyi djɛ nkoma Okristo wombotshunda?

² Mpame k’Okristo mbɛmbaka edjito wɛ djonyi efula lá nkfumbo la l’otshumano. Ape l’ehamo, wananyɔ w’elangala nyongokanelake edjito w’okokanyo ndowa l’etsho weyaye. Okoka ndjala l’okoma wɔ ndokoma onkambi wɔ winá enkfumɔ, onkambi w’okotshɛ́ la m’ɔkɔngɔ, ikokolo y’otshumano. Okoka nkombola lonkina ntshuka la mba wana. (Ɛfɛ. 6:4; 1 Ti. 3:1) Djɛ nkotshɛ ekoma wɛsɔ lá lɛdji lɔ wɔlɔ, wɛ ladjɛ nkoma Okristo wombotshunda lá nyuma.b

³ Kɛkɔnge kekoka nkokotshɛ́ djɛ nkoma Okristo wombotshunda lá nyuma? Akoka amɔtshi wa djonyi walekɔ w’oyɛ ladjɛ mfudjɛ. Ko kɛkɔnge k’okokɛ nangha má winá wɔsɔ djɛ ndálɔngɔsɔla djɛ ndokotshɛ edjito w’okokɛ ndowa l’etsho weyaye lá wopo wɔ wɔlɔ?

WIINA WA NTAPOLA DJƐ NTSHUNDA LÁ NYUMA

4. Lampe okokanyo mba ndjɔmbɔmba yɛ wɔlɔ yɛ ndjokola? (Lenda edjinge ntshango.)

⁴ Sɔna ndjɔmbɔmba yɛ wɔlɔ yɛ ndjokola. Bible ndola kfu la ndjɔmbɔmba yɛ wɔlɔ y’elangala okokawɔ ndjokala. Ampame yɛl’etsho wɛ ntondo yɛsɔ wakɔpaki Ndjambe la wawɛmbaki edjito wetshikitanyi djɛ mbakela enkambi wɛnde. Nyokoka ntana lonkina ndjɔmbɔmba yɛ wɔlɔ l’anteyi kɛ Akristo w’ampame imbotshunda lá nkfumbo la l’otshumano wɔnyo. (Heb. 13:7) Nyolekɔ lonkina la ndjɔmbɔmba kɛ djɔ kɛ Yeso Kristo. (1 Pɛ. 2:21) Winá wɔ ngoteke ndjɔmbɔmba yɛsɔ la nkɔmɛ nkfumɔ, shishima wekeka wawɔ wa wɔlɔ. (Heb. 12:1, 2) Ko, lenda wopo w’okokɛ ndjokola ampame yɛsɔ.

5. Wopo wɔkɔnge w’okokanyo mfudjɛ nkoka djɛnyo djɛ ekanedji kɛ yimba, ko lamo oyɛwɔ djonyi? (Yeembo 119:9)

⁵ Fudjɛ la ‘womba . . . nkoka dj’ekanedji kɛ yimba.’ (Woo. 3:21) Mpame kelekɔ́ la nkoka dj’ekanadji kɛ wɔlɔ apananghaka akambo lankeke lankeke, koko angɔtɔnɔlake la nkɔmɛ nkfumɔ lá ntondo kɛnde nsɔna kɛnɛ k’ɔkɔpande nangha. Djɛkondeke nangha la wolo djɛ mba la mbomba nkoka djɛsɔ. Lamo? Ladjikɛnde andja wanɛ wambolola l’elangala weyalɔndjɛ má tokanyi tɔwɔ yɔmɛlɛ kana wetshiká djɛ mposɛ yɛwɔ ndɔndjɛ nanghedji djɛwɔ. (Woo. 7:7; 29:11) La koko avideo, televiziɔ, ɛntɛrnɛtɛ la reso sosio nkoka ndjala la ndjimbo kɛ wolo efula lewɛ. Iya wopo wɔkɔnge w’okokɛ mba ekanedji kɛ yimba kɛ wɔlɔ? Tateyɛ ndjeka tɔkfɔ tɔ Bible edjinge ntɔnɔla lamo tɔkfɔ tɔkɔ okokawɔ nkoyakala wapɔ. Makɔ nkamba la tɔkfɔ tɔkɔ djɛ nkokotshɛ́ djɛ ndɔsa akano wangosasangɛ Yehova. (Wala Yeembo 119:9.) Ntsha ombofudjɛ nkoka djɛ djonyi djɛsɔ, ngokokotshɛ efula djɛ nkoma Okristo w’ombotshunda lá nyuma. (Woo. 2:11, 12; Heb. 5:14) Kólenda wopo wɔ nkoka djɛ ekanedji kɛ yimba okokawɔ nkokotshɛ́ l’akambo ape wanɛ: 1) Wopo w’ɔsɛ ankaana la 2) akano w’ɔsɛ lá kɛnɛ kelendana l’ɔlɔtɔ la ɛnamelo kɛko.

