Mukanda wa kumpala wa Kuilondena kua Mianda
18 Kunyima kua mafuku, Davide baadi mutshimune bena Filistine, aye nkuibamuna, na aye nkunyenga bena Filistine kibundi kia Gate na bibundi bikifunyishe. 2 Kunyima Davide baadi mutshimune bena Moabe, na bena Moabe babafikile bena mudimo ba Davide, abo nkubanga kumupa milambu.
3 Davide baadi mutshimune Nfumu Adadezere a ku Soba pepi na Amate, pabaadi Adadezere ende ku musulo wa Efrate bua kutuula bufumu buaye. 4 Davide bakuatshile bantu ba Adadezere abatambushaa nfualasa 7 000, matempu 1 000 na basalayi 20 000 abatambukaa lua ngua. Na Davide nkutshiba mishila ya mu nkonyeno a mikoolo ya nfualasa yoso ibaadi ayikaka matempu, anka aye nkuleka nfualasa 100. 5 Pabaadi bena Siri ba ku Damase bafikie mu kukuasha Adadezere nfumu a ku Soba, Davide bayipayile bena Siri 22 000. 6 Kunyima, Davide batuudile bisaka bia basalayi mu Siri a Damase, na bena Siri babafikile bafubi ba Davide na babaadi abamupa milambu. Yehowa baadi akuasha Davide bua kutshimuna koso kuende. 7 Dingi, Davide batshile ngabo i bishengu ya ôlo ya basalayi ba Adadezere, aye nkuenda nayo ku Yelusalema. 8 Davide batshile biamo bia munyinga bikile bungi mu Tibate na mu Kune bibundi bia Adadezere. Na biabia biamo bia munyinga, Salomone bakitshine Kalunga ka kiamo kia munyinga, musungo wa kiamo kia munyinga na bingi bintu bia kiamo kia munyinga.
9 Pabapushishe Nfumu Towu a ku Amate’shi Davide mmutshimune kiluilo kioso kia Nfumu Adadezere a ku Soba, 10 musango umune Towu batumine muana aaye Adorame kui Nfumu Davide bua’shi amuipushe biadi, na amutumbule bua biadi mulue na Adadezere amutshimuna. Muanda Adadezere baadi alu ngoshi na Towu misango ibungi. Na Towu batumiine Davide bintu bia mishindo yoso bia ôlo, bia arja, na bia kiamo kia munyinga. 11 Nfumu Davide baadi muibiikashe bia kishila bua Yehowa, pamune na kiamo kia arja na ôlo bibaadi muate ku bisamba bioso: Bia mu Edome, bia mu Moabe, bia bena Amone, bia bena Filistine na bia bena Amaleke.
12 Abishai muana a Seruya bayipayile bena Edome 18 000 mu Ebanda dia mungua. 13 Batuudile bisaka bia basalayi mu Edome, na bena Edome boso babafikile bafubi ba Davide. Yehowa baadi akuasha Davide bua kutshimuna koso kuende. 14 Davide baadi mutungunukie na kumunana mu Isalele oso mushima na baadi asambisha muilo waye oso na kululama. 15 Yoabe muana a Seruya baadi mukata a basalayi, Yeoshafate muana a Akilude baadi mufundi a mianda ya nfumu, 16 Zadoke muana a Akitube na Akimeleke muana a Abiatare babaadi ba tshite muakuidi, Shawesha namu baadi mufundi. 17 Benaya muana a Yehoyada baadi mukata a bena Kerete na bena Pelete. Bana balume ba Davide babaadi na miasu ikata balondele nfumu.