Waka lokembo má ndjewa ente Yehova angosasangake la wɛ

1. Enkambi ɛmɔtshi wɛ Yehova wɛ nkɔmano yananaka la tokanyi tɔkɔnge?

ALEKƆ nsɔsɔlɔ nkambo djɛ lokembo djɛ ndjewa ente Yehova ndjawolaka enkambi wɛnde etengo oloyi! Bible ntepelaka ante: ‘Yehova nsasangaka l’enkambi wɛnde.’ (Yee. 149:4) Koko winá ɛmɔtshi, anto amɔtshi wangokake ambɔ wambɔlɛmba ko wangolawɔpolake ambɔ: ‘Yehova ndjawolaka lemi?’ Enkambi efula wɛ Yehova wɛ nkɔmano wewikaki l’etsho wefunamaki Bible wananaki winá ɛmɔtshi la tokanyi tɔ nghɔsɔ.​—1 Sa. 1:6-10; Djɔ. 29:2, 4; Yee. 51:11.

2. Anto wakɔna wawolama me Yehova?

² Bible nyɛnyɛka papoo ante, anto wa ntshamba djɛ djɔ nkoka ndjawolama me Yehova. Lá wopo wɔkɔnge? Iso ladjɛ nyɛnyɛ djawo te Yeso Kristo ole ndongola batisimo. (Dj. 3:16) Lá wopo wɔsɔ tɔngɛnyɛ lá ntshandjawala ente tomboyapɛla má mpekanto yɛso la ente tombolaka Yehova djɛ nangha ɛkɔpa kɛnde. (Ele. 2:38; 3:19) Yehova angosasangake winá w’onanghaso akambo wasɔ djɛ ndjala la djokanelo djɛ wɔlɔ la nde. Ntsha tokindjɛ nangha kenkfumɔ k’oyɛso ladjɛ nangha djɛ mbika lá wopo wokana l’ɛlɔkɔ kɛso, Yehova angosasanga laso la angɔtɔsa etengo tolongo tɔnde tɔ ma ma.​—Yee. 25:14.

3. Kɛkɔnge k’ɔkɔpaso nyɛna lɔ lá djamba djɛnɛ?

³ Iya lamo, anto amɔtshi okokawɔ ndawoka lá winá ɛmɔtshi ambɔ Ndjambe apasasanga lawɔ? Wopo wɔkɔnge Yehova ndɛnyɛka ante nde nsasangaka laso? Edjinge wopo wɔkɔnge Okristo okokande ndáshikikɛ ante Ndjambe nsasangaka la nde?

DONGA DJETSHINDA ANTO AMƆTSHI DJ’IWƆ MFƐNYƐ AMBƆ YEHOVA APASASANGA LAWƆ

4-5. Kaanga tolawoka ente topalekɔ la ntshina, okokaso ndjala l’eshikikelo kɛkɔnge?

⁴ Efula l’anteyi kɛso wangonanake l’ikanyi y’ente wapalekɔ la ntshina ngo má ɔlɛngɛ wɔwɔ. (Yee. 88:15) Wɔnanyɔ ɔmɔtshi wetawɔ Adrián atepela ante: “Winá enkfumɔ langoyawokake ente mpalekɔ la ntshina. Mvungɔ ente m’ɔlɛngɛ wɔmi lalɔmbaki djɛ nkfumbo kɛmi ndjingela lá Paradiso, koko ndáshikikɛki ente lemi mpalekɔ onto wɔ wɔlɔ wokoka ndjingela l’eteyi.” Tony, kanga lotafula lá nkfumbo k’Akristo atepela ante: “Ambotshi wami watanshimela kaanga lofu lɔmɔ ambɔ iwɔ nkɔpaka lemi kana wangosasangake la lemi. Ko kɛsɔ kentshindaka djɛ mfɛnyɛ ente mpakokaki nangha nkambo djekoka ndaasasangɛ.”