6. Wopo wɔkɔnge nkoka dj’ekanedji kɛ yimba okokawɔ nkotshɛ́ wɔnanyɔ w’olangala djɛ ndɔsa ankaana l’odjito?

⁶ Ekanedji kɛ yimba kengokokotshɛ́ djɛ nɛmɛyɛ amato. Lako nyɛtshi wɔnanyɔ w’olangala ndjala la djokanelo djɛ wɔlɔ la nkaana. Koko, olangala wolekɔ́ l’ekanedji kɛ wɔlɔ, apakoke ntepela, mfuna kana nangha nkambo mɔtshi djɛ nkaana okokande mfɛnyɛ ante wɔnanyɔ ndɔkɔpaka, mbɔ ngo ntsha eka nkaana l’ikanyi yɛ ndotshuka. (1 Ti. 5:1, 2) Ntsha ahonana nya nkaana, nde akoka nama lokumu lɔ wɔlɔ lɔ nkaana má nsamba ndjala iyɔmɛlɛ toko ipa la itshantomɔ ikoka.​—1 Kɔ. 6:18.

7. Wopo wɔkɔnge nkoka dj’ekanedji kɛ yimba okokawɔ nkotshɛ́ wɔnanyɔ w’olangala djɛ ndɔsa akano lá kɛnɛ kelendana l’ɔlɔtɔ la wimelo wɔ nkfo?

⁷ Wopo ɔmɔtshi wɔ olangala okokande nyɛnyɛ ante ambofudjɛ nkoka dj’ekanedji kɛ yimba nde, má ndɔsa akano wa wɔlɔ walendana l’ɔlɔtɔ edjinge la wimelo wɔ nkfo. Mbala efula, waaposɛ la waanangha publisite yɛ ntshendja, oyɛwɔ nde anto wapalɛmɛyɛ tɔkfɔ tɔ Yehova la wakilika lowiko lɔ mbindo. Ekanedji kɛwɔ kɛ nyɛtshi kɛnama má wopo wɔ ntshendja dj’oposɛwɔ, djemalema demba kana djeposɛ mpame etengo omoto. Winá w’ɔsɔnande ntshendja djɛ ndɔta, olangala w’Okristo wombotshunda lá nyuma angɔlɔndjama má tɔkfɔ tɔ Bible, la má ndjɔmbɔmba yɛ wɔlɔ yel’otshumano. Akoka ndáwopola ante: ‘Akano wami wɛnyɛ ente ndekɔ piyɔɔ lá yimba edjinge la dilɛmɛlɔ te anto ankina? Má ɔlɔtɔ wɔmi, anto ankina nkoka ndjawola ipa l’okokasano ambɔ ndekɔ onkambi wɔ Ndjambe?’ (1 Kɔ. 10:31-33; Tito 2:6) Olangala wolekɔ́ la nkoka dj’ekanadji kɛ yimba angɔlɛmɛyɛma ape ngo me wananyɔ l’ankaana toko, koko lonkina me Papa kɛnde kɛ l’olongo.

