Yobo
5 “Itanyina namu! Kui muntu mulombene nkualula?
Muikeyilu kinyi e selele odi mulombene kuitanyina bua nkukuasha?
2 Kuilaminyishena mianda munda akuipaa muntu shi na binangu,
Na luabi aluipaa muntu sha binangu bipeela.
3 Ne mumone muntu shi na binangu amene mishi,
Anka mususa umune kishalelo kiaye nkuedibua mulua.
4 Bana baye tabemukukaluilua,
Na abebaashina ku kibelo kia kibundi, kushi muntu akuibapaasha.
5 Sha nsala adiyaa kiakia kiadi muumbule,
Ekiataa mpa na munkatshi mua milobo,
Na bintu biabo mbikuatshikie mu muteo.
6 Muanda bintu bibubi tabituukaa mu lufufi,
Na lukalakashi talutuukaa mu nsenga.
7 Muanda muntu mmutandikue bua nkalakashi,
Nka bu ntolontolo ya kaalo ayitoloka.
8 Anka nantekie Efile Mukulu,
Na nalungula Efile Mukulu muanda wande,
9 Kui Yawa akitaa mianda ikata na ishi biakuukibua,
Mianda ya kukaanya ishi bia kubadika.
10 Anokieshaa mpeshi pa nsenga
Na atumaa mema mu mapia.
11 Akaamishaa baba bashadile,
Na akaamishaa yawa mubofule bua kumupaasha.
12 Aluishaa mpango ya bantu basha mayele,
Buashi mufubo wa maasa abo tawendanga kumpala.
13 Akuataa ba sha binangu ku mayele aabo e bubi,
Buashi mpango ya bantu basha mayele tayendanga kumpala.
14 Abafumankana na mufito munkatshi mua efuku,
Na abakunku munkatshi mua midi nka bu’shi mbufuku.
15 Apaashaa ku lupete lua ngoshi alutuuku mukanua muabo,
Apaasha balanda ku maasa a bantu be bukome,
16 Biabia akuikala lukulupilo bua bantu bashadile,
Anka mukanua mua bantu bakutue kululama mubafungibua.
17 Oolo! muloo kui muntu abasaashila kui Efile Mukulu;
Biabia topelanga dinyoka dia Sha Bukome Boso!
18 Afuishaa busungu, anka anya elonda na kilamba;
Atshokola mu bipindibipindi, anka apaasha na maboko aaye.
19 Akakupaasha ku makienga asamombo,
Sunga dia musambobidi tadikakukitshina bi bubi.
20 Mu kipungo kia nsala akakupaasha ku lufu,
Na mu kipungo kia ngoshi akakupaasha ku bukome bua lupete lua ngoshi.
21 Abakakukaluila ku lufimbo lua ludimi,
Na apafiki kabutu tokekatshinyi.
22 Okasepe kabutu na nsala,
Na tokatshinyi nyema ya mu kisuku ya pa nsenga.
23 Muanda mabue a mu kisuku taakakukitshina bi bubi,*
Na nyema ya mu kisuku ayikekala nobe mu butaale.
24 Okauku’shi kashibo kobe k’epema nkalamibue,*
Na takui kintu sunga nkimune akikakutshikua nsaa yotaluula mbalo yobe yakudishila nyema.
25 Okekala na bana be bungi,
Na bekulu bobe, abakafuimi nka bu lubishi lua pa nsenga.
26 Okekala nka na bukome p’okende mu mashama,
Nka bu bisaasa bia ntete ya blé bibungie pamune mu kipungo kiabio.
27 Tala! Tuibebitaluule, na bi nka biabia.
Teemesha na webikumiine.”