⁵ Ntsha winá ɛmɔtshi toyawoka ente topalekɔ la ntshina, tovungɔ ente Yehova nyɔmɛlɛ kɛnde ndeke lotosepisá le nde. (Dj. 6:44) Nde ɛnaka akambo amɔtshi wa wɔlɔ leso wa sɔmɛlɛ sopakoke nyɛna edjinge nde ndjewaka oloko wɔso wɔlɔwɔlɔ. (1 Sa. 16:7; 2 Ɛk. 6:30) Djɛkondeke, tokoka ndoowela oloko winá w’otoshimelande ante tolekɔ la ntshina.​—1 Dj. 3:19, 20.

6. Kɛkɔnge k’ɔpɔstɔlɔ Poolo ndoke lá kɛnɛ kelendana la mpekanto yɛ ndananghaka ntondo?

⁶ Lá ntondo kɛ ndjeka nsɔsɔlɔ, amɔtshi l’anteyi kɛso wananghaka akambo wa nkfum’oloko yɛwɔ ikindjɛ ngo ndawɛmbɛ lowo. (1 Pɛ. 4:3) Kaanga Akristo wa nkɔmano wangonanake la ikanyi yetshinda onto djɛ nangha mpekanto. Iya wɛ? Ongokanelake winá ɛmɔtshi ente Yehova apakoke nkimeyɛ? Ntsha nghɔsɔ, okoka mba lokembo má ndjewa ente edjinge enkambi wɛ nkɔmano wɛ Yehova wangonanake la tokanyi tɔ nghɔsɔ. Ndjɔmbɔmba, ɔpɔstɔlɔ Poolo ayawokaki ante alekɔ ose ndjolo winá wɔ ndatɔnɔlɔka lá evunga wɛnde. (Ɔrɔ. 7:24) Lá nsɔsɔlɔ, Poolo ayapɛlaka má mpekanto yɛnde la alongolaka batisimo. Koko, nde ayawɔsaki etengo ‘ɔpɔstɔlɔ woleka daambi’ la ‘onto wɔ ntondo’ l’anteyi kɛ ananghi yɛ mpekanto.​—1 Kɔ. 15:9; 1 Ti. 1:15.

7. Kɛkɔnge k’oyɛso ladjɛ ndjewa lá kɛnɛ kelendana la mpekanto yɛ sananghaka ntondo?

⁷ Papa kɛso kɛ l’olongo ntolakaka djɛ ntimeyɛ ntsha tomboyapɛla. (Yee. 86:5) Djɛkondeke ntsha tomboyapɛla lá lɛdji lɔ nsɔsɔlɔ má mpekanto yɛ sananghe, tokoka ndjilela Yehova oloko ente kɛnɛ k’otepelande kelekɔ ngo nsɔsɔlɔ, ntepela ente ambotimeyɛ́.​—Kɔl. 2:13.

8-9. Wopo wɔkɔnge w’okokaso ntshika ikanyi yɛ ente topakokaki nangha akambo efula djɛ nsasangɛ Yehova?

⁸ Isankfumɔ nkɔpaka nangha kenkfumɔ k’okokaso nangha djɛ nkambela Yehova. Koko, amɔtshi ndawokaka ambɔ wapakokaki ndjawolama mende kaanga ndambo daambi. Nkaana kɛmɔtshi k’etawɔ Amanda atepela ante: “Lafɛnyɛki ente mpɛyɛ Yehova kɛnɛ keleka wɔlɔ lemi, osakisolawɔ nde nanghaka ngo akambo efula winá enkfumɔ. Djɛkondeke mbala la mbala lasɛsaki nangha akambo wa motayalaki l’akoka. Ko winá wɔ masambaka nkotshɛ ekoma wɛ moyawilelaka, lafɛnyɛki ente Yehova angoka nsɔnyi lá nkambo djɛmi ngo ngete lemi mɔmɛlɛ okami.”