8. Wopo wɔkɔnge wɔnanyɔ w’olangala okokande nkoma onto wɛdje ndowilela oloko?

⁸ Yala onto w’okokawɔ ndjilela oloko. Olangala wilelawɔ oloko angokotshɛke edjito wɛnde la nkɔmɛ nkfumɔ. (Luka 16:10) Tokolenda ndjɔmbɔmba kɛ djɔ kɛ Yeso. Nde atayala kanga ompino kana atalotaki edjito wɛnde. Koko, nde akotshɛka edjito wɔpɛyisá Yehova, kaanga lá winá wɔ nkambo djɛsɔ yayalaka wolo nangha. Nde akɔpaki anto, pekapeka ambeki wande, edjinge apɛyɛka lowiko lɔnde lá nkambo djɛwɔ l’ɛkɔpa. (Dj. 13:1) Djɛ ndjokola Yeso, kamba la wolo djɛ nkotshɛ odjito onkfumɔ wɔ yɔmbɔkɔpɛyɛ. Ntsha opewe wopo w’okokɛ nkotshɛ odjito wɔkɔ, yala l’okitshakitshɛ la hona okotshɔ me wananyɔ wambotshunda lá nyuma. Shiyɛ olemo wɔ yɔmbɔkɔpɛyɛ ape nkamba ngo ndambo daambi ko mpekɔ. (Ɔrɔ. 12:11) L’edjena kɛ nangha nghɔsɔ, kotshɛ odjito wɔko tii l’ekomo, nangha nkambo djɛsɔ etengo onanghelɛ nde ‘Yehova koko ape anto.’ (Kɔl. 3:23) Lá nsɔsɔlɔ opalekɔ djɔ, djɛkondeke yala l’okitshakitshɛ edjinge awola ovunga onkfumɔ w’onanghɛ.​—Woo. 11:2.

EKA DJƐ NDJALA L’AKOKA WALEKƆ́ DJONYI

9. Lamo wananyɔ w’olangala oyɛnde ladjɛ mfudjɛ akoka wa nkamba elemo?

⁹ Djɛ nkoma Okristo wɔ mpame wombotshunda, wɛ ladjɛ mfudjɛ akoka walekɔ́ djonyi. Akoka wasɔ wangokokotshɛ djɛ mbɛmba edjito l’otshumano, djɛ mbomba olemo, djɛ nshiyɛ ehomba wɛko kana wɛ nkfumbo kɛko la djɛ ndjala la djokanelo djɛ wɔlɔ l’anto ankina. Tokoshishima akoka amangha wa djonyi.

10-11. Wapɔ wɛkɔnge otshumano la wɔnanyɔ nyɔmɛlɛ ngɛndjɔ okokawɔ mba ntsha nde ambewa mbala la mfuna wɔlɔ? (Yee. 1:1-3) (Lenda edjinge ntshango.)

¹⁰ Eka djɛ mbala la mfuna wɔlɔ. Bible ntepelaka ante: Onto w’osasa la w’olonga l’akambo w’onanghande ndɔsaka winá mfu inkfumɔ djɛ mbala la ntɔnɔla lá Otepela wɔ Ndjambe. (Wala Yeembo 1:1-3.) Má mbala Bible lofu la lofu, nde angewa wopo wɔ Yehova okanelande, ko kɛsɔ kengokotshɛ́ djɛ nkanela la ntɔnɔla wɔlɔwɔlɔ. (Woo. 1:3, 4) Otshumano wolekɔ la djonyi dj’ampame yɛ nghɔsɔ. Lamo?

