Yobo
6 Akupu Yobo baluluile’shi:
2 “Su babaadia kupima penda bushito bua kinyongua kiande
Na kuikituula pa kipimo pamune na dikienga diande!
3 Muanda binobino, tabidi bushito kukila lusenga lua ku tulunga tua mema.
Nyi buakinyi mayi ande taadi bu mayi a buakulakule.*
4 Muanda mikietue ya Sha Bukome Boso ngintubule,
Na kikudi kiande kikuete kutoma lulengo luayo;
Mianda ayikuatshisha moo ngiele mulongo bua kunduisha.
5 Mpunda a kisuku e kudila p’adi na lubishi su,
Sunga ngombe mulume e kudila p’adi na biakudia su?
6 Bidibua bitaale mbilombene kudiibua kushi mungua su,
Sunga mema a ngimove* ngalombene kuikala muenyi su?
7 Ne* mupele kukuma bintu bi biabia.
Bi nka bu bintu biluile bi mu bidibua biande.
8 Ô su luteko luande lubadia kupeta lualulo
Na Efile Mukulu ampa kiandi nakio lukalo!
9 Su Efile Mukulu badia kukumiina sunga nkusoosa,
Na aola mboko yaye angipaa!
10 Sunga biabia bibaadia kunyingisha;
Nadia kuitumba bua muloo sunga nekala na mitanyo isha ipu,
Muanda ntshimupele mayi a A Kishila.
11 Ne na bukome bua kutungunuka na kutengiela su?
Na nfundiilo ande akekala naminyi buashi tungunukie na kuikala na muwa?*
12 Bukome buande bui bu bua ebue su?
Su mbidi yande ngikitshibue na kiamo kia munyinga?*
13 Kui mushindo wandi mulombene kuikuasha
Aku bangate bintu biande bioso bia kuikuasha nabio?
14 Muntu oso asumina mukuabo kifulo kia lulamato
Akalekie kutshina Sha Bukome Boso.
15 Bakuetu babaadi bantu bashi ba kukulupila nka bu muela mu kipungo kia mashika,
Nka bu mema a miela ya mu kipungo kia mashika ayikama.
16 Mbeyifiitshishe kui mabue a mashika,
Na muanka mmufuame neje ayisunguluka.
17 Anka apalombana kipungo ayikama na ayishimina;
Apafiki kibobo, ayikama.
18 Mbakuumbe mashinda aayo;
Ayalaala mu kabaaka na ayishimina.
19 Bisaka bia ba nsunga bia ku Tema abiyikimbi;
Bena nyendo abafiki ku Seba* abeyitengiela.
20 Buufu bubebakuata pa muanda wa kukulupila kuabo mu bisumanga;
Babafiki kuakua penda bua kukuatshishua buufu.
21 Muanda bino nyi bibanuikala kuandi;
Nui bamone moo wibukopo wa dikienga diande, na nubatshinyi.
22 Ne muakule’shi: ‘Mpeyi kintu kampanda,’
Sunga kuinuteka bua’shi numpe kia buntu mu bupeta buenu su?
23 Ne muinutekie bua’shi nunkaluile ku maasa a muishikuanyi
Sunga nkumpaasha* kui bantu abakiengieshenaa?
24 Ndongiesheyi, na nashala mumiine;
Nkuasheyi buandia kuuka kilubilo kiande.
25 Mayi a binyibinyi ta atapaa kuishimba!
Anka kusaashila kuenu kuina bukuashi kinyi?
26 Nubepushena bua kutopeka mayi ande,
Mayi a muntu mufudiile, abapapula kui lupunga su?
27 Nui bia kuta bubale bua muana a nshiye
Na kuudisha* kuuku eenu!
28 Biabia eyaluleeyi nuntale,
Muanda tshi bia kudimba kumpala kuenu.
29 Elayi dingi binangu, tanundimbilanga namu mianda—
Oolo, elayi dingi binangu, muanda mpa na binobino nki nka muntu mululame.
30 Ludimi luande ndulombene kuakula mianda ishi ilulame su?
Mukanua muande ta mulombene kushinguula muanda wibubi su?