Mukanda wa kumpala wa Kuilondena kua Mianda
16 Biabia babafikile na Mushete wa Efile Mukulu a binyibinyi, abo nkuiutuula munda mua kashibo k’epema kabaadi Davide muiukitshine. Akupu, babalambuile milambu ya kushiika kaalo na milambu ya butaale kumpala kua Efile Mukulu a binyibinyi. 2 Pabapuile Davide kulambula milambu ya kushiika kaalo na milambu ya butaale, belele muilo miabi muishina dia Yehowa. 3 Akupu, aye nkuabila bena Isalele boso, bana balume na bana bakashi, muntu oso mukate wi kishengu, ka mukate kakitshibue na tukuba tua date na ka mukate kakitshibue na tukuba tua nfinyo tuume. 4 Biabia, batuudile bangi bena Levi buabadia kufuba kumpala kua Mushete wa Yehowa, bua kumupa kinemo, kumutumbula na kutumbisha Yehowa Efile Mukulu a Isalele. 5 Asafe baadi mukata aabo, Zekariya baadi mumulondele, Yeyele, Shemiramote, Yekiele, Matitiya, Eliabe, Benaya, Obede-edome na Yeyele babaadi abayimbi na biombuanga bia mioshi na nseese. Asafe namu baadi ayimbi na sembale. 6 Benaya na Yahaziyele ba tshite muakuidi, babaadi abatungunuka na kuela mpungi kumpala kua mushete wa kilombeno wa Efile Mukulu a binyibinyi.
7 Mu diadia efuku, nyi mubaadi Davide bua musango wa kumpala mufunde loono bua kutumbula Yehowa. Na aye nkuilupa Asafe na bakuabo, bayimba’shi:
8 Tumbulayi Yehowa, itanyinayi eshina diaye,
Nuukishe bikitshino biaye munkatshi mua miilo!
9 Muyimbileyi, muyimbileyi ngono ya kumutumbisha nayo,
Nangushenayi pabitale midimo yaye yoso ya kukaanya.
10 Etumbisheyi pabitale eshina diaye dia kishila,
Mashimba a boso abakimbi Yehowa ekale na muloo.
11 Kimbayi Yehowa, na bukome buaye.
Nukimbe mpala yaye mafuku ooso.
12 Tentekieshayi midimo yaye ya kukaanya yadi mukite,
Bilengieleshi na biimu biadi mutshibe,
13 Anue bana* ba Isalele mufubi aaye,
Na anue bana ba Yakobo babaadi musangule.
14 Aye mmuikale Yehowa Efile Mukulu eetu.
Biimu biaye mbitale bantu boso ba pa nsenga.
15 Tentekieshayi kilombeno kiaye bua loso,
Tanulubanga mulayilo ubaadi mukite, mpa na ku bipungo kinunu bia bantu.
16 Kilombeno kibaadi mukite na Abalahama,
Na mutshipo ubaadi muitshipe kui Isaake,
17 Baadi mushinkamishe wawa mutshipo bu muiya kui Yakobo
Na bu kilombeno kia loso kui Isalele,
18 P’aye kuamba’shi: ‘Nakakupa nsenga ya Kanaana,
Ayikala bu bobe bupianyi.’
19 Bino bibakitshikile pabanudi bapeela,
Eyendo, nubaadi bapeela ngofu, na nubaadi benyi muiumbo.
20 Babaadi abende ku kisamba na kisamba,
Abakatuka ku bungi bufumu abende kui ungi muilo.
21 Tabaadi mutadiile muntu su ngumune bua’shi ebakiengieshe,
Anka baadi munyokie ba nfumu pa muanda wabo,
22 Aye nkuamba’shi: ‘Tanukumanga bedibue muimu bande,
Na tanukitshinanga batemuki bande bi bubi.’
23 Imbilayi Yehowa anue boso bashale pa nsenga!
Ukishayi kipandilo kiaye efuku dioso!
24 Ukishayi ntumbo yaye munkatshi mua bisamba,
Na midimo yaye ya kukaanya munkatshi mua miilo yoso.
25 Muanda Yehowa mmukata na mmukumbene ntumbo ibungi.
Nga kutshina ngofu kukila bangi b’efile boso.
26 Bangi b’efile boso ba miilo mb’efile ba bisumanga,
Anka Yehowa nyi bapangile eyilu.
27 Kinemo na ntumbo bi kumpala kuaye;
Bukome na muloo bi mu mbalo yaye ya kushalela.
28 Payi Yehowa kiakia kimulombene, anue bifuko bioso bia pa nsenga,
Payi Yehowa kiakia kimulombene bua ntumbo na bukome buaye.
29 Payi Yehowa ntumbo ilombene eshina diaye;
Fikayi na kia buntu na nutuele kumpala kuaye.
Inamayi kumpala kua* Yehowa bafuale bilamba bia kishila.
30 Susayi kumpala kuaye, anue boso bantu ba pa nsenga!
Nsenga nginyingishibue pe poo; ta ngilombene kusanyishibua.
31 Eyilu disankie, na nsenga ikale na muloo;
Ukishayi munkatshi mua bisamba’shi: ‘Yehowa bafiki Nfumu!’
32 Kalunga kakungule na bioso biule muanka.
Mapia na bintu bioso bi muanka bikale na muloo.
33 Mitshi ya mu mitamba yele namu misaase ya muloo kumpala kua Yehowa,
Muanda kuete kufika* bua kutshibila nsenga kiimu.
34 Tumbulayi Yehowa muanda e buwa.
Kifulo kiaye kia lulamato ki kuanka bua loso.
35 Nuakule’shi: ‘Etupashe, Ô Efile Mukulu a kipandilo kietu!
Etubungie na wetupaashe ku maasa kua miilo,
Bua’shi tutumbishe eshina diobe dia kishila,
Na tukusaamune na muloo.
36 Yehowa Efile Mukulu a Isalele atumbishibue
Bua ikalayika.*
Na muilo oso ubambile’shi, “Amene!”* Na abo nkutumbisha Yehowa.
37 Akupu Davide balekiele Asafe na bakuabo paapa kumpala kua mushete wa kilombeno wa Yehowa, bua kufuba mafuku oso kumpala kua Mushete, muyile kiubishi kia kuifuku n’efuku. 38 Batuudile dingi Obede-edome na bakuabo babaadi 68, na Obede-edome, muana a Yedutune na Osa bua kulama ku kiibi. 39 Balekiele tshite muakuidi Zadoke na bangi ba tshite muakuidi kumpala kua tabernakele a Yehowa, mu mbalo i kunundu ku Gibeone, 40 bua kulambula Yehowa milambu ya kushiika kaalo nsaa yoso, ku kilambuilo kia milambu ya kushiika kaalo, ku namashika na ku kiolua, na bua kukita bioso bibaadi bifundibue mu Miiya ya Yehowa ibaadi mupe Isalele. 41 Emane na Yedutune babaadi nabo, na bangi bana balume babaabadi basangule muyile mashina aabo bua kutumbula Yehowa, muanda “kifulo kiaye kia lulamato ki kuanka bua loso.” 42 Emane na Yedutune babaadi abeele mpungi, na kuyimba na sembale, na biombuanga bibaabadi abafubisha bua kutumbisha Efile Mukulu, bana ba Yedutune babaadi abalama ku kiibi. 43 Akupu bantu boso babayile ku mashibo aabo, na Davide bayile mu kuelela ba mu nshibo yaye miabi.