¹¹ Wananyɔ l’ankaana yɛso walekɔ la djonyi djɛ ampame ilekɔ́ l’akoka djɛ ndakanyɛ la mpɛyɛ alako wambopikamá lá Bible. (Tito 1:9) Ntsha ombewa mbala la mfuna wɔlɔ, ongoyala l’akoka wa ndɔngɔsɔla wamba la kɔmantɛrɛ ikembɛ djawo djɛ anto ankina. Ongoyala lonkina l’akoka wa mfuna akambo wa djonyi winá w’onanghɛ wekelo wɔko la winá wekameyɛ wamba lá nsanghanyɛ y’otshumano, y’edjingadjinga la yɛ rɛjɔ. Nɔtɛ yɛsɔ ingokokotshɛ djɛ nkembɛ djawo djɛko la nkembɛ anto ankina.

12. Kɛkɔnge kekoka nkokotshɛ́ djɛ ndjewa nsawola l’anto wɔlɔwɔlɔ?

¹² Fudjɛ akoka wa ndjewa nsawola l’anto wɔlɔwɔlɔ. Okristo wɔ mpame ladjɛ ndjewa nsawola l’anto wɔlɔ. Mpame k’ewa nsawola l’anto wɔlɔ ndjekameyɛka la nsipisoyɛka wopo wɔ anto ankina oyawokawɔ la okanelawɔ. (Woo. 20:5) Winá w’owalande, nde nkoka ndjeka djɛ ndjokola djoyi djɛ onto onkina, nangha tosawo lá elongi la l’ɛwɔ. Opakoke ndjeka djɛ nangha nghɔsɔ ntsha opahetshɛ winá l’anto. Ntsha ongokambake mbala la mbala l’aparɛyi djɛ nsawola l’anto, ndjɔmbɔmba má mesajɛ, akoka wako wa nsawola l’anto lá elongi l’elongi nkoka nkitakita. Djɛkondeke, honaka mbamba yɛ nsawolaka l’anto l’elongi l’elongi.​—2 Dj. 12.

13. Olangala oyɛnde ladjɛ ndjeka lonkina nge? (1 Timɔte 5:8) (Lenda edjinge ntshango.)

¹³ Eka djɛ nshiyɛ ehomba wɛko nghɔmɛlɛ ngɛndjɔ. Mpame kembotshunda lá nyuma ladjɛ nshiyɛ ehomba wɛnde la wɛ nkfumbo kɛnde. (Wala 1 Timɔte 5:8.) Lá engidji ɛmɔtshi, wananyɔ w’elangala nkoka ndjeka wopo wɔ nkamba elemo ɛmɔtshi w’ɛwɔ me papa kana ewoto kɛwɔ kɛmɔtshi. Koko l’engidji enkina, wɔna mpame nkoka ndjeka djɛ nangha opoto kana ndjala l’akoka ankina wa nkamba elemo winá w’onanghande imanite. Ayale owikɛ lampe, alekɔ wɔlɔ ndjeka nkoka mɔtshi ngokokotshɛ́ djɛ mba olemo. (Ele. 18:2, 3; 20:34; Ɛfɛ. 4:28) Yala la lokumu lɔ nkambi la l’onto w’oshiyɛka elemo w’owangande. Ntsha ombonangha nghɔsɔ, ongoyala l’akoka wa mba la mbomba olemo. Wekeka l’akoka wasotepelaki má djiko walekɔ lonkina djonyi le Okristo wɔ mpame djɛ nde ndoyala l’akoka wa ndɔwɛmba edjito l’etsho weyaye. Nyontshɔ tokoshishima edjito ɛmɔtshi.