⁹ Wopo wɔkɔnge w’okokaso ndonga ikanyi y’ente topakokaki nsasangɛ Yehova? Vungɔ ente Yehova apalekɔ akambo wolo. Nde apatɔlɔmbɛ kaanga ndambo daambi dj’iso nangha kɛnɛ kɛ sopalekɔ l’akoka wa nangha. Angoyalake la djedjɛ lá kenkfumɔ k’onanghaso l’olemo wɔnde l’ilá kenkfumɔ k’ilaso welo djɛ ndokambela. Lonkina, tɔnɔla lá ndjɔmbɔmba yɛ Bible yɛ wanɛ wakambelisá Yehova l’oloko ɔmɔ. Tɔkɔtɔnɔla lá ndjɔmbɔmba kɛ Poolo. Nde akambaka olemo l’entete l’ilá k’ɛnɔnyi, ananghaka nkɛndɔ yɛ kilɔmɛtrɛ nunu la nunu, edjinge ataka ntshumano lombombe. Iya Ndjambe atasasanga lande lonkina winá wɔ akambo yotshikitanaka lá lowiko lɔnde la ndotayala lonkina l’akoka wa mpoposanyɛ etengo ndapoposanyɛka ntondo? Lako. Nde akindjɛka nangha kɛnɛ kɛ ndakokaka nangha, ko Yehova osakolaka. (Ele. 28:30, 31) Lá wopo wɔkɔ ɔmɔ ndeke, kɛnɛ k’okokaso mpɛyɛ Yehova nkoka ntshikitana winá ɛmɔtshi. Koko kɛnɛ keleka djonyi lende nde donga djetotshinda djɛ ndokambela. Nyontshɔ tokolenda topo tɔmɔtshi tɔ Yehova ɛnyɛkande ante nde nsasangaka laso.

WOPO WƆKƆNGE YEHOVA NDƆTƐNYƐKA ANTE ASASANGA LASO?

10. Wopo wɔkɔnge w’okokaso ‘ndjoka’ Yehova atoshimela ante nde ntɔkɔpaka? (Djɔanɛ 16:27)

¹⁰ Má Bible. Yehova nkɔpaka nyɛnyɛ enkambi wɛnde ante nde nsasangaka lawɔ la ndakɔpaka. Afunelo watepela mbala ipe yɛ ndashimela Yeso ante nde alekɔ Wɔnande wɔ ngandji, wawolande. (Mat. 3:17; 17:5) Ɔkɔpa Yehova nkoshikikɛ ante nde nkɔkɔpaka? Yehova apatepelaka laso m’olongo, koko nde ntepelaka laso má Otepela wɔnde, Bible. Tokoka ‘ndjoka’ djoyi djɛ Yehova ntoshimela ante nde ndɔkɔpaka winá w’owalaso etepela wɛ Yeso welá Evanjiliyo. (Wala Djɔanɛ 16:27.) Yeso okolaka lonto lɔ Papa kɛnde lá lɛdji lɔ djɔ. Djɛkondeke winá w’owalaso ente Yeso ashimelaki ambeki wande wa ntshamba djɛ djɔ koko wa nkɔmano ante nde ndaakɔpaka, tokoka nyɛna ente Yehova ndeke lotoshimela etepela wɛsɔ.​—Dj. 15:9, 15.

11. Ladjikɛnge mpomana l’ekakasano yopasakisola ente Yehova apasasanga laso? (Djakɔbɔ 1:12)

¹¹ Má nanghedji. Yehova nkombolaka ntokotshɛ́, ndjɔmbɔmba ntoseyɛ ehomba wɛso wɛ demba. Lá winá ɛmɔtshi, Yehova nkoka ndjawola dj’iso nyɛna ndjolo etengo mpame kɛ sii, Djɔbɔ ndɛnyi. (Djɔ. 1:8-11) Ekakasano wɛpɛnyɛ ente topawolama me Yehova. Koko wɛtɔpɛyɛ mbamba kɛ nyɛnyɛ ngandji k’efula k’okaso Yehova la wɛkamo wɔso te nde. (Wala Djakɔbɔ 1:12.) Iso nyɛnaka wopo w’otowakelande la w’otosukande la ngandji kenkfumɔ winá w’otokotshɛ́nde djɛ nkfulumeyɛ.

