Mukanda wa kumpala wa Kuilondena kua Mianda
19 Kunyima, Nakashe nfumu a bena Amone bafuile, na muana aaye nkufika nfumu pa mbalo yaye. 2 Paapa Davide nkuamba’shi: “Nalesha Anune muana a Nakashe kifulo kia lulamato, anka bu bibaadi nshaye mundeshe namu kifulo kia lulamato.” Biabia Davide nkutuma bantu buabadia kumusamba bua lufu lua nshaye. Kadi pabafikile bafubi ba Davide mu nsenga ya bena Amone bua kusamba Anune, 3 bakunkushi ba bena Amone babalunguile Anune’shi: “Omono’shi Davide nkinemo kiapa nshobe, p’aye kutuma bantu buabadia kukusamba su? T’omono’shi batumu bafubi baye bua kukuponesha, kuuka bi kibundi na kuikitalula kalolo, bua kumona bia kufika mu kuikiponesha?” 4 Biabia Anune bakuatshile bafubi ba Davide, aye nkuibakuula miefu, nkutshiba bilamba biabo nyaa na ku matako, akupu aye nkuibabinga. 5 Pababalunguile Davide wawa muanda, batumine bangi bantu musango umune buabadia kufumankana nabo, muanda babaadi bebayishe milongo ngofu. Nfumu Davide nkuibalungula’shi: “Shalayi mu Yeriko mpa nka na apamene miefu yenu, akupu nualukiile.”
6 Kunyima kua mafuku bena Amone babamuene’shi babafiki bu kintu ki butete kui Davide, biabia Anune na bena Amone babatumine bantu na ntalanta 1 000 ya kiamo kia arja ku Mesopotami,* ku Arame-maaka na ku Soba, bua’shi bebatumine matempu na bantu abatambushaa nfualasa. 7 Biabia, babebatumiine matempu 32 000, pamune na nfumu a Maaka na bantu baye. Akupu, babayile batuula kishalelo kiabo kumpala kua kibundi kia Medeba. Bena Amone babebungile pamune mu bibundi biabo, abo nkuenda mu kulua ngoshi.
8 Pabaadi Davide mupushe wawa muanda, batumine Yoabe na kiluilo kioso kishima pamune na bilobo biaye bia ngoshi. 9 Bena Amone babatuukile, abo nkuilonga mu milongo bua kulua ngoshi ku kiibi kia kibundi, na ba nfumu babafikile mu kuibakuasha babaadi pabupenka munkatshi a kipia.
10 Pabamuene Yoabe’shi basalayi ba beshikuanyi bakuete kuenda na kufika kuadi dia kumpala na kunyima, basanguile basalayi abauku kulua ngoshi kalolo ba mu Isalele, aye nkuibatuula mu milongo buabadia kulua ngoshi na bena Siri. 11 Batshile basalayi babashadile, aye nkuibapa mukuabo Abishai bua’shi ebatuule mu milongo buabadia kulua na bena Amone. 12 Akupu Yoabe bambile’shi: “Su bena Siri babankidi bukome, abitungu ofikie ompashe, kadi su bena Amone babakukidi bukome, paapa ami namu nankupaasha. 13 Abitungu tuikale bakankamane na banyingie mashimba bua muilo wetu na bua bibundi bia Efile Mukulu eetu, na Yehowa namu akakitshi kiakia kibuwa ku meso kuaye.”
14 Paapa Yoabe na bantu baye babayile mu kulua na bena Siri, na bena Siri nkusuuka. 15 Pabaadi bena Amone bamone’shi bena Siri babasuuku, babasuukile’nyi mukuabo Abishai, abo nkuenda mu kibundi. Kunyima kua biabia, Yoabe bayile ku Yelusalema.
16 Pabamuene bena Siri’shi bena Isalele babebatshimuna, babatumine bantu bua kuketanyisha bena Siri ba ku nsenga ya Muela,* na Shofake nfumu a kiluilo kia Adadezere nyi baadi ebakunkusha.
17 Pababalunguile Davide uno muanda, babungile bena Isalele boso musango umune, abo nkusabuka Yordane bua kuenda kuabadi, na nkuilonga mu milongo bua kulua nabo. Davide balongiele basalayi baye mu milongo bua kulua ngoshi na bena Siri, na abo nkubanga kulua nabo. 18 Kadi bena Siri babasuukile bena Isalele, Davide nkuipaa bena Siri 7 000 babaadi abatambusha matempu, na basalayi 40 000 abatambukaa lua ngua, na bayipayile Shofake, nfumu a kiluilo kiabo kia ngoshi. 19 Pabaadi bafubi ba Adadezere bamone’shi babebatshimuna kui bena Isalele, babakitshine bukidibukidi kipuano kia butaale na Davide, abo nkubanga kumufubila. Bena Siri tababaadi abakumiina dingi kukuasha bena Amone.