LOKALƆNGƆSƆLƐ DJƐ NDƆWƐMBA EDJITO

14. Wopo wɔkɔnge wɔnanyɔ w’olangala okokande ndalɔngɔsɔla djɛ nkoma onkambi wɔ winá enkfumɔ?

¹⁴ Onkambi wɔ winá enkfumɔ. Akristo efula w’ampame wambotshunda wawangaka olemo wɔ winá enkfumɔ má ɔlɛngɛ wɔwɔ. Olemo wɔ yat’ekalo nkotshɛ́ka olangala djɛ nkamba wɔlɔ l’anto watshikitanyi. Wongookotshɛ́ lonkina djɛ ndjewa nkamba la balo nkfumɔ la mfalanga yowande la dj’ipa nsomba nkete lá lɛdji loleka mfalanga yowande. (Flp. 4:11-13) Yopo imɔtshi yɛ wɔlɔ yɛ mbanga l’olemo wɔ winá enkfumɔ nde má ndjala yat’ekalo yɛ winá ɛmɔtshi. Efula wɔsaka olemo wɔ yat’ekalo yɛ winá ɛmɔtshi ngɔndɔ imangha toko, ko kɛsɔ k’akotshɛka djɛ ndɔsa olemo wɔ yat’ekalo yɛ lotshinda. Olemo wɔ yat’ekalo nkoka ndjipola mboka tá topo tonkina tɔ olemo wɔ winá enkfumɔ, ndjɔmbɔmba nkamba lá olemo w’opikelo wɔ amvulu y’Onkfumi kana lá Betɛlɛ.

15-16. Wopo wɔkɔnge wɔnanyɔ w’olangala okokande nkotshɛ akambo walɔmbama djɛ nkamba lá otshumano?

¹⁵ Onkambi w’okotshɛ kana ikokolo. Akristo w’ampame ladjɛ ndjala l’okoma wɔ nkotshɛ akambo walɔmbama djɛ nkambela wananyɔ l’ankaana yɛwɔ l’otshumano etengo ikokolo. Bible atepela ante ampame ikombola odjito wɔsɔ ‘wakombola olemo wɔ wɔlɔ.’ (1 Ti. 3:1) Lá ntondo kɛ nkamba etengo ikokolo, wɔnanyɔ ladjɛ nkotshɛ akambo walɔmbama djɛ nkamba etengo onkambi w’okotshɛ́. Onkambi w’okotshɛ́ okotshɛkande nde tokokolo lá topo efula tɛnama. L’okitshakitshɛ onkfumɔ, tokokolo la enkambi w’ekotshɛ́ nkambelaka wananyɔ l’ankaana yɛwɔ la mpoposanyɛka l’osasalo onkfumɔ. Wananyɔ w’elangala nkoka nkotshɛ akambo walɔmbama djɛ nkamba etengo onkambi w’okotshɛ́ kaanga l’ekomo k’ɔlɛngɛ wɔwɔ. Edjinge onkambi w’okotshɛ́ wokotshɛ akambo walɔmbama wɔlɔwɔlɔ nkoka nsɔnama etengo ikokolo kaanga má bango dj’ɛnɔnyi 20.

¹⁶ Wopo wɔkɔnge w’okokɛ nkotshɛ akambo walɔmbama djɛ mbɛmba edjito wɛsɔ? Bible atɔɔla wekeka woyɛ la djonyi. Koko akambo ankfumɔ wel’Afunelo walɔmbamá wasɔ mpikamá lá Bible, lá ngandji kɛko te Yehova, te nkfumbo kɛko la t’otshumano. (1 Ti. 3:1-13; Tito 1:6-9; 1 Pɛ. 5:2, 3) Nangha la wolo djɛ nsipisoyɛ nkambo la nkambo. Lɔmba okotshɔ wɔ Yehova djɛ nkotshɛ akambo wasɔ.c

17. Wopo wɔkɔnge wɔnanyɔ w’olangala okokande ndálɔngɔsɔla djɛ nkoma wome la owandji wɔ nkfumbo? (Lenda edjinge ntshango.)