12. Olakanyelo wɔkɔnge w’owaso lá kɛnɛ kekomelisá Dmitrii?

¹² Tokolenda kɛnɛ kekomelisá wɔnanyɔ Dmitrii, kanga lowika lá Asie. Nde atshutshɛka olemo wɔnde ko ananghaka angɔndɔ efula ngo apawa olemo onkina. Manyi nde ɔsaka nkano djɛ mfudjɛ olemo wɔnde w’ipoposanyɛ, djɛ nyɛnyɛ wɛkamo wɔnde te Yehova. Angɔndɔ efula ihetaka ko ngo atawaki olemo. Nde atataka lonkina elando wɛ wolo efula wɛtɔpɛyɛki mbamba kɛ ngandjɔ má mbeto. Nde awangaka nkanela ante apɛlama lonkina ndɔsama lonkfunda etengo papa la wome, edjinge ayawopolaki lonkina ntsha Yehova asasanga la nde. Nkɔlɔ mɔtshi wɔnande w’omoto ofunelaka l’itatshi yɛ nkishi etepela welekɔ́ lá Izaya 30:15 wɛnɛ: ‘Wolo wɔnyo wongoyala má ntshikala vu la má nyɛnyɛ wɛkamo wɔnyo.’ Ndombooyakala lá mbeto kɛnde ko ndomboshimela ante: “Taata, winá wɔ ngopoke wɔlɔ, okoka mvungɔ etepela wɛnɛ.” Dmitrii ayɛka ndɛna ante mpeyi l’okotshɔ wɔ Yehova, nkfumbo kɛnde kayalaki la nkete djɛ ndɛ, ntshendja la mvulu kɛ ndjintasɛ. Nde atepela ante: “Kɛnɛ kɛ mayale ladjɛ nangha nde ntshikala vu la nkindjɛ ndjilela Ndjambe oloko.” Ntsha opomana l’okakasano wɔ wopo wɔkɔ ɔmɔ, yala l’eshikikelo ente Yehova angokowakela la angokokotshɛ́ djɛ nkfulumeyɛ.

13. Yehova okokande nkamba l’anto wakɔna djɛ ntɛnyɛ ante nde ntawolaka, ko wopo wɔkɔnge?

¹³ Má mbamba kɛ wananyɔ l’ankaana. Yehova angokambake la wananyɔ l’ankaana djɛ ntɛnyɛ ante angosasangake laso. Ndjɔmbɔmba, nde nkoka ntshinda anto ankina djɛ ntoshimela etepela wɛ lokembo winá w’oyalaso la djonyi. Nkaana kɛmɔtshi kelá Asie ɛnaka nsɔsɔlɔ kɛ nkambo djɛsɔ winá wɔ ndayalaka la yɛnyi y’efula. Nde atshutshɛka olemo wɔnde la atataka olando wɔ wolo efula. Manyi womɛnde ananghaka mpekanto kɛmɔtshi k’ekekete edjinge wopapolaka odjito w’ikokolo. Nde atepela ante: “Ntasipisoyɛki lamo akambo wasɔ yankomelaka. Lafɛnyɛki ente mbala imɔtshi lambonangha nkambo djɛ nyɛtshi ko Yehova apɔnkɔpaka lonkina.” Nkaana kɛsɔ awɔndaka Yehova djɛ ndoshikikɛ ante akindjɛ ndɔkɔpa. Yehova ndananghe nkambo djɛsɔ nghope? Nkaana apakisola ante: “Tokokolo t’otshumano wasawolaka la lemi la wanshikikɛka ambɔ Yehova nkɔpaka.” M’ɔkɔngɔ nde alɔmbaka Yehova djɛ ndokotshɛ́. Nde atepela ante: “Ngo lofu lɔkɔ, ndongolaka onkanda me oloyi ɔmɔtshi wɔ wananyɔ l’ankaana y’otshumano. Winá wɔ mawale etepela wɛwɔ wekembɛ, nyɛnaka ente Yehova ambokaka lɔlɔmbɔ lɔmi.” Ɛwo, Yehova ntɛnyɛka mbala la mbala ante nde ntɔkɔpaka má etepela wɛ ngandji wɛ anto ankina.​—Yee. 10:17.

14. Wopo onkina wɔkɔnge Yehova ɔtɛnyɛnde ante nde nsasangaka laso?

¹⁴ Yehova ntɛnyɛka lonkina ante nde nsasangaka laso má nkamba la winaso andjawodji djɛ ntɔpɛyɛ alako winá w’oyalaso la djonyi. Ndjɔmbɔmba, lá ɛtɛndɔ kɛ ntondo, Yehova akambaka la ɔpɔstɔlɔ Poolo djɛ mfunela winande andjawodji enkanda 14. Enkanda wɛsɔ weyalaki l’alako wa wolo efula koko wa ngandji. Ladjikɛnge Yehova ndatshinde Poolo djɛ mfuna alako wa nghɔsɔ? Yehova alekɔ Papa kɛ ngandji la angɔpɛyɛke wana wande ‘wɔkɔpande’ iluku. (Woo. 3:11, 12) Djɛkondeke ntsha tombowa dako mbopikama lá Bible, tokoka ndɔsa ente oyɛwɔ nde ilembetelo yɛnyɛ ngandji kɛ Ndjambe, koko ape ente Ndjambe apatɔkɔpɛ. (Heb. 12:6) Tolembetelo tonkina tɔkɔnge tɛnyɛ ente Yehova ntɔkɔpaka?

TOLEMBETELO TONKINA TƐNYƐ ENTE YEHOVA SASANGAKA LASO

15. Anto wakɔna Yehova ndɔpɛyɛka nyuma kɛnde k’ekina, ko lamo nkambo djɛsɔ okokawɔ ntoshikikɛ?

¹⁵ Yehova mpɛyɛka anto wawolande nyuma kɛnde k’ekina. (Mat. 12:18) Tokoka ndáwopola ente: ‘Lemi langɛnyɛke wekeka amɔtshi wa lowambo lɔ nyuma kɛ Ndjambe lá lowiko lɔmi?’ Ombotateyɛ ndjala la balentshitshi te anto ankina ndeka wopo wɔ ngayalaka lá ntondo kɛ ndjeka djɛ ndjewa Yehova? Lá nsɔsɔlɔ, winá wɔ ngotaleke nyɛnyɛ wekeka wa lowambo lɔ nyuma kɛ Ndjambe, ndeke nghongoleka nyɛna ente Yehova nkawolaka!​—Lenda ipapango: “Lowambo lɔ nyuma nde . . . ”

16. Anto wakɔna Yehova ɔpɛyɛnde odjito wɔ mpoposanyɛ losango lɔ wɔlɔ, ko oyawokɛ ngete mo lá nkambo djɛsɔ? (1 Tesalɔnikɛ 2:4)