¹⁷ Wome la owandji wɔ nkfumbo. Etengo Yeso ndɛnyɛ, Akristo amɔtshi w’ampame wambotshunda lá nyuma nsɔnaka djɛ ntshikala endjemba. (Mat. 19:12) Koko, ntsha ɔmbɔsa nkano djɛ ntshuka, ongakfɛ odjito wɔ wome la w’owandji wɔ nkfumbo. (1 Kɔ. 11:3) Yehova nkongelaka djɛ wome nkɔpa wadjɛnde la ndoseyɛ ehomba wɛnde wɛ demba, wɛ yimba la wɛ nyuma. (Ɛfɛ. 5:28, 29) Wekeka l’akoka wasotepelaki má djiko, etengo mfudjɛ nkoka djɛ ekanedji kɛ yimba, ndɔsa amato l’odjito, ndjala onto w’okokawɔ ndawɛkɛ te nde, wangokokotshɛ djɛ ndjala wome wɔ wɔlɔ. Ongoyalonghanyɛ djɛ nkotshɛ edjito etengo wome la owandji wɔ nkfumbo.

18. Wopo wɔkɔnge wɔnanyɔ w’olangala okokande ndálɔngɔsɔla djɛ nkoma papa?

¹⁸ Papa. M’ɔkɔngɔ wɔ wɛ ntshuka wadji okoka nkoma papa. Elakanyelo wɛkɔnge w’okokɛ mba me Yehova djɛ wɛ ndjala papa kɛ wɔlɔ? Elakanyelo welekɔ efula. (Ɛfɛ. 6:4) Yehova ashimelaka wɔnande Yeso Kristo papoo ante nde ndɔkɔpaka la ndowawolaka. (Mat. 3:17) Ntsha ambokoma papa nangha la wolo djɛ nshimela wana wako mbala la mbala ente wɛ ndakɔpaka. Edjɛwɔ l’osasa onkfumɔ winá w’onanghawɔ nkambo djɛ wɔlɔ. Papa yokola ndjɔmbɔmba kɛ Yehova nkotshɛ́ka wana wawɔ djɛ nkoma Akristo w’ampame l’amato wambotshunda. Okoka ndálɔngɔsɔla má winá wɔsɔ djɛ odjito wɔsɔ, má mbakela la ngandji kenkfumɔ anto ankina welá nkfumbo la wal’otshumano wɔko la má ndjeka djɛ ndaawedjɛ la ndaashimela ente wɛ ndakɔpaka. (Dj. 15:9) Nkambo djɛsɔ ngokokotshɛ djɛ nkotshɛ edjito wɛko weyaye winá wɔ nghongokoma wome la papa. Lá winá wɔkɔ ɔmɔ, ongoyala epeko kɛ djonyi le Yehova, lá nkfumbo kɛko la l’otshumano.

OKOKƐ NANGHA NGE MÁ WINÁ WƆSƆ?

19-20. Kɛkɔnge kekoka nkotshɛ́ wananyɔ w’elangala djɛ nkoma Akristo wambotshunda? (Lenda ntshango djelá loposo.)

¹⁹ Wananyɔ w’elangala, ngo nyo ndjila welo djɛ nkoma Akristo w’ampame wambotshunda. Nyo ladjɛ nsɔna ndjɔmbɔmba yɛ wɔlɔ yɛ ndjokola, mfudjɛ nkoka djɛ ekanedji kɛ yimba, ndjala onto w’okokawɔ ndáwɛkɛ te nde, mba akoka má nkamba elemo ole ndálɔngɔsɔla djɛ ndɔwɛmba edjito l’etsho weyaye.

²⁰ Mbala imɔtshi nyokoka ntshimba yimba winá w’ɔtɔnɔlanyo lá elemo wenyokonga wɛsɔ. Koko nyokoka ndonga. Nyovungɔ ente Yehova akombola nyokotshɛ́. (Iza. 41:10, 13) Lá nsɔsɔlɔ, wananyɔ l’ankaana yɛ otshumano wangonyokotshɛ ole iwɔ. Winá wɔ nghongokoma Okristo wɔ mpame wombotshunda lá nyuma, lowiko lɔko longoyala l’okfudji ole l’osasa. Wananyɔ w’elangala, iso nyɔkɔpaka! Yehova anyosakole winá wonanghanyo la wolo djɛ nkoma Akristo w’ampame wambotshunda.​—Woo. 22:4.