¹⁶ Yehova nsasangaka mpɛyɛ anto wawolande odjito wɔ mpoposanyɛ losango lɔ wɔlɔ. (Wala 1 Tesalɔnikɛ 2:4.) Tokolenda wopo wɔ nkaana Jocelyn ndawa wapɔ má mpoposanyɛ anto ankina. Lofu lɔmɔtshi, Jocelyn awetshɔka la lɔlɛmbɔ efula. Nde atepela ante: “Ntayala kaanga la ndambo kɛ wolo la ndáwokaka ente mpalekɔ la ntshina. Koko mayalaka nde yat’ekalo ole ɔsɔ yayalaka nde lofu lɔmi lɔ mpoposanyɛ. Manyi nanghaka lɔlɔmbɔ ko ntshɔka ntopoposanyɛ.” Nkɛsɛ djɛkɔ djɛsɔ Jocelyn apomanaka nya Mary, omoto w’oloko wɔlɔ wawolisá wekelo wɔ Bible. M’ɔkɔngɔ wɔ ngɔndɔ imangha Mary atepelaka ante winá wɔ Jocelyn ndakɔkɔlaka lá lokfuke, ndalɔmbaka nde Ndjambe djɛ ndokotshɛ́. Winá wɔ ndatɔnɔla lá nkambo djɛsɔ, Jocelyn atepelaka ante: “Ndjokaka etengo Yehova ambonshimela ante ‘lemi nsasangaka la wɛ.’” Lá nsɔsɔlɔ, ape onto onkfumɔ ndeke longawola olemo wɔso w’ipoposanyɛ. Koko tokoka ndjala l’eshikikelo ente Yehova nsasangaka winá w’onanghaso la wolo djɛ mpoposanyɛ anto ankina losango lɔ wɔlɔ.

17. Olakanyelo wɔkɔnge ngombowa má etepela wɛ Vicky welendana l’oshinga wɔ mbendo? (Yeembo 5:12)

¹⁷ Yehova nanghaka djɛ anto wawolande mba wapɔ má ntsho djɛ oshinga wɔ mbendo. (1 Ti. 2:5, 6) Iya okokaso nangha mo ntsha tokanela ngo ente Yehova apotawola kaanga oyɛso la djawo l’oshinga wɔ mbendo la sombolongola batisimo? Tovungɔ ente, topakoke ndjilela tokanyi tɔso oloko winá enkfumɔ, koko tokoka ndjilela Yehova. Nde ndɔsaka anto walekɔ́ la djawo lá oshinga wɔ mbendo etengo anto wa sii ole ndalakaka djɛ ndasakola. (Wala Yeembo 5:12; Ɔrɔ. 3:26) Ntɔnɔla lá oshinga wɔ mbendo akotshɛ́ka Vicky. Lofu lɔmɔtshi m’ɔkɔngɔ wɔ nde ntɔnɔla efula lá nkambo dj’oshinga wɔ mbendo, nde atepelaka ante: “Yehova amɔnyɛnyɛ balentshitshi ilá efula. . . . Koko lá nsɔsɔlɔ, moshimelaka nde ente: ‘Ngandji kɛko kepalekɔ ekekete efula djɛ nkoma le lemi. Olambo wɔ Wɔnako wopakoke ndjipa mpekanto yɛmi.’” Má ntɔnɔla lá olambo w’oshinga wɔ mbendo, nde awangaka nyɛna ante Yehova ndɔkɔpaka. Ole iso tɔnghɛna ente Yehova ntɔkɔpaka la nsasangaka laso, ntsha tɔmbɔtɔnɔla l’oshinga wɔ mbendo.

18. Okokaso ndjala l’eshikikelo lá nkambo djɛkɔnge ntsha tombokindjɛ nkɔpa Papa kɛso kɛ l’olongo?

¹⁸ Kaanga okokaso nangha la wolo djɛ nkamba l’alako wa djamba djɛnɛ, tokoka ndjoka winá ɛmɔtshi ente tɔmbɔlɛmba ole tokoka ndáwopola ntsha Yehova nsasangaka laso. Ntsha tomboyawoka nghɔsɔ, tovungɔ ente Yehova nsasangaka ‘l’anto wakindjɛ ndɔkɔpa.’ (Dja. 1:12) Djɛkondeke kindjɛ nsɛmɛla te Yehova la hona topo tonkfumɔ tɔkɛnyɛnde ante nde nsasangaka la wɛ. Tokote winá enkfumɔ lá yimba ente Yehova ‘apalekɔ otale la onto onkfumɔ wɔ l’anteyi kɛso.’​—Ele. 17:27.